Lalthangliana Hnamte chanchin leh a hla phuah dan – Lalrammuana Sailo

(Chibai le. Kan website a kan thu post te hmun danga min copy sak lo turin kan ngen a che. Link share mai ni se.)

Lalthangliana Hnamte chanchin tawi:

“Ṭhal khaw romei zing riai karah,
A lang e chhailai di lenna;
Eng tak han dawn ang maw?
Min vei hian ka ring ṭhin.

Murvate thlawkin leng la,
Romei zing riai karah,
Chhailai di lenna run saw va bel ta la,
Han hlan ang che, ka hmangaihna.”

Lalthangliana Hnamte hi Pu H.Hrangkaia (1917-1997) leh Pi C.Chalchani (1919-1990) te inkarah kum 1948 October ni 12-ah Thingsai-ah a lo piang a. A nu Chalchani Chhakchhuak hi  Zosap Missionary Pi Zirtiri ten Thingsai hmeichhe school din tura an tirh chhoh a ni.1946-ah a pasal Hrangkaia Hnamte nen Thingsaiah lutin a pasal hian tingtang a pulut a, chu chu Thingsaia tingtang awm hmasa ber a ni. Thingsaiah hian an unau Zira Hnamte tih loh chu an piang vek a ni.An unau zinga mipa pathum Lalthangliana Hnamte, Zirna Hnamte leh Lalremsanga Hnamte te chu hla lar tak tak phuahtute an ni hlawm.An naute dang pawh hla tha tak tak phuah nei vek an ni. Chhungkaw nu ber chu 1951-ah a hnathawhna avangin Darzoah Mission School-a Matron turin sawn a ni a. Hetah hian a chhang hla phuah thiam leh zai thiam lar Zira Hnamte chu a piang a. Zira Hnamte hi a hming diktak chu Zirkunga a ni. 1952-ah South  Lungleng Mission School-ah a nu chu an sawn leh a, tah chuan kum khat an awm a. 1952ah Mission Sikul chu District Council-in a lak tak avangin Lungleng aṭang chuan Thingsai-ah a nu chu Governmemnt Middle School-ah zirtirtu hna thawkin a kir leh ta a.

Lalthangliana Hnamte hi Thingsai-ah hian Primary leh Middle a zir zo a. High School chu 1964-ah St. Pauls-ah a zir a, rambuai a lo thlen tak avangin pawl kua an nih lai 1966-ah an zir zawm thei ta lo a. Thingsai-ah a haw chho a,hlo te a thlo ve nawk nawk a. A pa Pu Hrangkaia chu pa rilru nei tak mai a lo ni a. A pa chuan hlo thlo ringawta awm zawng tiin lehkha zir leh turin a u Lalremsanga nen a ti a. Anni chuan an lo chak hle mai a. Tichuan 1967-ah Shillong-ah Lalthangliana leh a u Lalremsanga te chu lehkha zir turin an chhuk thla ta a, 1969-ah St.Anthony’s Highe School atangin Matric a pass ta a ni. College chu St. Edmund’s College ah a zir a.B.Sc hi 1973-ah exam zoin a haw a, mahse Chemistry practical-ah a pass zo lo a. 1973-ah Thingsai High School-ah zirtirtu hna a thawk a. 1974 kum tawpah Thingsai aṭangin B.Sc chu exam leh dil turin St. Edmunds College-ah chuan a zuk chhuk leh ta a.

Hetia exam dil tura a kal hi St. Edmunds Principal chuan a lo phal lo hle mai a. A han dil luih ngial hnu chuan Principal chuan amah nek luih tum niin a ngai ni maw,a rem ti bar lo mai a. Thangtea chuan, “Ka pu, ka dinhmun a tleu lutuk a, class ka rawn kal thei lo. Exam ringawt mi phalsak rawh,” tia khawngaih a han dil pawh chuan Principal chuan a lu a thing nasa hle mai a, a thin a rim em em a. “Chutiang kan danah a awm lo,” a ti a. Thangtea chuan “Ka pu tihngaihna a awm lo. Class ka rawn kal thei lo. Kan dinhmun a tleu lutuk. Exam ringawt mi phalsak rawh. Ka pass tho ang,” a ti a. Principal chu a thin a rim ta a. A seat aṭanga thoin Lalthangliana tukhumah chuan a nawr a, pawn thlengin a nawr chhuak a, a ṭhutna lamah chuan a luhsan ta a.

Mahse Thangtea exam duh lutuk mangang chuan tihngaihna dang hre hek lo, Principal hnungah chuan a zui zawm leh nghal zat a. Principal-in a seat-a a ṭhut rual chiahin a hmaa a dinna ngaiah khan a ding leh a. A tumruhna leh exam a duhzia a hmuhin Principal rilru chu a hneh ta a ni ang chu, a hmaa ding Thangtea chu dam taka enin “Eng chu nge i duh sawi leh rawh?” a ti ta a. A dinhmun chhiatzia leh thla hnih thla thum chhung lek class kal tur pawhin an chhungkaw dinhmunin a tlin loh dante sawiin, exam ringawt phalsak turin a ngen nawn leh a. Tichuan Principal chuan a duhna chu a phalsak bakah Practical a pass ve theih dan tur thlengin ruahmanna a siampui ta a ni. B.Sc chu 1975-ah chuan a pass ta a. Chumi hnu chuan Thingsai High School-ah a nghetin a thawk hlen ta a.

Hetia Shillong-a lehkha an zirlai aṭanga tawh hian zai lamah a inhmang chho tawh a, hla lar tak tak te pawh a phuah ve tawh a. Kum 1975-ah piantharna a chang a, a thlarau chan chu a kal natpui hle a, a awmna Baptish Kohhran pawh chhuahsanin ‘Rinna Kohhran’ a zawm a. Pathian rawngbawla hun hman a duh avangin 1985-ah zirtirtu hna chu a bansan a. Lunglei-ah Rinna Kohhran-ah General Secretary hna chelhin Ofice a luah a. 1990 September-ah Baptist Kohhran-ah a kir leh ta a, Baptist Kohhran chuan a Pastor nihna zawng zawng pawmin an lo kuangkuah a. 1991-ah Serampore College-ah BD a zir ṭha leh a. 1994-ah a zir zo a. Lawngtlai bialah dah a ni a, 1999-ah Serchhip bialah dah a ni a, 2001-ah Lawngtlai-ah Executive Secretary hna a thawk leh a, term hnih chhung a thawk a. Kum 2007-ah BCM Headquarter Serkawn-ah, Christian Education Director hna a chelh a, 2010-ah Pastoral Coordinator hna a chelh a, 2013-ah a pension ta a ni. Hetia a hna aṭanga a pension hnu hian kum 2015-a BCM Assemneihah chuan BCM President Elect atan thlan tlin a nihleh tak avangin 2016-ah chuan President hna a chelh a, 2017 ah a chhuak hlen ta a ni. Hetia pension-a a chhuah hnu hian Lunglei Zotlang-ah a awmna tur in a sa chawp a, tahchuan chhungkua an inbengbel ta a ni.

Rawngbawlna lama a luh hnu, Pastor hna a thawh hnu hi chuan hla a phuah ta meuh lo a. Hla phuah lama a kal lai hian Thingsai khaw chhuak ve tho Lalsangzuali Sailo te, F.Lalthanliana te nen an inchhem alh chho tawn bawk nen, hla lar tak tak a nei nual a. A hla phuah hnuhnung ber hi kum 1986 niin a hria a. Pathian hla hi a vaiin 56 vel a siam a, Lengzem leh lenglawng huangah hian hla 10 vel lar zual a nei a. A vaiin hla hi 80 bawr vel chu a nei turah ngaih a ni.

1964-66 ah St. Pauls-a a kal laiin thla hnih vel pawl kua a zir hman tihah Rambuai-in a nan avangin lehkha an zir zawm thei lo a, a hunlaia tlangval tam tak ang bawkin volunteer-ah a tel ve a. March ni 5, Jet Fighter-in Aizawl a bomb ni chuan Tuikhuahtlang-ah Sikulpui hmunah volunteer mi 400 vel an awm khawm a. Chuta tang chuan, East Pakistan-ah an chhuk ve zuai a. Chumi hnuah Thingsai-ah a haw chho ta a. Thingsaiah chuan MNF-ah Company Clerk nihna an pe a, chutih hunlaia an dinhmun leh MNF an hmuh dan chu heti hian a sawi a: “Khatih lai kha chuan, mipa tleirawl tawh phawt, mipa zawng zawng chu kan MNF a ni mai. MNF nih loh chu a zahthlak. Mipa fa, tlangval, tleirawl nih ve tawh si chuan MNF nih loh kha chu zahthlak khawp a nia. Kan ngaihsan bakah mi a hneh a. Independent tura kan inngaih avangin”. 1966 kum chu a chang leh hlo a thlo a, a chang leh MNF lamah a inhmang a. 1967 January thla tir te,kumthar hman zawh hlimah apa chuan “Hetia in awm ringawt chuan a dik thei lo e. Lehkha in zir duh em? Shillong-ah kal ta che u,” a ti a. A u Lalremsanga Hnamte nen chuan an lo chak nasa mai a, tichuan miin kum thar an la hman laiin sipai convoy zuiin Shillong an pan ta a.

Lalthangliana Hnamte hian 1966 vel Thingsaia an awm laiin hla pakhat chu  a phuah tawh a. Chutih hun lai chuan All India Radio, Gauwahati an ngaithla ṭhin a. Chung hun laia zaithiam lar ho chu Vanhlupuii te, Siampuii Sailo te an ni a, an ngaisang em em ṭhin a. Tin, midang Lalhmingliana leh Zosangliana te pawh an zai bawk a. An ngaisang em em ṭhin a. Aizawl a awm tirh lam 1964 leh 1965 velah chuan Aizawl-ah Beatles band ho an lar chho viau a, Theatre hall vel-a show The Propellers leh Ricky Lalrinliana tih teho chuan Beatles hla an sa tam a,an ngaisang em em ṭhin a. Chutiang chuanmi zai ngaithlain leh tuipuiin hun an hmang chho a. Thingsai lamah te pawh khawlaiah te zaiin Beatles hla te an kurpui ve em em a. A thu dik mang hlei lo a sak, nuihzathlak tak tak pawh an lo ngah viau tih tun hnu hian an hre chhuak ṭhin. Zan thla eng hnuaiah Thingsai khaw dung fangin ṭingṭang akin an zai a, nula an rim bawk a, veng lehlam aṭanga zaia khaw lai rawn fang an awm bawk a, zai leh zai hi an inchhawnin an inpel sup sup a ni ber mai. Chutianga zai leh hla tuipuia hun an hman lai chuan mahnia phuah ve chakna a neih tir ṭhin bawk a.

Shillong-a lehkha zir tura an chhuk thla chu kum 1967-ah Don-bosco, St. Anthony’s High School-ah a u Lalremsanga Hnamte nen an lut a, an pahnih chuan pawl thuhmun, pawl kua an zir a. Chutia unaua pawl kua an han ni chu a u Lalremsanga chu a tlawmngai viau mai a, chuvangin thla hnih thum vel chauh St. Anthony’s ah a kal hman tihah Alu Kudam hmun lama Mizo High School, zan school lamah chuan Lalremsanga chuan pawl sawm a han zawm ta a ni.Shillong-ah chuan a u nen in luah an ni a,a u Lalremsanga chu mi kawlhrawng leh inhaiveng chi tak, ngaihtuahna seng mi a ni a. Ani chuan All India Radio-ah ‘Lalremsanga leh a pawlte’ tiin voice test a lo va dil a,an rawn ko ta a. Tichuan, Lalremsanga hoin amah Lalthangliana leh an thianpa Zosangliana Chhangte, Pu Kela fapa tuna Mission Veng, Aizawl a awm ta nen chuan an pathumin voice test nei tur chuan an inbuatsaih ta a.

Radio-ah chuan tlin ngei tumin nasa takin ngaihtuahna an seng ve a. Mi hla neih sa ringawt an sak chuan tlin loh palh awm theiin an hria a. Tichuan, hla an mamawhna chuan hla  a hring chhuak a, ‘100 miles’ tih hla thluk then lai la-in Lalthangliana chuan, ‘Hmangaihna’ tih hla chu a han phuah ve ta tawp mai a,tichuan  chu hla thar chu an zir zui ta a. An uluk bawk a, an tling chiang khawp mai. Hetia hla an record tum hian an zai dan chu Beatles ho zai dan ang deuh a ni a. Beatles ho chuan aw chi thumin hla sak ang ching a; a air an awm a, tenor an awm a, alto an awm bawk a, alto ho chuan alto hniamin an sa ṭhin a. Chu chu Lalthangliana chuan nalh a tiin a ngaisang em em a. Aizawl velah chuan group ho reng rengin hla an sak chuan alto hi mipa ni si hmeichhe aw ki sang angin an sa vek a. Anni chuan midangte tih loh angin tiin Lalthangliana chuan alto hniamin a sa a, Lalremsanga’n air a chang a, Zosanglianan tenor a chang bawk a. Radio-a an hla thun thar, “Hmangaihna” tih chu  kar loah mite hriat a hlawh thuai a, Mizoram pumah ‘Lalremsanga leh a pawlte’ tih chu thlan zin ber pawlah a invawrh chho a, chu chu 1967, 1968, 1969 chhoah a lar zual a ni. Chung hun lai 1967 an zai a lar chhoh ṭan tirh chuan Lalthangliana chu kum 19 a ni ve tawh a.

Tun hma lamah chuan Radio-a hla an thun dawn hian voice an test zawh a record tak tak an tih hian minute sawm panga te hunan pe ṭhin a, chu chu hman zawh tur a ni a. Radio-ah hi chuan hla sei lutuk hi chu a hneawm hma a, chuvangin hla pakhat hi minute thum aia rei lo ni ta se, minute hnih pawh hi a tawk viau, minute li hi chu a rei deuh mah mah ṭhin tih vel a nih avang khan hla phuahtute reng rengin hla sei zawng vawn a ngai ṭhin a ni. Chutih lai chuan han chei mawi leh han sawngbawl tam kha a awm lo a, hmuh nawm tura en theih tur chi a la ni bawk si lo a.

Lalremsanga leh a pawlte pawh chuan hla thun tur leh an hun neih ang hmang zo tur chuan hla panga vel an mamawh a, ‘Hmangaihna’ tih hla bakah, ‘Nunhlui’ tih hla a phuah leh ta a, tichuan Thingsai an awm laia an thian Pahlira phuah ‘Japan ral lian’ behchhan hla te nen, a dang pahnih nen Radio-ah chuan an thun ta a. Chung an hla record panga zingah pawh chuan lar bik a awm leh ta zel a.  Hla reng reng mi pakhat phuah pawh a duh reng vang ni lo, rawn lar bik tlat a awm ṭhin a. Chutiang deuh chuan ‘Hmangaihna’ tih leh ‘Nun hlui’ tih chu  a lar zui ta viau a, a lar rei bawk a. Rambuai laia Thingsai-a awm vai Captain Pu Deya an tih pawhin a thiam vek an ti ṭhin.

Rambuai lai chuan Mizoram-ah sipai che rawva tak tak an tam avangin vai huatna  nasa a, Thangtea pawh hian Sikh ho diar vet te phei hi chu a ngeiin a ngei ngawih ngawih ringawt a, Jaat Regiment sual lutuk leh rawng lutuk vang kha a ni pakhat ang. Sikh ho chu an hua a. Haw viau e ti lo chuan an hlau tel bawk a. Rambuai kha chuan thinlung chhungrilah hian hlauhna a siam tam a; vaiho hlauhna bakah armed force lam chi hrim hrim hlauhna hi Mizoin kan neih tam phah deuh niin a hria a ni.

Ṭum khat chu Shillong-a Wards Lake-ah an lawngleng chu chesualin tuiah an tla chiam mai a. Thangtea chu a inhai buai viau a, a pil ta mai a, mahse a u Lalremsanga chu a lo fng hlauh a, lawng inkhaikhup chu man beh nachang a hria a. Thangtea chu a dap fuh a, a khai chhuak ve ta a. An ṭhian pakhat F. Lawmkima chu tui a hleuh thiam avangin amahin a hleuh chhuak a. Anni unau pawh chu lawngah chuan an inham tang hram hram thei a. An ṭhian pakhat F. Rochhunga, Lunglei Chanmari-a khawsa ta chu a pil ta vang vang mai a. Pawn lam aṭang chuan hnam dang ho chuan an lo au luai luai a, an zingah chuan mingo, sap te pawh an awm; tihngaihna an hre chuang si lo a. A tawpah chuan Wards lake a pangpar huan hungna mau tlawn pakhat chu an pawt phawi a, an hawlh an hawlh ta a. An chetsualna chu thawktute awmna hnai vai tawh, Lawng dahna in aṭang chuan mau tlawn chuan an zuk hawlh an zuk hawlh a. Chu chu a lo man fuh ta a, an la chhuak ta a ni. A hnua chanchin a sawi leh chuan F. Rochunga chuan mau chu a man tih pawh a inhre chuang lo, an lak chhuah lai chuan ni khua a hre lo reng reng a. Tichuan an bawihsawm a, tui te an nem chhuak a, engmah a la hre chuang lo a. Wards Lake hrula sipai motor tlan lai chu an au ding ta tawp a. A lo ding a, an zawn phei a, Civil Hospital-ah an phur phei ta a, sipai ho chuan thu hnutchhiah thlapin an bawihsawm a. Chumi ṭuma Lalthangliana te ṭhianho buaipuitu sipai hote chu Sikh ho hlir an ni a. An fel ropui si a, an gentleman em em mai a. Chuta ṭang chuan a Sikh ho huatna pawh a reh vek a, Sikh ho chu hnam pui tak niin a ngai hlen ta zawk a. Chu chuan kan thil tawn avanga hnam dang kan en dan pawh a danglam ve zel theih dan a entir ṭha hlein a hriat.

Kum 1967 October thla a ni a. Zan khat chu a u nena an in luah Deilang Cottage, Nongthymai-ah  chuan SP hoin police an rawn lut thut mai a. Anni chuan “Eng nge in duh ka pu”, an han ti a.  Police ho chuan a tirah chuan an chhang tha duh mai lo a, “A… lunghlu kan zawng” te an han ti mai mai a. A hnuah chuan in album (thlalak dah khawmna) in neih zawng zawng kan lo en ang e,”an ti ta a. Anni unau chu thlalak uar mi tak an lo ni a, an album an han pek chuan a tam tham lutuk avangin an en seng lo a, a vaiin album chu an la vek a, Lalremsanga hnenah chuan“Min zui rawh” an ti a. An man chu a ni ta reng mai a.

An man chhan chu thlalak aṭangin a ni a. MNF Volunteer a zawm laia vai sipai an ambush zawh a an thlalak, rife leh MNF thuam nena a ṭhianpa Robuanga nena an thlalak chu, Robuanga an man aṭangin sipaiin an rawn chhui zawm zel hi a lo ni a. Chu Robuanga thlalak ang chu Lalremsanga chuan a kawl ve lo na a, “Hei hi han en teh, nangmah i ni em?” an ti a. Phat rual a ni si lo a. Lalremsanga chuan, “Keini te chu student, lehkha zir thei lo haw mai kan ni a. Kan khuaah volunteer an lo kal a, kan ngaisang si a. An form kan dil a, an rife kan keng a, thla kan lakpui a nih kha,” te a han ti ve tak na a. “A rei lo ang, min zui la” an ti ta a. Tichuan a u Lalremsanga chu an man ta a.

Lalthangliana chuan a u Jail-a tang chu kar khat chhung vel chu Shillong Jail-ah tlai tin a zuk tlawk ṭhin a, amah a hmu theih si lo a. A ei tur biscuit te a kensak a, Jail-a thawkte chuan an la zel a. Mahse a hnua an han hriat leh chuan Lalremsanga chu ni hnih bak Jail-ah chuan awm loin Nowgong Jail lamah an lo dah daih chu niin. A thil ei tur kan kensak te pawh chu a thawkten an lo la riral vel mai mai a lo ni a. a u chu Nowgong-ah chuan kum hnih lai a tang a, hei hian zai lama an hun hman pawh a tibuai pha ta a ni. Nowgong atang hian a u Lalremsanga hian Matric II Div-ah a pass a ni.

Kum thar kum 1968 a lo inher chhuak a, Radio aṭang chuan ‘Lalremsanga leh a pawlte’ tiin kohna chu an dawng leh ta a. Tichuan Radio-a record tur chuan hla an zawngin a then an phuah bawk a. Radio-a mi la sak ngai loh an zawng khawm a, Aizawl lama mite sak lar sa leh thun luh sa ang chu an sa duh loin a hran an ngaihtuah tlat thin a. Chu chu tifuh hle pawhin an inhria a ni. Hei hi a chhan chu hla lo sa hmasatute nen khaikhin theih tura an awm loh vang a ni a, mahni style ngat-a lo chawr chhuak angin miten an hriat hma theih phah a ni.

Kohna an hmuh angin Shillong Radio station a hla thun tur chuanan inbuatsaih ta a. Lalthangliana leh a thiante pathum Zosangliana Murray leh Lalsangliana, Rev. Sawiluaia fapa leh Lalchhawnsanga te nen chuan hla zir hoin Radio-a aw khung tur chuan uluk em emin an inbuatsaih a. Lalthangliana bengah phei chuan Zosangliana leh Lalsangliana te an zai thiam si a, an hla sak chuan a hmaa an lo thun tawh zawng zawngte khum vekin a hria a. Lalsangliana chu Clif Richard-a nen an danglamna a awm lo e, tih tur khawp aw mawi nei a ni a. Zosangliana pawh a ṭul chuan Elvis-a te Tom Jones  te zai dan ang pawhin a zai thei a, Beatles ho zai dan pawhin a zai thiam a. Tichuan uluk em emin hla chu an khung a, chutih laia recording lam khawihtuPu Sena (P.S. Chawngthu) pawh chu an zai vel chuan a tilawm em em mai a.

Tichuan, hla an han khung zo lawmman lam tura Lalthangliana a kal chu Pu Renga Sailo, chutih hunlaiaMizo Programme-a Director chuan ‘Lalremsanga leh a pawlte’ tiin a han ko a, Lalthangliana chu a va kal ta a. Cheque chu sign ta mai lo chuan, “Ka pu Lalremsanga hi ka ni lo a, a nau ka ni a” tiin Lalthangliana chuan ahan sawi a. Pu Renga chu a meng sen ta rum mai a. “Khaw nge ani chu a awm a?” a ti a. Jail a tan thuin a chhang a. Director chu rin loh tak maiin a thin a rim ta em em mai a.Lalthangliana chu hmaisen hmuhin, “Ka mantir dawn che emaw ni le, ka tantir dawn che emaw ni le…” a ti ta hrep mai a. Lalthangliana chuan chutiang zawngin thil a lo ngaihtuah si lo a, a hrilhhai em em mai a. Tichuan Pu Renga chuan thinrimin an hla record sa chu a cancel ta vek a, P.S. Chawngthu pawhin a ui hle mai a, mahse Director berin theih loh a ti si a. Chung an hla record te chu hriat zui lohin a awm ta a ni.

Chumi hnuah chuan Lalthangliana chuan ama hmingin ‘Johny Lalthangliana leh a pawlte’ tiin radio-a aw khung chu a dil ve leh ta a. ‘Johny’ tih sap hming chu ṭhianzaho inkohna hming a ni a, Zosangliana chu Murray tiin an ko a, Sangliana chu Derreck an ti a, Chhawnsanga chu Roger-a an ti bawk a. Chutianga inko ṭhianho inkoh famna nei khawpa inkawm chu an ni a. Voice test chu an va nei a, an tling a, phur takin hla pawh an record zui leh a. Mahse a hma ang an phak tawh lo a. A lar zui thui lo.

Solfa hi primary leh middle school –ah an zir avangin mahni duh ang ti ve thei turin an thiam ve a. Sikul-a hla phuah tur-a class work an pek chang chuan a hla thu ni loin a solfa a phuah turin an zirtirtute chuan an ti ṭhin a. Solfa chu zilaiah a tel avangin an thiam ve hle a, an hlawkpui viau bawkin an inhria a. Hla an phuah leh an zir pawhin an awlsam phah a. Lalsangzuali Sailo te nena hla an han zir ho chang pawhi ani Lalsangzuali chuan a chang hi a malin a han sa al al a, a thunawnah part chikimin an zawm ta ṭhin a, mitena n duhin mawi an ti ve thei viau a ni.

Sawi tawh angin Lalsangzuali Sailo te nen khaw khat Thingsai khaw chhuak an ni a,an khuaah chuan Lalsangzuali chu a zai thiam tih pawh an la hre vak lo a. Radio-a a han zai chu miin an lo duh riau a. “A va mak ve” te an ti mai mai a. Mahse an han zai zui tak zelah chuan a zai thiamzia an hrechiang telh telh a ni. Lalthangliana te unau thum Lalremsanga Hnamte, Lalthangliana Hnamte leh Zira Hnamte te chu hla phuah thiam tak tak an nih avangin an unau hla phuahte chu Lalsangzuali chuan sak a hauh vek a,midang an saktir ve chuan a hau hrep zel a. Chutiang khawp chuan an inpawhin an inngaina a, Lalsangzuali zai kawngah pawh an pui fo bawk a.Lalthangliana hla lar ber pakhat ‘Chhailai di lenna’ tih hla ‘Murvate’ tia mi tam takin an hriat zawk pawh hi Lalsangzuali sak lar a ni. Lalthangliana te unau hian chhun tur an nei tha pawh a ni ang, a pa Pu Hrangkaia pawh hi zai ngaina ve tak a ni a. Thingsai khuaa ṭingṭang la lut hmasa ber nia hriat a ni a, kum 1946 khan Thingsai khuaah ṭingṭang a lo hmang tawh a.

CHHAI LAI DI LENNA – A PHUAH DAN

CHHAILAI DI LENNA
Phuahtu – Lalthangliana Hnamte
Sa lartu – Lalsangzuali Sailo

1.Ṭhal khaw romei zing riai karah,
A lang e chhailai di lenna;
Eng tak han dawn ang maw?
Min vei hian ka ring ṭhin.

Thunawn:

Murvate thlawkin leng la,
Romei zing riai karah,
Chhailai di lenna run saw va bel ta la,
Han hlan ang che, ka hmangaihna.

2.Kar a hla e, biahthu hrilh nan.
Kan tiam dun sa kha hre rengin,
Ṭhal khaw dur karah hian,
Thamraltir lo la, kan tiam sa.

2.Chhingkhuala lunglai di neih chu,
Lung dam ni reng ka vai lua e;
Hun tawi te kan hlim ni,
Ka dawn ṭhin a, nang ngaih a zual.

Lalthangliana Hnamte-in ‘Chhailai di lenna’ tih hla a phuah lai hian Lalthangliana te hian an unauin Shillong Auxilium Convent hnung lam hrulah in an luah a. In fal deuh tak a ni a. A kawmchhak ah chuan ek in an nei a; ek in chu a bang pawh awng deuh fer fur mai, fur lai phei chuan a chung pawh far deuh fep fep reng mai hi a ni a. Ṭum khat chu a College bang hi amah chauhin inah a awm a, a unau dangte an la haw lo a.

Daikal turin a kal a. Chutia a ek in chhunga a awm lai chuan vamur rual hi an lo thlawk a, hlim leh thlamuang em emin an rawn hram a, bang awng aṭang chuan chung vamur leh an nungchang te chu a hmu thei vek a. A ngaihtuahna pawh a kal thui hle mai a. Zawlpala leh Tualvungi thawnthua vahui tirh a nih thu te a hrechhuak a. Ani erawh chuan a lunglen thu chu a rang thei ang bera hrilh turin vamur chu a thu hmanhmawh kengtuah ṭha berin a hre ta zawk a. “Vamur chu a thlawk rang ber a”,  tih thu zirlaibuah an lo zir tawhte a hrechhuak bawk a. Chuvangin a biahthu kengtu atan vamur chu tha ber dawnin a hria a, hla thuin ‘Murvate’ tiin palai atan a tir ta zawk a ni.Tun laia contextualisation an tih hi a lo hmang daih tawh a nih chu. “Murvate’ hi record player single dics-ah khung hmasak ber zinga mi a ni.

Tichuan ‘Chhailai di lenna’ tih hla hi a phuah chhuak ta a ni. Hla phuahtu tam takin palai atan vahui an hman ṭhin laiin ani chuan a hmuh leh a rilru luahtu vamur chu ‘murvate’ tia koin palai atan a tir a. Mite duhpui a hlawhin a nung zui viau bawk a, amah pawhin ti fuh hlein a inhria a.Thinlung chhungril aṭanga lo chhuak chuan zawn chawp thu leh hla aiin nunna a nei zawkin a hriat a ni.

LENRUAL HLUI HLA A PHUAH DAN

LENRUAL HLUI
Phuahtu – Lalthangliana Hnamte
Phuah kum – 1973

1.Aw khawnge lenrual hlui zawngte kha,
Hmanah chuan nau ang nui za ṭhinin;
Hlim leh lawmin tlaitla eng hnuaiah,
Duhthuleng tinkim kan sam za ṭhin.

Thunawn:

Mahse khuarei an chang leh si,
Hei hi maw lo ni le lunglen;
Mahriakte’n luaithlipui nul zelin,
Hlimlai ni kha ka ṭahpui ta’ng e.

2.Min hnemtu awm hian ka ring lo ve,
“Khuarei hian min la hnem ve mahna,”
Ti-a ka han dawn chang ni pawh hian,
Lunglen tizualtu mai lo ni e.

3.Aw hlim lai, aw hlim lai, hlim lai ni,
Ṭap ṭapin ka au ding zo si lo;
Lenrual hlui zawngte kha khawiah nge?
Damlai khawvelah tawng leh i maw?

Hle hla a phuah dan ngaihnawm tak chhiar duh tan hetah hian click rawh

Leave a Reply

Your email address will not be published. Required fields are marked *

error: Content is protected !!