Lalpa’n min ko ve – Mizo Sermon

Ṭpa Ngente.

“Buh seng tur a tam hle a, nimahsela a thawktute an tlem; chutichuan a buh seng tura thawktu turte tir turin buh Neitupa hnenah chuan ngen rawh u.” (Luka 10:2)

Isua zirtirte khan buh Neitupa hnenah thawktu tur an dil a, buh Neitupa chuan anmahni tho a tir chhuak a. A awmzia chu, an ṭawngṭai chhannaah anmahni tho ṭangin anmahni an in dil chhuak tihna a nih chu, an nun an hlan vek a nih kha, an va ropui em.

Tunah hian kan velah, kan khua ṭheuhah, kan ṭhenawm khawvengah buh lak tur (chatuan nun la nei lo) an tam hle a, Setana’n chatuan boralna lamah a hnuk liam zut zut reng a, tichuan keini hian Lalpa tan seng khawm hna kan thawk dawn nge midang tir turin kan dil reng mai dawn? Keimah ngei hi thawktu tura kan dil chhuah leh midangten an dil chhuahah ka ṭangin ka inpe ve ngam dawn em le?

Setanan min seng khalh nghauh nghauh lai hian ‘Kan thawk hle bawk alawm maw..’ tiin kohhrana kan chet velnate hi kan mitthla mai dawn em ni? Lalpan thawk hleah min ngai ve ang em?

Thawk hle bawka kan inngaihna hi tehna pakhat hmangin i han teh lawk teh ang: Kohhran hian kan thawh ṭhin pangngai kan thawk reng chung hian kan ram kristianna percentage chu a hniam hret hret zel a, kohhran mi ni ve si kohhran bel ngai lo an pung zel bawk a. Hei hian kan thawk tawk lo emaw, kan thawh dan a dik tawk lo deuh emaw tih a lan tir tih hi kan pawm ngam em? Chuvangin, Krista nun neitua inchhalte chuan kohhrana kan mawhphurhna ṭheuh kan thawh hian thawk hlea inngai mai thei kan la ni lo va, mite hmuhpui phak lovah tih tur kan kova tla tam tak a awm tih hi kan hriat a ngai hle mai.

Heng kohhrana kan mawhphurhnate hi chu ruat kan nih vang te, thlan kan nih vang te, hlawh kan neih vang tea thawk hi a tam ber kan ni a, kan thawh chhan hi Pathian ni lo ‘vang’ dang a awm deuh tlat a. Mi dang pawhin kan dinhmun hi rawn luah ve sela an tih theih ve vek tur dinhmun kha keinin kan lo luah a ni mai a, chuti chung chuan a tam ber chu mawhphurhna tlin mang lo, ti ṭha peih lo, ti ṭawk ṭawk, ṭhahnem ngaihna tak tak nei lo, chanvo erawh chu duh ve tlat si kan la ni zui a. Lalpa tana ṭangkai taka thawk thei turte tan hmun kian lovin kan lo luah tlat si a, Lalpa pawi kan sawi ang tih a hlauhawm hlawm hle mai.

Ṭawngṭai taihmak viau te, inkhawm taihmak viau te, lâm taihmak viaute pawh hi a ṭha, thil ṭha tak a ni. Mahse, heng thilte piaha che chhuak thei lo, midang tih tura dah tlat kan nih chuan Thinlungte bûktu hmaa kan dinhmun chu a ṭha vak lo thei ang.

Thawhlawm pawh thawh tam hle mah ila, a taka Lalpa ram veina tak tak nun nei lo kan nih a, neih chuang liam aṭanga kan pek kan thawhlawmte hi kan aiawh thei tura kan ngai deuh mai a nih chuan, kan thawhlawm hi Lalpan ṭangkai takin a hmang ang a, a thawhtu erawh chuan Lalpaah chan rêng kan nei hauh lo thei tih te hi ngaihtuah thlen a ṭha e.

Eng pawh ni se kohhrana kan mawhphurhnaah ṭhahnem kan ngai viau a ni thei, mahse hei hi a tawk mai lo va, kan Lalpa pawhin tawk a ti mai lo tih hi i pawm ngam ang u. Krista hmangaihna leh ṭhahnem ngaihna chuan tawp chin a nei ve ngai lo va, Krista nun neitu tak tak chuan Krista hmangaihna leh ṭhahnem ngaihna tawp chin nei ve ngai lo chu a nunpui ṭhin.

Kan ṭhahnem ngaihna ten a la thleng tawi viau a, kan chanvo chelh bak a pel hleithei lo a nih chuan Krista nun neitu tak tak kan la ni lo deuh tihna a ni thei ang. Kan thlarau chan tur pawh mahni kan invei a la ngai hle tihna a ni thei ang. Tin, mahni chanvoa ṭhahnem ngaihna tak tak pawh nei peih lo kan nih lek phei chuan inngaihtuah chian kan ngai lehzual hle ang.

Kan velah buh lak tur a tam hle a, nimahsela a thawktute an tlem.

Sorkar hna thawk kan ni emaw, eichawp zawng kan ni emaw, eng ang mi pawh ni ila kan duh zawng tih nan hun âwl nei lo kan awm lo. Mi tam takin an hmangaihte leh an in lum an kalsan laiin riak chhuak lo va Lalpa ram zauh hna thawh tur hi kan vel maiah hian thawh sen loh a awm a, setanan chatuan meipui lamah ni tinin a hnuk liam zut zut reng a, sual sipai râl beia thlarau boral mekte chhanchhuaktu tur, ṭhahnemngai taka thawktu tur, “Kei heta hi ka awm, mi tir ta che,” (Isaia 6:9) ti theitu tak tak ni turin Lalpan ringtu mimal tinte hi min ko ve.

Leave a Reply

Your email address will not be published. Required fields are marked *

error: Content is protected !!