Lalpa tih chu damreina a ni – Rev. VL Nithanga – Sermon

LALPA ȚIH CHU DAM REINA A NI

– Rev VL Nithanga

Lalpa țihna chuan dam chhûng ni a tisei a, nimahsela, mi suaksual kumte chu tihtawi a ni ang (Thuf.10:27).

Mizote hi kan dam rei lo hle mai a. Chawh rualin kum 47 vel chauh dam ang kan ni. Kum 47 chu la vanglai tak a ni a. Mizote hi vanglaiin kan thi tihna tluk a ni. Hei hi a dik leh dik loh finfiah nan hman deuhah khan ka țhian rawngbâwlpuite nen khaw sâwm leh pakhatah, an thlânmualah kan kal a, mitthi thlâna an kum zat zawng zawng kan la khawm a, kan belh a. Chu chu a thi zatin kan sem leh a. A average kan la a. Kan tih chinah chuan kum 41 leh kum 50 inkarah a tla vek a ni. Thlanmual dangah pawh kalin ti ta zel ila, hetiang vel tho hi a nih a rinawm. Chuvângin, Mizote dam chen chawh rual chu kum 47 vel tih hi a dik vel viau ang.

Țhalaite leh kum la naupang lam thi kan tam hle tihna a ni. Țhatlai hun hi kan chak vânglai leh kan hrisel vânglai hun tur a ni a, mahse, thihna hun atân kan hmang tam hle. Naupang chu thuhranah dah ta ila, kan ram țhalai tam zâwk hi chuan Pathian kan țih tak tak lo a ni. Kohhran tinah țhalai member 30% vel chauh hi rawngbawlnaah an active tlãngpui a. 70% vel lai hi active lo an ni. Active lo zinga tam tak chu ruihhlovin a tihbuai an ni a. Nu leh pa zingah pawh 40% vel lai hi chu inkhâwm ngai mang lo an ni. An mahni mai bâkah an fate leh an tûte thlengin inkhâwm lo mi an inthlah chhâwng zui zel a. Chutiang mite zingah ruihhlo tihbuai theihna chance a sãng bik. Kan ramah hian kumtinin Patuai ruihhlo tihchhiat vanga thi an tam viau zel. Nula ruihhlo thihpui lah bo lo, tlangvâl phei chu an tam lehzual. Thihna em la thleng lote pawh nu leh pa, chhûngte rilru tihreawmtu an ni fo. Mizoramah hlêprûk kan țhanlenpui tawh a, ti ve thei lote pawhin hlêpru thei nih kan châk. Hiv/aids ah India ramah kan sang fi lawr hle bawk. Cancer, blood suger, high pertention-ah kan sãng ber bawk. Kan ram hian Pathian kan țih lo em a, natna hlauhawm pawh Lalpan a dah tam bik a ni ang. Chu chu a vanduai ten kan tawng ta mai a ni mahna. 2018 KȚP report-ah kum khat chhûngin member thi 472 an nei a, chûng zinga 429 chu mipa an nih laiin hmeichhia chu 42 chauh. ȚKP report-ah kum khat chhûngin member thi 125 an nei a, chung zinga 111 chu mipa an ni a, hmeichhia chu 14 chauh an ni. Sual kan pawisa lo em em a, sual eichhiat vânga thi țhalai zingah, a bikin mipa zingah a tam hle tihna a ni.

Pathian thu chuan, “Aw ka fapa, ka thu ngâithla la, pawm rawh, tichuan i damchhûng kum a lo tam ang (Thuf.5:10),” a ti a. Mizote hian tun ai hian Pathian hi țih ila, a thu hi ngaithla ila, a thu awih ila kan dam rei zâwk ngei ang. Pathian avânga kan hlêprûk duh loh va, ruihhlo kan tih duh loh va, inngaihna sual kan bansan chuan, heng avânga chhiatna leh thihna chu thui takin kan pumpelh thei ang. Sual kalsana Lalpa țihna tak tak nêna tui taka rawngbâwl zel hi kan tan malsâwmna leh dam reina a ni.

Hetih lai hian mi țha an thi ve tho leh mi țha lo an dam rei ve tho tih chu kan hre țheuh awm e. Mahse, Pathian țihna nei lo, thil sual ti chunga dam reite chuan engemaw tak tluan lohna leh awhawm lohna an nei zel țhin. Pathian thu chuan, “Mi sual chu vawi za pawh thil sual tiin dam rei bawk mah sela, a tluang lo vang. A ni tihsei ni mah sela, hlim thla ang lek a ni ang, Pathian țihna a neih loh avângin (Thur.8:12) a ti a ni.

Leave a Reply

Your email address will not be published. Required fields are marked *