Lalpa koh leh koh loh

Ṭpa Ngente.

Lalpa kohna leh tirhna pawh dawng lem lova mahni duhna leh châkna lama chhuaka rawng bawl te pawh hi a awm ve thei niin a lang. Tin, ‘Ringtu zawng zawng hi rawng bawl tura koh kan ni sa reng alawm, hei bak kohna dang a ngai chuang hleinem,’ tia ba tlata inhriatna leh ti lo thei lova inhriatna avanga engemawti tala rawng bawl tum hrim hrim pawh a awm theih bawk awm e.

Eng pawh nise, eng vang pawha Lalpa rawng bawl hi a ṭhain a ropui em em vek a, a der pawh ni se a bawltuin a hlawkpui loh laiin mi dang tan erawh Lalpan malsawmnaah a chan tir thei a ni. Paula pawhin Filipi 1:18-ah chuan, “Engnge a pawina? Aderin emaw, atakin emaw Krista Thu hrilh a ni ta reng reng a, chu chuan mi tilawm tho ve. A ni, ka lawm zel ang, a tih kha.

Amaherawhchu, ringtu zawng zawngte kohna angkhata min kohna piah lama mi nazawng thawh theih loh, a koh bik leh a buatsaih bikte a tirh ṭhinna angah hian Lalpa’n a tirh ni lova tlân hi a ṭha ang emaw ka hre lo. Tirh lohva rawng bawl chu Lalpa’n a hmangin a tih nun sak kher ang emaw chu le.!

Pathian chuan ringtu zawng zawngte hi a rawng bawl turin min ko vek a, min hmanna leh min hûnna hmun erawh a inchen vek lo va. Chuvangin khawi hmunah nge min hun, engtianga rawng bawl turin nge min koh tih hi ngun taka ngaihtuah a pawimawh hle a ni. Ringtu tam ber chu kohna thuhmun, mahni awmhmun aṭanga kan tih theih tawk ṭheuh mawhphurhna pekin kan awm a. Chutiangin kan awmhmun ṭheuh aṭanga kan phak tawka a rawng kan bawl theihna tur kawng min hawn sak vek bawk a. He kohna hi kohna vantlang (general calling) a ni a, sawi nêp tur a ni chuang lo. Tichuan, he kohna bakah hian rawngbawlhna hautak zawk, mi nazawngin an tlin loh leh an thawh theih loh, a koh bik leh a buatsaih bikte chauhin an thawh tur a awm bawk a ni.

Chung ang rawngbawl hna pawimawh leh hautak bik, koh bik leh chher hriamte tan chauha thawh theihah chuan, mi ṭhenkhat chu phûr thutna chhuahpui ta mai te, mahni ngaihtuahna sawr bing ngut nguta pawimawh riaua an hriatna chu kohna emaw tia chhuak ve ta mai te pawh a awm theih niin a lang. Eng vang nge ka hre lo, rawngbawltu zingah mualpho ta te, an zuih ralna sawi tur mumal pawh awm lova tawp leh ta mai te an awm leh zauh ṭhin. Koh bikte leh chher hriam tawhte rawngbawlna turah hi chuan thlarau lama puitlinna tak tak neih hmasak a pawimawh em avangin, thlarau nun puitlinna tak tak an la neilo te pawh a ni hlawm mahna, ka hre phak lo le.

Irresistable grace, khawngaihna hlu chungchuang avanga hnial theih loh kohluihna.

Lalpa kohna tak tak erawh chu mihring tan hnial theih rual a ni lo va, peih loh sawi theih a ni lo va, insitnain a dang thei lo. Mualpho taka zuih ral mai mai tura koh chhuah pawh an awm ngai lova, an hnathawh pawh Lalpan a hmang ngei ngei ṭhin.

Jeremia chuan, “Ani chu ka lam lo vang a, A hmingin thu ka sawi tawh hek lo vang,” ti mah ila, ka ruh chhunga mei kang inkhung ta ang mai hian ka thinlung chhungah chuan a awm si ṭhin, ka pai hle hle zo lo va, ka chelh ngang lo a ni.” a ti a. (Jeremia 20:9) Lalpa’n mi a tirh takzet chuan mihringin hnial dawn sateh mahse, ti lo thei lova nawrluitu a awm ṭhin a, hnial theih rual a ni lo. Lalpa kohna tak tak chu mihringin haider luih pawh tum mah se, an haider rei zawh poh leh a kohna a na ting mai a, kal lo thei lova nawr chhuah an ni tho tho ṭhin.

Hei hi, hnial theih rual loh kohluihna (Irresistable grace), ringtu zawng zawngten a huho rawngbawlna kan kalpui reng piah lama Lalpan engemaw bik atana a kohluihna a ni. He kohluihna hi Pathian ngaihah chuan malsawmna hlu chung chuang bik a ni a, mihring thlirna aṭang chuan thil duhawm lo leh thlanawm loh tak a ni thung.

Chutiang kohnaah chuan thil tam tak chân a ngai ṭhin a, mihringin a hmangaih leh thlakhlelh ngawih ngawih te, a ngaihsan zawng leh a nuam tih zawng te, a thinlung put hmang leh a nun thlengin a thlaha a kal san a ngai ṭhin. Tin, harsatna leh retheihna te, hmusitna leh cheksawlhna te, tawrhna leh tihduhdahna te, martarnate thlengin an hmachhawn a ngai ṭhin.

Chuti khawpa mihring thlirna aṭanga thil îtawm lo leh thlanawm loh chu ni mahse, a kohate tan chuan peih loh leh duh loh sawi theih a ni lo va, hnial theih rual loh kohluihna a nih avangin a dawngtu chuan a thawk lo thei ṭhin lo.

Chuvangin, chutiang aṭanga rawngbawlna chu a bawltu leh a thawktu avang ni lovin, a tirtu leh kotu Pathian avang zawkin a thawhna turah nungin a thawk ngei ngei ṭhin a, mite hnenah nungin a thleng ngei ngei ṭhin.

He kohna hi ringtu ṭhahnemngaihna leh inpekna te, mahni lam aṭanga ti lo thei lova inhriatna te, ba tlata inhriatnate nen chuan a inang lovin a hrang dang daih a ni.

He kohluihna hi ringtu zawng zawngin kan dawng vek lo va, tin, a dawngtute zingah pawh Lalpan a hman zui reng loh an awm bawk awm e.

Tute nge a koh țhin.?

Inpekna thûk tak neih ngam hi he kohna dawng tura a kalkawng pawimawh hmasa chu a ni phawt mai.

Lalpa hman tlak tak tak leh a hna ṭha thawk tura a koh bik ni thei tur hian ṭhenkhat chu nu pum chhûng aṭanga ruat lawk leh chher chhoh an awm a, an vai erawh chuan an ni vek lo va.

Pathian chuan ringtute hi a Thutaka min chhûn khah a, a thlaraua kan nun pumpui min luah khah vek a, a hna pawimawh bik thawk tlaka min buatsaiha min chher hriam a duh vek a. Mahse, tihluihnaa min pâwng lak ngai loh avangin ringtu ni tawhte zingah pawh amah pawl tama atana inpe thûk apiangten thlarau thlarau thilpek an dawng tam a, mahni nun ngei pawh phat phala inpe thûk phal apiang ten thlarau thuamna chang tamin, chung mite chu tisa leh thlarauah chher hriamin an awm zel a, tichuan, he kohna hlu tak hi dawng tlak an lo niin an dawng ṭhin a ni.

Chutih rualin Lalpan a sawizawia a chher hriam tlak ni tur chuan bible râwn tlat chunga inpekna kawng dik zawh erawh a ngai thung. Mahni rilrua awm ang ang ûmzuia mahni nuam tih zawnga phul hlut leh, a langsar lam ûma chet chiam hi inpekna dik a ni ngai lo.

Thlaraua siam puitlinna tak tak changa Lalpa hmantlak, tisa leh thlaraua chher hriam tlak ni tur chuan, bible chhiar leh ṭawngṭai a amah pawl tam hmasak a ngai a, tin, hun reilote chhunga he dinhmun hi thlen mai theih a ni lo tih hriaa chhelna leh nghah peihna neia tei rei peih a ngai hle a ni.

Tirhkoh Paula, a pianthar hma pawha an hun lai bible byheart deuhthaw khawpa Pathian thu hre hneh sa em em, Krista inlarna hmu meuh pawh kha, Damaska daiah êngin a chhun tluka piantharna a chan veleh khan thlaraua puitlinna neia Lalpa rawngbawl tlak a ni nghal mai bik lo va. Lalpa hman tlak leh tisa leh thlaraua chher hriam tak tak a nih theihna turin kum thum chhung tehmeuh bible chhiar leh ṭawngṭaiin hun a hmang ral leh a, chumi hnuah chauh chuan Lalpa hna ṭha bik thawk tura hman tlak a lo ni ta chauh a ni.

Chuvangin pianthar hlim phur thutna chhuahpui pawh hi chhuah loh ai chuan ṭhat zawng a ṭha e, a ṭha lo kan ti ngam lo, mahse, hmelma rothap hmachhawn tur chuan an la patuai deuh maithei e.

Chuvangin, Lalpa rawngbawl hna ṭha bik thawk tura buatsaih tlak ni tur chuan tirhkohte hniakhnung zuia a reilo berah pawh kum thum tal chu tihtakzeta Pathian pawla inbuatsaih a ngai hle a. Chutianga kawng dik zawha tihtakzeta beitute chu Thutakah chher hriamin an awm telh telh a, tichuan Pathianin a hna ṭha bik thawk tura a koh tlak an lo ni chhoin Lalpa ngaiha malsawmna hlu chung chuang bik ‘kohluihna’ dawng tlak a lo ni thei ṭhin a ni.

Leave a Reply

Your email address will not be published. Required fields are marked *

error: Content is protected !!