Lalpa i rawngbawla min koh hi – Bihchianna – K. Zalawma

K. Zalawma

Lalpa, i rawngbâwla min koh hi
Hriain, sual, chak lohna phuar vĕl hi;
Hlau leh khùrin, beiseinain,
Ṭâwmkai lo leh bawlhhlawh, puih ngai,
I chakna ring ka lo kal e.

He hla hi Upa Selĕt Thanga (1920-1995) phuah a ni. A thlûk hi Lalthlengkima (b.1932) siam niin a thlûk remfel (Harmonise)-tu chu Rev. Z.T. Sangkhuma (b.1934) a ni.

Upa Selet Thanga pa chu Sabuta a ni a, a nu chu Vanneihchhûngi a ni. Chhiahtlângah an khawsa ṭhin a, 1920-ah Làmchhipah an lal hovin khawthar an kai a, a ni hi June ni 9, 1920-ah a piang a; an khaw thar kàinaah hian an sial hi ngam duh lovin an khaw hlui lamah a lĕt leh ṭhin a; chu chu a hmingah chawiin Selet Thanga tiin a pa te hian an sa ta niin an sawi. A pi leh pu, a nu leh pâ chena lal khâwnbâwl, khawsa thei tak, buh leh bal leh ran vulh kawnga malsawmna dawng tak chhûng an ni ṭhin.

1940-ah Matric a zo va, Indopui II-na lai khân Ambulance-a Recruiting Officer a ni. Kum 1947 January aṭangin Sialsûk-ah Middle Anglo Vernacular School-ah zirtirtuah a ṭang. Làmherh nula Chhingpuii nên inneiin Bûkpui-ah Middle School-ah leh Govt. Secondary School, Aizawlah a thawk a. Kum 1958 khân Mission Veng Kohhran Upa atân thlan tlin niin kum 1959-ah nemngheh a ni.

Upa Selet Thanga hian hla 20 zet a phuah a, a hla phuahte hi kutziakin a dah ṭha a, a hla ziak hi ni 23.4.2009-a xerox chu a copy min pe ve hlauh mai a, ka lawmin ka roh hle.

“Lalpa i rawngbawla min koh hi” tih hla a phuah ni chiah hi hriat a ni lo va, ziaktu tam ber chuan 1967 July thlaa a phuah niin an ziak a, a kutziak ngeia a copy min pĕkah erawh chuan 1967 June tiin a ziak thung.

Upa Selet Thanga hi Synod Music Committee-in Kristian Hla Bu a en ṭhat a, mizo kut chhuak engemaw zât lâk luh a nih tâk kum, kum 1983 Edition buaipui a nih lai khân Synod Music Committee Secretary a ni a. Kristian Hla Thar Bu pawh 1984 aṭangin tih len leh a thlûk soprano chauh tonic solfa-a dah tura ennawn nghal a ni a; Upa Selet Thanga hian hla 27 lai Hla thar bua tonic solfaa dah tûr min rawn thawn ve nghe nghe a, min ngen angin tonic solfa-a ziak sain ka thawn kir leh ta a ni.

Synod Music Committee Secretary a nih lai hian N. Hlimen leh Bûkpuiah Synod Music Committee tirhin Music zirtirin upa Tlanghmingthanga leh Pu Lalromawia Synod Music Instructor ve ve te nên kan kal ho a, Synod motor, Jeep la infit tak kha a rawn keng a, a lo thawh tawhna Bûkpui Middle School kan tlawh chu a lung a lĕng hlein ka hria; hetih lai hi Synod Music Committee-a ka ṭhut ve lai a ni.

1995 December ni 5-a Zàrkawt Kohhran Biak Ina Synod inkhawmpui kan hman laiin, Chatuan kulh che rual lo inhûng, Krista tuarna zâra a tâah chuan, chatuana chêng tawh tura min kal san tâk thuin min rawn dĕng a, inkhawmpui boruak a la pĕng khawp mai.
Lalpan rawngbâwl tura a kohna hriaa sual, chak lohna phuar vĕl, ṭawmkai lo, bawlhhlawh, puih ngai nia inhre chunga a kotu hnena kal Upa Selet Thanga chuan, chatuan famkimna hmunah, riangvai, chanhai, hnehtu lian chan, voh bik chawimawina Lallukhum chang turin min lo kalsan ta a ni.

Upa Selet Thanga hi mihring lamah chuan chhûang duh se chhùan tur a ngah mai. Mahse, Lal Isua lamah chuan engmah chhuan tur nei lo, rethei leh saruak mai a nih a in hre chiang a, he hla nung tak hi a lo phuah ta a ni.

Lal Isua zuitur kan nih chu kan hre tlang viau. Upa Selet Thanga erawh chuan, “Mi ṭhenkhat chuan, Lal Isua hi kan hmakhalh thawt thawt thei a. A nih loh leh, amah hmu pha lovin, a hnug fé-ah kan kal fo,” tiin a sawi an ti. Chuvangin,
“I ruala kal dân min zirtir la,
I thu ni se ka dam chhûng hla a’n…” a ti ta a ni.
Zosapthara pawhin, “Isu i sîrah min kai la,
Hmangaih èn lai,” a lo ti ve bawk a. Lal Isua ruala kal hi kan zìr thiam a ngai hle mai.

KHB-ah hian –
“Ka kal zĕl ang, aman min awmpui,
Khawvêl hnehna chu ka ta a ni…” tiin dah a ni a. Upa Selet Thanga chuan,
“Ka kal zĕl ang, aman min awmpui,
Khawvêl hnehna chu ka tân a ni…”_ a ti thung.

‘Ka ta’ tih ai hian ‘ka tân’ tih hian, a hun a lo thlena neih chawp zĕl tur lam a kâwk deuhin a lang a, a ngaih a nuam zawmahin ka hria.

“Buaina chhûm leh thlĕmna fâwnten
Min chîm pawhin chhantu ka nei,
A ta ka ni, chatuan Lal ta,” a han tih te hian min va cho ve le!
Buaina chhûm leh thlĕmna fâwn vĕlah hian kan tlu hún hún mai ṭhin a ni a; chatuan Lal ta kan nih hi hriain, chhantu kan nei tih te hi i hre thar ve teh ang u.

Khawvel hneha kal zĕlte chu chatuan famkimna an thlen huanah, “voh bik” chawimawina lallukhum changin an la ding dawn a, chu chawimawina changve tur chuan, tú tân danga nung tawh lovin, ama rawng chauh bawl angai a, tuarna kal tlangin chatuan kulhche rual lovah kan lût thei chauh dâwn a lo ni.

Kristian, hlimin kal rawh hlauhawmah pawh,
Khua nasa takin lo dur mah sela;
Khaw dur nasa leh chhûm a lo kiang ang,.
Chhandamtu hnenah i awm kumkhua ang.

Kristian, hlimin kal rawh, hlauhawmah pawh Geo. C. Stebbins

Leave a Reply

Your email address will not be published. Required fields are marked *

error: Content is protected !!