Lalngo tah ka bang dawn lo – Thanghmawnga

Phuahtu – Thanghmawnga
He hla a phuah dan hi a tawp lamah kan dah e

Lalngo, țah ka bang dawn lo
A na, keia tuara’n
Laikhum zala dawn chang rengin
Riang thlawn val tur ka lo ni e.

Engtin damte’n ka lo tuar ang,
Mahte’n suihlunglen hi?
Ka riang chuang e zaleng zingah
An awm hlawl lo, thinlai hnemtu.


Hmangaihzual, i tel lo chuan
Mahte’n ka lo vai e
Ai ang i cham dawnlungrukah
Nghilh ni awm lo, tawnmangah pawh.

Ar ang ka vai dawn em ni?
I tel lo chuan kumtluang
Hai ang tar lo i sakhmel mawi
Biak leh nan kumsul min tiam rawh.

Engah kher ka lo tawn che!
Rairah suihlunglen nan
Chuailopar iang i sakhmel mawi
Enchim si loh, ka tan țahna.

Lalngo tah ka bang dawn lo, Lalremi Sialsuk, Lalngovi Kulikawn, Lalremi Kulikawn
He thlalak han en a, veilama a mi, a dung tawi zawk hi Lalremi a ni

Hla ṭobul – Contributor Mary Winchester Zoluti

He hla phuahtu Thanghmawnga, Sialsuk khua chuan an khaw nula Lalremi a hmangaih tlat mai a. Rawlthar Lalremi tan kawplai nei Thanghmawnga hmangaihna chhan let a rem lo. Thanghmawnga na lutuk awmngaihna hre lo chuan Lalremi ke hniak te chu duh takin a fawp ngawih ngawih țhin a, a chantawk a ke hniak chauh pawh chu a tan thil hlu a ni. Zan a lo ni a, Lalremi a rim ngam si lo, a rim lah a rem hek lo. Chauh-thubarawhah, “Lalrem, min ngaina ve tih lan nan zan in dar … -ah in in kawtah ka lo kal ang a, i mut pindan i lo tieng dawn nia, chutah chuan i hlimthla ka lo thlir ang,” te a’n ti thul…. Lalremi pawh khan vawi khata vawi khat chu a mut pindanah eng a chhit tak ngawt kha maw… He hla tlar hmasa ber zel hi rem khawm chuan ‘Lalrem ka hmangaih ber che’ tih a ni. Hetiang hi Acrostic an ti. Lalremi hi kum 2019 June ni 20 khan a chenna Kulikawn-ah a boral a ni.


Mi lungleng, hmangaihnaa uai zo, lunglen vanga fam Thanghmawnga ruhro hi kum 2015 khan a tu leh faten an phawrh leh ta hial a. Zah tak leh duat takin, mawi zawkin an phum țha leh a. Hmangaihna chanchin, hmangaihna thawnthu chi hrang hrang zirho nan Thanghmawnga pualin awm ni an kham let leh ta hial zawk a ni.

Leave a Reply

Your email address will not be published. Required fields are marked *

error: Content is protected !!