Lalhleia Sailo-in Mizoram-a Salvation Army-te a humhim dan leh Salvation Army General hnena lehkha a thawn dan

-L.Sanglura Sailo
Ramhlun South, Aizawl

LALHLEIA’N SALVATION ARMY TE A HUM 

Lalhleia Sailo Ratu a awmlaiin a thil dang lam deuh lo lang awm leh chu Salvation Army ten in humhimna atana an hman hi a ni. Vawiina kan hun hman mek dan aṭanga thlir chuan Lalhleia chanchin ziaknaah hian telh loh mai tur em ni ang? a tih theih hial a. Amaherawhchu, hun a lo kal zel a, hmana indo ṭhin kha unau anga sa-ui an tan thu pawh kan ziak lang thova, chuvangin helai pawh hi a hun laia thil thleng a nih avangin ka ziak tel ta a ni. Hmanlaia in be thei lo, hnawksaka inhriate khan, Thisen hmunkhata hrin an nihzia hrian vawiinah chuan a thlum a al ei zain kan awm ta a. Tun tan mah han ngaimawh tham a ni love.

Kum 1917 April thla a Capt. Kawlkhuma’n Mizoram-ah, Salvation Army a din khan, tuna Presbyterian kohhran ni ta, khatih hunlaia Welsh Mission chuan hnawksak a ti viau mai a. Anmahni chakna mai bakah Bawrhsap chakna hial hmangin Pu Kawlkhuma leh a ṭhiante chu Aizawl leh Durtlang chhuahsan tir duhna a lo awm ta hial a. Hemi thu an hriat hian Pu Kawlkhuma te ho hi an mangang hle mai a, ‘Aizawl chhuahsan ta ila, khawiah nge kan awm ang a, tu lalin nge min lo hum ngam ang?’ tih chu an rilru a zawhna lian ber a ni ta a.

Chutia rilru mangang taka an awm lai tak chuan Lalhleia, Ratu lal hi Aizawl-ah a lokal hlauh mai a, Capt. Kawlkhuma nen an inhmu a. Capt Kawlkhuma chuan Pu Lalhleia hnenah chuan a rilru a khat liam, a ṭhinlung zawng zawng luahtu chu a sawi nghal phawng mai a. “Hei Salvation Army ho chu Mission vengah te, Durtlangah te kan awm thei dawn ta lova, chhuak thuai tura hriattir kan ni vek tawh a. I khuaah te awm i remti lo em ni le, lo kal ila min lo pawm ngam ang em?” a ti a. Lalhleia chuan thu tam pawha chhang lovin, “E, lo kal rawh u, ka khua rawn pan rawh u,” tiin a hrilh a. Capt Kawlkhuma tan chuan hnara hlit phawi ang huai a ni ta. Kum 1918 January thla chuan Mission Veng chhuahsan tura hriattirna Capt. Kawlkhuma chuan a dawng leh a. An chhungkua leh a ṭhianpa Chiangdailova te chhungkua chuan Mission Veng chhuahsanin Lalhleia khua Ratu panin an chhuak a. Durtlanga awm chhungkaw ruk te kha Mission Veng ang bawkin an khuaa awm ve an phal loh avangin an hnawtchhuak bawk a. Tichuan Aizawl aṭanga chhungkaw hnih leh Durtlang aṭanga chhungkaw ruk te chuan Lalhleia khua Ratu panin Aizawl leh Durtlang chu a huhovin an chhuahsan a. Heng chhungkaw riat te hian theih ni se Aizawl hnaih deuhah awm an duh a, Ratu thleng kher lova awm an phal mial takin tiin Sihphir lal Pu Rohnenga, Khawruhlian lal Pu Khawzadala leh Phaileng lal Lalsavunga te hnenah an khua a awm an dil ṭheuh va; tuman an phalsak ngam lova.

Sawleng an thleng phei a, Ṭhuamluaia hnenah a khuaa awm an dil leh a. Ani chuan, “Ramri hrang neia awm ka la ni lova, ka pa Lalhleia, Ratu lal ka va be phawt ang a, a rem tih chuan ka khuaah in awm dawn nia,” tiin a lo chhang a. Ṭhuamluaia’n a pa a va hrilh chuan Lalhleia chuan, “Pathianin a aiawhin hnam tin chunga rorel turin min dah a, kan khuaah hian Lusei, Ralte, Hmar te an awm a, anni pawh Salvation Army an nih mai avangin engah nge ka hnar ang. Lo awm tir rawh u,” tiin a hrilh a. Ratu thleng lovin Sawlengah chuan an awm ta a, an lal Ṭhuamluaia chuan a pa thu angin an duhna lai berah, a huhovin a awmtir ta a ni. Lalhleia hian a ram chhungah Salvation Army ho a awmtir avang hian hetih laia Bawrhsap, H.A.C. Colguhoun, A.C.S chuan a kova, vawi thum lai, “Mi a pa,” a ti a. Tin, a ram chu Sailutar aṭanga Ratu dai Dilkawn thleng chhuahlam zawng chhuhsakin Tengtawng lal hnenah a pe a ni. Salvation Army ten Welsh Mission an nih loh avanga hnawhchhuah an tawh lai mek a thlamuang taka a khua leh tui ni tura a lo lawm lut hi a chungah an lawm em em mai a, an sawi an sawi mai bakah tunah hian amah hriatrengna atan Ratu a lalna khuaah ngei chuan LALHLEIA MEMORIAL HALL mawi tak an sa a ni.

LALHLEIA’N MIZORAM-A SALVATION ARMY MEMBER TE THLAVANG HAUH NAN SALVATION ARMY GENERAL LEHKHA A THAWN:

Sawrkar tha chakna ringa Aizawl leh Durtlang aṭanga Salvation Army te an chhuahtir chu duh tawk mai lovin, Culcutta-a an hotute hnenah Welsh Mission lam chuan an inzawmna titawp turin an zuk sawi a nih a rinawm. A chhan chu khawchhak lam leh hmar lamah Salvation Army te chu Welsh Mission a kir leh tum an thlem ṭhin avangin, an nin an lo duh si lova. Kum 1923 April thlaa Capt. Kawlkhuma Culcutta zuk kal chu an Headquarter hotute chuan, “Mizoram Sipai Pawl hnathawh hi General-in pawi ti em em chungin a lak kir sak ta che u a ni, chuvang chuan kan rawn enkawl thei tawh dawn lo che u a, Mission lamah lo tel leh vek ula, Uniform pawh kan thu lo chuan lo ha tawh suh u,” tiin an lo hrilh phawng mai a. Capt. Kawlkhuma chuan amah zuitu Lt. Pawihlama a hrilh a, an hrilhhai dun hle mai. Hemi an zin hawng hian an thu hriat chu an mite (Salvation Army member) hnenah an hrilh a.

Chu thu lungchhiatthlak tak mai chu an mahni lo humhimtua an ngaih, Lalhleia Ratu lal chuan a lo hre ve hlauh mai a. A tihngaihna vak pawh a hre lo a ni mai thei e, Salvation Army General, London-a mi hnenah Salvation Army a memberte a lainat thu leh a thu chu sut leh turin a zuk ngen sak a, a fapa Ṭhuamluaia, Sawleng lal pawhin a thawn ve bawk a. General hnena an lehkha thawn chu London aṭangin Calcutta Headquarters-ah (Salvation Army te tih ṭhin danin) an rawn thawn let leh a, a fapa Brig. Ngurliana’n Lt. Colonel Kawlkhuma hnen aṭanga a lak chhuah Original Copy chu he chanchin ziaktu kutah hian a ngai ngaiin a la awm a. Chu lehkha, Lalhleia’n  General Bramwel hnena a thawn chu hetiang hi a ni; a ziak dan ngai ngaiin :

Ka thianpa, General,

Tunah hian i hnena thu sawi tur ṭul tak ka nei a ni. Kei hi Lalhleia, Hmar lam lal ka ni a.

Kum 60 mi ka ni tawh a, kum 15 mi ka nihin ka khaw chhungah ro ka rel ṭan a. Hnam tin miin Pathian kan zawn dante a hrang ṭheuh a, a danglam ṭheuh tih pawh ka hria a. Tin, kan zoramah hian Missionary Pathian thu sawitute hi an lo chhuahna a rei tawh hle a, vawi tam tak an thusawi leh an hla sak ka hre fo ṭhin a. Nimahsela an thusawi dan leh anmahni nungchangte ka enin Pathian thu reng reng hi ka rilru-ah a lut thei ngai lova, ka haw em em mai ṭhin a. Tirhkohte pawh ka khuaa riak atan ka duh ṭhin lova. An thusawiin mirethei khawngaih tur an ti a, an khawngaih si lova, chapona ngawt hian khatin ka hre mai ṭhin a.Tin, kum1920 kum khan Chhandamna Sipai hi ka khuaah an lo awm ṭan ta a, chuta chinah chuan kei ngei pawh chuan ka lo hmu thiam ta em em mai a, theitawpa ṭanpui leh chawisan tumin ka lo awm ta a. Chhandamna Sipai a lo chhuah chin chu kan Zoram hi ṭha sawt em emin ka hria a. Tunhmaa Pathian thuawi chapo tak tak leh sual tak tak pawh khan Chhandamna Sipaite awm dan leh nungchang te zirin an lo nem sawtin an lo ṭha sawt em em a ni a. He dan ṭha ber leh mawi ber hi kan Zoramah lo chhuakin mi ṭhenkhat ten sakhaw bulpuiah leh nghet berah an lo pawm ta a. Tuna keima khawchhungah ngei pawh 115 laiin sakhaw bul atan an lo thlang ta a ni a. Tunah hian i mite hi i han thlahthlam deuh avangin, Pawl lehlam ten an biak dan hi sawichhia a lak luh tumin an bei nasa em em mai a, an khawngaihthlak em em a ni. Chhandamna Sipai dan hi mi zawng zawngin kan duh zawkin kan thlang zawk vek a ni a. Hlain, “Ding ru ding ru Isua tan Krossipai rualte u, in puanzar khai sang rawh u a boraltir lo vang,” a tih hi kan Zoram atan hian dawt a ni ang tih ka hlau em em a ni. Zoram Chhandamna Sipaite hi tihboral an tumzia leh Pathian leh Nangmah an ngaihzia che hi hrechiang la chu, Anmahni i khawngaihin i ṭap lo theiin ka ring lo a ni.

Hetia i rawn tihzia ngaihtuahin kei mi hrang daih pawh hian ka tuarpui hle a ni. Hetia sipai dik tak leh Officer ṭhahnem ngai tak leh kal zel tumte i han paih a, anmahni Uniform pawh ha lo tura i han ti hi mi zawng zawngin mak an ti a ni. Hetia thil ti sual hauh si lo mi dik tak tak te paihna mai hi Sipai Pawl danah a awm em ni? Calcutta i lo kal khan ka khua ata Officer 1-in a lo hmuak ve che a, i thusawite chu min han hrilh a, i pa thih dwan a, “He Sipai Pawl hi i rawn hruai zel ang em?” a ti che a; Hruai zel ang i ti a. ‘I hruai zel takmeuh ang maw,’ a ti che a,’Hruai zel takmeuh ang’ tia i intiam thute kha min hrilh a. Chhandamna Sipai hi khawiah pawh awm sela ṭanpui peihin leh zawm thei zela ka rin tehlul vei che nen. Rei lo teah Zoram Sipai an hotuin a han thlah ta tih thawm ka hre leh ta mai a, mak ka ti em em mai a ni. Tin, chu Officer chuan hei hi i thusawi a ni tiin mi hrilh bawk, Calcutta khuaa Union Chapel-a i sawi a ni a, “India Officer te u, enge Officer in nih chhan hi? Mi rethei leh ṭanpui ngai apiang ṭanpui turin a ni,” tiin min chah bawk a ti a.

Hetiangin mi rethei leh ṭanpui ngai apiang ṭanpui turin ram tinah leh hmun tinah Officerte i dah a, an theih ang tawk chuan mi rethei leh ṭanpui ngai apiang an ṭanpui ṭhin ngei mai a, Officer te ṭanpui tur chuan Pathianin Nang a dah che a, Tunah hian Zoram Sipaite leh Officer-te chuan nangma ṭanpuina an ngai ta em em a ni. I theihtawpin kan Zoram tan hian han ngaihtuah hram ang che.

I ṭhianpa,
Lalhleia, Ratu Lal,
Buallawn khua, 25.9.1923

 

(Note: He thu hi L.Sanglura Sailo-in Lalhleia Sailo chanchin a ziah aṭanga lakchhuah a ni a, Lalhleia Sailo chanchin zau zawka chhiar duh tan Lalhleia Sailo chanchin leh Puma Zai lo chhuah dan etc

Leave a Reply

Your email address will not be published. Required fields are marked *

error: Content is protected !!