Lal Isua lo kal huna inring renga awm dan – Lal Ramhluna Ralte – Mizo Sermon

Matthaia 24:44 Chuvangin, nangni pawh inring rengin awm rawh u, in rin loh hunah Mihring Fapa a lo kal dawn si a.

Awi, ka inring reng thiam lo, ka buai thei si, kan muthilh hlante hian lo kal ta se engtin nge niang? Hna kan thawh leh kan zin laite hian engtin nge niang? I ti maw? Chutiang lam a ni lo, chhiar teh.

Lal Isua lo kal leh tur thusawia bengthlep tlat, ngaithla tha duh lo kan nih chuan kan nun inbih chian kan ngai a ni mai thei. Mi tam tak chuan Lal Isua hi a lo kal leh pawh an ring lo, lo kal leh tur pawhin an beisei lem lo niin a lang. Mi thenkhat chuan “Thlarau Thianghlim rawn thlen hi a lo kal lehna chu a ni mai, a lo kal lehna dang a awm lo” an lo ti vei thul. Hei hi zawng, Bible-in Lal Isua lo kal lehna thu a sawi nen a inang lo tih hriat a tha. Chhum zingah khian Lalpa tawtawrawt ri nen, vantirhkoh chungnungber aw nen a lo kal anga a mi thianghlimte a hruai dawn a ni( IThes.4:16). Thlarau Thianghlim kan hnena dah hi chu kan nun hruaitu leh min chenchilhtu leh a lo kal huna inpeiha amah kan tawh theihna tur a ni.
Bible pawh hian Lal Isua lo kal leh ringlotu an awm tih a sawi. Chung mite chuan, “A lo kal lehna thutiam chu khawiah nge? Siam tirh atangin engkim a awm pangngai angin chi thlahtute muthlilh ni ata tawh kha a la awm zel alawm,” (IIPet.3:4)an la ti ang.” tih kan hmuh kha. Chung mite chuan chi thlahtu Abrahama te, Isaka te leh Jakobate muthilh (thih) atang tawhin engkim a awm pangngaiin a awm a, Isua lo kal lehna engtinnge a thlen tehlul ang? an la ti dawn a ni. Keini hunah pawh hian “Kum 2000 chuang a ni tawh, kan naupan lai atang tawhin Lal Isua a lo kal dawn an ti a, vawiin thlengin a lo la kal lo, a awihawm tawh lo em mai,” titu kan awm mek a nih hi!

Mahse ngaihtuah teh, “A lo kal lehna thutiam chu khawiah nge? Siam tirh atangin engkim a awm pangngai angin chi thlahtute muthlilh ni ata tawh kha a la awm zel alawm,” tih dawtah khian heti hian a sawi zawm kha, “Heng hi an haider lui si thin: Pathian thuin hman laiin vante a lo awm a, lei pawh tui ata leh tui zingah awm khawmin a lo awm a;
chungah chuan chu mi laia khawvel awm chu tuiin a chim a, a boral ta, tih hi;(II Petera 3:5-6) a tih kha.

Tuilet hmaa khawvel chu chhe thei lo turah an ngai a, an sual deuh deuh a, Nova’n lawng a tuk pawh khan tui a let tak tak an ring lo va, mahse Nova lawng tuk atanga kum 100 hnuah tui chu a let ta ngeia lei chu a chim ta a nih kha. Chutiang chiah chuan Isua lo kal leh kan rin loh lai takin a lo thleng dawn a ni.
Pathian thutiamte hi a thleng dik lo ngai si lo va. Isaia’n Isua pian tur thu a lo tlangau chu kum 600 hnuah a thleng dik a; Isua krawsa a thih tur thu te, a thawhleha vana a lawn tur thute chu a thleng dik vek tih kan hria. Engvangin nge a lo kal lehna thutiam pawh hi a thlen dik loh tehlul bik ang le? Pathian daw rual a ni si lo va. Engtik niah emaw chuan a thleng ngei dawn a sin. A hun leh ni, darkar erawh tuman, vana vantirhkoh pawhin kan sawi thei lo, Pa chauhin a hria, a hun a tihah chuan a lo thleng mai dawn a ni.( Mat.24:36).

Kan changthlan hmaah chiah khian heti hian Lal Isua lo kal hun tur chu rukru chet hun nen tehkhinin a sawi, “Chutichuan ngaihven rawh u, eng niah nge in Lalpa a lo kal dawn in hre si lo.
Nimahsela, hei hi hre rawh u, rukru a lo kal hun tur in neituin hria sela, a veng ang a, a in a reh pawhtir lo vang.”(Matthaia 24:42-43) tiin.

Rukru tumahin, “Nakin zanah i inah dar chuti zatah chuan ka lo kal anga ka rawn rawk dawn che,” tiin an rawk tur in neitute an hrilhlawk ngai lo, hrilh lawk ta se in neitu chu a lo inring anga engtin mah rukru chu a che thei dawn si lo. In neitu rin loh hunah a che zawk thin. Chutiangin Lal Isua pawh hi mi tam takin a lo kal dawn tih an rin loh hunah a lo thleng thut dawn a ni.

Kan rin loh hunah Isua chu a lo kal dawn si chuan engtinnge inring rengin kan lo awm tak ang le?

‘In rin loh hunah’ a tih hian mi zawng zawng ni lovin ringtute chu a huam ve lo, awih lotuten a lo kal an rin loh lai a ni zawk tih hriat a tha.
A nih leh zanah te tlaivarin kan lo nghak reng dawn em ni ang? A nih loh leh hna pawh thawk lovin kan lo awm thap reng mai dawn em ni ang? Ni lul love, zan mut hunah chuan kan mu ang a, hnathawh hunah chuan hna kan thawk reng tho vang. Inring reng nun zawk chu piantharna hi a ni. Lal Isuan Nikodema hnenah, “Mi tupawh a pianthar loh chuan Pathian ramah an lut thei lo vang,” tiin a sawi a ni. Mi piangtharte chauh chu an muthilh lai emaw hna an thawh lai emaw pawh nise Lal Isuan a hruai turte chu an ni. BA passed tawh chu a muthilh lai pawhin BA a ni a, hna a thawh lai pawhin BA, chaw a ei lai pawhin BA tho a ni ang hian mi piangthar tawhte chu Lal Isua lo kal, lo hmachhawn turin an qualified tawh avangin Inring reng nun chu an nei tawh zawk a ni.

Lal Isua lo kal leh hian kan engti lai nge min rawn phawk ang le? Corruption kan practise lai te, mipat hmeichhiatna sual kan tih lai te, ruk ru leh zu ruia kan awm laite hi min rawn nang ching ang tih a va hlauhawm em! Engtia kan awm lai nge min rawn phawk se kan tih le?

Lal Isua thihna leh thawhlehna tawmpui a, a chhandamna min pek kan chanvoa neitu mi piangtharte chauhin thlamuang takin Lal Isua an tawk dawn a ni. Kan tel ve ang em le?
Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!