Kum 1966 Rambuai lai Lunglei kha – RK Lalhluna

KUM 1966 RAM BUAI LAI LUNGLEI KHA

-RK Lalhluna

Hman lawk emaw kan tih kha tuhakuai rual (teens) angte tan chuan hmakhawsang thil a lo ni reng mai a. Kum 1966 rambuai lai hmu ve pha lote tan chuan a chanchin hriat chakawm leh ṭul tak a lo ni reng ta mai a nih hi. Tichuan Lungleiin hun thim tak a tawn dan chanchinte chu a chin chhuakin leh a kip a kawiin tar lang thei lo mah ila, theih ang chin chin tal tarlan i’n tum teh ang.

Lunglei Background: Nghasih kurunga lung, lei ang taka inkham kai, hmana Sailo lal Vansangan a khaw hming chawi chhana khua lian a lo din Lunglei-ah hian kan chhui theih chin aṭang rengin indona rapthlak leh chhiatna nasa tak a thlen kan la hre lo va. Vai rawn len lai khan tlang ruak a niin anni khan kulh sain an hmunpuiah an hmang zui ta zel kha a ni a. Sipai leh Police-te dahin tun thlenga ṭhut ngheh a ni ta a. Kun 1939- 1945 a World War II chhung pawh khan Japan ral relna hmun mah ni se chhiatna chuan a thlawh khum ṭhin a. Tin, 1946 – 47 ah pawh khan Mizo Union sosangte kha thisen chhuah loin an thunun thei hram zel a. Chutiang chuan khawpui him leh muang a ni ṭhin a. Amaherawhchu, zalenna kha hmang thiam lo kan lo tam tain buai hma vela a mi chengte nun kha a chhe hle mai a. Tlangval sual tuboh leh chemte kenga mi khawih mai mai ching an tamin zan a ralmuang lo em em a ni.

Buaina inmun: Kum 77 zet muang taka awm ṭhin kan chhim khawpuiah chuan a mimir leh changkang deuhte pawhin chhiatna inmun hi an hre lawk lemin a lang lova. SDO Pu R.V. Pillai pawhin ngaihṭhat lohna nei lem lovin muang taka a tuk lungkhamin a mu a. Bawrhsap Pu T.S. Gill pawhin buaina chu thangawk ang maia a thlen ring lem loin zan mu a chhing bawk a. Assam Chief Minister, Pu B.P.Chaliha pawhin a sipai rawn tawlh luh, Pu Laldenga’n withdraw tura a ngenna chu chhang lem lo mah se, chutianga chhiatna a thlen phut chu a ring lem lo bawk niin a lang a. Chutih lai chuan MNF M.P sawmli rualte chuan Aizawl-ah ropui relin 1st March 1966 chu zero hour-a independence puan rel thluin MNA (Mizo National Army) lam pawh a ṭul anga che mai turin thupek an chhuah bawk a. 28th Feb, 66 zanah chuan Lungleiah M.P. sawm rual chuan Operation Code Mizo tih signal chu nghakin in pakhatah hun an hmang mek a. Khami zana thuruk tawpkhawk kha CID te pawhin an hre lo a ni ber ang chu, SDO Officer dangte pawh venhimna ṭha pek an ni chuang lo va. Assam Rifles leh BSF te, Assam Police te pawhin inralrinna an nei tehchiamin a lang lo va. Mahse ramin duh leh ngiat a neih chu tarlan tumin MNA lamte chu inthup tak siin an phili buai hle a.

MNA leh Police / Sipaite khaikhinna : Mizo National Army-te tam lam hriat a har hle a, Rifles 30 leh Sten Gun 2 an nei a. Ist A.R. chu Company khat an niin mi 85 an ni a. Rifles 85, LMG 3, 2″ Mortar 3 leh Hand Grenade tam tak leh silaimu tam tawk an nei a. BSF lam chu Platoon khat, mi 40 vel a ni a. Rifles 70 an nei, Jamadar R.T. Phungan a command a. Tin, Thanna-ah silai engemaw zat a awm bawk a. Dy. S.P. chu Choudhury a ni a. MNA Commander chu Brig. Gen R.Lalnguraa ni a, A.R. hotupa chu 2nd Liutenant Grawal a ni thung a. Thana O.C. chu Pu Boel a ni. Inkahna: 28th February 1966 chu a ral ta chiah tih chuan MNA lam chuan an Headquarters ațanga operation signal chu an hmu ta a, Mizo’an rawn ti ta ngei a; MP rualte chuan tawngtaina neiin Independence’chu an puang ta a ni. MNA lam khan Brig. Gen. Lalngura ho chuan ral an rela, an insemdarh ta sung sung a Pawl khatin BSF leh AP Camp an pan a, pawl khatin Thana leh AR lam an pan ta a. Tichuan, AP leh BSF beitute khan an camp-a luhchilhin silai an hmetpuak a. Anni khan kap let lovin an inpek thu an puang ta a; tichuan awlai takin an la ta a. Amaherawhchu ram buaina tuar hmasa ber Pu Biakchhawna, Lunglawn chu kah a ni a. Tin, BSF chawchhum (cook) pawh kah a ni a, an boral ta ve ve a.

AR lam beitute khan Thana chu thawm nei lovin an la thuai a. ARGate duty kha Motor-a paltlanga luhchilh an tum a. Gate duty khan a lo remti lo va, amah chu an kap zui ta a. Tichuan, chu thawmah chuan Camp-a awnmte chu an lo harh a, rang taka insemdarhin bunker an pan ta sang sang a. Tichuan, inkahna chuan a zui ta a. He inkahna hi inralsai a ni deuh ber a. Sipai lam kha bunker-ah an tanga, MNA lam khan Bazar tlang atangtein an kap a. Chumi zan chuan Pu Suraba fapa chu kahhlum a ni a, ani chu civil-a thi chhun a ni a.

MNA-in an mante: Dt. 1.3.1966 zingah SDO Pu R.V.Pillai, IAS chu man a ni a. Tin, Pu Joshi, Dak lam hotu te, CID mi engemaw zat te, BRTF hotute leh civil an rinhlelh dangte nen an man a.

Rukrukna runpui: Chutia thi leh thau pawlha thenkhatin sipai an kah lai chuan MNF-ainchhalin mi awkhrawlte chuan dawrkai sum leh bungrua te, office sum leh thildangte an lo vai a.

Inkahhai rawt: MNA leh sipaite kha ni engemaw zat chawl lovin an inkap reng

si a, thi leh hliam an awm bawk si a, MNA khan luhchilh an rawt thuak thuak tawh a. An luhchilh ngat chuan bayonet fighting-a an tin a ngai dawn a. Thisen nasa tak a luangin thihna rapthlak tak a thleng ngei dawna hriatna neiin Pu J.Buana, Padma Shri te, Pu Hauthuama, BDO (Aizawl DC ni ta kha) te chuan silai mu leng karah Mike-a auvin inkah titawp turin an ngen chiam ṭhin a. MNA lam chuan an hnial lem lo va, mahse AR lam kha an be eih thei lo va. Tichuan remna chuan anniho kaltlangin thla a zar hleithei ta rih lo a ni.

India Parliament rorelna: Mizorama MNF-in Independence’an puan chuan India ram a nghawr nghing ta a. Ram thlaler a ni a, Sorkar dangin an puih rinna te pawh an nei rum rum a. Tichuan, Parliament emergent sitting an ko ta chuk chuk a. Mizoram Security Post zawng zawng beih a nihzia leh hualbeh an nihzia chu tarlan a ni si a. Tichuan New Delhi Parliament-ah chuan, “Mizo helhote chu nuai ral (liquidate) ni se, sipaite pawh thuneihna sang tak pek ni se,” tiin ropui an rel ta a. Tichuan Security Force-te chu Zoram pan vat turin thu an pe ta a.

MNA Funpui erna: MNA-te khan Falkáwnah Funpui an er a, an ei leh in tur an buatsaih mup mup a, ral kaptute chu chaw leh in tur an pe ṭhin a. Hmun hrang hrang aṭangin buhfai leh chawhmch leh sate a rawn thleng reng a. Tichuan, ration tha tawk tak neiin sipai an kap a.

Damdawiin: Lunglei Civil Hospital-ah hliamte kha dah luh an ni zel a. MNA lam hliam te, Assam Riflcs Tlabunga awm Lunglei rawn pan an kah hliamte an enkawl a A.R. lam khan Hospital chu an kap lo.

All India Radio: All India Radio-in station hrang hrang atangin Security Force-te hmasawn zel dan a puang zel a. Tin, Mizo lam pawhin Radio Station siamin thu an puang reng bawk a.

A.R. tanpui tum: Ni thum leh zan thum an inkah hnu chuan 4th March, 1966-ah Silchar atangin Transport thlawhna a rawn thlawk ta a. Buaina tlang chu pan vang vangin a rawn kual vel a. Tichuan A.R. awmna chung zawnah chuan parachute-a rawn thlak ta a. Mahsc A.R. lam vanduai a siamin Bung zarah a tang ta hlauh mai a. Tichuan MNA lam khan thlawhna chu an kap vak a, thlawhna kha a tek sawr sawr a, meikhu a chhuah a, a thlawk kiang ta a. Sipai lan chuan an chhawrbawk thei ta lo va. Tin, an headquarters lam be turin wireless pu kha a thi hmasa pawlah a tang bawk si a, chhantu an au hlei thei ta lo a ni.

Inpekna zahawm: Security Force lam khan hma an rawn sawn zel tih Radio leh source dang atanga hriat a ni a. Chuvangin MNF lam kha an hmanhmawh hle a, mahse inpe mai tura an vauna chhanna chu silai mu a ni mai rih si a. Tichuan, 5th March 66 zing lam atang chuan an kap leh ta alh alh a. A.R. Camp chhunga nunaute leh sipaite kha an tui a hal em ema. A tawpah chuan bunker atangin flag var a rawn phe chhuak ta lap lap a. MNA lam khan an hah an han chawl hlek a, bunker atang chuan 2nd Lieutenant Grawal leh Subedar Akal Singh chu flag var kengin an rawn chhuak ta a. MNA lam khan an lo thlir reng a. Akal Singh chuan Mizo tawngin, “Mizoho, silai kah thiam, kan thuk lo che u. Kan inpe e, min kap tawh suh u,” ati ta a. Chu veleh Brig. Gen. R.Lalngura hote khan an pan a, tichuan MNA hnenah 1st A.R. chu an inpe ta a ni. Tichuan, sipaite kha an man vek a, an ralthuam zawng zawng an la vek bawk a, nunaute erawh kha chu an awmna ngaiah an awmtir a, nunauten an lam hmasak ber chu tui a ni.

Rallak (Booty): Rallak zat chiah hriat theih a ni lo va, Rifles 185, LMG 3, Sten Gun 8,2″ Mortar 3, Hand Granade tam tawk tak leh silaimu tam tak leh thuamhnaw te an ni a. Tin, sum lamah chuan Rs. 18,00,000 (Cheng nuai sawmpariat) leh Dakin lama lak Rs. 20,000 (Cheng singhnih) vel a ni.

Hnehna lawm a ni: 5th March, 1966 zing lam dar 11-ah 1st AR-in ipekna zahawm tak an neih tak avangin Lunglei chu MNA kutah a awm ta a. Chumi lawmna chu neih a ni a. Tawngtaina te neiin MNF leh MNA te chuan an lawm a, wveng hrang hrangah AR an tlawm ta, ‘tin Motor-a chuangin an puangdarh a. Hemi ni hian 1872 hma lam Zoram nun min ngaihtuah chhuahtir hle a ni

Thi leh hliam: Hun rei tak ngawrh taka inkap hlawm e ti lovin vanneihthlak takin thi leh hliam an awm lo viau va. MNA lam 5 an thi a, engemaw zat na vak lovin an hliam a. AR lam 2 an thi a, hliam an tam vak lo bawk a. BSF Cook pakhat a thi a, hliam an awm lo va. Tin, A.P. lam thi an awm lo va, hliam an awm bawk lo va. Civil mi pakhat a thi thung a ni.

Jet Fighter a rawn leng: Lungleia AR an tlawm hnu lawk darkar thum velah Jet Fighter-in AR chhanchhuah tumin an rawn pan a. Anni kha an inpek tawh avangin chhan tur an awm tawh lo va. Lunglawn E.E. Office tlang vela an mi man leh a mantu zi huai huaite chu a rawn hrut a, mahse engmah tih lovin a kirsan leh ta a ni.

Pathian hliahkhuhna: Lunglei khawpui hi tun hma pawhin chhiatnain a thlawhkhum ṭhin kan tih tawh ang khan, hemi buai lai vel pawh hian chhiatnain a kalkan leh mial a. 1st AR-ho kha darkar thum han tang leh hlauh phei se chu liakhaw, liakhaw a ni ringawt mai ang! Thlawhna khan a rawn chhan ngei ang a, Lunglawn, Chandmary, Rahsi veng, Bazar leh Zohnuai te chu a kap alh dur dur mai ang a, mi tam takin in leh lo leh nunna kan chanin hliam tam tak kan awm dawn a ni. Mahse AR inpekna te kha Pathian remruat a lo niin inpekna zahawm tak a lo ni ta zawk a ni.

MNA &MNF Underground: Security Force te kha thlawhnain a escort zel a, dan rual lohva awmin an tum ram an thleng thei zel a. Tichuan kawrvai lo lian dang zo si hek lo le, underground an rel ta a. Tichuan, 11.3.1966 zanah an rallakte leh an mi mante nen an insaseng ta a. Lunglawn, an awmkhawmna atang chuan Thangpui lamah an liamthla ta a ni.

Mizo Union MDC te leh MNF inremna: MNF leh Mizo Union inkarah thil duhawm lo a awm ṭan avangin Mizo leh Mizo indona kawng pumpelh duhin MNF aiawh Pu LH.Lalmawia, Ex-MLA (Assam) leh Pute, Sawia, Lalsanga, Bawnga, MDC-ten inhriatthiam tawnna thuthlung an siam a. Hmar khawchhaka MU leh MNF te in-mu-leh-arna ang chu Lunglei chuan a pumpelh ta a ni.

Khawpui reh: Khatia MNA leh MNF an insaseng tak si-ah chuan Lungleiah awptu an awm ta lo va, NIL a ni ta ringawt a. Security Force-ten dan rual lohvin hma an rawn sawn zel a, an kalnaah khua an hal thu leh mi an man an sawisak thu te hriat a niin Lunglei khawpui chuan anni lo hmuh chu hrehna a nei ta a niangchu, mipui zatve aia tam chuan khaw dang leh ram lam an pan a. Tichuan, Lunglei khawpui dung chu a reh thuap mai a. Inkah bur burna leh mipui zik mup mupna khawpui chu pemsan khua ang mai a lo ni tain, han hawi velin lung a awi thei ngang lo va. Khaw ram zawhte ang mai kan hawihai hle mai zawng a ni.

Peace Mission: Sipai hmasawn vel nunphung leh chetzia kan lo hriatin lo tawn kan huphurh tak meuha. Tichuan, Baptist Kohhran puipate Rev. HS.Luaia, General Secretary leh Rev. Dr. CL.Hminga te chuan thih leh thih tiin thlarau lama an enkawlte tisa lam thawvenna kawng dapin Flag var tarin Aizawl lam an pan ta ringawt mai a. Sipai hotute an va hmuhin nunau leh pawisawi lote chunga zahngai turin an va tahawh ta a. Anni khan “Min lo kap lo ula, tin, in tinah flag var lo tar ula, zah kan ngai ange,” an lo ti hlauh mai a. Tichuan an tawngtaina chhanna chu lawm taka pawmin Chanchin Tha an la hrilh ngai loh puang tur chuan an rawn let ta vang vang a. Pu Darchhawna, D.E. pawhin a lo tawiawm a. Tichuan, an pathum chuan an rawn kalna khua-ah chu thu chu an puang zel a. Jona rawngbawlna ang mai khan a tla tha hle a. Sipaiho rawn thlen hma chuan in tinah flag var kan lo tar ta a. Chung flag han phe siau siau ka hmuh ka dâwn let chang chuan Yellow ribbon round an old oak tree,’tih hla ka hrechhuak ṭhin.

Security Force Lunglei-ah: 13th March, 1966 (Sunday) tlai lamah Security Force Bihar Regiment leh an kaihhruai 19th AR te chuan Matan thleng ta a. Mahse Mat lei kha tihchhiat a nih avangin a sukuk hlek a. Lung rengan deng a, harsa takin Mat an rawn kan a. A tukah chuan Lunglei lam pan chuan an rawn move ta a. Lt. Col. Backlin chuan a command a. Zobawk an rawn lut a, an rawn tlawh zel a, Theiriat an rawn thleng a. Theiriat khan damlo an lo zawn kher a, mi zawntute chu an man ta a. Tichuan Lunglawn panin an rawn chhuak leh a. Dar khat velah Lunglawn hmun hlui an thleng a, hmun hluia mi inte chu an luah a. Anni khan an bungrua an thiar buai a. An han man thuak thuak a, mahse Pu Rothangan a chhanchhuak a. Tichuan, Lunglawn vengpui lam panin an rawn tawlhphei leh ta a. Bihar hang tak tak, thirlukhum neta khuh khum an hawi vel ruai a. Kan lo thlir reng a, eng min tih lo chuan Lunglei an pan ta dul dul a. Lunglei an thlen chuan silai an pawng kah a, mahse chhawntu an awm lo. Tichuan Lunglei chu thisen pakhatmah far lova la let lehin an thut ta a ni.

Lunglei SDO thar: Pu Pillai leh man dangte kha kea kalin Rengtlang (Ruma) Bangladesh thlenga hruaian ni a. Mahse tumah thah tawk lovin him takin an rawn chhuah leh ta a ni. Lawngtlai thlengin an rawn escord a. Tichuan, Sccurity Force-te chuan Lungleiah an rawn dah leh ta a ni. Pu Pillai tan hlan chuan SDO-ah 24th April, ’66-ah Pu D.S. Khongdup, Khasi Officer, Mizo cheng hre tak an rawn dah a, ani ho khan thimtham hnuaiah Lunglei chu a khawsa ta a.

Buai nghawng: Buai chuan nghawng a rawn nei ta thuai a. Curfew khauh taka puan a ni a, dan bawhchhia chu kah nghal thupek a ni a. Tin, in-check a awmin zana sipai kawlhrawng zual mi ina lut an awm nual nawk a. Keini lah kha Bethel chhuak ang mai kan nem zan mai a. Sipai mi ina kawlhrawng taka lut pakhat chuan Pu Rothangpuia te ina lutin a vaua, Pu Rova kha mi chak a lo ni bawk a, a man a, an hotute hnenah a hlan a. Tin, sipaiho tanchhanin Lunglawna BRTF santal-ho kha an rawn pawng ve a. Mi ina lutin an duh duh an la a. An rawsawt leh thil tuten emaw an man phuba an rawn la ve a ni awm e. Eng kan sawi ngam lo va, a hmaa dumka mai mai,’ ti ṭhin khan Ji Santal babu’ kan ti a ni hawt e! Tin, sipaite khan rin man an nei nualin na tak takin an sawisa a. Khaw danga an mante an rawn hruai a, thenkhat phei chu nghaisak hlum an awm hial a. India dan kha a nih pangngai ang reng ni mah se, sipai thuawih kha dan hriatna chi khat a ni ta ringawt a ni.

Sipai camp hung te, dai sam te, coolie te a tam ta em em a, mahni hna tul dang nen kan ipik ta hle a. Tin, Treasury ruak, Dak in ruak leh office sum bawm ruak ngang kha a nia. Sawrkar hnathawkte pawhin thla thum zet hlawh an la thei lo va, sum harsatna namen lo kan tawk a. Tin, dawrkaiho bungrua leh sum there kha a tamin anni khan bungrua an la leh thei mai lo va, an neih chhun kha an duh tawk tawk an chhiar a. Chini kg khat Rs. 10/-man a ni a, lehkha zial tur phek khat Rs. 3 man lai a ni a, khatih hun laia hlawhfa ni khat rate chu Rs. 5 a ni lek fang si a. Hetih hun laia dawrkai fakawm tak mai chu Chhotelel Seth & Company a ni a, anni kha Army Convoy zinga bungraw tawlh thei awm chhun an ni a, mipui harsatna denchhen lovin thil rate pangngaiin an hralh zel a, an fakawm ngawt a ni.

Tin, buaina karah chuan Security Force leh Sawrkar lam khan lamtang an mamawh a, MNF leh MNA hre awmte kha informer-ah an hmanga, An mi mante kha kawktu-ah an hmang ta a ni. Kha kha MNF lam tan an lo hlauhawm ta hle a, an inhumhimna an zawn a tul ta a. Tin, kawktute kha Civil mi an rinhlelh sipai lam bel te, MNF an man te an ni hlawm a. Khangte khan han rin kawh ngawt an nei bawk a. Chungte chu sawisak hrep an ni zel si a, chuvangin Lunglei-a vah vel a tit thlak hle a. MNF lam pawh khan kawktute chu dim hauh lova kutthlak an tum bawk si a. Tichuan, 1966 kum chu tisa leh rilru lama harsatna intanna a lo ni tain buai nghawng chu kan tuar tan ta a.

MNA-te kha underground tawh mah se, Mizo Sawrkarna kha kenkawh zel an tum a, dan leh thupek an zamin an theih ang tawkin an kengkawh zel bawk a. Tichuan, mipui chu tuboh leh dolung inkara khawsa kan ni ta ringawt a. Tin, Curfew a nih avangin Kohhran inkhawm programme-te a buai a. Tlai lama inkhawmna te neih a ni a. Tin, BCM Assembly pawhin a bahlah phah a, tichuan Kohhranah nghawng tam tak a nei bawk a ni.

A tha lam a nghawng: Achhe laite siamthatu kan neih miau avangin thil chhia a kan ruatte kha a tha lama hertir a ni nual bawk a. Lunglei buai hma kan nun te kha a tenawmin a sual em em a. Khatiang harsatna tuar tlak kha kan lo ni rengin a lang a. Lunglei khawpuiah zan a ralmuang lo va, tlangval sual chemte leh tuboh kenga a hlawpa awm, mi khawih mai mai ching an tam em em a. Zanah a falin len ngam a ni tawh lo va, hmeichhe zu in, mi hur tei mai mai an pung sawt bawk a. Tin, inti-sakhawmi, thlarau par tlan anga lang, tisa chak zawng anga che mai mai te, a dera ṭawngṭai tlawr thei tak takte leh rawngbawlna a loh theih loh a ni tia, mahni pawihawi sukiang peih lova thuhrila zan khaw tairek thleng thlenga tei an tam bawk a. Hlepna bawlhhlawh leh eiruk leh tham a leng chuai chuai bawk a. Chung ang boruak chuan kha hun kha a tawngbaw tain, buaina chuan a rawn sukiang ta duak a. Khaw laia tuboh kenga vak te chu Lailungdawt kengin an thlak ta a. Khawpui sualna chu engemaw chenah hnawl kiana awmin, tihtak zeta Pathian biakna leh ngaihna nun chuan min luah ta veng veng thung a ni.

Thu tlangkawmna: A kim lo leh thawi tak a kan hriata kan hmuh, kim lo taka ka han tarlan tak ang khan, Lunglei khawpui kum 77 zet lungmuanga lo awm tawh, zawi zawia hmasawn zel chuan hun tawng ropui a tawn tak avang khan a chhe lam leh a ṭha lamah nghawng nei tawn mah se, khatianga harsatna ang kha tawk leh turin tumah ka duhsak lo va, khatiang tawn leh ai chuan thlahtute khumpuia zal thlang zawk tam tak kan awm hial awme. Chuvangin, kan thalai leh ram kaihruaitute hian khang an lam hawi lo zawnga hnam kalsiam an hruai ka duh a. 1966 kum kha tawrhna intanna chauh a ni a. Kha thimhlim nun pawh kha tawrh tham tak a niin khatiang hun kara min hliahkhuha min hruaitu Pathian hnenah lawmthu awm sela, khang hun han dawn kir chang ni hian he ramah hian Socrates-a khawvel ang bawkin Pathian a cheng ngei a ni tih hi phera pho ang maiin a rawn lang leh ṭhin a ni. 1966 ram buai lai Lunglei-a thil awmziaah khan. “KUM 1966 RAM BUAI LAI LUNGLEI KHA!”

Biak rawnte : Pute-

Lalngura, C.Thangdula, L.H.lalmauia, Vanlalnghaka, Suaktlaia, R.K.Hmangaiha, Bauka, Rotlaia, Lalhnema

Leave a Reply

Your email address will not be published. Required fields are marked *

error: Content is protected !!