March ni 6, 1966 a Vaphai daia Mizo National Army te chetsualna raptlak –  ‘Thuchah Hnuhnung’ Zirsangzelan a phuah dan

March Ni 6, 1966 – Vaphai

(Note – Copy/paste lo turin kan inngen e, hmun danga kan dah duh a nih chuan a link share mai ni se a lawmawm hle ang)

Mizo hnam sipai, Mizo pasalṭha hmingthang Neuva hming chawi ngata din ‘Neuva Battalion’ te chuan Vaphai khuaa inkulh India sipaite chu luh chhuah turin leh tuk tlawm tura rawn pen chhuakin, zalenna famkim kap chhuak chunga an mahni khaw lama hnehna hlado nena haw leh ngei inringin phur takin an khua an rawn chhuahsan hlawm a.

Chung Mizo pasalthate chu Khawbung, Vanzau, Leithum, Dungtlang, Samthang, Zawlsei, Khuangthing, Thekte, Thekpui leh Vangchhia vel aṭanga lo kal khawm an ni a (Zamawia 312). Chung mi, hnam pasaltha leh raldo tura inpete chu an nu leh pate chuan an thil tum atthlakzia leh pawi theihzia chu hrilh eng ang mahse koh kir mi an ni lo a, Mizoram a damna tur a nih phawt chuan thih an hreh lo a, nunna sawm pawh nei se a zavaia Mizo hnam tana hlan duh turte an ni a, ‘auh kir rual an ni lo’.

An ngaihzawng leh an nula rimte lakah pawh tlangval tam tak chuan an hmaa thil lo thleng tur Vaphai khaw sipai outpost beih tum chu an zep tlat a; thuruk vawng thei mi rinawm nih chu tum tlat a. An khua leh an ngaihzawngte kalsana ral an beih hma zanahte chuan an nula rim te hnenah chuan rinawm taka lo awm tlat turin thu an han chah a.

Tlangval chuan a rilru tak takin zalenna famkim hawn chunga a hmangaih chu hmuh leh ngei a beisei em em a. An khaw lama a kir leh hunah chuan independent ram niin chu ram thar nuam takah chuan a ngaihzawng nen cheng dunin fa an han hring ang a, a hmingah chuan a pain Zoram zalen nana ral a lo kah tawh thute chu phuah chhanin a ral beih dante chu chhuang takin a la hrilh ve dawn a ni. Chutiang chuan Mizo tlangval suangtuahnaah chuan zalen nana ral kah piah lamah chuan zalenna ram chu a lang hnai ruih mai a ni.

Chutichuan hnam sipaite chuan Vaphai khua behchhan sipai hmun chu hualin a sira trench khur an laih-ah chuan Mizo sipaite chuan ṭan hmun khawhin India sipai ho chu inpe turin an thlem a, an inpek hun an nghak bawk a.

Amaherawhchu zalenna sualtu Mizo sipai ‘Neuva Battalion’ te chu chu hmunah chuan leilunga luang ral turin an lo kal a, an thisen luang kawih zeih zuih tur te chu an hre lawk bik lo.

Ṭan kham pang kara inkulh sipai ho chu an rin leh an beisei angin an inpe ta mai lo a. Mizo sipaite nen chuan an inkap zeuh zeuh reng a, Mizo sipaite chuan silai leh a mu tam pawh an nei lo hrim hrim a, March ni 4 zan aṭanga tlaivara bei ṭan chuan March ni 6-ah pawh chuan sipai camp chu an la luh chhuah lo a, sipai camp chu luh chhuah turin hotute thupek an hmu lo ang bawkin, an dinhmun a chhiat viau hnuah pawh an ṭanhmun khawhna aṭanga hmun him lama insaseng turin an hotuten an ti lo bawk a. Training ṭha tawk nei ve ta lo chu hun rei inbeihnaah chuan a chan chhe zawk an chang chho ta a.

Pic Credit – Chhuantea Chawngthu

March ni 6 tlai dar 4:30 hnu lamah chuan Mizo sipai ṭhenkhat chu an ṭan hmun aṭangin an insaseng lo thei ta lo a. Chutih lai chuan Trech khura Mizo sipai ṭan hmun khawh zingah chuan ṭhenkhat chu an chauh luat avanga lo muthlu pawh an awm a, khur chhunga awm an nih avangin pawn lama thil thlen dan hre lutuk lo an awm bawk a. Chutia Mizo sipai ṭhenkhat an insaseng takah chuan India sipaite chu camp aṭanga lo chhuakin Trech khura Mizo sipai awmte chu hmun leh hmunah bomb an vawm hnan a, a ṭhen an kah chilh bawk a, a ṭhen chu lailung dawta vih hlum te pawh an ni bawk a. Mizo sipaite chuan chhiatna rapthlak tak an tawng ta a ni. He inkahnaa thi te hi vai sipai ten an kah chilhna trench khurah hian leiin an chhilh hnan ringawt a, vui leh phum mumal lohin Mizoram tan an nun an hlan ta a ni.

He inkahna hriatreng nan leh nunna chante zahna lantir nan Vaphai khawtlang hruaitute chuan ṭha takin lung an phun a, mitthite hming leh hnam sipaite nihna tilang thei mi lem ker tel a ni bawk. He inkahnaa nunna chan lungphuna an chhinchhiah theih te chu –

Kapzuala
Zamchhinga
Ch. Neithanga
Darkunga
Thansiama
Dailova
Sangthanga
Lalngura
Lalcheuva
Vanthanga
Thanghrima
R.Liankhama
Vaitawna
Neihhrima

Tichuan, Sipai camp bei tura kal Mizo sipai te chu kir leh tur awm loin Zoram leilungah hian an luang ral ta a, an thisen luang chu Zoram tan lei ṭha a nih an beisei a. An kal dawna an duhthusam, an ngaihzawnte hnena an thutiam leh Zoram zalenna ni chu hmu ve hman loin an ngaihzawngte chu an thlah a ṭul a. Pialral mitthi khua an kal ve huna lo hmuak zawk turin thuchah hnuhnung a sawi ṭul ta zawk a ni.

THUCHAH HNUHNUNG
Phuahtu -Zirsangzela Hnamte
Phuah kum – 21/22, October 1977, Shillong

A khi chhaktiang tharsa zuk sial lenna,
Sen vung kham rang chawi vel
Zo tui thiang leh sihpui hual vel
Ṭanpui mi hrang thlafam kaina.

 “Lenkawl a eng, Val rual tho r’u” tiin
Bawhar ṭhiangan a hril
Zoram chhan tur mi hrang rualte
Chengrang chawi rammu an liam ta

Auh kir rual loh chhuihthangvala
Tawn leh ni tur tiamin,
A liam ta maw vangkhua pelin
Chhai lai lenmawii lung len nan.

Tawn leh ni chuan di nen vangkhaw zauvan
Kumtluang run rem relin,
“Kan Zoram tan fanau chawiin
Riah run kan lum ve taw’ng” a ti.

Mahse Vala’n duhthu a sam sual e.
Ṭan tlangpui thlen ni chuan,
Doral hrangin hmatiang an sawn,
Hrang rual lengngha iang an dang ta.

Aw zam ngai lo Chhuihthangvala
Ngen hrang karah dingin,
Chengrang chawiin hmatiang a sawn.
Chawnban vawrin sakhming chhal e.

Zoram tan leh i tana nun pein
Zopui mihrang a fam ta!
Thuchah hnuhnung Hmangaihi hnenah
Ti hian biahthu a hlan ta a.

“Aw sel lo se, Valnuntawia hi
Hringnun hlimten hmanga
Pialral ram mawi a lo kaiin
Ka lo hmuak nang e chhuahtlangan
Ka lo hmuak nang run lumpuian.”

Thubelh : Kum 1960 chhoa Laldenga leh a pawlten India aṭanga zalenna hmuh theih inbeiseia Mizote tana zalenna thu an tlangaupui khan mi tam tak rilru a hneh a, a bikin ṭhalai zingah a tla na zual a. Nu leh pa tam tak Mizo Union Party-a la tui em em leh la ruh  em emte khan fanu fapa MNF ṭan tlat, zalenna famkim hmuh theih inbeisei an han hring ta tlat mai a, hemi avang hian pa leh fa tam tak inkar a khi a, chhungkua an lungrual thei lo.

Pa tan chuan an fate MNF zawmtute chu thil tih theih loh tih tumtu, ngam loh chala chil hnawm tum, buaina chawkchhuaktu tur an ni a, chutiangin fate tan pawh pa tam tak chu zalenna awmzia hre lo leh tunlai lo tak, party (Mizo Union Party) ruih chilh vanga thudik leh thu tak pawh hmu thei lo khawp a mitdel an ni thung a.

MNF hruaituten thu sawi an thiam em avangte, an hmuh phak leh an ban phak hmanraw awm ang ang hmanga tehkhinna thu sawia nula tlangvalte rilru deh an thiam em avangtein MNF zawm chu Mizo te tih ngei ngei turah mi tam takin an ngai hmiah a. Chu chu an tan chuan Mizo  nihna leh anmahni hringtunu Zoram an hmangaihnaa an chhanletna a ni.

He Vaphai daia inkahnaa boralte ruhro hi Aizawl Luangmuala Martar te thlanmuana phum ṭhat turin kum 2019 February ni 7-ah hai a a ni a. Zahna chibai nen khawtlang chuan an bawihsawm a ni. Zirsangzela hlaah hian a hunlai boruak, Hnam sipaite chu seltu an awm dan te, Vaphai a inkulh sipai an beih dawn boruak leh an vanduai dante hmuh tur a awm a. A ropui ber lai chu Mizo hnam ṭhatna tur duhtute an ni hi a ni.

Leave a Reply

Your email address will not be published. Required fields are marked *

error: Content is protected !!