KRISTIAN CHHUNGKAW DIN

-K. Zalawma

1Lalpan Zion salte a hruai kîr leh lai khân,
Mumanga mangtute ang mai kan ni a.

2Chumi lai chuan kan kâ chu nuihin a khat a,
Kan lei chu hla sakin.
Chumi lai chuan hnam tin zîngah,
“ Lalpan an tân thil ropui takte a tihsak a ni,” an ti a.

3Lalpan thil ropui takte min tihsak a,
Kan lâwm hle a ni.

4Aw Lalpa , sala kan tâng hi min hruai kîr leh ang che,
Chhim rama luite angin.

5Mittui tla chunga tuhte chuan hlim takin an ât ang.

6Ṭap chungin buh chi feh chhuahpui mah sela,
A buhphalte kengin hlim takin a lo haw leh ang. Sam 126:1‭-‬6.

Sam Bu-ah hian ‘Chhoh Hla’ chi hnih a awm a, a pakhat zawk chu Temple-a Pathian be tura an kal chhoh paha an sak thin a ni a; a pakhat zawk chu Babulon sala an tâng chhuak Jerusalem pana an haw chhohna, Saltâng kir lawmna “Chhoh Hla,” a ni.

Sam 126-na pawh hi saltâng kir lawmna Chhoh Hla an tih zinga mi a ni. He Chhoh Hla hi an kir mek lai a, a ṭhen sal tanna rama an la awm nual laia phuah a nih ai chuan, chutih lai rilru chu châwia, tlêma tlai deuh, Nehemia hun laia phuah niin an ring. Kir lote pawh an la awm tho a ni thei bawk.

‘Lalpan Zion salte a hruai kir lai khan’ a han tih dân aṭang hian tlai deuha phuah a kâwk a. An lâwmzia mai chu, mumang lama duhthusam hmu ang mai niin an hlim êm êm a ni tih a sawi a ni.

Jehovan thil ropui leh lâwmawm tak a han thlen sak chu, anni chauh ni lovin, an vêla hnam dangte pawhin an lawmpuiin mak an ti hle hlawm emaw a ni ang, “Lalpan an tân thil ropui tak a tih sak a ni,’ an lo ti ve bawk a ni.

Chutia an lâwm êm êm chung chuan an la lawm kim lo va, mi ṭhenkhat sal tanna rama la awmte an awm a, “Aw Lalpa, sala kan tâng hi min hruai kir lah ang che ” an ti a. Jehova chuan a hnathawh chu zo thuai thuai se an ti hliah hliah bawk a ni.

A tlângkawm nân, lungngaihna nasa tak hnuah lâwmna an seng ngei dawna rin tlatnain a ti tâwp ta, Mittui tla chunga tuhte chuan hlim takin an ât ang,” tiin.

Israelte Babulon sal tàn leh Kristian chhûngkaw nun hian in anna tam tak a nei thei awm e. Tun țum chu he ti zâwng hian ngaihtuahna i han sêng daih teh ang.

Zion salte :
Israelte kha Pathian Jehova aiin hnam dang pathian biak leh khawvel nawmsip lamah in hmangin Pathian an tlûk san fo ṭhin a. An in hriat chhuah a, a lam an hawi leh theih nân Pathianin a hrem fo va, sorkar dangte hmangin salah hial a hralh a ni. Assuria sorkarin hnam sawmte salah a hruai a; chumi hnu kum 100 chuang daihah Assuria hruai bâng zawng chu Babulon sorkarin a hruai ta vek a, Babulon sala an tàn chhung hi kum 70 nia sawi ṭhin a ni.

Chûng sal tângte chu Sam 126-na phuahtu hian “Zion salte” a ti a ni. He mi hma daih hian Aigupta salah kum 400 zet an tâng tawh a, chu chu Mosian a hruai chhuak tawh bawk.

Ringtute pawh hi Pathian chhandamna kan chan tawh hnuah pawh hian khawvel Babulon salah hian kan tâng fo thin, Kohhrante hi “Pathian chhungte” tia vuah kan ni a, Kohhran Member zingah hian Chhungkaw hrang hrang kan awm leh a ni.

Kristian chhungkua:
Chung Kohhran zîng aṭanga chhûngkaw mal-te chu “Kristian chhungkua” kan tihte chu an ni a. Inneihnain chhungkaw bul kan ṭan a, fanau kan lo neih hian chhungkaw member kan pung ta zel tihna a ni.

Kohhran Hmeichhiate Kristian chhungkua: Presbyterian Kohhran Hmeichhiate hian an rawngbâwlna pui ber pakhat chu “Kristian chhung kaw ṭha din” kawnga ṭan lâk hi a ni. Chuta an point lian tak pa hnih chu :

1. Chhungkaw tinin chaw chhum dawn apianga “Buhfai ṭham” ṭham ṭhin tura inzirtir hi a ni a; Synod-in Pathian ram Buhfai ṭham hi Kohhran Hmeichhiate rawngbâwlna tura a ruat a nih angin chhûngkua zawng zawngin ṭham tak tak ṭheuh tûrin Kohhran chhungkuate min zirtir reng a ni.

2. Chhûng inkhawm: Chhungkaw tinin “Nitin chhûng inkhawm” nei vek turin chhûng tinte an zirtir reng a ni.

He rawngbâwlna hi Kohhran chhûngkaw tinin ni tin an nei vek em? tih hi inelna atâna tehna atân an hmang ṭhin. Kohhran pakhata he tehnaa point hmu sang ber chu Ram puma “Kristian chhungkaw tehnaa sâng ber’ niin trophy hlan ṭhin an ni.

Buhfaiṭham leh Chhung inkhawm bâkah engnge tihtur kan la neih?:

Kristian chhûngkua tak tak ni tûr chuan chhûngkaw member zawng zawngte hian ni tin Lalpa hnung zuia kan nun hi a pawimawh ang. Buhfaiṭham ṭham reng chungin, ni tin chhûng inkhawm nei tho sinin chhûngkaw member ṭhenkhatte chu Khawvel Babulon salah kan tâng reng tho si. He Sermon ka buatsaih lai ngei pawh hian chu saltâng avâng chuan hmarchasawh kan han bâwl leh rih ṭhin a, Setana hian ṭan a va la nasa em!

Israelte an lo ralmuan a, an lo nawmsak deuh apiang khân Jehova duh zâwnga nun aiin khawvel nawmna leh sualna lamah an tlu lût leh ṭhin a, inthawi leh inkhawmpui pawimawh te, kût chi hrang hrangte hmang chung rengin pathian dang betute nun an ṭawmpui tho ṭhin a, a tâwpah salah an tâng leh ṭhin ang khân, Ringtu kan nih hnu hian khawvel hmasawnnain min lênin, nun hlui sualna chi hrang hrangah kan tâng leh ṭhin a nih hi.

Lalpa chuan thil ropui tak min tih sak a, kan lawm hle a ni (126:3) :
Zion saltâng hruai chhuaha an awm kha Lalpa tih sak a ni a, a ropui a, an lawm hle a ni.

Sual bawih ata Krista chhandamna kan chan hian kan lawm hle a, kan hlim hle ṭhin. Chhungkuaah pawh piangthar kan awmte hian kan hlim ṭhin.

Aw Lalpa, sala kan tang hi min hruaikir leh ang che (126:4): Zion saltângte a ṭhen an kir tawh hnuah pawh Babulon ramah a ṭhen an la awm reng tho. He hla phuahtu hian hruai chhuak vek turin Lalpa a ngen a ni.

Kei ni pawh chhungkaw member ṭhenkhat kan piangthar a, kan lawm hle lai hian pa ber emaw, nu ber emaw, fa nu/fa pa emaw Setana salah an la tâng tlat ṭhin hian “Chhungkaw Kristian” min din tir thei lo țhin a nih hi. kan lâwm a va kim thei lo em!

Mittui tla chunga tuhtute chuan hlim takin an ât ang (126:5):
Saltâng kir leh ten hnam leh ram an han din tirh lai chu a harsa khawp mai a, dâlna leh beidawnna kârah an bei a ni. mahse he Sam phuahtu hian rah a la awm chêk ang tiin a thlir tlat a ni.
Temple pahnihna an din tirh laia mittui an sênzia (Ezra 3:123) leh an sak zawha an hlimzia (Ezra 6:16, 22) leh, a kulhpui an serh ṭuma an hlimzia (Ezra 12:27,43) te hi heng châng thu dik entirna leh tihdikzia lantirna ṭha tak a ni.

Kan tu kan fate, ruih hlo bawia tâng leh khawvel sualin a man tlatte pawh hi, mittui tla chung takmeuha ṭawngṭai leh chhanchhuah an nih theih nâna theih tâwk kan chhuah chuan, kan rîla rah kan buhphalte keng hian hlim takin Lalpa hmaah kan la kûnpui leh ngei ang tih ring ila, kan dam laiin a rah seng hman lo mah ila, ringtu ṭhahnemngaihna ṭawngṭai chu Lalpan chhângin tih hlawhtlin hun a nei ṭhin a ni.

Kohhran chhungkuaah pawh: Kohhrante hi Pathian chhûngte kan nih thu kan sawi tawh a, Thlarau bo mana Lalpa hnenah hruai kir tur hian Kohhranin ṭan a la mek a, chumi hmanrua atân missionary, mihring mihrinnaa mi ropui leh tling ber ber pawh ni lo, Hmeichhe awmnem tê tê-te nên ṭap chungin buhchi kan feh chhuahpui mek a. Sakhaw dang betute leh hmusittu tam tak awm mah se, kan buhchi fehchhuahpuitute hian buphal (Ringtharte) kengin Lalpa leh a Kohhrante hnenah an rawn hawpui zel a, Lalpa Kohhran chhungkuaah lawm luh zel an ni.

Vawiinah Kristian chhungkua kan din hi Lalpa hmaah kûnpui kim vek thei rih lo mah ila, mittui tla chunga ṭawngṭai chungin khawvel Babulon sala tângte tân beidawng lovin dil ila, hlim taka âtin anmahni nen ngei hlim taka kan haw ve hun a la thleng ngei ang.

Leave a Reply

Your email address will not be published. Required fields are marked *

error: Content is protected !!