Krista hnena nun thuhruk – Rev. VL Nithanga – Sermon

KRISTA HNÊNA NUN THUHRÛK

– Rev VL Nithanga

In thi tawh a, in nunna chu Pathianah chuan Krista hnênah thuhrûkin a awm si a (Kol.3:3).

He khawvêl hi kan chênna ram hlun tur a ni lo tih chu hre țheuh mahila, he khawvêl chhuahsan hi tute pawh hian kan hreh țheuh mai tho va. Ringtu țha tak takte pawh hian an lo hreh țheuh tho mai. Chutih rual erawh chuan kan chatuan ram tur zâwkah kan hâwng lo thei dâwn si lo. Engtik niah emaw chuan he khawvêl hi kan la chhuahsan ang a, Lalpan kan tâna ram min buatsaih sakah chuan kan la hâwng țheuh dawn a ni. Chuvângin, keini ringtute hian Kristaa kan dinhmun dik tak hi kan hriat chian lehzual a țul tak zet a ni.

Krista hnênah chuan khenbeh kan ni tawh a, A thihnaah chuan kan thi tawh a. A hnênah phûm vein kan awm a, a thawhlehnaah pawh kan inzawm zêl a (Rom.6: 4ff) Tichuan, tuna kan la nung mêk pawh hi keimahnia nung kan ni tawh lo va, keimahniah hian Krista chu a nung tawh zâwk a. Keimahnia nung Krista ring chuan keini hi tisain kan la nung mêk a nih hi (Gal.2:20). Khawngaihna avângin Krista nihna chu kan nihna a nih tawh miau avângin Pathian thu chuan, “In thi tawh a, in nunna chu Pathianah chuan Krista hnênah thuhrûkin a awm si a (Kol.3:3),” tih thu chu min hrilh ta a ni. Chuvângin, tunah hian khawvêlah hian tisain kan la nung mêk a nih pawhin, keimahnia nung Krista rinnaa nung kan ni a. He khawvêl hi kan lo chhuahsan hunah pawh kan nunna chu Pathianah, Krista hnênah thuhrûk a nih tawh tlat avangin, ama hnêna ropui zinga inlãr ve tur ka ni tlat si. Chuvângin, dam emaw thih emaw kan tan hian a lem chuang ta lo va. Pathian thuin, “Keia tân zawng nun hi Krista a ni a, thih pawh hlâwkna a ni (Phil.1:21),” a lo ti ta a ni. Ringtute chuan la dam zêl kan thlãkhlelh chhan chu Krista tâna nung tûrin a ni a, kan lo thi a nih pawhin ama hnêna ropuia kan inlar chhuah ve hun tur a ni bawk si. Tirhkoh Paula pawhin Krista tâna la dam zêl nge, kal chhuaha ama hnêna awm chu thlan zâwk tur pawh a hre lo hial a. A lai laklawhah dingin a inhre hial a ni.

Khai le, keini Krista zara Vankhualehtui nihna changtute hian, kan nunna chu Pathianah, Krista hnênah chuan thuhrûkin a awm a, tuman an tibuai thei tawh lo va, engmahin a tidanglam thei tawh hek lo tih hi i hrechiang nawn leh teh ang u. Hetiang nun min neihtirtu, Lal Isua Krista hi Lei leh vâna thuneihna zawng zawng neitu a ni a (Mt.28:18), A hnênah chuan i nunna leh ka nunna chu thuhrûkin a awm a sin. Krista, kan nunna chu a lo inlâr hunah chuan keini pawh ama hnênah ropui zingah kan la inlar ve dawn a ni (Kol.3:4).

Leave a Reply

Your email address will not be published. Required fields are marked *