Krista avangin mi a kan ni – Rev. V.L Nithanga – Sermon

KRISTA AVANGIN MI Â KAN NI A

-Rev VL Nithanga

Keini zawng Krista avângin mi â kan ni a, nangni erawh chu Krista-ah chuan mi fing in ni zâwk e (1Kor.4:10).

London khawpui chhûngah tlangvâl pakhat, Lal Isua Krista tâna mi inpe tak mai hi a awm a. Pathianin a thinlunga thu a pêk ang anga engmah vên thâwn nei lova ti mai țhin mi a ni a. Ni khat chu, Pathianin thil tih tûr a pe a. Lehkha phêk hlai takah hian, “Krista avânga mi â” tih a ziak a, chu chu a âwmah hian a awrh a. A hmu apiangte chhiar theih tûr hian a in tar kulh mai a. London kawtthlerah chuan mipui tam tak kârah zahpui hauh lovin a kal ngut ngut mai a. Nula leh tlangvâl hlâwm khat, drugs eddict-te leh zu ngawlveite chuan an lo hmu a. “E, saw, Krista avânga mi â a lokal e,” an ti a, an lo nuihzat em em a, an lo deusawhin, an lo au nawmnah vêl a. Tichuan, chu tlangvâl chu ngawi rengin a lokal zêl a, a nuihzattute awmna bul chu a lo thleng a, an lo nuih sawh lui vêla, an lo țawng el khum vêl a. Tlangvâl chu a ngawi reng a, ngawi rengin a kal tlang a. A kalpelh hnu chuan, amah nuihzattute chuan a hnunglam chu an va en zui a. A hnungah chuan “Nang, tu vanga â nge?” tih ziak lianpui mai lo intar chu an hmu zui a. Chu thuziak chuan an thinlungah thu a sawi thûk viau a ni ang, lo nuihzattute chu an ngawi ta țhap mai a. Hun a lokal zel a, Krista avânga mi â ni ngam, hmusita nuihzattute chu Drugs abuse avâng leh Zu eichhiat avâng chuan an thi zo ta thuai a.

Tirhkoh Paula chuan, “Keini zawng Krista avângin mi â kan ni a,” a ti a. Krista avânga mi â nih a inhûam a, Krista chanchin țha hril chu a âtchilh a, “Kan dam pawhin kan thih pawhin Krista tân,” tiin a nun pumpui chu Krista tân a hlân a nih kha. Keini pawh hian Krista chu kan âtpui ngam a țul a, âtpui tham Isua a ni a. Ringtu hlawhtling tak ni tûr chuan mi rin dan bâka rin a ngai a, mi peih bâk peih a ngai a, mi tih bâk tih a ngai a, mi thlen bâk thlen a ngai a ni. Chutiang mi i nih chuan mipui vantlang ngaihah chuan mi â, i lo ni țan tawh anga. Mahse, Krista vânga mi â nih chu i duhthusam ber lo ni zel rawh se. Tichuan, mi â ti țhintute che khân sual hliam tuara an mangan niah chuan an la mamawh hle dãwn che nia. Krista vânga â ngam lote chu, Setana avângin mi â an lo ni tho tho zel nia.

Leave a Reply

Your email address will not be published. Required fields are marked *

error: Content is protected !!