Kraws-ah Isua a thi – Biakhmingthanga Chhangte – Sermon

“Tin, chawfak hun achin behliang mun hun thlengin khawvel a lo thim ta vek a.. Tin, ngai teh, Pathian biak in puanzar chu a chung lam ațangin a hnuai lam thlengin a lo thler chhuak ta a,” Matthaia 27 : 45 – 49.

Isua chu misualte kuta awmin Kraws-ah chuan hrehawm tuara rumin, lungngaiin a awm a. Hmusittuten nasa taka tihelin an nuih zat a. Chutih lai tak chuan khawvel a lo thima, lirte a nghing a, mithianghlim muhil tawhte chu thlan ațangin an lo tho a. A Pain a kalsan avangin Isua chu aw ring takin a au a, a thlarau a thlah ta a ni.

Khawvel a thim : Isuan Krawsa a tuarna chu a la tawp mai lo va, a taksaa natna, thi khawp hiala natna hliampui a tuar a ni. Pathian Fapa na tuar hrehawm ti leh lungngai mangang hmel chu Ni chuan a hmu ngam ta lo va. Tichuan thilmak tak chu thawklehkhatah a lo thleng ta phut a! Chhun dar 12 vel ațanga tlai dar li thlengin khawvel chu a lo thim ta vek a. Rom ram pumpui chauh a ni mai thei e. Ni awk lem a ni lo va, thla bial lai tak a ni si a, Pathian ațanga lo thim a ni zawk. Thim zingah chuan chau aw ni lovin, aw ring takin a lo au chhuak a, “Eloi, Eloi lama sabakthani?” “Ka Pathian, ka Pathian, engah nge mi kalsan?” tiin. Hemi lai tak hi a No in tur a hlauh em em lai chu a ni! Khawvel sual zawng zawng phurtu Pathian Beram no a nihna leh Pa chuan a hawisan lai chu a ni a, sual anchhia chu a chunga nghah a nih tak avangin, Pa meuh pawh chuan a kalsan ta a. A No in tur chu a in ta a – hetih lai tak hian, a Pa chuan a hawisan ngei a ni tih a lanna chu, “Ka Pathian, ka Pathian, engah nge mi kalsan?” tia, hlauthawng taka kalsan ni awm taka ring taka a auhnaah hian a lang a ni. Sualna nei lo chu kan aiah suala chhiar a lo ni ta a ni (2 Kor. 5 : 20, 21). Țawng mak tak a hman hi Sam 22 : 1 thu ami a ni a, Hebrai țawng a ni. Tichuan sual thua Pathian rorelna chu kan Lalpa chuan a in ta ngei a ni.

A kin ta : Isua “Eloi, Eloi lama sabakthani?” tia a au chu a kiang vela mite chuan Elija a ko niin an hra a. Johana chuan helaiah hian țawngkam dang Matthaia ziak tel loh a sawi a, “Isuan thil engkim tunah a kim tawh tih a hria a, Pathian Lehkha Thu a thlen nan, ‘Ka tui a hal e,’ a ti a” (Joh. 19 : 28) tiin. Tin an zinga mi pakhat a tlan ta nghal a, spanj a la a, uain thurin a chiah khat a, tiangah a tar a, a han intir a, (Sam 69 : 31). Isuan uain thur chu a lo in zawh chuan “aw ring takin a au leh a, ‘A kin ta’ a ti a, tin, a lu a kun a, a thlarau a thlah ta a. Matt. 27 : 50; Joh. 19 : 29 – 30. Lal Isua chuan he khawvela misualte tlanna tura Pa remruatna chu a thawk zo ta vek a, “A kin ta,” a ti a, chatuan atan vawi khatah a tlingtla ta vek a, tihnawn leh reng ngai tawh lovin a kin ta chiah a ni. (Heb. 9 : 26b; 10 : 10, 12)

Paradis-ah a chawl ta : “A thlarau a thlah ta” tih hi, a nunna chu “pe thei ka ni, la leh thei pawh ka ni” a tih thu kha a dikzia a lo lanna a ni. A taksa nunna chu amah ngeiin a pe a, a thlarau chu a thlah ta a ni. Misual pakhat hnena “vawiinah ka hnenah Paradish-ah i awm ve ang,” a tih hmunah khan a thlarau chu a kal ta a : Tita nen pawh khan an inhmu ngei ang. Paradis-ah chuan a taksa thawhlehna nghakin ni thum lai chu Abrahama angchhungah chuan a awm ve ta a ni.

Pathian biak in puanzar a thler : Isua chu Dan anchhe laka min tlan tura a thih veleh, Dan hnuaia Pathian biak dan tur Amah vêkin a lo ruat/siam tawh chu a tibang/titawp ta a. Thuthlung Hluia Biakbuka hmun thianghlim leh hmun thianghlim ber daidantu/pindantu puanzar chu, Puithiam lalber chauh luh theihna puanzar ngei chu, Pathian tihthler ngei a ni tih hriat nan, a chung lam ațangin a hnuai lam thlengin a lo thler chhuak ta vek a. Chu puanzar chu Krista taksa entirna a ni si a, Krista ber a thih a, a taksa chu tihthler a nih tak avangin entirna tura an zar țhin pawh chu a țulna a awm tawh lo va; Pathian ngeiin a tithler ta a ni. (Heb. 10 : 19 -20). Chumi achinah chuan ran thisena inthawi a țul tawh lo va, a Hapta 70 hlim leh thla lek a ni a, a tak Krista chu a awm tawh avangin Puithiam neih pawh a țul tawh lo va, Krista chu kan puithiam Lalber atan Pa dinglamah chuan a han țhu ta zawk a. Chuvangin huai taka khawngaihna Lalțhutphah chu kan hnaih ve theihna turin puanzar chu a thler ta a, Dan hnuaia rawngbawlna kawnga Pathian biakna chu a tawp ta a ni (Heb. 4 : 14 – 16; Kol. 2 : 14 – 17; 2 Kor. 3 : 7 -11; Rom 7 : 6; 10 :4).

Lirte a lo nghing a…: Chu mai a la ni lo, “Pathian Fapa meuh a thih ni chuan Niin a ênna a thup a, lirte a lo nghing a, khawvel pumpui mai hian a sun a, Chatuan Lungpui a khik ni meuh chuan Amah entirna lungpui chu a khi chat rem rum a. (1 Kor. 10 : 4). Hmanlai mithianghlim thlante pawh chu a inhawng a; Ama sawi kher pawh ngai lovin tunge a nih chu a thilsiamte chuan an rawn hriattir a. Khawvela lalberte an thihin chung thilte chu a awm ngai tih kan hre lo. Lalberte Lalber, a fam ni meuh erawh chuan lei leh van leh a chhunga awm zawng zawng te chuan an tuarpuiin an sun a ni.

Mithianghlim muhilte kaihthawhin an awm : Isua van ațanga lo chhuk chauh lo kha chu tun hma zawng kha chuan Mi thianghlim muhilte chu vanah an la lawn ngai lo va. Rinnain an sual tlanna chu lo thlir lawkin ran thisen chhuahin an inthawi țhin a, an sualte chu ngaihhnathiamna (haiderna) hnuaiah chuan khuh bovin an awm a (Rom 3 24), mahse an sual ngaihdamna tura Isua thihna leh thawhlehna a awm hma chuan chung lamah lawn theihna an la nei rih lo va. Entirna leka an lo hman țhin Pathian Beram No chu khawvel sual kalpuitu atana a lo thih chinah erawh chuan an sual zawng zawng ngaihdamna chu a tak takin a lo awm ta a; tichuan thlan ațanga a lo thawhleh khan Abrahama angchhunga mi thianghlimte thlarau, thihnain a man tawh te chu, a zuk man kir a, chunglama a han choh lai khan mi thianghlim tam takte chu a hruai chho thei ta a ni (Eph. 4 : 8 – 10). Lei hnuaihnung ber, Leihnuai Paradis-ah a zuk kal hmasa a, chuta țang chuan chung lam Paradis-ah chuan Thuthlung Hlui lama mi thianghlim thi tawh te thlarau chu rawn hruai chhuakin, thlana an taksa nena inzawm lehin, chung lamah chuan a hruai chho ta a ni.

Khaw thianghlimah… an inlar : Isua thihna ațanga Pathian thiltihtheihna lo lang chu hriatpuitu atan mi thianghlim lo tho leh te chu, chung lama hruai chhohva an awm hmain Jerusalem khaw thianghlimah chuan mi tam tak te hnenah an inlar a. Isua chu thihna chelh hlen rual a ni lo va, mitthi tawh te pawh chuan Amah thawh hma hruaitu avang chuan thawhlehna an chang ve thei ta a ni tih hriat theihna turin an inlar hlawm a ni. Ring lo va thi, misualte erawh chu an thawhleh thu reng hriat a ni lo ve, Mi hausapa awmna, mitthi khuaah khan an tuar ta zel rih a, chuta țang chuan taksa thawhlehna changin kum sang rorel tawp ah an lo tho ve ang, tichuan meidilah mitthi khua chawp chuan paihin an awm ang (Thup. 20 : 11 – 15).

Leave a Reply

Your email address will not be published. Required fields are marked *

error: Content is protected !!