Thlarau Sikul kal awmna Kolasib DIET an tih chu – Kolasib DIET chungchanga MZP Press statement

Kolasib khuaa Distric Institute of Education and Training (DIET) inrelbawlnaa buaina hi nikum 2018 vel aṭang khan ri ret ret a awm chho tawh a. Zirlaite leh Principal inkarah inhmuh thiam lohna lian tak awm chu Kolasib khuaa facebook group lian ber pakhat Kolasib Dot Com lamah post siam a ni a. He ta ṭang hian Kolasib DIET a thil dik lo awm ngei nia hriat hi a ri chho zeuh zeuh reng ta reng a. Chutih rual chuan DIET, Kolasib a Principal Pu C. Vanlalmawia hi mi hmingṭha, Kolasib-ah chanchinbu lamah thu leh hla ngah ber, khawtlang enkawlna leh chhungkua leh fanau enkawl dan lam ziak nasa em em mai, thu sawi tur leh thuziak tura sawm hlawh em em mai a ni a. Kolasib-ah chuan Revd. Chuauṭhuama te lan sarh ang tho hian mi langsar ber ni phak a ni a.

C. Vanlalmawia, Vanlalmawia, DIET Principal, Mizo idol Grace thlahrang
Pu C. Vanlalmawia
Principal, DIET, Kolasib

He buaina hi a tirah chuan DIET zirlaite leh Principal inkarah ri ret ret a awm a, chumi hnuah MZP angin an chhui a, The Frontier Despatch chanchinbu te pawhin nasa takin an lo thailang tawh bawk a ni.

A hnuaiah hian MZP Headquarter Kolasib ten DIET Kolasib a eirukna awm ni ngeia an hriat dan an tarlan chu kan chhawp chhuak e.

PRESS STATEMENT

MZP Headquarters Kolasib te chuan 7th June 2018 khan DIET Trainee hnen aṭanga lehkha kan dawn atangin Kolasib DIET sum chet vel danah thil dik lo tam tak a awm niin kan hria a, hei vang hian hma kan la nghal a, RTI hmanga dilna hrang hrang kan siam hnuah thil dik lo a awm ngei nia kan hriat vangin ACB lamah min chhui chian sak turin FIR kan theh lut a ni.

MZP Headquarters Kolasib te hian mi hrang hrang training tawh te leh training mek te bakah Staff te leh Ex-staff te kan kawm kual a, thil felhlel tam tak hmuhchhuah a nih bakah DIET Principal Pu C. Vanlalmawia hi mipat hmeichhiatna (Sexual Harrassment) lamah pawh a fihlim lo hle tih te kan hriat belh bawk a. Thu dik,  ṭan chhan tur ṭha tawk kan hriat hnuah DIET Principal Pu C.Vanlalmawia chu 17th September, 2018 khan kan kawm a. Kolasib DIET enkawl zui zel tlaka kan ngaih loh avanga mi dang hriat lohva transfer dil mai turin kan ngen a ni. Mahse kan ngenna ang hian transfer turin hmalakna a nei lova, Kolasib chhuahsan a tum loh thu kan hriat avangin 20th September, 2018 khan kan va hmu leh a, a mualpho lo zawng leh a service ti chhe lo zawnga hmalak kan duh avangin amah hi transfer dil turin kan ngen nawn leh a ni.

DIET Pre Service Trainee 1st Batch ten 24th May 2018 a Farewell an neih tumin Pu C. Vanlalmawia hian a speech ah, “Kan pawisa dawn hi in hman ve tur pakhatmah a awm lova, in it tlat si a, in hmang ve leh ṭhin a. Kan pawisa dawn hi chu zirtirtu ṭang lai mek te training kan pekna tur a ni,” tia a sawi avang leh In-Service training atana sum hi hmanna a awm hriat a nih si loh avangin Dt 29, October 2018 khan RTI hmangin 2013 – 2018 chhunga In- Service Training neih tawh zat, In-Service atana Fund lut tawh zat, Khawi School te nge lo kal tawh tih leh Attendance Sheet te RTI hmangin kan dil a. Kan zawhna hi ni 30 (30 days) ral hnuah pawh min pe thei lova, a chhan kan zawh chuan, “Director instruction kan la hmuh loh avangin kan la pe chhuak thei rih lo che u,” a tih vangin MZP General Headquarters lama kan Vice President Pu B.Vanlaltana chu kan be pawp a, ani hian Directorate lama min ngaihvensak tura kan ngen angin hma min laksak nghal a, mahse Director a awm loh avangin Jt. Director min biaksak hnuah a tuk 12th December 2018 khan kan RTI zawhna chhanna chu MZP Pisa ah min rawn pe ta a ni.

DIET, Kolasib DIET,
DIET Kolasib
Credit : DIET website

RTI chhanna hi keini pawhin kan zirchiang nghal a, mi thil chik mi tak tan lo pawh a felhlel a ni tih hriat nghal theih tur a tam hle mai a. Uluk lehzualin kan zir chiang a, Attendance Sheet a signature te pawh mi pakhat kutchhuak nia a lan avangin attendance sheet bika hming lang, Kolasib-a zirtirtu ṭhenkhatte chu kan hmu a, anni hian an Training loh thu leh signature te pawh anmahni kut hnu a nih loh thu min hrilh a ni. Hemi mai bakah hian Attendance Sheet ah hian pension tawh te leh boral (thi) tawh te hming engemaw zat a lang bawk a, an school lo thawh tawhna te pawhin mak an ti hle a ni. Hetiang anih avang hian Training neihna atana Hall an hman (RTI chhanna aṭanga an tarlan) te pawh kan chhui zui nghal a, Hall enkawltute lam kan zawh chian hnuah DIET hian training-nan an hman loh thu an sawi hlawm a ni.

Training-na sum chungchangah hian Directorate leh Kolasib DIET ten RTI zawhna an chhanna a inang lo bawk a, Directorate lama kan zawhna chuan ‘In-Service tan a hranin sum a awm lo’ an tih laiin Kolasib DIET chuan ‘In-Service training-na atan Rs. 2,527,341/- (Cheng nuaih sawmhnih panga sing hnih sang sarih zathum sawmli pakhat) an dawng’ niin an tarlang thung. SCERT leh Kolasib DIET te min chhanna hi a inmil lo a, a khawi zawk hi nge rin tur tih hi kan hre lo. SCERT hian Kolasib DIET tan 2013-2018 chhung khan fund Rs. 164.05 lakhs an pek thu an tarlang a, amaherawhchu heng sum tam tak hi Kolasib DIET-ah hian a hmanna hriat a nih loh avangin Ni 28 February 2019 khan Directorate of Anti-Corruption Bureau ah Lallawmzuala Sailo, Tresurer MZP Headquarters Kolasib hmingin thil dik lo awm min chhui chhuah sak tur leh mawhphurtu lakah dan anga action lak a nih theih nan FIR kan theh lut a ni.

ACB-ah FIR kan theh luh hma hian Kolasib DIET-a thil dik lo awm hi School Education Minister Pu Lalchhandama Ralte leh Kolasib bialtu MLA Pu K Lalrinliana, Supply Minister hnenah thil awm dan hi kan sawipui tawh bawk a, kan hmalakna ṭha an tih thu leh a ṭtul anga an lo bawhzui tur thu an sawi ve bawk a ni.

Issued : MZP Headquarters Kolasib

Thubelh : Kolasib DIET hi Kolasib hmar lam Saidan Veng huam chhunga awm (gps location 24.245361, 92.676243) niin kum 2006-ah chutih laia School Education Minister Dr. R. Lalthangliana’n a hawng a, Principal hmasa ber chu R. Lalthianghliama a ni a. Kum 2019-a an website a a lan danin Principal bakah hian lecturer 15 ten zirtir hna an thawk mek a ni.

Leave a Reply

Your email address will not be published. Required fields are marked *

error: Content is protected !!