KOHLUIHNA – IRRESISTABLE GRACE
(Lalpa’n a hna ṭha bik thawk tura khawngaihna a pek bik, hnar theih loh ‘kohluihna’)

Lalṭanpuia Ngente

Hnar theih loh khawngaihna tih zawk awm tak a ni a, mahse, theological term awm sa a niin kohluihna kawh tir a lo ni tawh ṭhin a, chumi zul zui chuan ka han sawi ve mai a ni. Tin, a nihpnungin kohluihna a nihna a tifiah bawk a.

He kohluihna hi mi ṭhenkhat chuan chhandamna chang tura thlan bikna an kawh tir a, tunah erawh chuan ringtu nih tawh hnua Lalpan a hna ṭha bik thawk tura a kohluihna, khawngaihna hlu chungchuang bik a nihna rawn tar lang thung ila.

He kohluihna (irregistable grace) hi ringtu kan nih tawh hnuah Lalpan a hna ṭha bik thawk tura a tirh bik leh a koh bik, a kohate tana hnial theih rual loh, Lalpa ngaiha malsawmna hlu chung chuang bik ni si, ringtu nazawngin an dawn loh a ni a.

Chu kohnaah chuan thil tam tak chân a ngai ṭhin a. Mihringin a hmangaih tak te, a duh zawng leh nuam tih zawng te, a thinlung put hmang thlengin a thlah fai vek a ngai ṭhin. Tin, harsatna leh tawrhna te, martarna te thlengin a keng tel bawk ṭhin a ni.

Mihring thlirna aṭang chuan chutiang khawpa îtawm lo leh thlanawm loh chu ni mah se Pathian thlirna aṭang chuan malsawmna hlu chungchuang bîk, lawmman ropui leh hlu chung chuang bik tak nei a ni thung.

Chutianga malsawmna hlu chuangchuang bik a nih avang chuan ‘A koh’ nih chu nihlawhna ropui tak a ni a, chutih rualin peih loh leh duh loh sawi theih a ni lo thung a, chuvangin, ‘hnial theih rual loh kohluihna’ tih a ni reng a ni. A dawngtu chuan a thawk lo thei ṭhin lo.

Chutiang kohna aṭanga rawngbawlna reng reng chu a bawltu leh a thawktu vang ni lovin, a tirtu leh kotu Pathian avang zawkin a thawhna turah nungin a thawk ngei ngei ṭhin.

He kohluihna hi, ringtu ṭhahnemngaihna leh inpekna te, mahni lam aṭanga ti lo thei lo leh ba tlata inhriatnate nen chuan thil hrang daih a ni a. Chutih rualin ringtu zawng zawng hi kan kan hma zawn ṭheuhah Lalpan kan theih tawk rawngbawlna tur min chhawp chhuah sak ṭheuh a, hei hi ngaihnep tur a ni chuang lo va, ṭhahnemngai leh tihtakzeta thawk ṭheuh tur kan ni tih hi kan hre reng bawk tur a ni.

Pathian chuan ringtute hi a Thutaka min chhun khaha, a thlaraua min luah khah veka, a hna ṭha bik thawk tlaka min buatsaih a duh vek a. Mahse, tihluihna a hman ngai loh avangin ringtute zingah pawh amah pawl tama atana inpe thûk apiangten thlarau thilpek an dawng tam ṭhin. Chuta ṭangin thlarau nun puitlinna kawngah hruai luhin an awm thûk deuh deuh a, chumi hnuah an inpekna azir zelin malsawmna hlu bik dawng tura buatsaih tlak an ni chho thei ṭhin a ni.

Pathian Thlarau chhun khaha awm tak takte chuan he kohluihna hi an thil thlakhlelh ber a ni ṭhin a, hrehawmna chu sawi loh, martar hial pawh ngai dawn mahse, chu chu an duhthusam ber a ni zawk ṭhin.

“Chutichuan, Krista hnenah kaihthawha in awm ve tawh chuan chung lam, Pathian ding lama ṭhu Krista awmnaa thil awmte chu zawng rawh u. Chung lama thil awmahte chuan in rilru nghat tlat rawh u, leia thil awmahte chuan nghat lovin.” (Kolosa 3:1-2)

Leave a Reply

Your email address will not be published. Required fields are marked *

error: Content is protected !!