Kohhrana rawngbawltute mawhphurhna – Upa K. Zalawma

KOHHRANA RAWNGBÂWLTUTE MAWHPHURHNA
(Rawngbawltu inhlanthar ni pual atân)

Upa K. Zalawma

Presbytirian Tual chhung Kohhranah hian rawngbâwltu chi hrang hrang kan awm a, chanvo bik neia kan ṭan hun chhûng (term) hi a tlangpuiin kum khat a ni a, kum tina ruat thar emaw, thlan thar a ni ṭhin.

Kum khatTerm aia rei neia thlan (Elect) kan neih te:
1. Kohhran Upate : Anni hi dam chhûng ṭang tura nemngheh an ni.
2. Tualchhung Upa (Kohhran Committee Member): Kum thum ṭang tura kohhran danzawhkimten an thlan a ni.
3. Kohhran Hmeichhe Committee Member: An ni hi kum hnih ṭang tura kohhran hmeichhe memberten an thlan a ni.
Heng bâk hi chu kum tina ruat thar kan ni deuh ber a, Kohhran pawhin Rawngbâwltu inhlan tharna hi kum tinin a siam deuh zel ṭhin.

KOHHRANA RAWNGBÂWLTU HRANG HRANG LEH AN MAWHPHURHNATE
1. PASTOR :
Pastorte hi Full time-a rawngbawl tura nemngheh an ni a, an pension hnuah pawh rawngbâwltu pawimawh an la ni reng tho a, an pension hmaa Biala an mawhphurhna chi hrang hrang zinga tlem tê lo sawi ila:
1) Pastor chu a Bial chhunga Pathian Thu leh Sakrament rawngbawlnaah leh chhiatni thatnia rawngbawlna pawimawha mawhphurtu a ni.
Pastor tih tùr pawimawh zualte chu – Pathian thuhril te, Sakrament rawngbamâwl te, ringtute tihchak te, inthlahdah chawh harh te, hrehawm tuar thlamuan te, Krista taksa tihpuitlin te, a enkawlna hnuaia kohhran mi zawng zawng kan leh ngaihsak te, kawng tinrênga kohhran rorelna dik ngaihtuah te a ni.
[adToAppearHere]
2) Pastor chuan a Bial chhûnga kohhran chhungkuate kum khatah vawi khat aia tlêm lo a tlawh chhuak ṭhin ang a, harsatna bik a awm erawh chuan hriatthiam tur a ni ang a; khawhar te, damlo leh harsatna tawkte phei chu a ngaihsak bik ṭhin ang.

3) Pastor chu a Bial chhûngah rorelna dik tak kengkawh tûr a nih avangin a tel theihnaah chuan Kohhran Committee a kaihruai ṭhin ang a, Kohhran Pathian Biak Inkhawm pawh a kaihruai ṭhin ang.

3) Bial chhûnga Committee leh Inkhawmpuia telna turte chu :
(a) Bial chhûng kohhran tin committee (a remchan dan azirin).

(b) Bial Standing Committee, Bial Nomination Committee, Bial Sunday School Committee, Bial KTP leh Bial Kohhran Hmeichhe Committee leh Bial huap Committee dangte.

4) Pastor chuan Kohhran hun pawimawh – Krismas, Kum thar, Good Friday, Easter Sunday leh Beihrual, Inkhawmpui leh Biala programme pawimawh etc. a awm tein Bial a chhuahsan tur a ni lo (Hei hian phalna nei leh Synod-in tih tur a pekte a huam lo vang) – (Pastoral Ministry Kaihhruina Bu – phek 16-17).

2. KOHHRAN UPA :
Kohhran Upate mawhphurhna tlem lo sawi leh ila:
Kohhran Upa chu kan Dân buin a sawi angin Presbytery-in Upa atana a thlan leh nemngheh a ni a. A hna tur mumal taka ziak a awm lo chungin hna tam tak leh mawhphurhna tam tak a koah a innghat a. Upa taima tak tân thawh tur a tam a, thatchhe deuh tân lah thawh mumal nei mang lova kum hman liam mai mai a awm thei bawk a. Chuvangin, inkhai rual zâwka thawh a nih theih nân a hnuaia mi te hi Kohhran Upa tih tur tlangpui a ni a. Upa chuan zawm hram a tum tur a ni.

1) Committee thurel bawh zui ngai a awmin a bawh zuitu bik inruat a ṭha a, thahnemngai taka bawh zui thuai thuai hi Upa tha tehna pakhat a ni.

2) Kohhran Upa chuan ringtu chak lo leh hnungtawlhte tlawh chhuak/zawng chhuakin Pathian thu leh ṭawngtaina hmanga chhan chhuak turin a bei ang.

3) Upa chuan a Bial chhung a tlawh ṭhin ang a, damlo leh harsatna tâwk chhungkuate phei chu a tlawh zing bik ang a. Lâwmna lam thil an dawn pawhin a hriatpui tur a ni. Upa Bial chhûnga kohhran pâwl dang awmte pawh a remchan anga tlawh ve a ṭha, inhmelhriatna hian thawh hona ṭha a siam chhuak thei a ni.

4) Pastor remchan loh ṭumah chuan mitthi vui leh inneih (Inneih kawltu tan) hi Upa kutah a awm a, inneite tana ṭawngṭai leh lusunte tana ṭawngṭai hi a Bialtu Upa mawhphurhna ni bik deuh sela a ṭha.

[adToAppearHere]

5) Sakramen buatsaih: Kohhran Upate chuan Lalpa Zanriah Sakramen chu ṭawngṭaina nen uluk taka buatsaihin maicham chungah an lo chhawp lawk vek tur a ni a. Inkhawm bânah Sakramen hmanruate chu Upate ngeiin fimkhur takin senghawi fel tur a ni.

6) Kohhran Inkhawm hruai hna : Pastor awm loh ṭum chuan Upaten Kohhran inkhawm an hruai tur a ni a. Thla bi emaw, hapta kar bi emawa inhruai chhawk ni se la. Pathian Biak Inkhawm Hruaina bu zui hram hram tur a ni. Inkhawm kaihhruaina hi puithû tak leh fel taka hruai a ṭha. Inkhawm hruai dan azirin inkhawm boruak a ṭhain a ṭha lo thei tih hriat reng tûr a ni.

3. Pem Upate: Pem Upate hi Kohhran Committee-ah tel ve lo mah sela, Upate rawngbâwlna dang – thuhril te, Sunday School zirtirna te leh Kohhran Committee hnuaia committee pêng hrang hrangah te hman theih an ni a. Rawngbawlna kawnga khawhar lova siam leh hman ṭangkai chu an pêmna Kohhran Committee bengvârna tur a ni a. Lalpa Zanriah ṭhehtu pui tur pawhin sawm theih an ni ang (Pastoral Ministry Kaihhruaina p-19-22).

4. Tualchhûng Upa (Committee Member):
Kan Dân pui Bung II-na, 2-na, b-na (ii)-nain a sawi angin “ Kohhranin ṭul a tih chuan Secret ballot hmangin danzawhkim zinga mi Committee-a tel tur, Bial kaihhruainain a thlan belh ang. Anni hi kum thum chhung an ṭang ang a, thlan nawn theih an ni ang” tih a ni a. Hemi dân hmang hian Coimmittee-a tel tur (Mizoramah chuan Tual Upa kan ti) kan thlang ṭhin. An ni hian Kohhran Upate an puiin Kohhran Committee-in an tih tur a ruat apiangah theih tawp chhuaha rawng bawl tur an ni tih an inhriat a pawimawh a, intih Upat lutuk chuan miin min ngei duh a, in dah hniam lutuk lahin a mawi bawk lo va, “A zuitu fel tak nih ka duh” tih hla hi vawn reng a ngai a ni ber mai. Tual Upa fel tak chu Kohhran Upa atân pawh an ṭha nge nge thin a ni.

A bik takin Kohhran Committee hi Kohhrante kal dân tûr uluk taka rêltu an nih avangin Dân hriat a ngai a, huaisen a ṭul a, dawhtheih leh tuarchhel a pawimawh a, kawng engkimah mipui hma hruitu nih a ngai bawk. Kohhran Committee Memberte chuan Kohhran inkaihhruaina hrang hrang hi an hre vek tur a ni.

5. RAWNGBÂWLTU DANGTE: Tualchhûng Kohhranah hian Kohhran rorèlna (Church Court) ni lo, Fellowship puitling pahnih leh puitling lo pakhat leh Kohhran Sub-Committee te, Sunday School Committee leh Pathian Biak inkhawma chanvo neitute, Zirtîrtute kan awm bawk. Chûngte mawhphùrhna tawi tê têin lo sawi zui ila:

1) KOHHRAN HMEICHHIA:
Pâwl hming leh thil tum :
A hming : Mizoram Presbyterian Kohhran Hmeichhia
Thupui: THUHRETU ATÂNA KOH “Ka thu hretute in ni ang”(Tirh 1:8)
A thil tum te:
1. Kohhran pum rawngbawlna tihlawhtling tura thawh ho.

2. Kristian chhungkua din nghehtir tura ṭan lak.

3. Ṭanpui ngaite Krista hminga ṭanpui.
4. Chanchin Ṭha puandarh.

Kohhran Hmeichhiate hi Bial leh Central-a inthlun zawm kan ni.
Kohhran Hmeichhia-ten rawng kan bawlnaah kan thupui leh thil tumte hre reng chunga rawng kan bâwl a pawi mawh. Mahni tuipui zâwng lama kal vak theih a ni a, kan thiltum tihlawhtling zâwnga hmâ lak hrâm hrâm tùr a ni. A bik taka rawng bâwlna kan neih chu Pathian ram thawhlawm ‘Buhfaiṭham’ enkawl hna hi a ni a; he hna hi Synodin Kohhran Hmeichhe kutah a dah a ni. Kohhran pum rawngbawlna tihlawhtling tur zawnga thawhho hi kan tum pawimawh tak a ni tih i hre reng ang u.

[adToAppearHere]

2) KRISTIAN ṬHALAI PAWL:
1. Pawl hming : Kristian Ṭhalai Pawl (K.T.P)
2. Thupui : Rawngbâwl tura chhandam
3. Thupui innghahna : Ephesi 2:10 “Thil ṭha ti atân Krista Isuaah chuan siama awmin ama kut chhuak kan ni si a; chu thil ṭha tih chu kan awmna turin Pathianin a buatsaih lawk a ni.”
4. A thil tumte:
(1) Isua Krista rinna leh amah anna kawnga ṭhalaite hruai.

(2) Kohhran kutke ni tura ṭhalaite buatsaih.

(3) Kohhran hn athawh tih puitlin.

(4) Krista Chanchin Ṭha puan darh.

K.Ṭ.P hi Bial leh Central-a inthlun zawm a ni. Tualchhûng Kohhran- ah hin Branch K.Ṭ.P a ding a, K.Ṭ.P-ten kan rawngbawlnaah hian kan thupui leh thiltumte hre reng chunga rawng kan bâwl zêl a pawimawh a, kan tum ber chu Kohhran hnathawh tih puitlin a ni tih hriain, Kohhran pumpui ṭhatna tur thleng phà ngei tura hma kan lâk hi a pawimawh tih hre rengin, rawngbàwl nâna kan hmanrua pawh hi ṭhalaite kohhrana 8hruai thleng thei ngei tur i hmang ṭhin ang u.

3. KOHHRAN PAVALAI PAWL :
Kohhran Pavalai Pawl (KPP) hi Kohhrana Fellowship kan neih pakhat, Fellowship puitling la ni chiah lo, Revival Department enkawlna hnuaia awm a ni a, Kohran, Bial leh Rampum huapin Revival Department-ah a inthlung khawm a ni.
1. Pawl hming : Kohhran Pavalai Pawl (K.P.P)
2. Thupui : Krista tâna nun.
3. Thupui innghahna : Phil 1:21

4. A thiltum te
(1) Mi dangte Krista hnêna hruai.

(2) Kohhran hmalâkna ṭawiawm.

(3) Kristian chhûngkaw ṭha din tura ṭan lak.
Committee hna thawh tur leh mawhphurhnate:
(1) An huam chhûnga member-te Krista hnêna hruai tur te, kohhran kutke ṭangkai ni tur leh, Pathian thu hriatna lama hmasawnna an neih theih nan rawngbawlna kawng hrang hrang a ngaihtuah ṭhin ang.

(2) Hun remchângah Pathian biak inkhawm/fellowship an nei thei ang.

(3) Bial pawn khawih tel progrmme a nei dâwn emaw, a tel dâwn emaw a nih chuan Kohhran Committee remtihpuina a la hmasa thin ang a, Bialtu Pastor a hriattir ṭhin ang.

(4) Tualchhûng kohhran dang nghawng programme a buatsaih dâwnin Kohhran Committee phalna a la hmasa ṭhin ang (Inkaihhruaina Bung 5).
Heng inkaihhruainain a sawite hi hrerengin K.P.P chuan a mawhphurhna hlen tumin rawng bâwl zel sela, a thiltum tak hlen chhuak pha lova a hmanrua leh behbawm lamah zâm ral mai lo se, Kohhranin a hlâwkpui leh zual ang.

4. KOHHRAN SUB-COMMITTEE HRANG HRANGTE :
Tualchhûng Kohhranah hian Sub-Committee hrang hrang kan nei hlawm a, Kohhran in kan neih zât erawh a inang vek kher lo vang. Heng sub-Committee hrang hranga memberte hi keimahni zâwn ṭheuhah rawngbàwlna pawimawh chelhtu kan ni ṭheuh a, kan hma ṭheuha tih tur rèl tawh chu ṭha taka hlen thuai tum ila, a ṭha lam zâwnga hma sawn zêl pawh kan tum tur a ni.
Committee-in hna a thawhna kawngah hian mi dang zuitu nih aiin a hmahruaitu nih tum zel a ṭha a, kan duh zawng ang chauha mi thawhpui tum aiin, mite ngaihdan pawh pawm theia thawhpui thei mi nih tum hrâm hrâm a ṭha.

5. CHANVO DANGTE :
Kan sawi tâk bâkah hian Kohhrana rawngbawlna langsàr engemaw zât a la awm, chungte chu :
(1) Thuhriltu
(2) Sunday School zirtirtu
(3) Inkhawmpui palai
(4) Inkhawmna Ṭantu
(5) Inkhawmnaa khuang vawtu/hla hruaitu
(6) Biak In dar vawtu
(7) Kohhran Zaipawl hruaitu
(8) Inkhawm thawhlawm khawntu
(9) Inkhawm Receptionist
(10) Inkhawma hun neitu dangte.

[adToAppearHere]

Heng chanvo hrang hrang hi Kohhran chuan, Kohhrana rawngbawlna langsarte a ti (Nupa chungchang Dan Bung III B. 1). Heng rawngbawlna hi pawimawh lo bik a awm chuang lo va, kan chanvo chelhte tithlâwn lo tura Pathian hnênah inhlân thar reng tûr kan ni.

Thuhriltu chuan mahni tuipui lam ringawt aiin Kohhran mamawh zawng te, zirtirna him te, Kohhran thurin te Kohhran mite châwm nân a sawi ṭhin tur a ni.

Sunday School hi kan Kohhran Pathian thu inzirtirna laipui ber leh pawimawh êm êm a ni a, zirtirtu pawh hun dang leh hmun dangah pawh kan nun thlahdah lova invawng him tlat mi nih a ṭha.

Inkhawmpui hi Kan Kohhran kal zel dân tûr leh tih tûrte rèlna a nih avângin Palai mawhphurhna a sâng a, Dânzawhkim memberte aiawha palai hnà a ni a, taima taka kal leh rorel tur a ni.

Inkhawmna Ṭantu hi Inkhawm service-a element pawimawh tak, Pathian biakna bul ṭan nâna Bible châng chhiara inkhawm ṭawngṭaia hlântu a nih avângin a dinhmun a pawimawh êm êm a, Ṭantu a awm loh chuan inkhawm a ho sawt thei a, ngaihpawimawh tur a ni.

Khuangvawtu/Hla hruaitu hna hi rawngbâwlna chanvo-ah chuan a regular ber a ni hial ang. Inkhawm apianga chanvo neih ziah a ni a, mi taima tak takte chan chi a ni. A pawimawhna êm êm chu – hla hruaitu an thiam chuan Kohhran Pathian biakna boruak a ṭhain mi rilru Pathian be turin an hruai lut thei a, an thiam loh chuan Kohhran Pathian biakna boruak an ti chhiain mi rilru an tibeidawng thei. Pathian thuchah ṭha taka ngaithla tûr chuan zai boruak ṭha bawk kha a ngai ṭhin. Solfa zai leh Lêngkhawm zai hruai thiam mi an pawimawh a, hla key tawk hria an ṭangkai bawk. Zai hi Music lam a nih avangin zai hruai tûr chuan music kalhmang hria an pawimawh zual. Chuti khawpa rawngbâwlna pawimawh, midang tihlima ti lunghnûr thei an nih avangin Kohhranho pawhin tawngtaipui nasat hle an mamawh a ni.

Biak In dar hi Inkhawm dâwn mai ni lovin vuakna tûr dang pawh kan nei a, a vuak zât tûr pawh siam thliah a ni. A hun taka vuak leh a hun taka ṭan dâr vuak a ngai a, inkhawmna atâna pawimawh hmasa ber a ni a, mi taima leh hun vawng dik peihte hnà a ni.

Kohhran Zaipâwl hi Kohhrana rawngbawlna pawimawh a ni a, Special Number/Special Item a ni mai lo. Chuvangin zaipawl memberten an mawhphurhna ṭha taka an hlen theih nan Zaipawl hruaitu ṭha, music lama vengva, thin nel, zirtir thiam leh taima nih a ngai.

Thawhlàwm hi Pathian biak nâna element pawimawh tak, miin Pathian tâna an neih an pêk lêtna a nih avangin a khawntu hi rawngbâwltu langsar zinga chhiar an ni a, mahni invawng thinghlim chunga khawn ṭhin tur a ni.

Inkhawm Receptionist/Usher hnà hi hnà pawimawh tak a ni a, inkhawm ṭhutna tûr fel taka rem leh, chhuah leh lam thlengin zahawm taka Biak in kan chhuah san theih nâna hna pawimawh a ni a, mi inchei fai leh zei, smiling face pu mi, mi hawihhâwm nên a inhmeh bîk.

Inkhâwmnaa hun neitu dangte tihah hian Nilai zân thupui hawngtu te, Inkhawmpui report petu leh Kohhranin chanvo a siam dangte a huap thei ang. Thupui hawn hi a inziak sâ bâk sawi zau theih nise a ṭha leh zual.

A tâwp berah chuan Tirkoh Paulan Pastor Timothea hnena a thuchah hian hnu khar ta ila:

“Pathin mit hmuh leh, mi nung leh mitthi ngaihtuahtu tur Krista Isua mit hmuhah chuan, a inlarna leh a ram chhalin, thahnemngai takin ka hrittir a che. Thu chu hril rawh, a hunah te, a hun lovah te pawh bei zel rawh; dawhthei taka zirtir chungin an thiam loh hriattir la, zilh la, fuih rawh.

“Zirtirna dik an ngaih peih loh hun a la thleng dawn si; an bengte a zat avangin, anmahni duh zâwng angin zirtirtute an hnenah an khâwm zâwk ang a, an bengte chu thutak lamah an chhu ngâwng ang a, thawnthu lam panin an pêng tawh ang.

“Nang erawh chu engkimah fimkhur la, Chanchin Tha hriltu lam hna thawk la, i rawngbâwlna kha hlen rawh.”

Rawngbâwltute hi Chanchin Ṭha hriltu lam hna thawktute kan ni a, engkima fimkhur a, kan rawngbâwlna hi a tâwp thlenga hlen tûr kan ni tih i hre reng ang u.

[adToAppearHere]

Leave a Reply

Your email address will not be published. Required fields are marked *

error: Content is protected !!