KHITA HMING AN LAM HUN CHUANIN KA AWM ANG
(When the roll is called up yonder I’ll be there.)

James Milton Black-a chuan Pathian rawngbawl hi he khawvela a awm chhan a ni tih a hriat chian em avangin rawngbawlna chu mut mawh hnar mawhah a neih a. Mahse a hnathawh chuan a duh khawp a thleng hlei thei ṭhin lo.

Thahnemngaih vanga thawpik up up chang a ngah hle a, a rilru kaptu lian ber chu an khua Williamsport thalaite Lalpa ke bula hruai a ni. A taksa pawhin a chauh phah hle ṭhin.

Tuk khat chua Biakina a ṭawngṭai haw lamin kawtthler reh lai tak a paltlang lai chuan a rawngbawlna chu a chhut let neuh neuh a. Chutih lai tak chuan hmeichhe tleirawl thawmhnaw hlui lam tawh tak inbel hi amah tawk zawngin a lo kal hnak hnak a. Chu tleirawl chu a hmuh fo hnu ni mahse Biakin lamah chuan a hmu ngai hauh lo tih a hre chiang a. A sam chu khuih mam a ni lova, a taksa lang lai leh a hmel chu a dawldang hle a. A chezia hrim hrim pawh a inthlahrun hmel em em a.

Chu tleirawl chuan Pu James-a chu melh zak zak chungin kawngsir lamah hel a tum a. Mahse Pu James-a chuan a be chak ta tlat mai a, aw dam diai hian, “Mami, i ṭha em?” a han ti a.

Tleirawl chuan chhang mai lovin a tawi hrat hrat a. “Mami, i hming min hrilh thei em?” a tih leh takah chuan tleirawl chuan mi nelawm leh hawihhawm tak a ni tih hriain, “Ka hming chu Bessie a ni e,” a ti ve ta a.

Pu James-a chuan Bessie-i chanchin chu a zawt chiang ta a. Bessie-i’n a chanchin a han sawi chuan Pu James-a rin dan tawk vel a ni a. Bessie-i pa chu zu ngawlvei a ni a, a nu chu a hrisel loh avangin hna a thawk hleithei tawh lo va, chuvangin, Bessie-i chuan a thiam leh theih ang angin an chhungkaw eitur a dap ve ṭhin a lo ni a. Ani ang naupang mai tan chuan sum hmuh a harsat em avangin ruk te pawh a ru hial ṭhin a lo ni.

Pu James-a’n engvanga Biakina kal ve ngai lo nge anih a han zawh chuan Bessie-i chuan inkhawm a chak ve ṭhin thu leh, ralkhat aṭangin an zai ri te a lo ngaithla in a thiam ang angin a lo zawm ve ṭhin thu te a sawi a. Mahse, an dinhmunin a zir loh vanga inkhawm ngai lo anih thu te a sawi ta keuh keuh a.

Mi tumruh Pu James-a chuan Bessie-i chu inkhawmnaa tel ve ngei turin tihtakzetin a sawm ta a. Bessie pawh chuan hreh tak chungin a pawm ve ta a ni.

Pathianni a lo thleng a, Bessie-i pawh chuan a thawmhnaw neih ṭhat ber ha chhuak vein tleirawl inkhawmna hmun chu a pan ve ta hnak hnak a. Pu James-a’n a lo hmuh chuan a lo dawngsawng vat a, midangte nen inhmelhriattirna te a nei a, a ṭhiante pawh chuan an lo kawm tlangnel ve thuai a, nuam pawh a ti ve hle a.

Chumi ni aṭang chuan Bessie-i chu hming lamna bu-ah a hming ziah luh a ni a, Pathianni a lo thlena a hming an lam apiangin phur takin “AWM” a lo ti ve ta lauh lauh ṭhin a. Chutia ṭhiante zinga Pathian faka hlim taka a awm thei chuan Bessie-i hringnun chu nasa takin a ti danglam a, Pathianni apianga inkhawmnaa kal chu nuam a tiin a nghakhlel hle ṭhin a ni.

‘Khawiah nge Bessie?

Tuk khat chu, Pathianni a lo thleng leh ta a, tleirawl rual chu hlim takin an zai leh ta tuarh tuarh a. Pu James-a chuan hming a han lam leh ta lauh lauh a, mahse a tawp bera Bessie-i hming a han lam chuan phur taka ‘AWM’ lo titu tur reng reng a awm ta hauh lo mai a. Pu James-a chu a hrilhhaiin a rilru a khingbai hle mai a, zirlaite zingah lah Bessie-i chanchin hria reng an awm si lo va.

Inkhawm ban veleh chuan Pu James-a chu rilru khingbai takin Bessie-i te in lam panin a kal ta vang vang a. An in a va thlen dawn ṭep chuan Bessie-i pa zurui kal pai ṭuang ṭuang chu a hmu a, inchhung a va luh chuan ngui taka Bessie-i nu chhuata lo ṭhu hnenah chuan “Khawiah nge Bessie?” a va ti nghal tawng mai a. Bessie-i nu chuan Bessie-i chu a dam loh thu leh a chauh em avanga khuma a mut thu a lo hrilh a. Pu James-a chuan Bessie-i khum lam chu panin chau taka Bessie-i lo mu bem chu a va hmu thuai a. A pang an han khawih sak chuan a lo sa vur mai a, “Bessie, vawiinah i rawn inkhawm si lo va, i hming kan lam laia phur taka ‘AWM’ lo ti ṭhin kha i awm ta si lo va, kei leh i ṭhiante kan hrilhhai teh asin” a ti a. Bessie chuan, “Ka pu, ka taksa hi a nain ka chau em mai a, ka rawn inkhawm peih ta lo a ni. Ka pu, Isua hnena ka kal hun hi a hnai tawh hlein ka hria,” a han tih chuan Pu James-a chuan theih tawpin a han thlamuan a. A hnu deuh ah chuan Bessie-i chuan, “Ka pu, he leiah chuan ka hming lam laiin ‘AWM’ ti thei tawh lo mah ila, khitah Vanah ka hming an lam hun chuan ‘AWM’ ka ti thin tawh dawn asin,” a ti ta a. Chumi ni, Pu James-a awm lai reng chuan Bessie-i chuan a lei hringnun khawvel chu a lo chhuahsan ta a ni.

A chanchin hi a lungchhiatthlak teh e maw..!!

Pu James-a chu hnuk ulh ṭeuhin a mittui a sur zung zung a. Hun rei tak hnuah pawh Bessie-i ṭawngkam chu a bengah a ri nawn awn awn ṭhin. “Khita hming an lam hun chuanin ka ‘AWM’ ang.”

Nikhat chu James Milton Black-a chuan a rawngbawlna te chu chhui kirin a mitthlaah Bessie-i a rawn lang uar uar a. A rilrua Bessie-i ngaihtuah reng chung chuan Van lam ngaih hla sak tumin Piano bulah a han ṭhu a. Mahse chutiang lam hawi hla chu sak tur a hre ta hauh lo mai, Bessie-i ngaihtuaha rei fe a ṭhut hnu chuan ‘Aw’ zawite fiah tak si hian, “Nangmah ngeiin phuah rawh” a rawn ti a. A ngaihtuah nasa hle mai a, chutia Bessie-i ngaia a ṭhut reng lai chuan he hla, khawvel huap pawha hla lar leh chuai thei tawh ngai lo tur, ‘KHITA HMING AN LAM HUN CHUANIN KA AWM ANG’ tih hi, kum 1893 khan a lo phuah chhuak ta a ni.

He hla mawi leh lungkuai tak mai hi khawvel ṭawng chi hrang tam takin lehlin a lo ni tawh a, artist lar tak tak, Loretta Lynn, Johnny Cash, Jim Nabors, Willie Nelson leh Doris Johnson te bakah zaithiam lar leh group zaipawl tam takten version 500 chuang zetin mawi takin rimawi nen an lo rem tawh ṭhin a, musician thiam tak takten music chi hrang hrangin mawi takin an lo cheimawi tawh ṭhin bawk a, khawvel hla mawi, ṭha leh lar a tling takzet a ni.

‘Khita hming an lam hunin kan ‘AWM’ ve ang em.?’

Leave a Reply

Your email address will not be published. Required fields are marked *

error: Content is protected !!