Khawlkungi lemchan thlirzauna – K. Lalnunhlima

 

 

 

Mizo hmeichhe zinga lemchan thawnthu ziak leh thawnthu phuah kawnga a sulsutu pawimawh tak mai, Khawlkungi (1927-2015) hian lemchan thawnthu (drama) te, thawnthu (fiction) te, leh lehkhabu lehlin (translation) lamah a thawh hlawk hle a. Dr. Laltluangliana Khiangte-in Khawlkungi leh A Kutchhuakte lehkhabua a ziah danin thawrnthu hi 26 a ziak a (26), Sap thawnthu hi 38 lai a letling bawk a (27-28); tin, lemchan thawnthu hi 37 a ziak bawk (23-24) a, a thu la vawnthat leh chhut chhuah erawh chu a tam lem lo. Thu leh hla lamah hian India chawimawina sang Padma Shri (1987) leh MAL Academy Award (1998) bakah chawimawina dang pawh a dawng nual a. A chanchin hi Indigenous Writers of India ah leh Mizo Who’s Who bu-ahte a chuang bawk. Thuziak lamah hian lawmman ropui tak tak a la nual tawh bawk a: thawnthu inziahsiak (1972)-ah leh lemchan thawnthu inziahsiak (1982)-ahte pakhatna a lo hauh tawh nghe nghe a ni.

Khawlkungi hian kum 1970-ah khan lemchan thawnthu hi a ziak tan a; Mizo hmeichhia mai ni lo. Mizo mipa zingah pawh ani anga lemchan thawnthu ziak nasa hi an awm mang lo a ni. Tun tumah hi chuan a thuziak dangte chu kan dah tha rih ang a, a lemchan thawnthu ziahte kan thlir zau dawn a ni

  1. ALEMCHAN THAWNTHU ZIAHTE

Khawlkungi lemchan thawnthute hi a hun laia chan hlawh tak ni hlawm mah se, a zawng a za chuan mipui chhiar theih tura chhawp chhuah a la ni hlawm lo va. A then a zar chauh hi a bua chhuah a ni a, bothlau eng emaw zat a awm tawh bawk a, a pawiin a uiawm hle a ni.

1.1 A Kutchhuak Hriat Theih Chinte

Khawlkungi hi, Dr. Laltluangliana Khiangte-in. Mizo hmeichhe zingah chuan lemchan thawnthu ziak kawnga inhmang nasa ber leh inhmang lar ber a ni’ tia a sawi hi a pawmawm hle. Ani hian Khawlkungi hi a dam laiin a kawm a, a chanchin a ziahsak a. Khawlkungi leh A Kutchhuakte tiin a bu hmingah a vuah a. Chu lehkhabua Khawlkungi lemchan thawnthu ziah a rawn tarlante chu

(1).Pangpar Bawm(1972-a ziah, 1977-a chantuala chan)

(2).Hmuh Theih Ka Va Duh Em (1972-a ziah leh chan)

(3).Ram Mawi Kalkawng (1978-a ziah ich chan)

(4).Eden uan (1979)

(5).Jejebeli (1983)

(6).Nipui Vanglai Tawnmang (1984)

(7).Phuba (1979)

(8).Genevieve (1983)

(9).Khawchhak Miing (1984

(10).Josefa (1977)

(11).A Va Pawi Tak Em (1982)

(12).Ngaihdamna Luipui (1978)

(13).Thangthar Nun (ziah 1982, chan 1988)

(14).Sikul Hmasawnna (1978-a ziah leh chan)

(15).Krisma tak tak (ziah kum – 1974, chan kum 1990)

(16).Monu Sual (ziah 1982; chan 1983)

(17).Sual man Thihna (1989-a ziah leh chan)

(18).Vur  Vari (ziah 1978; chan 1979)

(19).Dan Rangkachak (1990-a ziah leh chan)

(20).Man leh Mual (1991-a ziah leh chan)

(21).Rip Thiala (1976-a ziah leh chan)

(22).Chhungkaw Thubuai (1992-a ziah leh chan)

(23).Drugs Hlauhawmzia (1993-a ziah leh chan)

(24).Krismas Thilpek (1996-a ziah leh chan)

(25).Kumhlui leh Kumthar (1982-a ziah leh chan)

(26).Buhfai Tham (1995-a ziah leh chan)

(27).Rawngbawina Entawn Tlak

(28).In Hre Lo Em A Ni

(29).Mi Chhaw Paruk

(30).Hun Hlutzia

(31).Hmeichhe Chan Chhiatzia

(32).Nun Kawng Dik (2004-a ziah leh chan)

(33).Kristian Hma leh Kristian In

(34).Beram Vengtu Naupang teh Uite (2003)

(35).Krismas Tree

(36).Khawchhak Mifing Artabana, leh

(37).Centenary Documeniary Film (ziah 2004: chan 2004) te hi a ni (23-24).

Amaherawhchu, a lemchan thawnthu tam tak hi chu mipui chhiar theih tura theh darh a ni hlawm lo va, a then a lo bothlau tawh bawk nen, a kutchhuak zawng zawng hmuh theihin a awm ta rih lo va, a pawi hle. Cyclostyle printer-a a her chhuahte leh chhutkhawl (press)-a a lemchan thawnthu tihchhuah thenkhat pawh a bu a siam tlem avangin a riral zo va, a kawpi bo hlen ta pawh a awm hlek niin an sawi.

1.1

A Lemchan Bute

(1).Zawlpala Thlan Tlangah: Hei hi a lemchan thawnthute zingah chuan chhutkhawl (press)-a chhut hmasak ber a ni a, Exodus Press-in kum 1981, November ni 6 khan an chhu zo va, a chhuahtu Adult Education Department (Gov’t of Mizoran) chuan bu 2,000 lai a theh darhsak a ni (20). He lemchan thawnthu ngaihnawm tak mai hi a hnuah nove-in a ziak tha leh bawk a, chu chuan he lemchan hi a chhilh bo lek lek thin niin a lang.

(2) Lemchan Thawnthu Thlan Chhuah: He lehkhabu hi kum 1999-ah khan chhut leh chhuah a ni a, lemchan tawi pariat lai dah khawm a ni, chungte chu -Hmuh Theih Ka Va Duh Em, Thangthar Nun, Phuba, Rammawi Kalkawng. Nipui Vanglai Tawnmang, Isua Pian Thu, leh Heichhe Hmasawnna tih te hi a ni.

2.CHANTUAL. LEH KHAWLKUNGI LEMCHAN

Khawlkungi lemchan thawnthute hi a chan (acting) lamah pawh a hlawhtling thawkhat hle a, pawl hrang hrangin hun leh hmun hrang hrangah an lo chang tawh thin a ni. Kohhran leh pawl hrang hrangin sum tuak nan lemchan an duh a, ani hi an ziahtir chamchi chu chuan chantual lamah a lemchante a vawrh lar ta thin a ni. A Iemchan thawnthu ziah hmasak ber, Pangpar Bawm, kum 1970 chhova a ziah chu Mission Vengthlang KTP-in kum 1976-1977 khan hlawhtling takin an lo chang tawh a, khawpui chhung hmun hrang hrangah an chhuah a, a hun laia mite chuan an hlut ve hle a ni. A Va Paw En tih lemchan, a ziaktu’n Pasal Duh Thlan tia a sawi bawk thin pawh hi a bua chhuah la ni chiah lo mah se, chantualah erawh chuan chan a ni tawh bawk a.

Tin, a lemchan thawnthu ta zawk chu kum 1977 atanga 2004 inkár thleng khan chantuala chan a lo ni tawh hlawm bawk a, Dr. Laltluangliana Khiangte-in a chhinchhiah danin, a lemchan zinga 26 zet chu mipui hmaa chan a ni tawh hlawm a ni (23-24). Lemchan thawnthu ziah mai chu a har viau lo a nih pawhin a changtu tur hmuh hi a awlai vak lo va, vawi tam tak chantir tur phei chuan a harsa ngawtin a rinawm. Chuvangin, Khawlkungi pawh hi hemi kawngah hian tluk loh rim a nam a, a hlawhtling hle a ni.

3.LEMCHAN THAWNTHU A ZIAH DAN

Pi Khawlkungi hian lemchan thawnthu a ziak rei ngai lo va, ama sawi danin, darkar 2 vel chan tur pawh ni se, zan khata zawh hman a tum bur thin a, a zawh hma chuan a ziak ngat ngat thin. Hetia zan khata zawh hman a tum thin chhan hi chu, eng dang ni lovin, a hnua chhunzawm leh a buaithlak vang leh a peihawm tawh thin loh vang a ni ber.

A dam laia Mizo Refresher Course a awm tuma ‘Lemchan Thawnthu Ka Ziah Dan’ tih thu a ziahah chuan hetiang hian amah ngeiin a sawi :

Lemchan thawnthu hi ka ziah dawn chuan thawnthu neih hmasak a ngai tlat a. Thawnthu ka phuah hian lemchan thawnthu siam rem theih turin ka phuah thin a ni. Lemchan thawnthu ka ziah tam takte chu Bible atanga ka lak chhuah pawh a awm tho mai. Mi tam zawk thawnthu ziahte hi lemchan thawnthuin siam dawn i la, tih hleih theih loh a tam khawp mai.

Lemchan thawnthu ka ziah dawn chuan :

1.Ka mitthlain lemchanna hmun tur ka ngaihrualh hmasa phawt a, lemchan thawnthu ka hman tur nen a inmil dan tur ka ruahman masa thin.

2.Lemchan thawnthu ka ziahah chuan a changtu turte ka ngaihtualh leh a, a tlem thei ang ber chan theih dan ka ngaihtuah leh a.

3.Tawngkam sei lutuk hman hi lemchan atan chuan ka hmang ngai lo. Thinrim tawng emaw, lawm leh hlima tawng danah tawngkam hman hi ka ngai pawimawh a. Radio-a chan turah phei chuan tawngkanm hman dan hian awmzia a neih bik avangin ka hmang uluk hle thin a ni.

4.Lemchan thawnthua an hun laia an inchei dan tur ka ngai pawimawh hle bawk. Puanzar khar zing lutuk hi mit a tikham ka ti a, a lam lo thei ang bera siam ka tum thin a ni (40).

Khawlkungi hian ama irawmin lemchan hi a ziak nual a, “Thawnthu ziak mi tan chuan lemchan thawnthu hi phuah hran vak a ngai lo va. kei pawhin ka phuah hran ngai lo. Ka mitthlaa ka suangtuahna atangin ka ziak mai thin a ni”, (41) tia a sawi hi ama irawm lemchan thawnthu a ziah thin dan chu a ni. Thawnthu phuah mi a nihna hi a lemchanah pawh hian a rawn lang a, lemchan thawnthu thar hlak ziak tur hian harsatna a nei lo viau a ni.

Chutih rualin, thawnthu awm tawh sa hmanga lemchan thawnthu buatsaih (dramatize) lamah pawh hian a kut a kal viau mai a, Sap thawnthu atangin lemchan thawnthu eng emaw zat a buatsaih tawh a, a hma lama a lemchan kan han tar lan takte atang khian a chiang mai awm e.

 

4.TAWNGKAM (DIALOGUE) A CHHEH DAN

Sawi tawh angin, Khawlkungi hian a lemchanah reng reng tawngkam a chhep duah ngai lo va, tawngkam sei aiin a tawi lam a ngai pawimawh zawk zel. Hei hi lemchanah chuan a pawimawh em em a, thiltih (action) luahlan khawp leh ninawm khawp a awm thei a, lemchangtute tan pawha vawn bel harsa khawp a nih a hlauhawm a, a thlirtute tana ninawm tham a nih phei chuan a hlawhchham hlauh thei a ni.

Ni tina kan tawngkam hman hi lemchan tawngkamah pawh hman a ngai thin a, mipui tawng tualleng ngei hman a nih loh chuan a tak anna a awm lo thei. Hei hi Khawlkungi hian a hre chiang em em a, sermon tawngkam ni lovin inbiakna tawngkam, tawngkam tualleng ngei a hmang thin (41).

5.THILTIH (ACTION) A THLIR DAN

Lemchan thawnthuah chuan inbiakna tawngkam (dialogue) leh thiltih (action) hi a inbuk tawk a ngai em em a, thiltih tel mang lova inbiak char char ringawt hi chuan lemchan a hmuhnawm thei thin lo. Khawlkungi pawn chu chu a ngaih pawimawh lam tak a ni a, a lemchan thawnthuah reng reng thiltih (action) chu a theih anga tam leh hmuhnawm zeh lan a tum thin. Amah ngeiin heti hian a ziak:

Lemchan tur a nih avangin thutkhawma titi ringawt turin lemchan thawnthu hi ka ziak ngai lo. Thiltih ieh chetziaa lantir theih ngei turin ka ziak thin a, a lo hrilhfiah zeltu turin thusawi tur ka ruat hranpa ngai lo bawk. An lemchan khan a thawnthu kalhmang chu a hrilhfiah tho dawn a, an thiltih leh an chetziaa lantir mai turin ka ziak zawk a ni. Lemchang tur an ni a, tawng tam duah aiin chetziaa lantir hi ka ngai pawimawh zawk bawk a ni (41).

6.LEMCHAN THLIRTUTE (AUDIENCE)

Thuziak mite chuan an thuziak lo chhiartu turte an mitthlà ran thin a, mahni lawm zawng leh phur zawng ringawt ziak lo vin, a chhiartute ngaihdan leh pawm zawng pawh an ngaihtuah tel chang a awm thin. Lemchanah pawh hian a thlirtute hi an pawimawh em em a, a hlawhtlinna pawh anmahniah a innghat lian hle.

Khawlkungi pawh hian a lemchan thawnthu ziakah reng reng a thlirtute chu a dah pawimawh em em a, a changtute tluk zetin a ngai pawimawh niin a lang. A thlirtute rilruah lemchanin a chhe zawng leh a tha zawnga hna a thawh thui theihzia a hria a; chuvangin, kohhran emaw. hnam emaw timualpho thei tur zawngin lemchan thawnthu a ziak ngai lo. Hemi chungchangah hian a ngaihtuahna kilkhawr ber thlengin a seng a, hnam dangin an lo thlir ve palh te pawh awm thei a nih avangin, kan hnam an hmuhsitna tur eng mah a zep duh ngai lo (41).

7.A LEMCHAN KALHMANG THENKHAT

Khawlkungi hian lemchan chi hrang hrang a ziak nain, a hawi zawng a inang deuh thup a; nun siamthatna lam leh mi zirtrna lam haw ani ber hlawm. Hetiang hian a lemchan kalhmang lo sawi dawn teh ang.

7.1.Problem Play

Thu leh hla ziah leh phuah lama inhmangte chuan khawtlang nun an thlir a, an vei a, a siam that nan thu leh hla hmangin an bei thin. Mizo khawtlang mun hi Khawlkungi pawh hian a thlir a, vei a ngah a, siam that ngai a hmu nasa a, chung chu a lemchan thawnthuah a tar lang thin. Hetiang hi Problem Play an ti a A lemchan thenkhat  Monu Sual te, Drugs Hlauhawmzia te, Chhungkaw Thubuai te, leh Sual Man Thiha tih te hi khawtlang nuna harsatna leh buaina hrang hrang awm a tar lanna leh a chin felna kawng a zawnna lemchante an ni hlawm.

7.2.Morality Play

Lemchan hi mihring nun darthlalang tha tak a nih avangin mihring nun siam that leh kawng dik kawhhmuh hi lemchan ziaktuten an tum fo thin a, chutiang atan liau liaua an lemchan ziakte chu morality play an ti a Khawlkungi lemchan thawnthu tam tak pawh hi hetiang kalhmanga ziah hi a ni.

7.3.Biblical Play

Bible-a chanchin leh thawnthu kan hmuh, ngaihnawm leh lar tak takte atangin Khawlkungi hian lemchan a ziak (dramatize) nual bawk a, chungte chu Eden Huan te, Jejebeli te, Khawchhak Mifing te, Josefa te hi a ni. Tin, a lemchan thawnthu 2awng zawng hi Kristian thurinin an hrin chhuah a ni ti i la, kan sawi sualin a rinawm loh. A ziaktu hi Kristian a ni bawk a, Kristian rin dan leh nun dan hian a lemchan a chiah hneh hle a ni.

7.4.Feminist Approach

Khawlkungi hi hmeichhia a nih angin a lemchanah pawh mipa aiin hmeichhia an lang lian zawk a, Mizo khawtlang nuna hmeichhe dinhmun dawm kan a duh avangin a lemchanah pawh hmeichhia an pawimawh zawk tlangpui a, hmeichhe chanchin leh dinhmun hmuh tur a tam hle a ni Hmeichhe Hmasawnna leh Hmeichhe Chan Chhiatzia tihte phei hi chu, a thupuiin a tar lan ang hian, hmeichhe dinhmun dawm kan nan liau liaua a ziakte an ni. A lemchan thlirtu, Dr. Laltluangliana Khiangte chuan heti hian a ziak:

Hmeichhe tha (heroine) dinhmun tar lanna a ni fo thin a, a thawnthu ruangarn pawh a changtunu-ah a inzem nghet tlat thn. Hmeichhe dinhmun chawi san tumna leh mipa tih ang an ti ve thei a, hniam bika ngaih tur an ni lo ve tih thu hi Khawlkungi lemchan thawnthu atang chuan a chiang em em a i (22).

  1. TLIPNA

Tun dinhmuna Zonu zinga lemchan lama ropui ber tia chhal ngam, thu leh hla lama mi zakhaw rawih leh thawhhlawk ber ni bawk, Khawlkungi hian Mizo hmeichhe ai a awh zo em em a, mipa tam takin an tluk loh a ni bawk. Thlur hrang hrangah a kutchhuak hi sawi tur a awm teuh a. Chutih rualin, a lemchan thawnthu ziah tam tak, la hmuh chhuah rih lohte erawh chu a zawn chhuah leh dan kawng zawn ni thei se a duhawm hle a, a bua la chhuah lohte pawh hi chhuah thuai ni se, lemchan lama tui mite tan chuan a lawmawm hie ang.

 

Works Cited

Khiangte, Dr. Laltluangliana. Thuhlaril. CTBEB Publications, Aizawl: 1994.

—.Khawlkungi leh a kutchhuakte. Aizawl 2007

Khawlkungi. Lemchan Thawnthu Thlan Chhuah. Aizawl 1999

Rammawi Kalkawng leh Duhtak Sangpui. Aizawl: 2011

Lalthangliana, B. Mizo Literature. MC Lalrinthanga, Aizawl: 2004

Mizo Department. History of Mizo Literature. Aizawl: 2013

—.Theory of Literature Aizawl: 2013

 

 

Leave a Reply

Your email address will not be published. Required fields are marked *

error: Content is protected !!