Rammawi Kalkawng behchhana Khawlkungi lemchan (drama) ziarang

‘Rammawi Kalkawng’ Behchhana Khawlkungi Lemchan Hrang Hrang Kalhmang

Lalrammuana Sailo & Thang Sian Tluang

Thuhmahruai:

(Note – Advertisement link i hmuh chuan min click sak ve ngei ang che. He website domain manah hian kum tin cheng tam tak kan seng a, chuvangin he site a kal theih nan hian company advertisement te hi i clik hian i hmu ngei a ni tih an lo hre dawn a ni)

Padma Shri Khawlkungi hi kum 1927 September 14-ah Mission Vengthlang Aizawlah a lo piang a. Zirna lamah pawl ruk thleng chauh zir ni mah se mahni inzir zau mi a ni a. Khawvel Indopui pahnihna lai khan sipai-ah (Women Auxiliary Corps) a ṭang ve a. Indo a zawh hnuin 1947-ah a bang a. PWD Clerk hna a chelh leh a, chu hna aṭang chuan 1991-ah a pension a. Thu ziak kawnga a in hman nasat avangin India mi Civil chawimawina sang Padma Shri in Literature chu kum 1987 a dawng a. Kum 2015 khan a boral a. Khawlkungi hian a damlaiin lemchan thawnthu bu pahnih ‘Zawlpala Thlan Tlangah’ (1981) leh ‘Lemchan Thawnthu Thlan Chhuah’ (1999) te a tichhuak a. 1998 khan Mizo Academy Award hlan a ni bawk.

Khawlkungi Drama Kalhmang Chhuichianna:

Khawlkungi drama-ah hian a changtupa (hero) tia han chhal tlak an awm ngai lo: Dr. Laltluangliana Khiangte chuan Khawlkungi lemchan hrang hrang khaikhawmin “A changtunu lam chan a ṭha viau zel a; a changtupa (hero) lam sawi tur em em a awm ṭhin lo” (Khiangte 3) a lo ti hi a dik hle.

Khawlkungi lemchan tam takah hian hmeichhiaten a thawnthu khawvel an awp ṭhin a, amaherawhchu ‘ideal tragic hero’ an tih ang chi; ‘changtu chu dinhmun sang taka ding Lal emaw, hruaitu ropui tak dinhmuna ding te, changtuin a thil tihsual emaw thutlukna a siam sual vanga a chunga tawrhna lo thleng ang chi te, chu thil tihsual lo awm chhan chu amah a indahsan lutuk vang emaw a inngaih ropui lutuk vanga lo awm’ (Definition of Tragic Hero) te ang chi kha hmuh tur an awm lova, amaherawhchu chu mi avang chuan a lemchan te chu a hlu lo sawt anga ngaih tur a ni chuang lo.

‘Rammawi Kalkawng’ ah hian character 16 vel lai kan hmu a, a thawnthu hnukpui ber chu Pi Greii leh Rosa-i te chet danah a innghat a, an ni pahnihah hian Pi Greii dinhmun leh chetdan hian thawnthu kalzelah kawngro a su zual niin a lang. Pi Greii avangin Rosa-i nu thih hnuin Rosa-i chuan enkawltu a neih phah a, ama sualna avang vekin Rosa-i leh Toma Pu ten ‘Rammawi kalkawng’ zawn duhna rilru puin chu hmun chu an thlahlel zual a. Pi Greii’n a sualna a hriatchhuah a, inlamletna a neih hnuah a thawnthu chu tihtawp a ni. Pi Greii hi nu sual tak angin lang mahse amah hi thawnthu ina a mamawh harsatna siamtu leh tihlawhtlingtu a ni a, thawnthu tingaihnawmtu a ni bawk.

Khawlkungi hi hmeichhe dinhmun chawisan tumtu nimahse a thawnthu khawvela buainate hi hmeichhia vanga lo thleng a ni tlangpui. Lalthangfala Sailo lemchan kan thlir chuan a thawnthu khawvela buaina thlentu ni fo chu tlangval chapo tak, neinung tak chhungkua aṭanga lo chhuak, a hausakna hmanga midangte thunun tum ṭhin mi kan hmu a; chung ang lemchan zingah chuan ‘Sangi Inleng’ te, ‘Sual Man Thihna’ te, ‘Hmangaih Vangkhua’ te a tel. Khawlkungi drama-ah thung chuan hmeichhia ten a thawnthu khawvelah harsatna an thlen ṭhin.

‘Hmeichhe hmasawnna’ tihah chuan Thangi chuan itsikna avangin a hmeichhiatpui Chhingi chu Khawhring neia puhin Chhingi te chhung chuan khua aṭanga hnawhchhuah hial an hlawh phah a. ‘|hangthar nun’ tihah chuan Ruatliana nu leh pa chuan an monu (Ruatliana nupui Lianchhingi) chungchang titi dunin Ruatliana pa chuan an monu chu a fak hle a. Ruatliana nu erawh chuan chuti taka an monu a fel theih chhan chu an fapa vangah a ruat a, a ngaihdan chuan, “…a nupui (Thanchhingi) chu eng ual nge a nih ang ni? A pasal hi a hlau em a, suahsual han bawl na sela, a ekna ngaia ek leh mai asin a hmabak ang ni” (Scence IV,34) a ti a. Ruatliana pa chuan, a nupuiin chuti taka an monu chunga rilru a seng daih mai chu mak a ti a, a nupui nena an monu chungchang an han sawi dun dan aṭang ringawt pawh chuan hmeichhe rilru chu lang chiang nghal hlein a hria a ni.

‘Rammawi kalkawng’ ah pawh buaina leh harsatna a lo thlen changa lemchan thlirtute thin tirimtu ber chu Pi Greii niin a awmpui naupang Rosai leh a pasala pa (Tom-a pu) te tiduhdahtu a ni a, a sualna chu Rosai leh Toma pu-in ‘Rammawi kalkawng’ an zawn chhan pakhat a ni . A thawnthuah te chuan hmeichhe sual chu chhungkua leh khawtlang tana mi hlauhawm an nih theih dan a tarlang a; hmeichhe ṭha lo tak nundan chu rawn tarlangin chu mi hmang chuan hmeichhe ṭhain a tih ve hauh loh tur thil min hrilh pah a. Pi Greii sualna chuan thawnthu chu hmun pik lamah luhpui mahse a inlamletna-lehna chuan hmun thawvengah hruai chhuakin buaina chinfelna chu hmeichhia pakhatin a thil tih ṭha lo te a sim hunah a lo thleng ṭhin.

A thawnthu boruak siam turin rimawi/zaipawl a hmang ṭhin.


Khawlkungi hian a drama ziak tam takah zaipawl lemchan boruak vawng turin zai/rimawi a hmang fo. ‘Hmuh theih ka va duh em’ tih lemchanah chuan a tirah heti hian “Drama chan chhung zawng hian “Tlang mawi tak chu a awm, Ram hla takah chuanin,” tih hla play reng tur a ni” tih a ziak tel a (Hmun theih ka va duh em Scence I). Chutiangin ‘|hangthar nun’ tihah leh ‘Nipui vanglai tawnmang’ tihah te pawh ṭangkai takin rimawi chu a thawnthu boruak chawmtuah leh vawngtuah a hmang a. A lemchan hrang hranga hla a hman te hi thlirtu mipuiten an tuipui zung zung theih tur, an hriatbel sa leh lemchan thawnthu nena inrem thei tur nia a hriat a hmang mai niin a lang a. Chumi avang chuan hnamdang nuna innghat leh hnamdang hmingpu thawnthu pawh ni se Mizo phuah leh Mizo hla hman a hreh lo. Entir nan ‘Isua pian thu’ lemchanah chuan zaipawlin “Ram thianghlima Lal lo piang chu” tih hla Patea phuah chu a hmang a. Hei hian Khawlkungi’n lemchan thlirtute rilru hip leh hneh tuma a rilru a sen nasat dan leh ṭha nia a hriat anga thawnthu khawvel a siam rem dan a lantir kan ti thei ang.

Changtute mizia-ah stock character hmuh tura awm fo.
Stock character kan tih hian kan hriat bel leh ni tura kan beisei dan sa ang mizia nei te a kawk thei ang. Entirnan, Pastor chuan Pastor mizia tur leh rawngbawlna te, midang khawngaih theihna te a keng tel ang a, incheina thlengin Pastor chuan ama milpui awm incheina a inbel ang a, fiamthu thawh mi (Clown) te chuan an incheina pawh mak danglam tak leh fiamthu thawh mi a nih hriat theih tura a rawn inthuam ang chi te hi.

Rammawi kalkawng-ah pawh hian stock character hmuh tur a awm nual a. Rosa-i nu damlohna avanga thi lek lek te, Rosa-i pu, tar chak lo tak tawh te, Pastor te leh Pastor fanu Esther-i te thleng hian kan beisei dan leh rin dan sa mize pu an ni a. Pi Greii pawh hian a tawpah a sualna te hmuchhuak bawk mahse a sual dan tur leh a tihawm tak zel a tih ṭhin avangin stock character nei niin a sawi theih ang.

Khawlkungi hian a lemchan ziakah hian plot leh character aiin a theme a ngai pawimawh fo.
Lemchan ziaktu tam tak nena Khawlkungi danglamna chu plot leh character aia theme a ngai pawimawh zawk hi a ni. Aristotle-an “The plot, then, is the first principle, and, as it were, the soul of a tragedy: Character holds the second place” (Literature lamtluang 159) tiin drama ṭha ziak tur chuan plot a pawimawh ber thu a lo sawi a; William Shakespeare ve thung chuan drama ṭha ziak tur chuan character ṭha an pawimawh ber a ni tih a lemchan hmangin a lo lantir ve bawk a. Khawlkungi erawh chuan heng thil te hi inthunun tir leh inphuar tir loin lemchan thawnthu a ziak a. Lemchan thawnthu hmanga mihring rilrua tuh a duh chu a tihhlawhtlin theih nan hmanraw hrang hrang a fawmkhawm mai niin a lang a ni.

‘Rammawi kalkawng’ lemchan kan thlir pawh hian a plot leh character-te chuan duhthusam tawk lohna nei mahse a ziaktuin tarlan a duh ber ‘Rammawi kalkawng’ Vanram kalkawng chu a tarlang thiam em em a. Lan 7-naa Police II-nain a sawi “Rammawi kalkawng…Isua chu ka lo zawng hmu ta a nih hi. Amaha kal lo chu tumah Pa hnenah an thleng thei si lo va…” a tih hian he lemchan laimu hi a phawrh chhuak chiang viau a, awlsam takin a theme chu kan hmu thei a ni. A tlangpui thuin a thawnthu hrang hrangte chu simple plot huang chhungah a dah theih ang; thawnthu tluangtlam leh hriatthiam harsa lo tak, ngaihnawm tak siin lemchan thawnthu a ziak ṭhin a ni.

Khawlkungi hian a lemchan dang ‘Hmuh theih ka va duh em’ tih tawpah chuan heti hian thubelh a dah a. “He kan lemchan hian kawhhmuh a tum ber chu Isua zawngtute chuan, an hmu ṭhin a, Amahah chuan Damna leh Chatuana Nunna an chang ṭhin tih a ni.” tiin a lemchan te chu zirtir nei tura a duan a nihzia a ziak bawk (22).

Khawlkungi drama-ah chuan thil tisualtute inchhirna leh inlamletna hmuh tur a awm fo.
Rammawi kalkawng lemchanah hian thawnthu chhung hmun tam zawka buaina leh harsatna zawng zawng thlentu, mi chapo leh midang zahpahna tlachham tak Pi Greii chu thawnthu tawp lamah nun thar neiin a thil tihsual te inchhirin a inlamlet tih kan hmu. Tin, Doctor Dela pawhin a sualna a lo hmuchhuak ve bawk a. Hei hi Khawlkungi lemchan kalhmang a ni a, hemi avang vek hian misualin a tuhrah a sengna (dramatic justice) pawh a awm hlei thei ṭhin lo a ni. Chumi tichiang tur chuan entirna dang lo pe leh ila:

‘Isua Pian Thu’ ah chuan Khualbuk neitu Tahrea chuan “an pi leh pute aṭanga Lalber pindan pual a an ruat ṭhin chu” (121) Isua chan tir lovin Isua tan hmun a lo zuah lova. Khualbuk chang lova Isua a lo vahvaihtir avanga a inchhir zia kan hmu zui a. ‘=hangthar nun’ lemchanah pawh Rintei chu Biaka nen humsual daiin nupa ang maia khawsain a nu leh pate hriat lohin an lo inhual a. Mahse a ṭhiannu Madiki’n a thiltih dan chu a dik loh zia chu a hrilh a, Rinteii pawh chuan a ṭhiannu zilhna chu pawmin a nu leh pate thu zawm a tum tawh tur thu a sawi a, lemchan a tawp zui a ni.

Exotic setting leh Khawlkungi drama
Mawlmang taka hrilhfiah chuan exotic setting kan tih chuan ram pawn lama thawnthu innghat kan ti thei ang. Oxford English Dictionary chuan Exotic chu “originating in or typical of a distant foreign country” (348) tiin ahrilhfiah a. Narelle Atkins-in a sawifiah dan behchhan exoting setting chu lo sawi zau ila; thawnthu chu exotic setting nei a nih theihna chu a thawnthu ziaktu lam ai mahin a chhiartu lam aṭangin a ni ang. English novelist ten anmahni ram chhunga thil thleng thawnthu an ziah te chu Mizote tan chuan exotic setting a ni dawn a. Tin, Mizote tan pawh Mizo ziah ngei leh Mizoram chhunga thawnthu innghat ni ngeia lang mahse suangtuahna ram nena chawh fin leh kan la tlawhpawh loh leh daidar loh rama innghat thawnthute chu exotic setting nei a ni. Entirnan, C.|huamluaia thawnthu ‘Engtin awm ta zel ang maw?” tih te hi Mizo te tan ngei pawh exotic setting nei a ni.

‘Khawlkungi hi Indopui 2-na laia hmeichhe sipai (Women Auxiliary Corps) a ṭang hman a ni a, 1944 khan Airforce Clerk-ah a lut a’ (Khiangte, Laltluangliana 1) , a thil tawn leh a hnathawhin a zir bakah amah hrim hrim pawh mi inzir mi leh tumruh tak a lo ni bawk a, chu chuan hnamdang nun leh hmasawnna te, an chetzia leh nihphung te a man tirin chung chu a lemchan thawnthu tam takah a seng lut tih kan hmu a. Chumi avang chuan a thawnthu innghahna (setting) ah pawh Mizoram pawn a hmang fo.

‘Rammawi kalkawng’ pawh hi a innghahna chu Mizoram pawn a ni tih a hriat theih a. Lan 2-naa Lake Avenue lo lang te, an ram a vawt em em mai te, chaw a an rin te pawh alu leh bawngsa tih te a ni a, mihring hming pawh Pi Greii te, Rosa-i te , Tom-a tihte a ni a. ‘Hmuh Theih Ka Va duh em’ tih lemchan pawh Jerusalem khuaa innghat niin a changtute pawh Mari te, Marthi te, Petera tihte an ni. ‘Lalengmawia Ralte khan lehkhabu ngainatute a hip zawk beisei leh ring chungin a thawnthu bu hming sap ṭawngin a phuah ṭhin a’ (Thuhlaril 178), Khawlkungi hi chuan ram pawna innghat thawnthu a ziak a nih pawhin a thupui Mizo ṭawng thoin a dah leh a, Mizo literature huang zauhin hnamdang nun leh khawsak phung te min hmelhriattirin kan khawhawi a tizau te te a, chung karah chuan a thil tum leh a rilrua lian ber mihring nun chhe lai siamṭhat leh vanram/rammawi kalkawng thleng thei tura mi buatsaih a tum ṭhin.

Tlangkawmna
Khawlkungi lemchan zirchianna hi K. Lalnunhlima chuan Khawlkungi Lemchan Thlirzauna tih thupuia hmangin paper a lo ziak tawh a. Chutah chuan Khawlkungi’n lemchan thawnthu a ziah dawna a inpuahchah dan te, ṭawngkam a hman ṭhin dan te a sawi a, a lian berah Khawlkungi lemchan kalhmang sawiin lemchante chu Problem Play, Morality Play, Biblical Play leh Feminist Approach zawngin a rawn ṭhenhrang a. Dr. Laltluangliana Khiangte chuan Khawlkungi: World War – II Veteran leh A Sulhnu tih a ziak bawk a. Tin, Lalsangpuii’n Rammawi Kakawng Thlirna tih a ziah chu Re-Reading of Mizo Literature buah a chuang bawk a. Heng thil lo ziah tawh te leh tuna zirchianna te hian Khawlkungi ropuina leh Zofate tana a ṭhahnem ngaihna a lanchhuah tirin, kil hrang hrang aṭangin Khawlkungi zirtlak a ni tih hi a lanchhuahtir a, a chawimawi let theih hi duhthusam chu a ni.

Works Cited:
Khawlkungi. Rammawi Kalkawng Leh Duhtak Sangpuii. L.T.L Publications. Aizawl: 2nd Print. 2014.
—. Lemchan Thawnthu Thlanchhuah. Efatha Press, Chaltlang, Aizawl: 1999. Print.
Laldinmawia, H. Literature Lamtluang. CreatiVentures, Pune: 2015. Print.
Soanes, Catherine and Hawker, Sara. Compact Oxford English Dictionary. Oxford University Press. Oxford. 3rd edition, 2012. Print.
Khiangte, Dr. Laltluangliana. Thuhlaril. College Text Book (Mizo) Editorial Board Publications. Aizawl: 4th Print. 2006.
—. Khawlkungi: World War – II Veteran leh a sulhnu. One day theatre Festival Paper: Septermber 14,2016: Vanapa Hall, Aizawl. 2016. Print.
Lalnunhlima, K. Khawlkungi Lemchan Thlirzauna. One day theatre Festival Paper: Septermber 14,2016: Vanapa Hall, Aizawl. 2016. Print.

Bibliography
Atkins, Narelle. How do you define an exotic setting?
http://internationalachristianfictionwriters.blogspot.in/2014/09/how-do-you-define- exotic-setting-plus.html?m=1

Definition of Tragic Hero
http://literarydevices.net/tragic-hero/

Exotic setting in mystery analysis
http://www.enotes.com/topics/exotic-settings-mystery-fiction.’

Lalnunpuii, F. Re-Reading of Mizo Literarture. Department of Mizo, Gov’t Hnahthial College, Hnahthial. 2017. Print.

Sailo, Lalthangfala. Kan Ram A Ni (Lemchan Pathum). Mizoram Publication Board, Aizawl. 1999. Print.
—. Ramloh Lentu (Hmangaih Vangkhua leh Lemtesep panga). Gilzom Offset, Aizawl. 2008. Print.
—.Sangi Inleng leh Liandova te Unau. Zomi Book Agency, Aizawl. 2010. Print.

Leave a Reply

Your email address will not be published. Required fields are marked *

error: Content is protected !!