Khawkhawm hla leh Tho la ding ta che zirchianna – Dr KC Vannghaka

Re-Reading on
‘Kan huntawng Zingah Khaw Khawm A  Pawi Ber Mai’
and ‘Tho La, Ding Ta Che’

Dr. KC. Vannghaka
Govt. Aizawl College

Kan huntawng zingah khaw khawm a pawi ber : Suakliana

Tho la, ding ta che  : V.Thangzama

North Eastern Hill University (NEHU) hnuaia kan awm laia Iyr B.A.  & IIyr B.A. zirlaia Mizo Hlate zinga vawiin thlenga I Semester-te zir tur hla thlan chhuah zinga la tel, ‘Kan huntawng zingah khaw khawm a pawi ber mai’, Suakliana phuah leh ‘Tho la ding ta che’  V.Thangzama phuahte hi Mizoramin buai runpui a tawh lai hlate an ni a. Heng hla aṭangte hian Mizoram buai hrehawmzia leh thawpik thlakzia kha chiang takin lang a. A tuar ve lo tan pawh a hla thu han chhiar aṭang hian a hrehawmzia leh rapthlakzia chiang taka hmuh theih tura tarlan a ni.[adToAppearHere]

Amaherawhchu keimahni zirtirtu zingah pawh Mizoram buai hrehawmzia hre pha lo leh hmu pha lo tam tak kan lo awm ta a. Sawi zauna a awm loh chuan a hunlai boruak hriat thiam a lo har a, zirlaite hnenah pawh fiah taka sawizau a lo har tawh a. A hmu phaktena uluk tak leh chiang taka kan sawi chung pawha zirlai tam takin an hriat fuh hleih theih loh a ni a. Heng hla pahnih aṭanga zawhna, Mizoram buai lai chungchang a lo chhuahte hian, ‘hmanlai kan pi leh pute hunah vai an lo lian vak a, khuate an hal a, an sawikhawm ṭhin’ tiin kum 1880 chho vela vailen nen khan an ngaihfin ṭhin. Chuvangin tun ṭumah hian heng hla pahnihte hi zirtirtute pawhin kan hriatfiah theih nan leh zirlaite pawhin heng pahnih phuah hunlai boruak an hriat theih nan chhuizau kan tum dawn a ni. Amaherawhchu tunhma lama classical criticism an kalpui dan anga a phuahtute chanchin chipchiar taka luhchilh vak lovin, a hla aṭang hian kan chhui mai ang.

1.Kan huntawng zingah khaw khawm a pawi ber mai. [adToAppearHere]

He hla hi kan hriat angin Suakliana phuah a ni a. Amah hi kum 1903-ah Chhipphir khuaah a piang a, mitdel saa piang ni lovin a puitlin hnua vanduai vanga a khinghniha del a ni a. Chhipphir aṭangin Kanghmun Melvengah an pem a; Lungrang khuaah an pem leh a. Chuta ṭangin khaw chhak lamah Sialsir khuaah pem chhovin chuta ṭang chuan Riangtlei khuaah an pem a. Mizoram buai hma lawkin Tuipui ral Lianpui (Mualbawk) khuaah an pem leh a. Kum 1966-a Mizo National Front-in India Sawrkar lak aṭanga zalenna (Independent)a puanvang leh ralthuam cheleka inkahna hial a lo thlen tak avangin Assam Sawrkar chuan Assam Disturbed Act  1955 tlawhchhanin Mizoram chu rambuai (disturbed area) –ah a lo puang ta a. Assam Sawrkarin zalenna sualtute tana chet a harsata hmeh mih an nih theih nan leh venhimna lam a lo awlsam zawk nan khua a sawikhawm ta a, anni Lianpui khua pawh kum 1968 khan Vanzau khuaah sawikhawmin an lo awm ve ta a. Vanzau khuaah chuan Suakliana-te khua Lianpui bakah, Hlaikhan, Leithum, Dungtlang leh Sazêp khuate sawikhawm an ni. Tichuan khaw sawikhawm hnu lawkah he hla hi Suakliana chuan a phuah a ni.

Ngopaa ka kal ṭumin Pu J.Vanzika (RIP), Vanzau khaw chhuak, Ngopa Govt.Middle School zirtirtu chuan he hla hi Suakliana a phuahtir a nih thu min hrilh a. A sawi dan chuan, “Lianpui khua aṭanga Vanzau khuaa an rawn sawikhawm chuan Pu Suakliana chu mitdel a ni si a, an buai ve khawp mai a; an chhungkua chu min fin an tum a, mahse chhung rual tak tak chhungkaw thum zetin min fin tawh avangin tih ngaihna a awm tawh lo va; kan ṭhenawm kan kawt lawka Pu Lalenga, Presbyterian Upa min te chhungkua chu an fin ta zawk a. Chutichung chuan kan in chu a talna ber a ni a, chaw a ei chhung te, zana a mut chhung tih lohvah chuan kan inah a tal chawt ṭhin. [adToAppearHere]

Ni khat chu kan ina a lo len tumin, Mizoram lo buai dan chanchin leh hmun hrang hranga thil thleng leh khaw sawikhawm an nih dan kan hriatte kan sawi a; Sap missionary-te pawh hawtir an nih thute kan sawi bawk a. Amah kha hla phuah thiam a ni a, ka u Hlira, 1965-a chatuan ram min pansan ta pualin hla min phuahsak nghe nghe a. Chutihlai chuan ka nu, Chawngṭhuami chuan ‘khai, Pu Suak, hei ka damrei ve ta fu mai a; mahse hetiang hun rapthlak, khaw sawikhawm meuh hi chu ka la hre ngai hauh lo va; nang hla phuah thiamah, Khaw sawikhawm hla hi han phuah teh,’ tiin a ngen chawt mai a. Ani pawh chuan ‘Tum chin ila” tiin pawn chhuak miah lovin inah a tawm ta a. Tiang nena buh pho a ven lai pawhin hmm..hmm…hmm.. a ti reng mai a. Tichuan ka nuin phuah tura a ngen aṭanga ni 3 niin kan inah a lo kal a; ‘Nu Chawng, Khaw sawikhawm hla chu ka siam zo ta. A thluk atan chuan ‘Tahlai ni kawlkung zamual a liam thei lo’ tih kha ka rawn hmang ta mai’ a ti a. Tichuan, ‘Zika, nang a ziakna pen leh lehkha han la la, lo ziak rawh le, ka’n sawi ang e’ min ti a, a sawi zel a, ka ziak chhuak ta a ni” tiin.

Pu J.Vanzika sawi dan hi ka hre kim tawh lo va. Mahse Suakliana chanchin leh a hla phuah dan zir chiangtu VLC Vanlalhriatrenga hnena lehkha a thawnah chuan, Vanzika nuin hla phuah tura a ngen ni hi Sept. 21, 1968 (Inrinni) a ni a, Pi Chawngi hnena a phuah zawh thu a va hrilha J.Vanzika a ziak chhuahtir ni chu Sept. 24, 1968 (Thawhlehni) a ni. A tuk leha Pu J.Vanzika-te ina a va len leh chuan, Pu Vanzika chuan, ‘Pu Suak, a chang thumna tlar hnihna bula, Sappui lung fing mingo valin, tih lai tak hi Hnampui tia thlak i remti em? Kei chuan ṭha zawkin ka hre tlat mai,’ a lo ti a. Suakliana pawh chuan a remti a. Sappui tih aiah Hnampui tih hi an hmang ta niin Pu J.Vanzika chuan a sawi. [adToAppearHere]

He hla hi rei loteah Mizoramah a darh nghal a. Keini pawhin 1970-a Mizo District Council inthlan khan kan khuaah Congress Campaigner Hualrozama’n a rawn sa fawn hlarh hlarh mai a, thiam ang angin kan sa ve al al ṭhin a, a chang thumna tlar hnihna bula Hnampui tih hi Sappui tiin kan sa ṭhin. He hla aṭang hian Mizoram buai piklai hrehawmzia ṭhangtharten kan hriat theih phah ta zel a, a lawmawm hle.

Kan hriat fo angin kum 1966 kum tir lam (March 1) khan Mizo National Front (MNF) chuan Independent an puang a; February 28 (March ni 1) zan dar 12 pelhah Aijal Treasury te an bei a, pawisa tam tak an la a. Hetih lai hian Treasury chuan pawisa maktaduai thum leh nuai ruk zet mai an neih lai a ni.An beih tum 1st. Assam Rifle erawh chu ‘ṭhawn thut’ (surprise attack) chuan hneh dawna an inhriat loh avangin an bei lo. Hemi zan vek hian Lunglei, Champhai leh Kolasib-ah pawh silai a ri a. Champhaiah phei chuan Feb.28, 1966 zan dar 2 velah Assam Rifle post hi MNF Volunteer-ten an la a ni. Aizawla 1st. Assam Rifle chu March 3, 1966-ah zankhuaa beih an ni a. A tuk March 4-ah inpe mai turin mike-in an au va. Hetih lai hi Aizawl-ah Eastern Command Lt.Gen. Sam Manekshaw Aizawl-a a awm lai a ni a. MNF-ten Assam Rifle an kahnaah hian a ke an kaphliam niawma sawi a ni a. Ani kha a hnu lawkah India ram sipai lalber, General-ah hlankai a ni a, 1971-a East Pakistan (tuna Bangladesh hi) indonaa a chetthat em avang khan Field Marshall-ah hlankai a ni nghe nghe. Assam Rifle te chhan turin leh MNF Volunteer te do turin India sawrkar chuan an indo thlawhna chak chi, Jet Fighter chahin March 5, 1966 khan Aizawl khawpui an rawn bomb ta chiam mai a. March ni 6-ah sipai battalion khat Aizawl-ah an lo lut bawk a, Aizawl Bazar vel chu an dap nasain bungraw tam tak an la a; an hmuh apiang an vaw hrep zel niin an sawi. He mi hnuah pawh hian Bomber B, Fighter (lai-awng) hmangin khaw tam tak chu an bomb alh hluah hluah mai a ni. [adToAppearHere]

Hetih rual hian Mizoram hmun hrang hrangah BRTF – kawngpui laia awm mekte chu beih an ni a. Keini Rawpui khaw bul, Pangzawl nena kan inkar – Dapzarkawna BRTF pawh beih an ni a, an silai leh motor pawh an chhuhsak a. Ka la hriatreng chu BRTF One-tone an man chu MNF Brig.Ngurliana’n thiam leh thiam lovin a khalh a; kan khaw lal Khawsaia thlan, lungphek sang deuh mai pawh kan hmuh lai ngeiin a su thlu nghe nghe.

Tichuan sipaiho a battalion-in ralthuam ṭha pui pui kengin Mizoramah an lo chho va, tank pangngai kalna chi a nih loh avangin tank tê chi, armour car an rawn keng bawk a. Silai puakrang Light Machine Gun (LMG) hi an rawn vuah fur a, an silai ṭhenkhatah chuan a ṭul hun apianga kah mai theih turin bomb an rawn kam sa bawk a; kalkawnga khua awm reng reng mai chu an rawn hal chho a ni ber mai a. Heng hunlai hian khaw ṭhenkhatah chuan field-ah mipa zawng zawng khalh khawmin ina awm hmeichhiate an pawngsual hlawm bawk.

Khua an hal hnuah chuan bawktê an khawh sup sup a, khaw hal hmaa sipai hlauva ramhnuaia lo riak chhuak hmante chuan thuamhnaw leh mutpuan an nei a. Riak chhuak ve lote erawh chuan an sinlai bak engmah chan an nei lo va. Lo lam hna pawh thawk hman lovin Bawktê khawh a ngai a. Ina buh leh dai bul vela chhek in an hmuh apiang an hal bawk avangin ṭampui a tla a, zan khawvawta sin lum tur nei lo, ei tur nei bawk si lovin an awm a ni.[adToAppearHere]

Assam Sawrkar chuan Assam Disturbed Act 1955 tlawh chhanin March 2,1966 khan Mizo Disctrict chu rambuai (disturbed area)-ah a puang a. The Defence of India Rules 1962, Rules 32 hmangin MNF chu dan pawnah hnawl a lo ni ta bawk a. Chumi denchhen chuan Mizorama khuate chu lamlian motor kal theihna hmun remchangah, MNF chetvelna khuahkhirh nan leh khaw chhung venhim awlsam zawk nan 1967 kum tir lam aṭangin Vairengte – Lunglei kawngdung khuate chu an sawi khawm ta a. Khawchhak lam, Champhai kawng dung leh a piah lamte pawh 1968 khan an sawikhawm a, hemi hnua sawikhawm pawh an la awm.

Khaw sawikhawm chu a hrehawm khawp mai. Hre ve pha leh a hrehawm zawng zawng tuar ve phak ka ni a; khaw sawikhawm lai hun thim tak paltlanga kan la dam hi chu lawmawm tak a ni. Khua an sawikhawmna hmun (grouping centre) ṭhenkhat chu khua an sawi khawm hmain uluk takin an hung tir a; chutianga hung tur chuan an sawikhawm tur khua aṭangin chhungtina mipa puitling chin an hnatlantir vek a. Thingtuai leh mau an pu a, thingtuai chu nghet taka phunin mau pumin an rãm phei vek a; chutah chuan mau phelsep, a lehlam lehlama suihzum hi chhung lam leh pawn lam hawi zawngin phui takin an phuartir vek a. An hung zawh hma chuan mahni hna ṭul khawih theih a ni lo. An hnathawk lai chu uluk takin sipaiin an silaia lailungdawt (bayonet) vuahin an veng a; an inthlahdah ngam lo. Chu chu barricade an ti. Tuikhur kawng leh feh kawng chiah an hawng a, a dangah chuan chhuah theih a ni lo.

Tichuan barricade an hung vek hnuah chuan an khaw sawikhawm turte kha chu mi khuaa kal tur chuan an hrilh a; bungrua an ken theih zawng zawng keng nghal vek tura hrilhin khua aṭangin an um chhuak a. Mipui an chhuah zawh vek hnuah khua chu an hal leh ta a ni. In chauh an hal lo va, Kohhran hoten lungrual taka Pathian an lo biakna hmun – Biak In te, sikul te pawh an hal vek a. Mi tam tak chu an khawhlui leh an Biak In ngaiin an ṭap vawng vawng mai. Chutiang khaw hal vawi hnih tawk chu khaw tam tak an awm a. Khaw hal tawk miah lo pawh an awm. [adToAppearHere]

Tichuan khaw sawikhawmna khuaah chuan zankhat thil thuah khaw hrang hranga mi mipui an khalhkhawm ta a, chhungkhat laina belh tur neiin an bel a, nei ve lem lote erawh chuan pawnah a theih ang angin an inkaihkulh a, tualcharah ei rawng an bawl a, an mu tawp mai a. Damlo pawh duat ngaihna an awm lo. Tichuan bawkte khawhin mipui chu a buaiin an buai mur mur mai a; chutianga bawkte khawh chhung, buai zual lai chuan ration – buhfai, dailuah, chini, atta leh chite hi a thlawnin an sem ve a. Mahse an sem rei lo. Mahni chenna hmun an sak peih hnu, ram lama hnathawk tura an kal theih hnuah an titawp leh mai. Chutiang khaw sawikhawmna hmun chu Sawrkar lam chuan hming mawi tak ‘Protected and Progressive Village’ (PPV) an phuah a, ‘Grouping Centre’ an ti bawk. Mizo mipui tan chuan PPV/Grouping Centre chu hming mawi a ni ve lo va, hming tihbaiawm tak, Concentration camp a ni ringawt. Chu Grouping Centre enkawl tur chuan Sawrkarin Officer tenau deuh, Administrative Officer (A.O) leh staff tlem a dah a; a hunlai chuan A.O. chu an lalin awhawm tak an ni.

Chutianga khua an sawikhawm hnuah chuan uluk taka thla lain chhungkaw tin inchhiarna buatsaih a ni a. Ration Card siam a ni a, puitling tan Identity Card siam a ni bawk. Naupang chu kum 12 an tlin hunah Identity Card (ID) pek zel an ni a. Chu ID chu gate pawna chhuah dawn apiangin gate-keeper hnenah dahin a number ziakin hming an ziak (sign) hnan thlap a, haw hunah an number chuanna lehkhathem chu pein an ID chu an la chhuak thin. (Kei pawh ka number chu 14564 a ni a, gate pawn lama ka kal chhuak, haw lama ID ka lak dawn hian vaitawngin choda-pancho-sath ka ti ṭhin.- KCV). Khaw danga kal dawn pawhin A.O hnenah permit lak zel a ngai ṭhin a, file kal chhung kha a rei loh tehreng nen, ni khat chu nghah a ngai ve zel. [adToAppearHere]

Chutiang dinhmuna Mizoram a dinlai chuan he hla hi Suakliana hian a phuah a ni a. A chang khatnaah hian,

 “Kan hun tawng zingah khaw khawm a pawi ber mai,
Zoram hmun tin vangkhua (khawtlang) puan ang a chul zo ta;
Tlang tina mi kal khawm nunau mipuiten,
Chhunrâwl a vang, riakmaw iangin kan vai e.”

a ti a. Kan hun tawng zingah hian khaw sawikhawm hi a pawi ber mai, Mizoram hmun hrang hranga khaw tam tak chu a lo ram ta a, (sipaiin an hal vek avangin han chen lehna chi a ni tawh lo) khaw hrang hrang leh tlang hrang hrang aṭanga kal khawm mipui, naupang tan pawh chaw chhun ei tur a awm ta lo, riakmaw sava ang maiin riahna tur pawh nei lovin kan awm a ni, a ti.

Heta chhunrâwl tih hi  chaw chhun sawina atan Suakliana hian a hmang a. Mizote hi ni khata chaw vawi thum (3), tukṭhuan, chaw chhun leh zanriah ei ṭhin an ni a, khaw sawikhawm a nih khan chaw chhun ei tur a awm loh avangin ril a ṭam thei em em ṭhin.

Riakmaw tih hi sava hming a ni a. A hram hian ‘riak maw? riak maw?’ tih ang hian a hriat ṭhin a. He sava khawngaihthlak tak hian thing hrang hrang hnenah ‘riak maw?’ tiin a dil lawr a dil lawr a; ‘thiang lo’ tiin an lo chhang zel a; Thingthiang hnenah, ‘riak maw?’ tia a va dil chuan, ‘thiang e’ tiin a lo chhang a. Thingthiang kungah chauh tun thleng hian riakmaw sava hi a la riak niin an sawi a. Chutiang deuh chuan khua an han sawikhawm lai khan chhungkaw tam tak chu mi inah riahna dilin an kal a, mahse an lo khat vek tawh hlawm si a (Amah Suakliana te chhungkua ngei pawhin J.Vanzika te ina riah an dil a, mahse an khah vek tawh avangin a rem ta lo kha a ni a) Riakmaw sava ang maiin riahna tur hre lovin an awm a ni, a ti a ni. [adToAppearHere]

A chang hnihnaah chuan chhungkaw kima ṭhenrual ṭhate nena lungrual taka kan lo lenna, hlim taka kan Pathian faka kan zaina Biak in leh a khua hrim hrim mai a lo dai zo ta a, Mahni nute awmna hre lo sava- Vaṭhuten khawhar takin an nghak ta a; savate chenna, an tuallenna hmun ramngaw-ah a lo chang zo ta; a ti a.

Biak in hi Kohhran mite chuan kan ngai ropui a, khaw tinah hian a langsar ber ṭhin a. Chutah chuan kan inkhawm a, Pathian kan pawl a, kan fak ṭhin a. Chumi hmun a kang hmuh chu lung a chhe duh khawp mai. Chubakah hlim tak maia kan khawlai lenna, ni tin zan tina kan kalna a han chul ta rup mai han hmuh chu lung hi a leng em em mai a; nu ṭhenkhat phei chu an chhungkaw kimlaia an chenna ngaiin an ṭap hawm hawm mai a ni.

A chang thumnaah chuan, kan ram lungngaihna leh manganna hi ka ngaihtuah thui ngam lo; hnampui (sap missionary) ten an ramah min haw zawhsan ta bawk si nen, tumah chhantu kan nei ta lo. Kan ram khawngaihthlak tak boral mai hlauhawm tawh hi min chhana min tungding turin retheite lal, Pathian hi ka ngai ngawih ngawih ngawih mai a ni, a ti.

India sawrkar khan Mizote chu hnam mawl, lehkha thiam pawh la tam lo, mahni ngawta Independent nawra hel tur khan an ngai lo va; Aizawla Welsh missionary-te kha Mizo mipuite fuihpawrha helna chawk chhuakah an ngai tlat a. Chuvangin kum 1968 khan Aizawla Welsh missionary la awmte leh Serkawn lama awmte kha an ram lamah hawtir an ni a. Missionary-te an haw khan Aizawl khawpui chauh a ngui lo va; Zoram mipui hi an ngui a. India sipai laka thlavang hauhtu nei ta lovah an inngai a. Kan ram chu ram khawngaihthlak – riang hle angin a ngai a. Chu chu Suakliana pawhin a tira ‘Sappui lung fing mingo valin hnutiang min chhawn’ a tihna chhan kha a ni.

A chang li-naah hian Suakliana chuan Mizoram buaina chu Mizote thiltih sual vang niin a ngai nge ni, kan sualna zawng zawng Lalpa min ngaidam rawh, a ti a. Hei hi politik thila Mizoramin ke a pen sual vang ni vek chuang lovin, heng hunlaia Mizorama sualna lo pung ve zel, thamna bawlhhlawh te, eirukna leh ṭhalai zinga sualna lo pung zel an sawi ṭhinte kha hriain, Pathian hian min siamṭha turin kan tuar a phal a ni ang, tih ngaihdan a nei pawh a ni mai thei e. Tichuan ngaihdam dila Pathian a auh (invocation) hnuah, Zion parmawi, Pathian chenna hmun timawitu leh tinuamtu Thlarau Thianghlim kaihhruaina dilin, i chatuan ram kan lo thlen hma chuan min thlahthlam lovin min hruai la, nangma kut chak, i thiltihtheihna ngei khan (Zofate hi) min hruai la, mal min han sawm leh ang che, tiin Pathian a au mawlh mawlh mai a ni.

A thunawnah chuan mi tam takin harsatna leh manganna, buaina nasa takin a tlakbuak laia khawvel chhuahsana Pathian hnena hlim taka chawlh an chak ṭhin ang hian, Suakliana pawhin heti tak maia an hrehawmna hian Vanram, hmangaih ṭhen tak zawng zawngte an hmuh leh vek theihna tur hmun, Pathian khawpui thar nuama kal leh hmangaih then takte nena inhmuh a, hlim taka intawhkhawm leh a tichâk a. A lungkuai thei ang berin,

 “Kan chatuan Pa vangkhua ka ngai zual ṭhin,
Lungduh lenrual an kimna
Khawpui thar nuam,
Min hmangaihtu Lalnunnema tuallenna,”

a ti a ni. Han sak pawhin rinna mitin vanram min hmuhtir ṭhin. [adToAppearHere]

He hla aṭanga chiang taka lo lang chu India sipaite thiltih demna lam ai mahin Mizoten Pathian duhloh zawng kan tih avang te, duhamna te, ram hruaituten thamna bawlhhlawh an lak ṭhin avanga Mizote min siamṭhat nana Pathianin hetiang harsatna thlen hi a phal a ni ang tih rinna a nei a. Chuvangin, ‘kan sualna zawng zawng Lalpa min ngaidam rawh’ tiin Pathian ngaihdamna Zoram tan a dil a, chutih rualin Mizo Kristiante min hruai turin Thlarau Thianghlim a dil a ni.

2.THO LA, DING TA CHE

He hla phuahtu V.Thangzama, Vanṭhuama fapa, Ngopa khaw chhuak hian Calcutta University aṭanga B.Com. a zawh hnuin Aizawl-ah Mizo High School-ah zirtirtu hna engemaw chen a thawk a, Assam Civil Service hna a zawm leh a. Mizoram buai hma khan Saitual Community Development Block-ah BDO hna thawkin a awm a. Saitual khuaa Damdawi in leh sawrkar office eng engemaw sak tuma hma an laklai leh a hmunte pawh an laih nual tawh hnuin Mizoram a lo buai a, sipai hovin awmhmun khuar nan an rawn hmang ta a. Tichuan kum 1967 kum tir khan Nowgong-ah sawn thlak a ni a, chuta ṭangin Garo District khawpuiah sawn a ni leh a. Tura-a a awm hnu hian, Saitual a chhuahsan hmaa hmasawnna tur thil chi hrang hrang an ruahman laia sipai lo lutin an hmunhma an rawn luahsak tak vek dan te, Keifanga an inkhawmna ṭhin Biak in, sipai hovin Hindu temple-a an lehsak avanga a rilru natzia leh engmah tihtheih an neih tawh si lohzia a han ngaihtuah let khan a rilru a na em em a. Chubakah khua an han sawikhawm a, mipui nunau an mangan dan chanchinte a hriat khan Mizoram hian eng thil nge tihsual kan neiha, heti em ema buai manganga kan awm tak mai le, tiin a ngaihtuah a. Tichuan he hla hi a phuah ta a ni. [adToAppearHere]

 “Aw ka pianna leh ka seilenna ram,
Eng vang nge i lo rûm le;
Duhthu leng i sâm sual vang em lo ni,
Heti kauva i nat le?

Tho la ding ta che, i hliam a dam e,
I tha ṭhumte a kiang e
Hnutiang hawi lovin ram kal siam ta che,
Khuavel i la chhing ngei ang.”

 A hla hi chang lia sei a ni a, (a chang tin hi kan la sawifiah ang a) he hla hi sawi tawh angin Tura-a a awm laia a phuah, mahse Mizoram a la buai si avanga an sak chhuah ngam mai loh a ni a. ‘Duhthu leng i sam sual vang em lo ni’ tih lai tak hi MNF lamin an huat a hlau a ni. Mahse a phuahtu chuan ‘British-in min awplai aṭang tawh khan Mizote hian duhthu kan lo sam sual tawh a. Mizo hnahthlak zawng zawng len theih lohna, District Council an lo thlang a. District Council-a kan han awm khan kan hotute khan an tisual tih inhriain Mizo hnahthlak huapzo tur (Greater Mizo) State nawr chhuah kha an tum a. Chu chauh chu duhtawk lovin Independent te hial an lo nawr ta a. Khang zawng zawngah khan duhthu hi kan lo sam sual a, MNF thiltih chauh ka sawisel lo’ a ti a. Chuvangin Suakliana anga ‘Kan sualna zawng zawng Lalpa min ngaidam rawh’ ti ve em lovin, Aw ka pianna leh seilenna Mizoram, engtizia nge heti em em maia mangang leh lungngaia i lo awm tak mai le, duh thu i sam sual vang a ni mai lo maw, heti tak maia hrehawm tuara ilo rum tak mai le? tiin rilrua ṭap chungin a phuah a ni. [adToAppearHere]

Kum 1972-a Union Territory dinhmuna Mizoram hlankai a nih khan Mizoramah a lo chho leh a. Assam Civil Service aṭangin Mizoram Civil Service-ah a lut ta a. Tichuan Mizoram Sawrkar hnuaia hna pawimawh tak tak a thawh laiin, kum 1976-a India Sawrkar aiawh, S.L.Khurana, Home Secretary, S.K.Chhiber, Lt. Governor, Mizoram, M.L.Kampani, Joint Secretary (North East) te leh MNF hruaitu Laldenga leh a ṭhiante – Tlangchhuaka leh Chawngzuala-te an inbiak a, MNF lamin Mizoram chu India ram bung khata awm an pawm a, India Danpui ruangam hnuaia inbiakrem an remtih a (The delegation acknowledged that Mizoram is an integral part of India and conveyed to the Government of India their decision to accept the settlement of the problem in Mizoram within the framework of the Constituion of India, tia) ni18 February, 1976-a Delhi-a hming an ziak khan Mizoramah remna a thleng ta emaw tiin Mizoram Kohhran hrang hrangah lawm a ni a. Biak Inah inkhawmna te buatsaihin remna lawmin Kohhranho an ṭawngṭai a ni.

Chutianga India Sawrkar leh MNF an inrem ta anga thu a than lai chuan V.Thangzama chuan hmana Tura-a a hla phuah zawh tawh, sa chhuak  ngam lova a thul khung vang vang kha hai chhuak lehin a ṭhen lai lai siamṭhain a sak chhuahtir ta a. A hla thupui atan a thunawna mi ‘Tho la, ding ta che’ tih hi a hmang a ni. Sawi tawh angin a hla hi Tura-a a awm laia a phuah ni mah se, 1976-a chul mam ṭhat leh a nih avangin 1976-a phuah anga chhal a lo ni ta a ni. [adToAppearHere]

A chang 2-naah chuan vana arsite pawh khian anmahni kawng theuh an chhui ṭhin a, zangkhua pawhin a kawng zawh zelin khawvar dawnah chuan a lo bungbu vu tawh ṭhin a ni a. Tunah pawh hian kan tan khua a lo var dawn ta e; tho rawh u khai, kan ram tana hna thawk turin i pen chhuak ang u, a ti.

Ni e, arsite khian kalkawng bik tê an nei a, khiti zozai khi awm mah se, insu buai lovin an awm ṭhin a. Zângkhua pawh hian vanlaizawl pelin khawvar dawnah tlain bungbu vû mah se, a zan lehah chuan a kawng ngai tho a rawn zawh leh ṭhin a. Chutiang deuh chuan keini Mizote pawh hian buaina namen lo tawkin chan chhe tak niin inhre tawh mah ila, lungngaia engmah tih nachang hre lova indawmkun mai lovin, mahni awmhmun aṭanga tho chhuaka bul ṭanin, kan ram hmasawnna atan thawk tan nghal ila, keimahni kawng ṭheuh kha zawh lehin, kan ram, Mizoram hmasawnna tur leh kan damtlanna turin i che chhuak ang u, hun ṭha a rawn inher ṭan ta e, a ti a ni.

A chang 3-naah hian Mizoram buai piklai boruak rawn tarlangin, hmanah kha chuan hlau leh thlaphang reng rengin kan awm a, rilru muang taka han awmna hun pawh kha kan nei lo va. Kan hmuh tam leh min hual veltu chu India sipaiho kha an ni mai a. Venhimna an tih an hmelmate beihna silai puak ri dur durte khan min thlamuan zo hauh si lo va; zanah pawh tui taka mut a har ṭhin em em a ni, a ti a.

Ram a han buaia khua min han sawikhawm khan zan dar ruk dar sarih velah an camp aṭangin alarm (a-la-ram kan ti ṭhin) kha an han tiri a, khami hnuah kha chuan mahni inchhungah pawh mei chhem phal a ni tawh lo va, meialh lai pawh kan ṭhelh mih sawk sawk chang a awm ṭhin. Pawn chhuah an khap tlat a, pawnah zung tur pawha chhuah ngam a ni lo.Sipaiho kha khawlaiah patrol-in an kal a, kawt zawna an kal ri ṭhuap ṭhuap han hriatte khan hlauvin in chhungah kan lo tawm chawih chawih a, a chang chuan chhuatah kan muhil der thin. Duty sual deuh chuan in tin kha an check a, kawngka lu chung aṭang khan torchlight shell ngaa engin an rawn chhun a; mikhual lo mu an hmuh chuan an lo lut a, movement permit an neih leh neih loh an en ṭhin. Khatiang reng renga min thawn ṭhin avang khan lungmuang taka mut kha a har ṭhin. (Keimah ngei pawh hi curfew bawhchhiaa kan leng min man a, mita dumde leng chhawk chhawk khawpin min beng ṭhin – KCV). [adToAppearHere]

Chang 4-naah chuan, khang hun kal ta zawng zawng kha theihnghilhin thlir kir tawh lovin, hmasawn turin hmalam pan ila; Mizoram buai laia kan hliam, kan tuarna zawng zawngte kha lo dam tawh se la, hna thawk tura chhuah a hun tawh hle a. Insiam ula, i kal nghal ang u, chutilo chuan kan tlai lutuk ang e, a ti a ni.

Mizoramah inremna kawl a lo eng ṭan a, chu bakah Mizoram chu Union Territory-ah hlankai a ni tawh a; Sawrkar laipui aṭang pawhin ṭanpuina tam tak a lo lut a. Hmasawnna hna thawh tur tam tak a awm tawh a ni. State dang leh U.T. dangte chuan Sawrkar laipui aṭanga an sum hmuh hmangin hmasawnna hna nasa takin an thawk a, dinhmun an insiam ṭha a. Mizoramah erawh chuan mi tam tak chu rambuai laia an tuarna nasa tak avangin bul han ṭan leh ngaihna hre mang lovin an awm a, beidawnnain an khat hman a. Chutiang dinhmuna ding tawh tan pawh chuan bul han inṭan chhoh lehna turin kawl a eng ṭan a. Lungngaia indawmkun tawh lova hmasawnna rilru pu turin hla phuahtu hian Mizo mipui a chah a ni.

A thunawn hi chu a mipui lam ai mahin a ram-(sawrkar zawk) hnena ngenna niin a lang a. Khai le, tho la, ding tawh rawh le, i natna leh i hliamte pawh an damin chet harsa (tha ṭhum) i tihna zawng zawng pawh a kiang ta e, hun kal tawh thlir leta ding reng lovin hma lam thlir la, ram hmasawnna tur kawng hrang hrang dapin han thawk teh le, khawvel ram dangte pawh i la khum thei ang, tiin. [adToAppearHere]

Buai zual lai kha chuan sawrkar hotute tan pawh chet a harsa em em a. Kawnglai ho, BRTF te, hmasawnna tura hnathawh reng reng mai kha MNF lamin an lo vau ve bawk a. A bikin Mizoram khawpui Aizawl-ah ngei pawh hna thawh chak kha a har em em a. Inthah thut thut maite kha a awm fo bawk a. A khat tawkin curfew puan a ni a; khang harsatna zawng zawngte kha a lo kiang dawn ta niin a lang a. Chuvangin tho va, ding a, ram hmasawnna hna chak taka thawk turin a ngen a ni.

He hla pahnihte inanna :

Sawi tawh angin he hla pahnih, ‘Kan huntawng zingah khaw khawm a pawi ber mai’ tih leh ‘Tho la ding ta che’ tih hlate hi kum 1966 aṭanga Mizoram a lo buai tak hrehawmzia leh thawpik thlakzia tarlanna hla an ni a. Suakliana hlaah hian khaw sawikhawm avanga Mizo mipuite tuarna leh ei tur pawh nei lo, riakmaw sava ang maia riahna tur in pawh nei lova an awm lai hrehawmzia kan hmu a. Chubakah Assam sawrkarin khua a sawikhawm avanga khaw tam tak luahtu awm lova a lo ram tak dan te kan hmu bawk.

V.Thangzama hla, ‘Tho la ding ta che’ tih hlaah chuan chung khaw sawikhawmte chu sipaiin an veng nain, mipuite tan chuan eng hun lai mah kha thlamuang taka awmna hun a awm lo va; venghimtu sipaite kha mipui tan hlauhawm leh ṭihbaiawm tak an ni a, an venhimna hnuaiah khan zanah pawh tui takamut a harsat thu kan hmu thung.[adToAppearHere]

Suakliana hlaah chuan Pathian hnenah sual avanga ngaihdam dilna, “Kan sualna zawng zawng Lalpa min ngaidam la”, tih kan hmu a. Mizo mipui pawisawi ve lote chunga khati tak maia tuarna lo thleng ta kha, Mizote hian thil eng emaw Pathian duh lohzawng tihsual kan nei ta a ni ngei ang. Lalpa, kan sualna zawng zawng min ngaidam rawh, Zion parmawi – vanram lam min thlirtir rawh, tiin Pathian a au va.

V.Thangzama hlaah ve thung chuan, Aw ka pian ka seilenna ram, ram inrelbawlna lam thilah hian duhthu i sam sual vang em ni, heti tak maia buaina leh harsatna, manganna chi tinrengin a tlakbuak tak mai che le, tih hi kan hmu thung. Pathian a au lo va, keimahni duhthlanna sual avanga tuar ta angin a sawi thung. An hla ve vea lo lang chu Mizoram buai chu hun khirh leh hrehawm, thawpik thlak tak a ni, tih hi a ni.

An danglamna te:

Suakliana hla ‘Kan huntawng zingah…’ tih chu Mizoram buai avanga sipaiin khua an sawikhawm hrehawmzia puan chhuahna hla a ni a. He hlaah hian sipaiin khua an sawikhawmna hmunah khan chhungkaw tam tak chu zan riahna tur leh chaw ei tur pawh nei lovin hrehawm takin an awm a, chhungkua leh ṭhian ṭha, u leh nau, ṭhian duh takte nena an tuallenna kawtthler te, Pathian faka hlim taka an zaina Biak in pawh a kangral vek a; an khua chu ramhnuaiah a lo chang zo ta, tih kan hmu a. Hla phuahtu hian van ram, Pathian awmna hmun, lungduh ṭhen tak zawng zawngte awmna hmun a ngaih vawng vawng phah tih a thunawnah kan hmu.[adToAppearHere]

‘Tho la ding ta che’ tih hlaah ve thung chuan Mizoram chuan duhthu a sam sual vangin harsatna namenlo a tawk a, a ram mipui an rum chuah chuah mai tih kan hmu a. Mahse he hla phuahtu hian mipuite tuarna leh hrehawmna lam chu sawi zui vak lovin, arsiin a kawng pangngai a zawh ṭhin ang hian lungngai leh manganga indawm kun reng lova tho tur leh mahni chhungkua leh ram din chhuahna tura thawk ṭan turin Mizo mipuite a fuih ve thung a ni.

Suakliana’n, ‘Kan sualna zawng zawng Lalpa min ngaidam rawh’ tia Mizo mipuiten an harsatna aṭanga chatuan ram thlir nachang an hriat nan leh chatuan hmun an thlen hma lohva kaihruai tura Pathian Thlarau thianghlim a auh laiin V. Thangzama chuan, Mizo mipuite chu hun kal tawh thlir let reng lova hma lam pana pen tur leh khua a tlai hmaa inbuatsaih turin a sawm ve thung a ni.

Eng pawh ni se, he hla aṭang hian Mizoram buai avanga mipuite tuarna rapthlakzia hi chiang takin kan hre thei a. Heng hla aṭangte hian Pathian duh loh zawnga awm ṭhat lohzia te, ram chhung mipuite tana harsatna thlen thei tur thlir lawk nachang hre lova thiltih mai mai ṭhat lohzia hi chiang takin kan hmu thei a ni.

 

 

References:

Rambuai Literature, Aizawl. Lengchhawn Press. 2014

Nunthara, C., Mizo Society and Policy, New Delhi. Indus Publishing Company. 1996 [adToAppearHere]

Ralte, Ramhmangaiha, et.al. Suakliana leh a hlate. Mizo Hla leh A Phuahtute, Aizawl.

Hrangbana College, 1999

Thanmawia, R.L., (Dr), Ngirtling, College Text Book (Mizo) Editorial Board, Aizawl. 2007,

Vanlalhriatrenga VLC., Pathian Thlaraua Mi Ril Suakliana leh a Hlate, Vanlalvena Chhangte, Aizawl.2010

Vannghaka, K.C., Influence of Christianity in Mizo Fiction. Delhi. ISPCK, 2015

Verghese, C.G.(Brig.) & Thanzawna, R.L., A History of the Mizos, Vol.II. New Delhi. Vikash

Publishing House. Pvt. Ltd. 1997

Zamawia, R., Zofate Zinkawngah, R.Zamawia, Aizawl, 2nd.Edn. 2012 [adToAppearHere]

 

About the author

Comments

Leave a Reply

Your email address will not be published. Required fields are marked *

error: Content is protected !!