Khawiah nge in kan sak ang le? – Mizo Sermon

Lal Ramhluna Ralte

Matthaia 7:24-25 “Chutichuan, mi tin heng ka thu hi hriaa zawm apiang chu, mi fing lungpui chunga in satu nen tehkhin tur a ni. Ruahte a lo sur a, tuite a lo lian a, thlite a lo tleh a, chu mi in chu a rawn nam sawk sawk a; nimahsela a chim lo va; lungpui chunga rem tlat a nih avangin.”

Lal Isuan Petera hnenah,
“Nang Petera i ni tih ka hrilh bawk a che; he lungpui chungah hian ka kohhranho ka rem chho ang a, Mitthi Khaw kulh kawngkharte chuan chu chu an ngam lo vang.”
tia a sawi avang maiin Petera-ah khan Kohhran a rem chho dawn anga sawitu an awm. Mahse Bible ah chuan Lungpui a tih chu Amah Pathian (Isua Krista) kha a ni. Heng Bible changte hi en teh ang.

1 Samuela 2:2 “…Nangma ang reng an awm si lo, Kan Pathian ang lungpui reng a awm hek lo.

Deut.32:15″…A siamtu Pathian a hawisa ta, A chhandamna Lungpui chu a ngainep.

Sam 31:3 Nang chu ka lungpui leh ka kulhpui i ni si a; Chuvang chuan i hming avângin mi hruaiin mi kai ang che.

Isaia 44:8 ” ..Keimah lo hi Pathian rêng rêng an awm êm? A ni, Lungpui rêng rêng a awm lo; pakhat mah a awm ka hre lo.
(2Samuela 22:32″)(Deut.32:4) (Deut 32:18 “)
(Isaia 26:4 )

Mitthi khaw kulh kawngkharten an ngam loh thihna hneha tho leh ngei chu Isua kha a ni a.


Petera kha chu phatsantu ve mai kha a ni.
Kohhran inti tlusawp leh tam tak an awm tawh. Tlu sawp mek pwh kan ni mahna! Engvangin nge Pathian Kohhran meuh a tluksawp theih tih ngaihtuah tham a ni. Amah Kan Lalpa Isua Krista(Lungpui)a phun loh, innghat lo, Pathian chakna aia mihring chakna leh finnaa innghat leh khawvel ropuina chhuangtu an lo ni lek em ni ang?
Lal Isuan, “Kung zawng zawng ka Pa vana mi phun loh chu pawh chhuahin a awm ang.” (Mat.15:13) a ti.

Kan Pathian chu Lungpui nghet, nghing ve ngai lo chu a ni.
In satu chuan lei nghet leh che ve lo tur hmun a thlang thin a ni lo’m ni,? Khawvela kan awmna in tur atan pawh hmun nghet kan thlang theuh mai. Hmun nghet thlan nachang hre lo chu mi â, tiau vut chunga in sa ang kha an ni. Ruah a sur a, thliin a rawn nam a, a tlu sawp mai thin.
Lungpui chunga in sak erawh chu ruah lo surin, thliin nam sawk sawk mahse a ding nghet tlat thin.
Mi â tiau vaivut chunga in sate chu khawvel thil ral thei, chhe thei, bo thei, sum leh pai leh property-a rinna nghattute hi an ni. An innghahna lei ro thilte chuan chatuan a daih ve dawn si lo. Thlan piah lam a thlenpui thei dawn lo a ni. Khawvel thil, ropuina leh hausakna maia innghat ringtute hi nakina la tlusawp turte an ni.
” Leia sulrul leh tuiekin a ei chhiatnaah hian in tan rote khawlkhawm suh u, vanah sulrul leh tuiekin a ei chhiat lohnaah chuan intan rote khawlkhawm zawk rawh u.” (Mt. 6:19)

Lungpui Isua Kristaa innghattute erawh chu sualna tuifawn leh lungngaihna thlipuiin a nuai hrep hnuah pawh an nghing ve lo va, zirtirna tinreng pawhin a len bo ve hek lo! Chatuan atan an ding nghet dawn a ni.!
Tunah hian kan in tur kan sa mek theuh a, eng hmunah nge in kan sak le? Chatuana nghing ve ngailo tur Lungpui Isua Krista chu a foundation-ah kan hmang em le?
Vawiina i in sak mek khan chatuan atan a dinpui thei ang che ngem le.?

Krista,Lungpui nghetah ka ding,
Hmundang zawng chu tiau dup a ni.

Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!