Kei ka pianna Zoram nuam – Zothansanga Khiangte

KEI KA PIANNA ZORAM NUAMZothansanga Khiangte

THU HAR HRILHFIAHNA

Chappui –  vahchap; lo atana an vah pho ro lai.

 Sialsir –   mute chi khat, a ruala awm ṭhin.

 Fuanhawr –  sava rual chi khat.

 chhul khat kual –        nu thuhmun aṭanga piang ho.

 Tuchhuan –  thlahte; tute fa.

 mahni lu chunga –  Mahni ṭhat lohna tur emaw, tuar ngei ngei. Taksa tana ṭha lo tur pawh tih/addict tlat.

Thlaler – ram ro; thing leh mau awm lohna ram, hmun fianrial.

 va riah lei –  sava riah duhna leilung; hmun lum, chhuah chhawng tlak deng bawk.

 tui hnuk nung –   tuihna put reng ; tuihna luang reng.

 nipui sensa – nipui khaw lum lai tak.

 siar –  arsi.

fanghma thar ko – Thereng chi khat, fanghma thar ṭan tirh June thla vela hram ṭhin, a hram dan chu ‘ reng-reng, fawk-fawk’ a ti ṭhin. (mi ṭhenkhat chuan ‘‘sawng sawng bawk bawk’ tiin an sawi bawk)

kawl-ui – khau chi khat.

 tumbu ar –  chi hnih a awm, chi khat chu rannung, zang taka hram leh leu leu ṭhin a ni ; chi dang chu sava te tak te, harh zet mai a ni reuh; heta a sawi hi chu ‘sava te tak te’ a ni.

 Tuitu –  chhimbuk chi khat, lui kama awm ṭhin a, a hram chuan phun nuah nuah a ang hle.

 kang kang  –  ‘kat chat’ tia hram ṭhin hi’ kang kang’ tiin ṭhenkhatin an sawi a, rannung chi khat leh sava chi khat nia sawi a awm ve ve.

 Ngur –  lal.

 Tikawnkaw – titlachham; tirethei.

 kutkem nei – a ruka mi thil lak ching; thil rukhmang.

 tlangsel – khawtlang rel; miin an saisel huai huai.

Thinhrik – lungten, ten, iai.

 chhuanchham –    chaw chum tur nei lo; ṭam mangang.

khai chhuak – mi lo zawh ruala zove lote hi khawtlangin an thlawh zawhpui ṭhin a, chu chu ‘khai chhuak’ an ti.

1.Hengte hi in zirlai tlawhchhanin tawi te tein han ziak teh ;

(a) Fura hram ṭhin Therengte

Ans : Rengchal, Ngirtling leh Uleuh.

(b) Favanga par ṭhin pangparte

Ans : Pangpui, anthur, zawngṭah, zamzo leh derhken.

(c) Thlasika par ṭhin pangparte

Ans : Tlangsam, Japanhlo leh Bawngpupar

(d) Ngaw dur khup kara hram ṭhin savate

Ans : Zo tuklo leh Tawllawt, Varihaw leh Ramar

2.Heng thla hmingte hi Sap thla hmingin dah rawh :

(a) Ramtuk thla =  February

(b) Ṭomir thla =  May.

3.Hengte hi a thu ep (Opposite) han dah teh.

(a)        vul, hlimna     =           Chuai, lungaihna.

(b)       lungawi           =          Lungawi lo

(c)        hring dup       =           Ro rup.          

(d)       chul                 =          Vul

(e)        bengchheng    =           Reh

(f)        tlai lam            =           Zing lam

(g)        fawn               =           Cham del

(h)       khawhar         =          Hlimthei

(i)         nunna             =           Thihna

(j)        dimdawi         =          Nghaisa

(k)      vawt                 =          Lum

 4.Mizo lalte’n Mizoram an lo din dan, in zirlaiin a sawite kha tawi deuhin han sawi teh.

Ans :    Mizo lalte khan Mizoram an neih theih nan lu chum ban chum huamin ral an bei ṭhin a. Ramhnuaiah vangvat leh thosi karah, sa leh ral laka ring rawlhin, khawhar leh rilṭam te, tuihal dangchara chauhna te tawk chungin Mizoram hi an lo hum ṭhin a ni.

Thisen tam tak a bua a, ram daiah an taksa te chu bawihsawmtu nei lovin an ṭawihral a, thing lian leh sang tak takte hi kan pi leh pute taksa ṭawih hangin an chawmlen a ni a, lui tui luangahte hian an thisen chu a la luang tel zel a ni.

5.Lui tui tura luan ṭhintute kha eng ang mi nge nia in zirlaiin a sawi kha?

Or

‘Kei ka pianna Mizoram’ tih ziaktuin ‘Mizo tih atana mawi lo, mizo dik tak chuan tih loh tur’ a tih kha eng nge?

 Ans :   Lui tui tura hrai ṭhintute leh in tlak lohva siamtute hi kan hmelma an ni a. Mi hlauhawm, mi dawn tawi, mahni luchunga meiling chhekkhawl a, mahni fate in atana tur petute an ni a. Chu vangin heng thilte hi Mizo tih atan a mawi lova, mizo dik tak chuan tih loh tur a ni.

6.Mizorama thing leh maute leh nungchate engti anga enkawl turin nge inzirlaiin a sawi kha han ziak teh.

 Ans :   Mizorama thing leh maute hi kan ṭhiante, nunhlimna leh nawmna min thlentu an nih mai bakah thlaler nena min daidangtu an nih avangin kan duatin kan hmangaih tur a ni.

7.Zothansanga Khiangte-in ‘Mizo nun nen ṭhen hran theih an ni ngai lovang’ a tih kha eng nge ni?

Ans  : Thlasik a lo hnai a, tlangsam leh Japanhlo a rawn par a. Chungte chuan Remna lal lo pian tur thute an rawn tlangaupui ṭhin. Pangpar satliah an ni ngawt lova, lung tileng thei pangpar, nunhlui ngaia pachang kurtir an ni a. Heng pangparte nen lo hi chuan nun a kim lova, Mizo nun nen ṭhenhran theih an ni ngai lovang.

8.Ram dang mite tana bengchheng ni si,  Mizoram tana rimawi chang ta hlauh kha eng nge ni?

Ans  :  Fur khaw thiang hnuaia, rengchal, ngirtling leh Uleuh hramte chu ram dang mite tana bengchheng ni mahselang, Mizorama chengte tan chuan rimawi; kan lunglenna min chhawk zangkhaitu a ni leh tlat lawi si a ni.

9.A awlahte hian dah khat rawh :

Zoram tuite chu a vawt  kun ngaih  mai a. Sava no neih hun tlangaupuitu chu  Kiltheihrawk a ni a, Favang thlen dawnah  Anthur a par a. Mizorama rimawi rama siamtu chu ram awitu zawng zawng hi an niin a hun taka ruah ko thlatu chu hnah hringte hi a ni.

10.Thangsira leh Thangzaian chatuan thuthlung an siam dan han sawi teh?

Ans :  

“Kei chu e, kei chu e, Farṭuahah ka chang ang a,
Nang chu e, nang chu e, Vaubeah i chang ang a,
Kum tin kum tinin kan par vul dun chhing chheng dawn nia aw.”

 11.Heng thu hmang hian sentence han siam rawh :

  • ngaw durkhung : Ram ngaw dur khung chu hmuh tur a vang tawh hle.
  • hnawng : Ka kawr chu a la hnawng a nih hi.
  • hring dup : Mizoram chu a la lang hring dup tho.
  • chhawlhal : Tui vawt hi chuan chhawlhal a dawm bik.
  • vul chhing chheng : Pangpar par tak tak hi chu an vul chhing cheng zel.
  • ri seng seng : Vawiin ruahsur chu a ri leh seng seng ṭhin.

12.Mizorama pangpar a kung thing ni si hming pasarih ziak rawh. 

Chhanna : Mizorama pangpar a kung thing ni site chu: (1)        April par           (2)       Vau      (3)       Herhse (4)        Khiang.      (5)        Builukham       (6)       Phunchawng    (7)       Chawnpui.

13.‘Kei ka pianna Mizoram’ tih ziaktu Zothansanga Khiangtein Mizo dik tak nihna (mizia) or Mizo dik tak awmdan tur a sawi kha han tarlang teh.

Ans :   Mizo chu Mizo a ni a, khawvel awmchhung zawng chuan Mizoram pawh a awm reng tur a ni. Mizo dik tak chuan a ṭhenawmpa ti kawnkaw turin ruk a ru ngai lo va, thu tling lo leh kut tling lova sum lakluh lamah a kut a phar ngai hek lo. Kutkem nei leh hretu dera ṭang ṭhinte enhran an ni ṭhin a, tlang sel leh thinhrik niin kawppui zawn kawngah te thlengin an hnawng ṭhin.

Dikna lamah chuan tawrh a ṭul chang awm mah sela a kut a kir ngai lo. Mizo chuan ama thawhchhuah lo chu a ei duh ngai lova, ama kutkawih lo chu a silhin a feng ngai hek hek lo. A ṭhenawmpa riltam tan eitur hlan a hreh ngai lo va, a ṭhenawmnu rawp chaw atan nul-an a hawnsak ṭhin.

Mahni thawhchhuah a ei bil ngai lo va, a sem den den ṭhin. Amah a inhmangaih angin a vengte pawh a hmangaih a, pachhia leh rethei, thawk thei lo leh chuan chhamte a en liam mai mai lova, ram hnaah khai chuakin buh a hak ṭhin. Amah a inhmangaih angin a ram pawh a hmangaih a, lu chhum ban chhum huamin a hum hram hram ṭhin a ni.

14.‘Kei ka pianna Mizoram’ tih ziaktu Zothansanga Khiangtein Mizoram awmdan tur (a duhthusam) a sawi kha han tarlang teh.

Ans :   Mizoram pawh hi Mizoram a ni reng tur a ni a, thlaler a ni ngai tur a ni lo. Tlang karcheha te chuan lui tui vawt leh fim tak te chu a mi chengte nun nan leh a ram damna atan a luang reng tur a ni a. Chung lui tinahte chuan sangha mawi tak takte, kaikuang leh chengkawl leh luia chaw zawng ṭhin tawh phawtte chu thlamuang takin an cheng tur a ni.

Ramte chu thing leh mau sang leh mawi tak takte chuan khuh hring dup reng sela, chu ngaw dur khung maiah te chuan ramsa chi tinrengte chu thlamuang takin tla za sela, sava hram mawi tak takte chuan khat rawh se. Pangparte chu a hun takah he ram cheimawi tur hian par sela. He ram hi tuarte tuarpuina leh nuite nuihpuina thawma khatin, hlim nui ri leh lungawina thute chuan lo khat liam rawh se.

A ram innghahna lungphum, mi dangte tana inhlannate chuan vawrtawp thleng reng sela. A chhunga cheng Zo hnahthlak tinrengte chu thinlung insuihfinin, lungawi takin cheng za dial dial sela. Chhuan lo la awm zel turte hnenah he ram hi mawi leh duhawm zual zela hlan chhawn lo ni rawh se.

15.Mizorama pangpar a china chin ni lo, ramhnuia awm hming panga ziak rawh.

 Ans  : (1)         Fartuah            (2)       Tlaizawng        (3)       Ainawn           (4)        Chawkhlei  (5)           Hawilo

 

Lalrammuana Sailo —-

 

Leave a Reply

Your email address will not be published. Required fields are marked *

error: Content is protected !!