KC Lalvunga chanchin – Zikpuii pa (1924 – 1994) chanchin

Mizoramah hian thu ziak mite zingah tu nge hriat hlawh ber a, hming thang ber tiin inzawt ta ila, lehkha ziak chhiar mite chuan ‘Zikpuii pa’ kan ti ṭheuh awm e, chutiang khawpa Zofate tan a thawh hlawk chu a chanchin tlangpui leh a hnuhmate ilo bih chiang dawn teh ang.

Zikpui pa tia Zofate kan hriat lar hi Aizawl lal Hrawva leh Pi Lalluaii te fa sawm pakhat zinga upa ber dawtu nin K.C. Lalvunga tih hming puin December 27, 1929 khan Aizawlah a lo piang a. Ni. 5 September 1948-ah Darhmingthangi nena inneiin fa mipa 4 leh hmeichhia 4 an nei a. An fate pawh hi mi chhuanawm tak takte an ni. Zikpuii pa hian kum 1948-ah matric a zo a, kum 1953 ah B.A a zo leh a, kum 1962 khan IFS (Indian Foreign Service) ah inziak tlingin hna chi hrang hrang a thawk a, Mizo zinga IFS hmasa ber a ni nghe nghe.

Zikpuii pa hi thu leh hla lamah a tuiin a inhmang hma hle a, kum 1948 daih tawh khan thawnthu a lo ziak tawa a, amaerawhchu heng thawnthu kum 1948 a a ziakho hi hmuh chhuak loh a ni a, a pawi hle a ni.  Drama tih lohah chuan Mizo literature-ah Zikpuii pa hian hnuhma a nei deuh vek a, a bik takin thawnthu phuah lamah hian a inhmang nasain thawnthu pawh a buin a chhuah hnem malh malh hle a ni. A thawnthu chhuah thenkhat te chu

1.C.C.Coy. 27 (1986)
2.Kraws bulah chuan (1986)
3.Nunna kawngṭhuam puiah (1989)
4.Hostel awmtu (1991)

A thawnthu ziah – C.C.Coy. No.  27, Silvarthangi, Kraws bulah chuan leh Hostel Awmtu tihte chu hlawm khatah Lungrualna tlang hming vuahin kum 1994 khan RTM press aṭanga chhuah nawn leh an ni. Heng thawnthu zingah hian Nunna kawnghuam puiah tih hi miten ngaihnawm an ti zualin an hlut hle a. A ziaktu-pa pawh hian a thawnthu ziak zinga ṭha ber a ngaiin ka master-piece a ti hial a ni. A Ziaktu  meuhin ka master-piece a tih avangin Nunna kawngthuam puiah tih thawnthu hi ilo bihchiang teh ang.

He thawnthu hi Mizo nula hmelṭha tak Thingtlanga cheng nungchang mawi em em chu a ngaihzawngin phai lama lehkha a zir hlanin Zoram buaina chuan a chim a, sipal officer-in tihluihna a neiin vai ramah a hruai thla a, nawhchizawrhna hmunpuia hralhin chu hmun aṭang chuan a changtupa Chhuanvawran a chhanchhuah dan tlangpui niin MNF movement-a innghat novel a ni. Nunna kawngthuam puiah tih thawnthu ruangam  hi a ṭhain chhiartute a hip hle a ni. Zikpui pa hian a ziak hmain a thawnthu ruangam hi fel takin a duang sa vek niin a lang. A thawnthu hi a kal rual ṭha a, khawi lai mah hi chhiar ninawm leh keu kan puat ngai a awm meuh lo. A paragraph tin hi chhiar loh a hlauhawmin chhiartute ngaihtuahna a hip veng veng mai zawk a ni.

Thawnthu-a a changtu thlan dan hian thawnthu kaiphung a nghawng tel tlat avangin a pawimawh hle a, Zikpui pa hian a changtute thlan dan a thiamin an ṭawngkam hman ṭhin aṭangte hian an nun dan leh an mizia a zuk hriat theih a. Tin chhiartute tana ninawm leh awihawm loh tur khawpin tu mah ṭawngtir lovin an tawng dan tur awm tawk zelin a ṭawngtir a, thil hote angin lang mahse chhiartute riruah phurna leh thathona pe thei turin a ziak thiam hle a ni.

Tin, he thawnthu hian background a nei ṭhain nun kawng dik chhiartute min kawhhmuh a tum ber a ni. Hei hi mi tam takin kan hai fo a, hausakna te, thuneihna te kan hmang thiam lo ṭhin tih rawn tarlangin chu nun dik nei tur chuan a changtupa Chhuanvawra anga chungril lam ṭhatna (morality) neih  pawimawh zia uar takin a rawn tarlang a ni.

Zikpui pa thiamna kan sawi hmaih hauh loh tur chu Ngurthansangi nawhchizuar mi pangngai tana hmusitawm em em chu nawhchizawrh sawi mawi ni hauh si loin nawhchizuar tawh ṭhin ni mah se a chhiartu hmeichhiate chuan ngaisangin amah ang nih an chakin mipate pawhin Chhuanvawra anga Nurthansangi chhan chhuak a, neih thei nih an chak ṭheuh ngei ang.

Sawi tawh angin he thawnthu hian hringnun hlimthla a tar lang chiangin a ngaihnawm hle a. Amaherawh chu mi fel bera kan ngaihte pawh hian tlin lohna kan nei ṭheuh awm e. He thawnthu ziaktu pa pawh hian a changtu pa IPS officer India dan hre tur ber a ngaihin India danin a phal loh pawisa a hal raltir hi a fuh vak lo niin a lang tih loh hi chu a thawnthu ruangam a ṭhain a ṭawngkau chheh hman pawh hi Mizo thawnthu (novel) neih tawh zingah chuan a fuh berte zinga mi a ni.

Zikpuii pa hian kum 1950 aṭanga essay ziak ṭanin essay chi hrang hrang 17 a ziak a, heng a essay ziakte hian a hawlh zau hle a, a zinna ram chanchin leh kalkawng thu te, History leh politic lam te, literature leh criticism hawi te, Mizo culture thlurna ngaihnawm leh bengvarthlak tak takte an ni hlawm.

A essay ziak hrang hrang ah hian pipu nuna ze ṭha te, kristiannain kan hnam nun a chawi kan dan te, politics lo lutin a nuai nasat dan te, mi mal nuna awm dan duhawmte a ziak lang thiam bik em em mai a. A then chu chhiar paha nuih var varna tur te, a ṭhen chu ngun tak a chhut zui ṭul te, a ṭhen chu mahni inenfiahna tur te an ni hlawm a, chhiar a manhla hlawm em em a ni.

Khawvel hmun hrang hrang a tlawh a, a fang zau a, lehkha a chhiar tam bawk a. A thil hmuh leh tawn leh a chhiarte reng reng Mizo rilruin a chhiar a, Mizo ngaihtuahnain thlir a. Tichuan Mizote tan eng tianga seng luh tur nge tiin ngaihtuahna a seng zel a, chu chu a thu ziak tinreng, a bikin essayah te hian a tar lut tam a, a zam chiai reng a tih theih a, chuvangin a chhiar a nuam a, a hlawkin a ṭangkai bik a ni. Zikpui-pa hian sak chi pasarih leh hla hril sawm laia phuah a. Heng a hlate hi Shillong-a College a kal lai 1950 bawr vela a phuahte a ni hlawm chungte chu –

1.Tawn loh chhimtlang saw (1949)
2.Ka senlai nite zawng kha (1949-50)
3.Sakhmel hmuh loh hrai hlimthla (1949)
4.Hruaitu Vanapa kan ngai (1949-50)
5.Zozam par (1949-50)
6.Lalhmingliana father mihuai
7.Zaleng hun hmangtute
8.Happy valley retreat
9.Ka pu Hualrothanga
10.I hmel par ang kan lawm hun tur
11.Sikni eng (1950)
12.Lungruka min vei ve la
13.Hlui khaw lanu (1944)
14.Aw ka duh ber (1944)
15.Tho rawh Dinpui (1951)
16.Mami-pa mumang (1955)
17.Shillong ṭhal favang kut (1961)

Zikpui pa hian thu leh hla lama kut a thlakna hmasa chu hla hi a lo ni zawk a. A thinlungah hlain bu a lo khuar tawh chu thu lam hian a luah lan ta ni ngei tur a ni, hla hi a phuah zui lo a ni. Zikpuii pa hlate hi a rilru puang chhuak a, amah ngei a tel vena hla (Subjective poetry) a ni deuh vek mai. Tin a hla pianhmang hi thawnthu ang mai a inkahpupchaw chho thlapa hla chang rem ang chi (narrative structure) a ni tlangpui a, hla chang tinte an inlalawn ṭhain hriat pawh a awl hle a ni.

Zikpui pa hla pianhmanga thl chhinchhiah tlak tak chu thawnthu anga ruangam (plot) nei, changtute (character) awma a phuah hi a ni. Tawn Ioh chhimtlang saw tihah chuan mi pahnih amah naupang rilru hmanhmawh tak leh a nu, ngaihtuahna puitling tak nei tawhte inhnialna kan hmu a. Lalhmingliana father mihuai tih hlaah chuan a changtupa father mihuai ze ropui tak tilang turin ze dang lo lang chhuak a awm a

Taksa chakkhai hmasiala an zawn laiin
Fachuam iangin chanhai rairah i chawi

tiin. A hla dangah pawh hetiang chi hi kan hmu nual.

A hlarua han thir leh thuak thuak ila; tehkhinna hi a hlaah a hmang uar lo-naa hla ṭhenkhatah chuan ṭum sawmte a hmang thung a. Tehkhin hmanrua mi dang hman zen zen loh a hmang kual a, entirnan- Ṭek mei iangin, fa chuam iangin, khuavang iangin, dar ang dawn, hlim lai par ang ṭhen, chham ang a khuh bo, ral ang ṭi tih te.

Hmeh bel tehkhinna (metaphor) erawh chu a hmang tam lo hle. Hruaitu vanapa kan ngai tih hlaah chuan hetiang tehkhinna hi a hmang nual a. Entirnan; Renna tlangpui, sual thim seifa thinlung sakah hian, tlawmngaihna pial lung, dikna hriamhrei tihte a hmang a, a hman chhunte hi an mawi hle. Hruaitu Vanapa kan ngai tih hlaah hian zo fate zinga hlemhletna, itsikna, duhamna avanga rethei zawkte tawrhna a sawi chhova, Lersia ro darin khum, Liando inhnawl a maw? a tia. Hetah hian Liando chu mirethei ai awhtu symbol-ah a hmang a. Vanapa tih pawh hi symbol a ni nghal a. Amah Vanapa hrim hrim ai mahin a phuahtu rilru a lian nia lang chu Mizo nun mawi tak tlawmngaihna, aia upa zahna nun a sawina a ni.

Thu ziak mite leh hla phuah mite hian thumal hman rim bik an nei deuh zel a. Zikpuii pa pawh hian a hlateah hian thu mal hman rim bik a nei nual a, chun tih te, zua tihte, hrai tih te, siang tih te hi a hmang rim hle a. Hei hian a phuahtu mizia thui takin a tar lang a ni.

Heng a hla zinga panga vel hi chu anmahni chhungkaw lam chanchin sawina a ni hlawm a. Hengah hian a laimu chu chhungkaw inhmangaihna a ni. Nu leh pate tan chuan fate aia mawi zawk a awm thei lova, an aia hlu zawk khawvela a awm lohzia a pho chhuak thiam hle a ni.

Khawvel mawina leh sum zawng aiin
Ka thlang zawk che lungruka’n.

Khuarel (natural) lam hla pahnih chauh a phuah na a, a ṭha dun hle. Amaherawh chu Zozam par tih hlaah hi chuan chang khatnaah chauh Zamzo pangpar mawi zia te, mi a tihhlim zia te a sawi a. Vankhama’n tlaizawng par a enna tarmit bawk a vuah avangin, “A chuai leh ṭhin ṭhal rum chungturni hnuaian” a ti zui nghal a. Shakespear-a sonnet 60-a hringnun kan hmuh ang deuhin Zozam par tih hla chang hnihnaah pawh hian rawlthar hmel mawi tak takte pawh niin a liampui leh mai ṭhin a ni a ti a. Heta ni pawh hi hun sawina symbol tho a ni. Amaherawh chu, he lai changah hian a tawp mai lo va. Ngurchhawna’n fam an chang ta tih hlaa a sawi ang deuhin chuai tawh lo tur thil hmuh thiam a nei a, chu chu –

“Ngai teh vanglaini chuai mah se hming mawina,
A zam zel ang khawvel hmun zauvan;
Vanglai ni zawng hmaten a chuai leh si ṭhin;
Khua rei chang tur atan erawh dawn lo.
Hming ṭha a tlo zawk ang, thang leh thar chenin

a ti thei ta a ni.

Zikpuii pa hlaah chuan ‘Sikni eng’ hi a sang hle mai. Sikni eng mawi lawmin nungcha leh par tinten zia an chhuah sup sup niin a lang a. Vankhama’n tlaizawng par mawizia sawi chhuah nan –

Tleitir sakhmel ianga Tlaizawng par,
Vulmawi ka ti ang che hming lema’n,

a ti a. He tehkhinna hi a mawiin a sang hle tawh a, mahse Zikpuii pa chuan pen khat lekin “Tleitir sakhmelin a cho lo che” tiin mihringte mita mawi ber ṭhin ‘Tleitir hmel ṭha tak takte pawhin an ter phak loh hiala mawi niin a sawi a. Hetah pawh hian a la duh tawk lo cheu a. “Par tin mawina pawh i zar a ni,” a ti leh zel a. He hla changah hi chuan Zikpuii pa hi Wordsworth-a angin Nature worshipper tih ve mai tur niin a lang.

Hei hi a hla chang vawr tawp a la ni lo cheu va. Chang tawp ber tlar tawp tlar linaah chuan chu khawvel mawina ropui tak chu a dinhmun aṭang maia thlir chu duh tawk lovin, savate chu nun inthlengpui atan a sawm a.

Sirva len thiam nun intleng i,
Khawvel taksa lungkham pelin,
Chuan ka nuam ram loh lentu,

a ti hial a ni.

Zikpui pa hi thu leh hla thlit fim (criticism) kawngah hian a harh hma hle a, kum 1954 daih tawhah khan Mizo literature bihchianna lo ziakin mi tam takin Siamkima khawlhring hi Mizo thu leh hla thlitfimna (criticism) huangah bulṭantuah an ngai a. Amaherawh chu Zikpuii pa kut chhuakte hi chik zawk a han bihchian hian criticism-ah hian bulṭantu (pioneer) a ni kan ti lo thei lo. Mipui nawlpuiin kan hriat chian zawk nan kum1954-a a ziak Mizo literatureah hian hmanlai kan Mizo hlate a ṭhat tawk lohna tarlangin mahse a phuahtuten an dinhmun leh an hun tawng an puan chhuah dan thiam taka fakin chung zinga pahnih khat chu lo tar lang ila. Pi Hmuakin a nungchunga an phum laia a phuah

Nauvate u, nau-haia te u
Ṭhate te khan min han chhilh rawh u,

a han ti te hian a dinhmun hun tawng thiam takin hla thu hmangin a rawn puang chhuak a ni. Zikpuii pa hian he hlaah hian tunlai ṭhangthar hla angin hlarua (poelic words) hmu lo mahse hla ṭha chu a phuahtuin a rilrua thil awm thiam taka a puan chhuahpuina a ni tih hmuin, a hlutna a hmu chiang em em a ni.

Zikpuii pa hi mi nawlpui chuan thawnthu phuah thiam (novelist) a nih dan hi kan hriat dan ber a ni a. Amaerawh chu kan thu leh hlaah te hian huang hrang hrang lemchan (drama) tih lohah chuan a inhnamhnawih vek a. Chham hla pasarih leh sak chi hla sawm a phuah a.Essay pawh ṭha hnem tak ziakin heng zingah hian ‘Thilnawi kan hmaih ṭhelh’ tih phei hi chu belhchian a dawlin han zir chian hian finna thu (philosophy) pai kan tih tur ang hi a ni. Heng poetry, novel, essay huangah te hian kan literature tihausatu berte zinga mi a ni a, fakselna (criticism) huangah phei chuan a bulṭantu a nihna hi a pawimawhin miten kan hriat dan tur pawh niin a lang.

Leave a Reply

Your email address will not be published. Required fields are marked *

error: Content is protected !!