KAWLKHEN DAR – MIZO DAR HUAI – MIZO DAR HMINGTHANG

L.Sanglura Sailo
Ramhlun South, Aizawl

Sailo lal Lallianvunga chuan Zadeng lal ta Darkhuang lian tak, ri nalh em em mai leh ring bawk si a laksak a. Chu dar hming hi ‘KAWLKHEN DAR’ vuah a ni a. Lallianvunga chuan fapa mal Lalngura chauh a nei a, Lalngura’n fapa mal bawk Vanpuilala a nei leh a; Vanpuilala’n fapa mal tho Lalhleia chauh neiin a thi leh mai si a. Vanpuilala nupui Chawngpuituali, Lalhleia nu chuan, “tunhma aṭang tawhin he Kawlkhen Dar hi a kawltu apiangte an piang tlem reng a ni,” tih mi sawi aṭangin a lo hre tawh a. Chawngpuituali chuan a fapa Lalhleia tal chuan fapa tam tak nei ve se a duh avangin a pasal Vanpuilala thih hian an hreipui a la lawk a, an Kawlkhen Dar, an pu Lallianvunga aṭanga an lo kawl tawh chu la chhuakin, an thlah kal zel ten tuman an kawl tawh loh nan a chek chhe vek a, lal lungdawhah chuan a tartir nghal a.

Sailo lal dangten an lo hriat chuan an ui hlawm hle a niang, an uizia chu Vuttaia, hetih hunlaia tar tawh tak niin a la dam a, he Kawlkhen Dar dil tur hian Khawlian-ah a upate a tir hial a ni. Amaherawhchu lalnu Chawngpuituali thu hriat dan leh a thlir dan aṭanga han chik vang vang chuan thil tih awmtak  leh Vuta thlah kal zel te tan chuan thil lawmawm tak a ni zawkin a lang. Hemi ṭumaVuttaia upate Khawlian va kal hian an duh ber Kawlkhen Dar hawn lo mahse, Vanpuilala fapa neih chhun, Lalhleia kum 9 mi chauh an va hmuh a, hmelṭha an tihzia an lal Vuttaia hnenah an sawi a. Naupang hmelṭha tak, chum buang mai a nih thu leh a hmuh ve atan an it thu a upate chuan an hrilh a. Hetiang hunlai hian Mizoramah Darthlalang hmuh tur a la vang hle mai a; eng ang hmelpu nge an nih tih chu mi sawi aṭang mai lo chuan an in hre thei lo. Lalpa, Vuttaia chu tar lam sa ṭha tak, thau tak mai a la ni a. “Hmara Sailo lal naupang hmelṭha chum biang leh ka zang ka hmu chak ber,” a ti hial a ni.

Lalhleia hian a pa thih hnuah khaw thar sawmpakhat a sat a. Vawi li khuang a chawi a, vawi sawm Sakei a ai a; Zau a dawh bawk a, Mizo lal ropui dangte ang bawkin, ‘ZAWH-ZAW-ZO’ a ni. Ni 12.12.1939 khan kum 80 mi niin Buallawn-ah a boral a. Kum 70 chhung lal niin ro a rel a ni. A nuin an thlah an tlem zel a hlauh em avanga an Dar huai neih, ‘Kawlkhen Dar,’ a cheh chhiat vek vang te pawh ni fahmiang, Kristian ni mai si lova Pathiana zah em em avangte pawh a ni bawk ang a, Lalhleia hian fa lamah malsawmna a dawng nasa hle mai. Fapa pakua leh fanu sawm leh panga lai a nei a ni.

Leave a Reply

Your email address will not be published. Required fields are marked *

error: Content is protected !!