KAPHLEİA MEMORIAL LECTURE-cum-SEMINAR
KAPHLEIA CHHAKCHHUAK (January 10, 1910 – November 13, 1940)  CHANCHIN TLANGPUI

-Paul Lalremruata

KAPHLEIA PIAN LEH MURNA

Chalchhingvunga leh Chuaizovi te fa hmingkoh Kaphleia hi kum 1910, January ni 10 khan Aizawl-Sialsuk kawnga Ṭhiak khuaah a piang a. An unau hi a lu nung chuan 6 an piang na a, 2 erawh chu an sen laiin an boral hlauh a, dam puitling chho ta chu 4 niin, Kaphleia hi mipa awmchhun a ni a, an upat dan indawtin – 1) Kaphleia, 2) Darringaii,  3) Laltinthangi, 4) Hualziki te an ni. Tunah hian an unau zain mual an liam vek tawh a ni.

Kaphleia pa hi Dak la (mail runner) a ni a, tunhma deuh, Kaphleia te unau pian hma chuan Sialsuk bul Hauhuktar-ah an awm ṭhin a, heta ṭang hian Sialsuk-ah an chhung pem a, pa ber hna avangin Ṭhiak khuaah an pem leh a, he hmunah hian Kaphleia te unau za hi an piang vek nghe nghe. Tin, Ṭhiak aṭang hian a pa hna avang bawkin kum 1927 khan Tachhip-ah an pem leh ta a, he hmunah hian an inbengbel hlen ta a ni.

ZIRNA LAM

Sialsuka an awm laiin Kaphleia hian Sialsuk-ah zirna bul ṭanin Class II (pawl thum) a zir a, Aizawl lamah pheiin Boys’ M.E. School-ah a zir chhunzawm a. Middle School a zawh hnuah Shillong lamah chhukin Govt. High School-ah a zir leh a. Shillong hi July ni 8. 1931-ah a thleng a, kum 4 (1931-’34) chhung, High school a kal chhung zawng a cheng a. Matric a ekzam zawh hnuin an khua Tachhipah a haw a, 1935 May ni 20-ah a nghet lovin (temporary) Tachhip M.E.School-ah a thawk a, June ni 1, 1935-ah Matric a pass thu a hre nghe nghe. Shillong-a High School a kal chhung hian an zirtirtu sap hote’n an ngainain an duhsak hle ṭhin a, a bikin an hotupa (principal) E.E. Pugh-a chuan a ngaina zual a, kawng tinrengah ṭanpuiin a fapa ang hialin a en a, Kaphleia pawhin a ngainat leh ngaihsanzia, a diary-ah a ziak lang nasa hle. Chutah, a pu E.E.Pugh-a duhsakna leh thurawn angin Calcutta-a Scottish Church College-ah Intermediate of Arts (I.A.) zir zawm turin a kal leh ta a; July ni 19, 1935-ah College-ah a in ziaklut fel a. I.A. kum khatna chu 1936-ah ṭha takin a zir zova, a kum hnihna pawh zir chhunzawm leh nghalin 1937 March thlaah chawlh hmangin an khua Tachhipah a haw nghe nghe. Chutah, College kal chhunzawm leh turin Calcutta a pan thla leh a. I.A. final ekzam tura theihtawp a chhuah chhoh mek laiin damlohna (khawsik) in a tlakbuak ta chhen a. Kum 1937 July thla phei chuan a zual hle a, Doctor-ah a inentir fo nain eng a ang thei lova. In enkawl chhunzawm turin Shillong lamah a chho leh a, mahse ṭhat lam a pan hleih theih tak loh avangin a zirna pawh a chhunzawm thei ta lova. I.A. kum hnihna (final) chu ekzam lovin a chawlhsan a lo ngai ta a ni.

 KAPHLEIA NAT DAN LEH A HUN HNUHNUNG:

Kaphleia hian College kal tura Calcutta a thlen thlak a, Scottish Church College Hostel a luh hnu hian I.A. kum khatna chu ṭha takin a zir zova, amaherawhchu, a kum hnihna a zir zawm hnu rei vak lo vah khawsik a neih ṭhin thu a sawi ṭan a. Mahse a nasat lutuk loh avangin a palzam thei zel a, a zirlai pawh a chhunzawm thei zel bawk. I.A. kum hnihna a zir lai, kum 1937 March thla a chawlh hmang tura Mizoram lama a lo haw chuan an khuaah hlim takin vanglai hun a hmang a, sangha tlangvuaknaah te a tel a, an khaw lal Kamliana pawhin Bawrhsap hnen aṭanga lehkha pawimawh lo kal te chu a chhanna a ziahtir fova; khua a enkawl dan ripawt te pawh a ziah sak thin. Tin, Tachhip khuaa Presbyterian Kohhranah Sunday School Superintendent hna te pawh a chelh ve tawh a, Pi Zaii (Zosap missionary) hova Mizo zaipawlin India hmarlam khawpui lian deuh deuh 16 an fan ṭum khan Kaphleia hi a tel ve a, “Mizo Kohhran chanchina rahbi pawimawh tak a ni” tiin a diary-ah a ziak lang nghe nghe.

A hma deuh, Calcutta-a College kal tura a chhukthlak hnu, I.A. kum khatna a zirlai aṭang tawhin Kaphleia hian a damsam loh ṭhin thu hi a diary-ah a tarlang zeuh zeuh tawh ṭhin a; mahse buaipuiawm khawp a nih lem loh avangin a palzam mai mai ṭhin niin a lang. Amaherawhchu, I.A. kum hnihna a zir lai, kum 1937 July ni 14-ah chuan ‘Ka khua a sik’ tih thu a diary-ah chiang takin a ziak lang a. Heta ṭang hi chuan a khawsik thu hi a diary-ah a ziak lang tam tial tial a, Doctor hnenah a in entir ṭhin thu pawh a tarlang fo. Ṭhat lam a pan theih tak loh avangin uluk lehzuala in enkawl turin August ni 11, 1937-ah Shillong lamah a chho ta a; hetia Shillong a pan chhoh tak na chhan ber hi kawng tinrenga amah ṭanpui ṭhintu, a High School kal laia an hotu Pugh-a a belh duh vang ni berin a lang. August ni 12, 1937-ah Shillong khawpuia W.M.Hospital-ah a lut ta nghal a; he tah hian a natna chu NGAWR (T.B) a nih thu an lo hrilh chiang ta a, a nasa hman hle tawh tih pawh a hre ta zel a. Damdawiina a awm lai hian hetih laia lehkha zira Shillong-a awm ve, a hnua Mizo pa lar ber pakhat lo ni ta R. Vanlawma chuan a tlawh nghe nghe. Tin, Shillong-ah hian Ngawr natna vei ve tho, Mizo tlangval chhuanawm ve bawk, Mizo novel hmasa ber Hawilopari leh short story hmasa ber ‘Lali’ ziaktu Rev. Liangkhaia fapa Biakliana (1918-1941) nen an han intawng a, dinhmun inang ve ve ta chu an inkawp chho ta zel a ni. Hetih hun lai hian Ngawr (T.B) chu India ramah a damdawi a la awm loh avangin enkawl ngaihna a vang hle a, tihdam theih loha ngaih a ni hial. ‘Khawvel pang lehlam, America ramah te chuan an hmuchhuak tawh a ni awm e’ tih thuthang chu inhnemna awmchhun a ni ber awm e. Shillong-ah pawh chuan han inenkawl vak ngaihna awm chuang hek lo, pu bera a neih Pugh-a pawh chuan theihtawp chhuaha ṭanpui duh ngawih ngawih mah se kawng a awm miau loh avangin, August ni 19, 1937-ah chuan rilru na tak chungin, Mizoram lama haw mai turin thurawn a pe ta ngawt mai a ni. A hawna atan a pu chuan Rs. 35 lai a pe a, a ṭhianṭha Miss A. Bullock pawhin lehkhabu 6 ngawt, ngaihhrui nan a pe bawk. Tichuan, he a khualzinna rama a ṭhianṭha, amah hmangaih em emtu, amah paw’n a ngaih leh a thlakhlelh ngawih ngawih te nen chuan he khawvela inhmuh leh beisei tawh lovin ‘Luiral mawiah khian kan la inhmu leh dawn nia‘ (We shall meet beyond the River) tia inthlahna inhlan chungin September ni 6, 1937-ah Mizoram lam panin Shillong chu, mittui nena chhuahsan ta a ni.

A diary-a a tarlan dan chuan September ni 7, 1937 chawhnu dar 1-ah Silchar an thleng a, sap Doctor, Dr.G.G Grozier-a chuan Biakliana nen a lo en dun a, Kaphleia chu a dinhmun a ṭhat loh zawk thu a hrilh nghe nghe. Mahse, Kaphleia hian a pawm tehchiam lo ni tur a ni, a diary-a a ziak dan chuan (September 8, 1937)

Biakliana aiin ka dinhmun a ṭha lo zawkin a sawi a, ‘Sa pela i vahchhuah chuan, i thlanmual a ni ang,’ tiin min hrilh bawk a. Mahse a thusawi chu ka ring hauh lo. Shillong damdawiina ka awm laiin ka kal fo ṭhin a ni,” tiin a ziak.

Silchar-ah hian rei cham lovin Mizoram lam panin, Tlawng lui dung zawhin an chho leh nghal a. Lawnga tlawng lui an rawn zawh chhoh laia Biakliana leh Kaphleia rilru vah thui dan tur hi chhut tham a ni. Kaphleia diary, September ni 17, 1937-ah chuan ti hian a ziak a:

“Ka pa (Kaphleia pa-Chalchhingvunga) hovin mi paruk lai zing dar 9-ah Sairang an lo thleng a. Mi 30 lai Biakliana zawn turin Saitual aṭangin zing dar 10 velah an lo thleng bawk a. Kan pahnih chuan min zawn nghal a, sikul naupang leh Training hote pawhin an ṭanpui a. Durtlang-ah min zawn tlang nghal a, tlai dar 6 velah kan thleng,” tiin.

Durtlang damdawiin an luh hnu hian ngawr natna vei an nih miau avangin damdawiin ward pangngaia an awm ve a rem lova, Biakliana nen an awm dunna turin damdawiin sirah a hranin in te an sak sak a, a hmingah ‘INTE-THAWVENG’ an vuah nghe nghe. He in hi tu tlawh mah an phal lova, hriattima – ‘He in hi tlawh phal a ni lo. A tlawh kan hmuh chuan a pawi hle ang. Mi tin tana ṭha tur a ni’ tih hi damdawiin hotute’n an tar nghe nghe.

He ‘Inte Thawveng’-ah hian Kaphleia leh Biakliana chu hun rei tak chhung unau ang chiahin an cheng dun a, harsatna thuhmun tawk, tui zawng inang ve ve chuan he khawvel leh hringnun hi thlirin thu leh hla tuipuiah an cheng dun ṭhin a ni. Natna khirh tak, tihdam theih loha ngaih hial vei ni mah se Kaphleia beiseina erawh chu a nung reng ni ngei tur a ni, kum 1937 December-a a diary-ah chuan hetiang hian a ziak a:

“Ni tla a mawi hle mai, kumin ni hnuhnung ber anih avangin a ngaihawm hle. Kum tharah hlim zawk leh vannei zawk turin Pathianin min hruai rawh se,” tiin.

Durtlang damdawiina ‘Inte-thawveng’-ah Biakliana nen thla 8 dawn an awm dun hnuin Kaphleia chu a dinhmun ziaawm deuha ngaiin May ni 4, 1938-ah an khaw lamah an haw phei a. An chhungkhat hnai Pi Sangi sakawrah chuangin a tuk (May ni 5)-ah Tachhip an thleng a. Zosap missionary Pu Mena (Rev. E.L. Mendus) leh Kohhran mi pawimawhte’n June ni 1, 1938-ah an va tlawh a, Kaphleia awmna turin a bika in sak sak an duh thu an hrilh a, a senso atan Rs 20 an pe nghe nghe a ni. Tichuan, an inpui kawmchar pen sawm 20 emaw vela hla, Theihai kung (tun thlengin he Theihai kung hi a la ding) chhek in tia awrhin ‘In te’ bawk chu an sak sak a, kawngka pui leh bang thlang lamah tukverh neiin a chhungah khum, lehkhabu bawm leh dawhkan a awm. He ‘In te’ ah hian kum khat bawr vel a cheng a, ei leh in chu a chhung ten a hranin an pe mai ṭhin a ni. He hmuna a chen chhung, kum 1939, June ni 11 thlengin Kaphleia hian Ngawr damdawi atan Ui thi vawi 20 zet a in hman nghe nghe a. Amah pawhin a ziaawm phah viauin a hre ṭhin a, damchhuah leh inbeiseina pawh a nei sang viau ni tur a ni; kum 1938 kum tawp ni, December ni 31-ah phei chuan a diary-ah:

Ka harh hle, dam takin 1938, lungngaihna leh mangan ni te zawng kha liam pui la, nun tharin kum thar ka hmang tawh nang e…” tiin a tarlang nghe nghe.

Amaherawhchu, kum a lo thar a, a natna chuan kiansan a hnekin zual lam a pan ta zel thung a. Chutah, a dinhmun a tlakhniam chhoh tak zel avangin a chhungte mangang chuan June ni 15, 1939 khan Durtlang damdawiin an pan pui leh ta a, kum tawp, December ni 31, 1939 thleng a awm. He mi ni thleng hian mumal takin a diary a ziak a, he mi hnu lam hi chu hmuh tur a awm mumal tawh lo, a dinhmun a chhiat tak em avangin a ziak hlei thei ta lo ni ngeiin a lang a. A beiseina ni eng pawh tunah zet chuan chhum dumin a hliah bo zo ta a ni ngei ang, kum 1939 December ni 31-a a diary-ah chuan kum thar atana beiseina awka reng hriat tur a awm tawh lo.

Khua a ṭha hle mai, ka mu deuh reng a, Chami nu a lo kal, Ngengi nu te pawh an lo leng. Tlaiah Sawma a lo kal, vawksa kan chhum; zan dar 12-ah Aijal-ah te, Chaltlangah te, Durtlangah halpuah an hal, Durtlang ho biak inah an inkhawm…” tih thu chauh hi tarlangin a diary ziak kan hmuh theih hnuhnung ber hnu a khar ta a ni. A lainatawm ngei mai.

Tichuan, a dinhmun a beidawnthlak tak em avangin 1940 kum bul teah Tachhip lamah an haw phei leh ta a, an kawmchara a ‘In te’ ah bawk chuan a cheng leh a; amaherawhchu, a khuh nasat tak em avang leh khak te chhak ngun ngaih tak avangin, zep nak emaw, ṭhenawm khawveng ho phun ri a ring ta hle a. Tin, amah hi a harh ṭhat deuh chuan khawlai te pawh a leng ve fova, naupang inkawibah te hi a thlir fo ṭhin. Naupang leh tleirawl rual hian an ngainat (ngaihsan?) em avangin an bawr leh tuau mai ṭhin bawk nen, hri a kaidarh hlauin khawtlang ngaih ṭha lo chuan a chenna hmun chu sawn an rawt ta fo mai a. A nu leh pa, a chhungte pawhin khawtlang rilru puthmang chu awm an tih pui a, lainatin khawngaih em em mah se Kaphleia dinhmun thlirin a chenna chu sawn an remti a. Tichuan, hetih laia Tachhip Mission (Presbyterian) Biak in (tunah pawh Biak in hmun a la ni reng) hnung hla tawk fanga tlang/mual pawng, hmun rem takah chuan Kaphleia chhenna turin ‘In te’ bawk chu kum 1940 kum tir lamah an sak sak leh ta zawk a. Mipui mimir leh naupang chenchilh phak loh, dai hmun fianrial takah chuan khawhar takin a cheng ta zawk a ni. Nimahsela, naupang leh tleirawl rual hian an chhung te hriat lohin, a thawnthu sawi ngaithla tur leh kawm hlim turin an tlawh ru reng thin ṭho niin, Kaphleia hmu leh hre pha Tachhip pa ṭhenkhat chuan an sawi. Tin, Tachhip lal Kamliana Sailo fanu, nula hleitling leh hmel ṭha pui mai Rotluangi pawhin a tlawh fova, ei tur eng eng emaw bakah thei thur te a ken sak ṭhin a, a sam te pawh a khuih sak fo ṭhin niin an sawi bawk. Amaherawhchu, kum 1940 chawhnu lam, a lo chauh zual tak hle hnu erawh chuan an lainat em avangin a chhungte’n an in lamah an la phei leh ta a, a hun tawp thlengin an kawmchara a ‘In te’ hmasaah chuan a awm ta a ni.

‘In te’ khawhar a, natna hrehawm tak tuar, he khawvela damchhuah leh beiseina reng reng nei tawh lo Kaphleia’n chhun ni leh zan a hman liam ṭhin dan tur leh a rilru hrehawm leh baihvai a vahkual thui dan tur hi han chhut chian chuan a lainat awm ngawih ngawih a ni. He hmunah hian khawhar leh beidawng takin, natna hrehawm tak tuarin a mal tlat a, a rilru fing fim leh chak tak erawh chuan a hmangaih Zoram, Zofate leh hringnun khawvel hi a ngaihtuah reng ṭhin ang tih a chiang. Chutianga kum khat dawn a awm hnu chuan kum 1940, November ni 13 khan:

Ar ang ka vaihna tlang zawng zawng hi,
Ka zua Lal hnenah ka hrilh hun chuan,
Hmangaih banin min pawm ang,
Engmah reng ka hlau lovang,
Aw, chatuan lawmna ka chang tawh ang.”

tiin, he a vahvaihna thlaler ram hi, chatuan atana lo chhuahsan hlen ta a ni. A dam laia a ma’n a lo sawi lawk tawh leh duh dan ang ngeiin, amah chauha ‘In te’ khawhar a lo nghah ṭhinna Tachhip Mission Biak in hnung mual pawng hmun rem tak leh thengthaw nuam tak, he tih hun laia thlanmual pawh la ni lovah chuan Tachhip khaw mipuiin duhsak takin an phum a. A hnu rei vak lovah a pa Chalchhingvunga chuan a fapa, a hmangaih leh thlakhlelh em em thlan kiangah chuan a hriatreng nan Bung a phun a, ‘Kaphleia Bung’ tih vuahin, vawin ni thlengin he Bung hi a la awm a, a kung pawh a lianin a inzarpharh tha tawh hle nghe nghe. Kaphleia thlanlung, a nu leh pa’n a ruang zalhnaa an phunah chuan he thuziak hi a chuang a ni:

Kan fapa neih chhun,
Kan thlamuanna ber thin;
Kaphleia Chhakchhuak
1910 Jan. ni 10-ah a lo piang a.
Kum 1937 ah College ah I.A. zir
zovin a lo chhuak a. Kum 4 chhung
natna hrehawm tak tuarin kum 1940
Nov. ni 13 zan dar 10 ah
he hmunah hian a muhil ta.

A pa : Chalchhingvunga

A nu : Chuaizovi

(He Kaphleia thlanlung (original) hi thlanlung satliah ve mai a ni a, thlanlung dang aia chungchuanna leh duhawmna pawh a nei hauh lo. Hetiang hian, ngaihsak loh leh tlawh pawh loh taka he ‘Thlan khawhar’ hi kum 50 chuang a din hnuin, a hnuaia zalh tak mihring chu Zofate rohlu a nih zia hretute’n hma an rawn la a. Hrangbana College-a Literature Committe leh NSS te, Tachhip YMA te ṭangrualin Kaphleia thlanlung hi an phun ṭha ta a. Thlanlung kil thum nei, a kil tina Kaphleia hlutzia pholanna thuziak awm thlap buatsaihin, zahawm tak leh ropui takin November ni 28, 1994 khan Kaphleia chawimawina lungphun thar chu hawn a ni ta a ni. Hnam tana mi ropui chawimawina chang hria a, Hrangbana College leh Tachhip YMA te hmalakna hi a ropui hle a, an entawntlak hle bawk. He mi kawngah hian Pu B.Lalthangliana’n a bik takin fak a phu hle a ni.)

 LITERATURE LAMA A SULHNU:

Zofate zinga literature lama ṭhangharh hma ber pawl, ruahṭhamloh kutchhuak ṭha tak tak min hnutchhiahtu Kaphleia hi tlangval hmelṭha veng vawng, faina leh thianghlimna ngai pawimawh em em ṭhin, a thawmhnaw neih ang ang fai taka vawng a, uluk taka inchei thlap reng peih, a ṭhiante paw’n ‘gentleman dik tak a ni’ ti ngata an koh fo ṭhin, ziak leh chhiar a thiam tirh ata lehkha chhiar peih em em a ni a. High School leh College a kal hnuah phei chuan lehkhabu tha tak tak, khawvel pum huap pawha lehkhabu ṭha leh lar chhiar nan hun a hmang nasa ṭhin hle tih a diary aṭangin a hriat theih a; Adolf Hitler-a ziak ‘My Struggle’ te, Cambridge leh Oxford mithiam GT.Warner leh С.Н.К. Marten te ziak ‘The Groundwork of British History’, tih te, ‘Tales from Shakespeare‘ tih bu te, ‘The Poetical Works of Wordsworth‘ tih te phei chu a chhiar nasa tih hriat takin a bu chhung a thai hnawk nasa hle. A lehkhabu hnutchhiah eng emaw zat chu tun thlenga vawn ṭhat a la ni hlawm.

Tin, Kaphleia hi ziaka thil chhinchhiah leh vawn ṭhat kawngah a taima em em a, Shillong-a High School a luh tirh aṭangin diary ziakin a vawng ṭha thlap a, kum 1931 July ni 8-a Shillong a thlen thlak thu a ziak aṭangin kumtin diary a ziak chho reng a, kum 1939, December ni 31 thlengin a vawng ṭha hle. Hemi hnu lamah erawh hi chuan a chak loh zual tak em avangin a chhunzawm hlei thei ta lo a ni ang e, a diary hmuh tur mumal a awm ta lo a ni. Literature lama a kutchhuak hrang hrang, a ziak hun leh a ziak dan chungchang te pawh a diary-ah hian a tarlang fel thlap ṭhin. A diary hrim hrim pawh hi Literary piece ṭha tak a tling a ni. A diary behchhana hmangin, Literature lama Zofate hmahruaitu Kaphleia sulhnu hrang hrangte chu a tawi fel thei ang berin han tarlang ila:

A.PROSE (THU TLUANG) – ESSAYS & ARTICLES etc.

1.Kristian Beihram Pawl (May 3, 1932)
2.Koongoree and the Goblins (May 28, 1932)
3.Lushai Legends (July 1, 1932)
4.Thu nawi (July 2, 1934)
5.Engatinge Durtlang Damdawiin (1934)
6.KURTAI (February, 1936)
7.Mitdel ram (August 9, 1936)
8.Entirsiakna ṭhatzia (1936)
9.Entirsiakna ṭhatzia chhunzawm lehna (November 10, 11, 1936)
10.Mikhual leh Babu (November 12, 1936)

(Calcutta-a I.A. kum hnihna a zir lai, ṭhal chawlh chhunga ziak turin heng thute hi a thlanchhuah thu a diary-ah a tarlang a, a ziak ngein a rinawm bawk, chung te chu: Entirsiakna ṭhatzia, Mitdel ram, What is everybody’s business is nobody’s business, General introduction to the Bible and Testament, Who made Evil? (If God made everything), Where is Heaven?, Where is hell?, Ram Kabai, Engvangin nge thingtlang khua a hrisel loh?)

11.Modern Girl (Play – June 9, 1937)
12.Durtlang damdawiin kartin chanchinbu (December 5, 1937)
13.Zun thiar dan (December 16, 1937)
14.UI (December 16, 1937)
15.Poetical Word (December 21, 1937)
16.Chhura chanchinbu (January 17, 1938)
17.Question Method -lehlin (Pi Zaii tan – January 19, 1938)
18.Bible zirtir dan -lehlin (Pi Zaii tan – February 2, 1938)
19.Pericles ‘Prince of Tyre’ – lehlin (March 9, 1938)
20.LSA hi engtin nge a ṭangkai theih ber ang? (March 28, 1938)
21.Othello – lehlin (April 5, 1938)
22.Chhura chanchin No. 20-na (April 17, 1938)
23.Tachhip chanchinbu (May 25, 1938)
24.Hla lenglawng (August 30, 1938)
25.Т.В. – lehlin (September 13, 1938)
26.Chingal leh Saum (September 15, 1938)
27.Ngawr na leh thil dang te (September 16, 1938)
28.Chhura lehkhabu (February 18, 1939)
29.Chapchar Kut zawhna (March, 1939)
30Chhura chanchinbu (April 3, 1939)
31.THLIRTU (April 11, 1939-ah ziak ṭanin September 24, 1939-ah a ziak zova, November 10, 1939-ah ennawnin a chul mam leh)
32.Biaki Sermon – lehlin (June 30, 1939)
33.YLA tan News (August & October, 1939)
34.Tunlai chanchin (October 7, 1939)
35.Cake siam dan – lehlin (Pi Thari tan – December 15, 1939)

(Heng Kaphleia kutchhuak tam ber hi tunah hmuhchhuah a la ni lova, theihtawp chhuaha zawnchhuah hna thawh a ṭul tak meuh a ni. KRISTIAN TLANGAU MIZO LEH VAICHANCHINBU, YLA LEH LSA chanchinbuahte thu a ziak tlangpui. A chunga hawrawp pui (Capital letter)  chhut kaite chauh hi tun dinhmuna Kaphleia thuziak kan hmuh theih te an ni.)

B.THAWNTHU/THAWNTHU TAWI NOVELI (SHORT STORY)

Chhingpuii (October 4, 1938-ah ziak ṭanin April 11, 1939-ah a ziak zo)

C.HLA – HLAHRIL LEH THLUK NEI (POEMS, SONGS, HYMN, LEHLIN etc.)

1.Tlanglam Zai (Bawichhuaka nena an ziah – February 25, 1933)
2.Come, Birdie come… – lehlin (February 21-23, 1938)
3.Ka thinlung Isua hnenah – lehlin (May 19, 1939)
4.Vaihlo hla -kaihlek (September 14. 1939)
5.Nowell -lehlin (November 20, 1939)
6.Once in Royal David’s City – lehlin (November 21, 1939)
7.Christmas Awake – lehllin (November 30 – December 1, 1939)
8.Pi Thari hla (December 22, 1939)
9.Ka Nu Hmangaihna (December 22, 1935)
10.Ka Nu Hmangaihna Aw Nem Chu – lehlin (1935)
11.Zoram Nuam (January 25, 1936)
12.Nghilh Ni Awm Thei Ang Maw..! (1936)
13.Hun Leh Kum Te an Ral Zel a (1936)
14.Kan Run Khawhar (November 29, 1937)
15.Dam Takin (1938)
16.Ṭhal (January 19, 1939)
17.Zoram, Ka Ram (January 25, 1939)

(Hawrawp hrey (bold leiter)-a chhut kai te hi tuna hmuhchhuah theih chin a ni)

Leave a Reply

Your email address will not be published. Required fields are marked *

error: Content is protected !!