KAN ZINGAH A LO AWM TA

K. Zalawma

Tin, Thu chu tisaah a lo chang a, kan zîngah a awm ta a (Pa fa mal neih ropui angin a ropuizia kan hmu), khawngaih leh thutakin a khat. Johana 1:14.
He rilru, Krista Isua pawha awm bawk kha, nangmahniah awm rawh se; ani zawngin Pathian anga awma, Pathian tluka awm chu thil thlâkhlelh hleih theihah a ruat lo va, mihringte anga lo piangin, bawih angah a insiam a, amah leh amah a intitlâwm ta zâwk a. Tin, mihring anga lo awmin a inngaitlâwm a, thi khawp hiala thu zâwmin a lo awm ta a, krawsa thihna ngei chu. Chumi avâng chuan Isua hmingin mi tin – vâna mite, leia mite, lei hnuaia mite nên – an ṭhingṭhit nân leh Pa Pathian tihropuina tûrin, “Isua Krista chu Lal a ni,” tiin lei tinrêngin a puan nân, Pathianin ani chu nasa takin a chawimawi ve ta thung a, hming zawng zawnga hming chungnung ber chu a pe ta a. Philippi 2:5‭-‬11.

Thu: Grik ṭawngin ‘logos’ tih a ni a. Grik mifingte chuan, ‘engkim, Pathian thilsiam hi danglam thei lo a awm lo va, a danglam zung zung ṭhin a. Engkim danglam zung zunga siamtu hi a awm a, awmze neihtirtu pakhat a awm, chu chu Pathian thu (logos) hi a ni a, engkim chunga thuneitu chu ‘logos’ hi a ni e,’ an ti. Grik-ho chuan Pathian nihna sawi fiah nan ‘logos’ hi an lo hmang ve rêng ṭhin a. Pathian rilru leh ngaihtuahna lo chhuak hi ‘logos’ tiin an ko bawk a. Khawvel siamna thu zawng zawng hi ‘logos’ an ti bawk ṭhin.

Johana hian Juda-hovin finna an pawm dân te, Grik-hovin logos an pawm dânte a hre vek a. Juda-ho chuan finna (wisdom) hi Pathian tiatin an dah a. Pathian Dân thute chu ‘finna’ tiin an ko ṭhin a. Juda mifing Philo-a chuan Grik mite ngaihdâna logos leh Judate ngaih dâna finna tihte hi thuhmunah pawmin logos tih hian finna te chu keng vekin a hria a. Heng ngaih dan awm tawhte hi Johana hunah a lar hle tawh a. Johana hian Isua Krista hi mite hriat fiah ngei turin an thu lo hman ṭhin hmangin a puang ta a ni.

Logos chu Isua nihna bul angin Johana hian a sawi a. Kristiante pawhin Johana sawi hma pawhin Chanchin Ṭha sawi nân Logos hi an lo pawm sa reng tawh a. Paulan Chanchin Ṭha thu a hril pawh kha Logos tia sawi a lo ni tawh a ni.

Thu tisaah a lo chang (1:14):
Logos chu Pathian a ni a, chu Pathian chu hmuh phak loh tih ṭhin a ni. Mahse, hmuh theihin tisa, taksa neiin kan zingah a lo awm ta a. Chu Isua, kan zînga hmuh leh khawih theiha lo awm ta chu Pa Pathian Fa mal neih chhun a ni a, khawngaihna leh thutaka khat a ni (Rev. C. Chanchinmawia).
Grik-hoin engkim hi dang lam zung zunga an ngaih laiin Johana chuan “a mah chu a awm pangngai ang takin kan hmu dawn si a,” a ti (I Joh 3:2).

1. Pathin mihringa lo chang, kan hnena Pathian awm a ni: Johana te hun lai hian Grik finna hi khawvelin an ngaihsan ber a ni. Logos chu Pathian thu a ni a, engkim siamtu a ni bawk a, a thilsiam mihringa
chang turah an ngai thei lo.

Isua pian hma kum 700 hma lamah khan Zawlnei Isaian,
“Chuvângin, Lalpa ngei chuan chhinchhiahn a a pe ang che u: ngai teh u, nula thianghlim pakhat a rai ang a, fapa a hring ang a, a hmingah Immanuela a sa ang” (Isaia 7:14) tih leh,
“Kan tân naupang a lo piang a, fapa pekin kan awm ta a..” (Isaia 9:6) tia a lo sawi lâwk daih tawh Pathian thu chu a takah a lo chang ta a. Hei hi Johana chuan “Thu chu tisaah a lo chang a, kan zingah a awm ta…” tiin a sawi ta a ni. Grik-hoin thu, hmuh theih loh nia an sawi ṭhin ngei kha mihringah lo changin, hmuh theihin kan zîngah a lo cheng ta a, chu chu Lal Isua kha a ni a, Amah hi kan hnena Pathian awm chu a ni a ti.

Kristian hmasa ṭhenkhat, zirtirna dik lo tia an hnâwl tâk ‘Knostics’ an tih leh ‘Docetic’ zirtirna an tih chuan Isua Pathianna sawi uarin mihringa a lo channa hi an pawm lo. Josefa fapa Isua khân Jordan luia baptisma a chan aṭang khân thlarauvin a rawn luah ta a; kraws-a a thih dâwn khân a chhuah san leh a ni an ti.

2. Pathian tak leh mihring tak, kawng tinrenga hring nun min hriatpuitu leh chanpuitu a ni: Tirhkoh Paula chuan, “…Pathian anga awma, Pathian tluka awm chu thil thlâkhleh hleihtheihah a ruat lo va, mihringte anga lo piangin bawih angah a insiam a, amah leh amah a intitlawm ta zawk..” a ti. Pathian tak a nih avangin midang tihtlawm phak a ni lova, ama duhna ngeiin a intitlawm tihna a ni.

Paulan a sawi zelnaah, “…Thi khawp hiala thu zawmin a lo awm ta a, krawsa thihna ngei chu…” a ti. Lal Isua chuan kawng tinrênga hring nun min hriatpuia min chanpui hnuah, misual, nung tlak lote thih danin, krawsah khenbeh a ni. Hei hi kan nihna min tawmpui mai bakah kan tuar tur min tuar sakna leh kan tâna min thihsakna niin, a takin hring nun min chanpui a ni.

3. Lal Isua nen chuan lei pawh van a chang thin:
Tirhkoh Paulan Lal Isua thuawihna chungchâng a sawi zelnaah, “Chumi avang chuan Isua hmingin mi tin – vana mite, leia mite, leihnuaia mite nen – an ṭhingṭhit nân leh Pa Pathian tihropuina turin, ‘Isua Krista chu Lal a ni’ tiin lei tinrêngin a puan nân, Pathianin nasa takin a chawimawi ve ta thung a, hming zawng zawnga hming chungnung ber chu a pe ta a” Phil. 2:9-11), a ti. Ropui taka chawimawi a hlawhna chhan chu, chhel taka a tuar tlat avang a ni ang khan, he leia kan awm chhûng pawh hian, hrehawmah pawh lawm chunga van nun chen theihna ama zarah kan lo nei ve ta a ni.
R.L. Kamlala chuan,

“Aw Thlarau leng rawh, lawmna rimtui ber,
‘Haleluia!’ tiin thlaler ram hi;
Lawmin an awi nuam e, khawhar riangin,
Nang i awm chuan lei van a chang ṭhin..” a lo ti a ni.

Van nun Lal Isuan a rawn nunpui kha, mahni inngaitlâwma mi dang tâna malsawmna ni tûra inhmang ral nun a ni ang khan, ringtute pawh hi mahni tân maia nung tawh lovin, midangte ṭhatna tur zâwngin kan nun hi hmang ila, lei pawh hi van a chang mai dawn a lo ni.

Leave a Reply

Your email address will not be published. Required fields are marked *

error: Content is protected !!