Kan tih tel lo chhandamna – Laltanpuia Ngente

KAN TIH TEL LO CHHANDAMNA

Lalṭanpuia Ngente

Krista chu ‘leilung pian tirha talh tawh Beramno’ tih a ni a.(Thup 13:8) Leilung pian tirhah chuan lei hi a chhiaa a ruak ngawt a la nih avangin mihring hmasa ber Adama pawh siam a la ni lo va.(Genesis 2:4-5 ) Chutih lai daih tawhah chuan ‘Pa’ thinlungah chuan Krista chu talha awm tawhin ‘Pa Pathian’ chuan a lo sun daih tawh a, Pathian chuan chhandamna hna zawng zawng chu ama lamah chuan a lo thawk zo vek tawh a nih chu. (Thupuan 13:8, 1 Petera 1:20) (Chhandam tur mihring awm hmain chhandamna hna a lo thawk zo vek tawh tihna a nih chu, kan tih a tel ve lo chiang. Hei hi Ama hun ruatah mihringte hmuh theih turin atakin Kristaah a lo lang chhuak mai a ni.

Tichuan, bawhchhiat hnuah chuan, bawhchhetu Adama thlah mihring piang chhuak reng reng chuan hrilh hretu awm lo chuan Pathian hriattheihna kan nei tawh lo va, thlarau lam dinhmunah chuan engmah tih theih nei lo, chhelailet der, thi (totally depraved) kan ni tawh a. Hrilhtu awm lo chuan misual chhandam ngai kan ni tih pawh kan inhre thei lo va, van ram leh hremhmun a awm tih pawh kan hre lo va, kan ngaihtuahna chuan setana khawvel bak a pel thei tawh lo va, keimahni theihnain setana khawvel kan chhuahsan thei tawh lo. (A fiah nan heiti hian han sawi ila. Nausen pianghlim hi ramhnuaiah zâwng-in emaw enkawl seilian sela Jehova a awm tih a hriat in ring em.? A hre hauh lovang. Hei hi bawhchhe hnu mihring zawng zawng nihna a ni.

)

Pathian chuan chutiang mihring, chhelailet der ni tawhte chu a bo a bang awm lova chhandama awmah leh Thutak hriaah min duh vek a, tumah duhsak bik a nei lo va. Chuvangin Amah hre thei tawh lote hnenah chuan amah zawk chu a rawn inhriattir ṭhin zawk a. Amah hre hmasa apiangte chu hmanruaah hmang chhawng zelin amah la hre lote chu a zawng chhuak zel a, keini pawh min zawng chhuakin a chhandamna Chanchin Ṭha chu kan hmaah min rawn chhawp chhuah sak ve a nih hi.

Tichuan, kan hnenah Pathian a inhriattir hmasak avangin Pathian a awm tih te, hremhmun hmabak mai kan ni tih te, chhandamna a awm tih te, van ram leh hremhmun a awm tih te kan lo hre ta a. (Hei hi Thlarau Thianghlimin mihring nun a luhchilh hmaa mihring pawn lam aṭanga hna min thawh sakna hmasa a ni a. A chhandamna chu kan lo hriata a hnen kan pan theihna tura kan hnena Pathian inpuanna leh min zawn chhuahna, kan nun min luh chilh theihna tura min kohna leh min buatsaihna a ni a, chhandamna changtua min siam tura Thlarau thianghlim hnathawh vek a ni.

A ram leh a hnam ang pawhin han thlir ila, Mizote pawh hian kan zawn leh kan dil ni hauh loin sap missionary te hmangin Pathianin min rawn zawng chhuak a, anni kaltlangin ‘Amah’ chu kan lo hre ve ta a nih hi.

Tin, a chanchin hrilh dawng hman lova mual liamte lakah pawh Pathian chu a diklo chuang hauh lo. Pathian chu tumah duhsak bik nei lo Pathian a ni a, an tan chhandamna kawng a ruahman sak vek tho vang tih hi ringhlel lo phawt ang. Heng aṭangte pawh hian a hriat theih awm e.

(Tirhkohte 14:16-17 Chu Pathian chuan hman laiin hnam tin mahni kawng theuh zawh a phal ṭhin a, nimahsela amah hriattirna awm lovin a insiam lo.)

Tin, thlarau khawvelah pawh Chanchin Ṭha hrilh an ni thei bawk.

(1 Petera 4:6 “He mi avang hian a ni, mitthite hnenah pawh chuan Chanchin Ṭha hrilh a nih ni, tisaa awm mihringte anga ngaihtuahin an awm a, thlarau erawha Pathian anga an nun theih nan”.)

(1 Petera 3:18-19 “Pathian hnena min hruai theih nan Krista chuan sualte avangin vawi khat a tuar bawk si a, mi fel chuan mi fel lo aiin a tuar a, tisaah chuan tihthihin a awm a, thlarauvah erawh chuan tihnunin a awm ta a; chu chuan tan ina thlarau awmte hnenah chuan thu a zuk tlangaupui a,)

Mahse, Pathian chu dik taka rorel ṭhin a nih avangin dam lai aiin thih hnu thlarauah pianthar a awl sawt chuang bik lo vang. Helam hi chu chhui zui thui lo ila.

Tichuan, Pathian chu mitin hnenah a inhriattir vek a, inhriattir lohna reng reng a nei lo a nih chu.

Ninahsela, Pathian inhriattirna dawng ṭheuh chung si hian chhandamna chang leh chang lo kan awm ta tho a nih hi. Engvang nge ni ang.? Tute nge chhandamna changtute chu.? Eng tianga chang ta mai bik nge an nih.? Hei hi Pathian thu chhuina huanga zawhna pawimawh ber a ni hial awm e.

Aw le, heti hian i han sawi dawn teh ang. ‘Rinna chu hriatna avangin a lo awm ṭhin a, hriatna chu Krista thu avangin a lo awm’ tih ang khan, rinna/piantharna/nun thar nei tur chuan kan rin tur kan hriat hmasak a ngai a. Chuvangin Thlarau Thianghlim chuan, atir lama kan sawi tawh ang khian, a hmanrua Rawngbawltute hmangin chhandamna hna Pathianin a lo thawh zawh vek tawh chu min rawn hrilh hre ṭhin a.

Tichuan, mihring chuan hrilhtu awm lova kan hriat theih hauh loh tur ‘Pathian leh a Thu’ hriatna kan lo nei ta a. Misual, hremhmun hmabak mai kan ni tih te, hremhmun hlauhawm zia te, Pathian chhandamna hlut zia te, chhandamna chu a thlawna chan mai theih a nih zia te kan lo hre ta a. Hemi chin hi mihring pawn lam aṭanga Thlarau Thianghlimin hna min thawh sak a ni a, benga hriatna mai chauh a la ni a. Mahse, hei hi nuna hriatfiahna, kan nun chhungril ber (kan thlarau) aṭanga hriatfiahna kan neih theihna tur leh kan duhna hmin saka awma, ‘misualte zawk lama sim tir tura a lo kal ang khan,’ ‘Simna nun tak’ min neih tir theihna tura min sawmna/kohna/buatsaihna hmasa a ni.

Tichuan, mihring chu Pathianin min zawn chhuah hnu leh, kan hnena a inpuan vek tawh hnuah chuan, engati nge ṭhenkhat chhandam changtu an lo niha, engati nge ṭhenkhatin an chan si loh tih lai tak hi a pawimawh lai bet chu a ni a, heti hian han sawi fiah chho dawn ila. A hmasain hengte hi ngun takin chhiar hmasa teh ang.

(Thu Puan 3:20 “Ngai teh, kawngkhar bula dingin ka kik hi; tu pawhin ka aw hriaa kawng a hawn chuan, a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang.”)

(Thu Puan 22:17 “Thlarau leh mo chuan, “Lo kal rawh,” an ti a. A hria apiangin, “Lo kal rawh,” ti rawh se. Tuihal apiang lo kal rawh se; a duh apiangin nunna tui hi a thlawnin la rawh se.”)

Tirhkohte 13:46 “Tin, Paula leh Barnaba chuan huai takin an sawi chhuak a, “Pathian thu hi nangmahni hnenah sawi hmasak tur reng a ni; nimahsela, in hnar kir a, chatuana nung tlak lova in inruat tak ahnuin, hre rawh u, Jentailte lam kan hawi ta ve ang.”

Kan sawi tak ang khian, mihringin Pathian thu hrilh kan dawng hi kan tana Thlarau Thianghlim hnathawh, chhandamna changtu ni tura min buatsaihna leh min sawmna hmasa a ni a. Pathian thu tar lante khi ngun taka kan thlir chuan, chhandamna changtu ni tur chuan Thlarau Thianghlim sawmna hi hnar loh leh dodal loh a ngai tih kan hre thei a ni.

Thupuan hi ngun takin en ila. Lal Isuan, ‘Tu pawhin ka âw hriaa kawng a hawn chuan, a hnenah ka lut ang’ a tih hian, ‘Thlarau Thianghlim hmanrua rawngbawltute hmanga Pathian thu hrilh in dawng hi ‘Ka âw’ a ni a, thinlung kawngkhar min hawn saktu apiang hnenah chuan lutin amah nen pumkhat kan ni ang’ a tihna a ni a. Tin, “A duh apiangin nunna tui hi a thlawnin la rawh se” a tih hian, ‘Chatuan nunna hi a duh apiangin a thlawnin rawn chang rawh u, in duh lo a nih chuan in thu thu a ni mai’ a tihna tluk a ni bawk.

Tirhkohte thiltih lam khi kan en leh chuan, “Tirh kan nih ang ngeiin Pathian thu hi in hnenah kan sawi tawh a, nimahsela, in duh lova, in hnar kir a, chatuana nung tlak lovah nangmahni leh nangmahni in insiam ta a, chuvangin, hre rawh u, nangni anga ngainepa hnar ve mai mai lo tur Jentail mi tam tak an awm a, an hnen lam kan hawi tawh zawk dawn a ni” an tihna a ni bawk.

Pathian chuan a chhandamna chang tur hian tumah a tilui ngai lo va, sawmna aw nemin min sawm a, kohna aw nemin min ko zawk ṭhin a. Kan nun min luh chilha, chhung lam aṭanga min pui chaka, kan duhnate min hmin saka Chatuan nun neitua min siam theihna turin kan nun kawngkhar kan hawn sak hun nghakin min hnaih reng ṭhin a ni.

Tichuan, a lam kan hawi rual rualin engmah tih theih nei lo kan ni tih min hriatsaktu kan Pathian chuan a thlarauin min thlen chilh nghal ṭhin a, kan mihring hlui min ṭhiah sak turin min luh chilh a, chhung lam aṭangin min thawh sak zui nghal ṭhin. Chu chu nun thar min siam sak kawng leh chhandamna changtua min siam dan kawng chu a ni. Chuvangin, a lam hawi duh hauh lo leh hnar fithla ṭhuaite chu pâwnglakin van ramah hnuh luh luih hram a tum ngai lo.

Mi ṭhenkhat ten, “Mihringin kan thlan ve lam a ni lo, thinlung inhawng tur pawhin Pathianin inhawng thei tura kan duhna min hmin sak hmasak a ngai a ni,” an ti ṭhin a, an sawi dik thawkhat viau a, mahse, Thlarau thianghlim hna thawh dan kalhmang (process) an chhut kim lovin an hre fuh lo deuh niin a lang.

An thu kalpui dan ang hian, mihring inhawn hmasakna tel hauh lova Pathianin mihringte duhna a hmin sak mai ṭhin a nih chuan, Pathian chuan tih theih loh a nei si lo va, duhsak bik pawh a nei bawk si lo va, mi zawng zawng duhna a hmin sak vek ang a, tumah sakhaw dang bia reng reng an awm lo ang a, mi zawng zawngin van ram kan kai vek ang. Mi zawng zawng van ram kan kai vek lo a nih erawh chuan Pathian chu Dikna Pathian ni lovin, duhsak bik nei Pathian, Pathian fair lo tak a ni tihna a ni thung ang.

Chuvangin, Pathian hna thawh dan chu hetiang hi a ni zawk e. Pathian chuan kan duhna hmin turin mihring tana thil hlu ber, ‘tawktarh itawm tak ‘Chatuan Nunna’ chu min hrilh hre hmasa a. Chutih rualin amah hnartute chan tur chu rapthlak tawpkhawk ‘Hremhmun’ a nih thu min hrilh bawk a. Tichuan Chanchin Ṭha hrilh dawngtu mihring chuan chatuan nun hlutna hmuhfiahna tak tak a neiha, chu chuan a nun a hneha a duhna a hmin theih nan, ngainep leh ngaihsak duh lo te, ngaihsak peihlo te, hnar fithla ṭhuai tea awm san lova a lo inhawn ve a ngai a ni. Tichuan, Thlarau Thianghlimin luh chilhin a nunah hna a thawk thei chauh a, a duhna hminin chhandamna changtuah a siam thei chauh ṭhin.

Westminster confession of faith bung 9 chang 1 ah chuan heti hian ziak a ni. “Pathianin mihring duhthlanna chu a nihphung renga zalenin a siam a, a thunun sak lo va, a chhia emaw a ṭha emaw pawm ngei ngei turin a tilui lo.” tiin.

Tin, Welsh thurin bung 29 ah pawh, “Pathian chuan duhthlanna chiang tak siamtute chu khawngaihnain a ko va, nunna nei tura simna a pe a,…” tiin ziak a ni bawk.

‘Kan thlan vang a ni lo, kei hi chuan ka thlang reng reng lo ve, ka thlan lai âwm reng reng pawh ka hre lo, a khawngaihna liau liauin Aman min thlang a, heti mai hian chhandamna chu ka lo chang ve ngawt mai a ni, keima lamah hian sawi tur leh chhuan tur reng reng a awm lo,’ titute pawh hian a nihna takah chuan an hun kal tawh an chhui kir kim lovin an hmu kim lo va, Krista thu an hriat aṭanga Thilsiam thar an lo nih inkara an nunin Pathian lam a âwn ṭan lai leh an nun kawngkhar an hawn lai hun an hmu fuh thiam tawh lo mai mai a ni ṭhin.

Hetianga Pathianin a chhandamna chang tura min kohnaah tihluihna hmang lova mihringah mawhphurhna a dah avang hian Nikin Ni rorelna lo thlen hunah tumahin thiam loh an chan kawngah Pathian an dem thei lo vang. Amaherawh chu Pathianin mihringah mawhphurhna dah lo va amahin Van kai tur leh Meidil tla tur a thlanga a ruat lawk vek a nih chuan, Nikin ni rorel hunah thiamloh chang ten an mawhphurhna ni miah lova thiam loh an chan kawngah Pathian an la chhuahchhal ang a, chutih hunah chuan Dikna Pathianin an hmaah a dikna entir tur a nei lovang. (Mi hausa leh Lazara chanchin aṭang pawh khan helai thu hi hriat fiah theih a ni.

Amaherawhchu, piantharna thuah hian Bible chuan, ‘Siam thar lehna lo chu serh tan hi engmah a ni lo va, serh tan loh pawh engmah a ni hek lo.’ a ti a (Galatia 6:15). Pathian thuin ‘Van nun neitu, Van ram chang tur’ a tihte chu ‘Kristaa siam thara awmte, mihring hlui hlih thlak saka awma Lal Isua nun, nun thara thuamte’ chauh an ni a. Tichuan, mahni inthlang chhandam zo lo leh inthlang piangthar zo lote hi, kan duhna leh kan inhawnna tling zo hauh lo te hi A khawngaihnain tlingah min pawm sak a, kan nun min luh chilhin min siam thar a, ‘Van nun neitu, Thilsiam thar’ min nih tir mai ṭhin zawk a lo ni.

Pathian chuan mihringte hi, hrisel tak, hlim tak leh pang damin he lei aṭanga van thlengin a chhandamna famkim chu min chen tir a duh a, mahse, mi tam tak chu lungngaihna tam takin kan inchhun tlang chuk fo ṭhin. Pathian chuan amah kan hmuh theihna turin natna leh tawrhna te, harsatna leh manganna vawrtawpte, a hmangaihna avangin min tawrh tir a ngaih chang a awm fo ṭhin.

Tichuan, heti hian a hmawr han bawk dawn ila. Chhandamna hna zawng zawng hi kan rin hma leh kan pian hma daihin, avaiin (100%) Pathianin a lo thawk zo vek tawh a, mihringin tih ve pakhat mah kan nei lo. A lo thawh zawh vek tawh chu a duh apiang ten a thlawna kan chan mai theih turin kan hmaah min chhawp chhuah sak a, chu chu ngainep leh bengkhawn peih lova awm san mai lo va, hnar lova lo ngaihven te, lawm taka lo dawngtute chu Thlarau thianghlimin luh chilhin, an chhungah hna a thawk chhunzawm a, tichuan ‘Amen’ theihna nun a siamsakin an lo ‘Amen’ thei ta mai ṭhin a ni. Hetianga mihringin nun inhawnga a lam kan lo hawi vena hi, Thlarau Thianghlimin min chhunzawm sak zet loh chuan chhandamna min chantir khawp a la ni mai lo va, chuvangin, Pathian chhandamna hnathawhah tih kan nei ve anga sawi tur a ni lo tih kan hrethiam dawn nia.

A khawngaihna avanga mi tlingloten alam kan hawina tling lo tak tlinga min pawm saka, bawlhhlawh leh ṭawmkailo ber pawh a chatuan lawmna faa min pawm duhtu kan Pathian chu fakin awm rawh se. Amen.

(Hei hi Bawhchhiatna tih chhunzawmna a ni a, khuhhawnna tak tak  ‘Chhandamna Nghet ‘ tihin chhunzawm leh a ni.)

)

Leave a Reply

Your email address will not be published. Required fields are marked *

error: Content is protected !!