Kan lama tang chu Lalpa a ni – Upa K. Zalawma

KAN LAMA ṬANG CHU LALPA PATHIAN A NI

Upa K. Zalawma

“Chak tak leh huai takin awm rawh u; Assuria lal leh a hote mipui chu hlau suh ula, zâm hek suh u; kan lama ṭang chu a lama ṭang aiin a chak zâwk si a. A lama ṭang chu tisa sipai an ni a; min pui tûr leh mi dosak tûra kan lama ṭang erawh chu Lalpa kan Pathian a ni si a,” tiin thlamuanna thu a sawi a. Tin, mipui chuan Juda lal Hezekia thusawite chu an ring a. 2 Chro 32:7‭-‬8

Tin, ani chuan, “Nangni Judai rama mi zawng zawng leh Jerusalem-a awm zawng zawngte leh nang, Lal Jehosaphat, lo ngaithla rawh u! Lalpan in hnênah heti hian a ti: ‘Hlau suh ula, chûng mipui tam tak avâng chuan zâm hek suh u; indona chu nangni indona a ni lo va, Pathian indona a ni zâwk si a. 2 Chro 20:15

Chûng thu-ah chuan eng nge kan sawi ang le? Pathian kan lama a ṭan chuan tuin nge min do thei ang? Rom 8:31

Thuthlung Hlui lamah chuan Israel te leh an vela pathian dang betute an in do thin. Israelten Pathian an rinchhan chhung chuan mak tak takin an ral dote an hneh thin. “Indona chu nangni indona a ni lo va, Pathian indona a ni zawk sia a,” an ti mai a ni.

Tunlaia ringtute indona: Thuthlung Thar-ah chuan mahni mihringpuite do lovin, “Kan buante hi tisa leh thisen an ni si lo, lalnate leh thuneihnate leh, van hmunahte thlarau sualho awmte an ni zawk e,” (Eph.6:12) tia Paulan a lo sawi hi vawiin thlenga kan do an ni tawh zawk.

Tunah chuan kan vêl-ah leh keimahni taksa ngeia kan leido awm point hnih lek i lo sawi phawt teh ang u.
[adToAppearHere]
1. Zûk leh hmuam :
Zûk leh hmuam han tih hian kan taksain a ṭhat lohpui theih vaihlo chi hrang hrang zûk chi leh hmuam chi te, kuhva khawr chen hian kan huamtir ang. A mala chhui lovin a pumpui huapin sawi ta ila: Damdawi atâna ṭhatna an neih hi sawi ve châwk a ni a, a hun takah, kan taksain a ṭhat leh dam pahna tur atâna hman chu a sual lo pawh a ni ang. Mizoten zûk leh hmuam kan tih dân erawh hi chu damdawi atân a ni hauh lo mai.

Kan taksain a huat khawpin kan ti a, a ti ve lo tâna ninawm leh hnawksak khawpin kan ti bawk a, meizial zùk phei chuan a zu ve lo tâna hlauhawm khawp chhiatna thlen thei an siam a ni.

Pathianin kan taksa hi hrisel taka awma a rawngbawl nana hmanrua ni tûrin min siam a, a ti âwngrawp thei laka in thiar fihlim tûr kan ni.

Heng zûk leh hmuam hmang hian Setanan ni tin, darkar tin min bei a, a laipui mu atân hmangin kan sahuat laiah min kâp reng a ni tih hriain, kan lama ṭang Pathian chakna ringin i bei let ang u hmiang.

2. Zu leh Drugs :
Zu leh Drugs tih hian kan hre thiam vek turah ngai ila, drugs tih hian a huam zau viau mai a, damdawi, a hmanna tur ang ni lova hman (Drugs abuse) hi sual a ni. Mizote hi zûk leh hmuan, ruih theih thilah hian kan fihlim lo hle mai. Zû leh Zial phei hi chu vawiin thleng hian a tamberin kan la ti reng a nih hi. Mi ṭhenkhat phei chuan kan Culture-a bet tlat nia ngaiin sim ai chuan tih dan thiam inzirtir mai hi ṭhain an hre hial a ni.

Pathian thu aṭanga thlir erawh chuan, ringtute tân chuan kan tlansan tur a ni si. Ruih hlo zuar leh titute hi ram leh hnam hmelma niah ngaiin Kohhran, Khawtlang leh sawrkar pawhin kan do mup mup a, kan hneh hlei thei lo viau mai. Taksa indo anga do lovin, thlarau indona a nih zawk avangin a titute nun siam ṭha turin Kohhran leh khawtlang leh NGO hruaitu te, Sorkar te nen kan bei tlang a ni. Hengah hian NGO leh Sorkar ṭangrualin tisa lamah theihtawp chhuaha an beih laiin, Kohhran chuan taksa leh thlarau chhan chhuahna lam – Crusade, Camping leh Home te hmangin beihpui kan thlak thung a ni. Sorkar leh NGO-ten ruih hlo zuar an man changte hian, an lawina Kohhran hotute hi ṭawngṭaisak turin sawmin, anni pawhin hmangaih tak chungin ṭawngṭaisak phawt se, chumi hnuah thuneitute hnena hruai emaw chauh ni ta se. An dinhmun khirh lai taka Pathian hnena ṭawngṭaisak tluka pawimawh a awm lo vang.

Kan lamah Pathian a ṭang lo em ni? :
A huho leh a mimal ang pawhin Kohhran lam pawhin ṭan kan lak lai hian, zûk leh hmuam, ruih hlo leh zu leh sa ti leh zuar hi vai velh ang maiin an pung tual taul em ni a tih theih. Kan ṭhenawm, kan kawm chhak, kan kawmthlangah zu zuar leh drugs zuar an inphûm ru a, a ei leh in phei chu kan inchhungah kan kawl fur mai. Pathian hian min pui ta lo em ni aw tih mai awl a ni.

Pathian kan lama a ṭan chuan tuin nge min do thei ang?: Pathian chuan min puih a duh reng. Pathian lamah keini hi kan ṭan ve angai zâwk a ni. Rinna leh thiltih ṭangkawpin, ṭawngṭaina nên sual hnathawh hi tihtakzeta kan do chuan, hneh hun kan nei ngei ang.

Beidawng suh: Ringtuten kan tih ve tur chu Pathian thu anga beih leh thawh te, bâng lova ṭawngṭai te hi a ni. Malsawmtu leh tihlawhtling theitu chu Pathian a nih avangin, amahin a duh huna a thawh turin a kutah dah zel chungin, a ṭul ang ang beih zel hi kan tih ve mai tur a ni e.

Mahni chhungte aiin midang thu kan awih zawk:
Mizote hi mahni chhungte emaw, nu leh pate thu ai chuan mi dang thuin min hneh hma zâwk ṭhin. Kan rilru dik tak pawh chhûngte hnenah ai chuan midang hnêna sawi duh zâwk kan ni. Chuvangin mah ni tu leh fate mai ni lovin, mi fate hnena rawngbawl emaw, kan faten harsatna an neih chuan rawngbawltute koh nachâng hriat a ṭha. Dam loh thuhlâah phei chuan Biblein Upate ko turin min phût a ni. Samari miṭha ang khan, mi dang chungah an damna tura thawk tûr kan lo ni e.

Heng Setana duhzawng ti ṭhinte lama ṭang chu tisa leh Thlemtu a ni a, keini lama ṭang chu Lalpa kan Pathian a ni si a, zâm mai lovin ṭan i la zêl zawk ang u.

“Pathian kan lama a ṭan chuan tuin nge min do thei ang?” [adToAppearHere]

Leave a Reply

Your email address will not be published. Required fields are marked *

error: Content is protected !!