Kan chapo lohna turin – Rev. VL Nithanga – Sermon

KAN CHAPO LOHNA TURIN

– Rev VL Nithanga

Heng kan sum leh paite hi keimahni chakna leh kan kutkawih a ni, inti rilru dah ang e. Fimkhur bawk rawh u …. Lalpa in Pathian chu hre reng rawh u. Sum leh pai deh chhuah theihna petu che u chu amah chu a ni zâwk a sin (Deut.8:17).

Naupan lai ațanga nu leh pa thuawih, naupang fel, an nu leh pa ten Kohhran chhûnga an tel pui țhinte kha a tlangpui thuin lehkha zir tluang an ni deuh zel a. An nun lah a tluang nge nge zel a. An nu leh pate mawlsâwmna an rochung chho va. Ruihhlovin a tihbuai ve ngai loh an ni bawk a, an lo puitlin meuh chuan lehkha thiam tak leh mi nunngil tak, mi puitling takah an chhuak deuh zel a. Hna țha pui pui thawkin hlawh tam tak tak an lo hlawh ta țhin a ni. Hlêpru miah lo pawhin, mahni hna thawh hlawh ațang ringawt pawha neinung tak tak an lo awm ta nuk mai a. Mi hlawhtling tia han sawi tur chhûngkua kan ramah hian kan ngah ve ta khawp mai. Naupan lai ațanga nu leh pa thu leh Zirtirtute thu an awihna rah a ni a. Thil sual lam kawng zawh lo va, nungchang ngil tak chunga taima taka lehkha an lo zir fat fatna khan malsâwmna a pe ta a ni.

Hetiang mi țhate hi an hna an thawh bâkah khawtlãng tan te, Kohhran tan te, ram tan te pawh an țangkai em em a. Mi rethei zâwkten an zar kan zo nasa hle țhin bawk. Chhûngkaw neinung an nihna leh an mize țha leh an țangkaina te chuan midang tan entawn tur min siam sak a, ngaihsan tum viau lo mahila, kan hriat loh hlanin kan lo entawn a, min lo hneh viau tho zel mai. Mi thiamte neihnunna chuan an fate leh an tute pawh mi hlawhtlingah a siam zui zel a. Tuchhuan zêlte thlengin malsâwmnain a zui tlangpui țhin. Heng ang mite hi a tlangpui thuin an naupan laia an class-a a huai huai an ni ngai meuh lo. A dawi zep leh ngawi chawi, midang tibuai ve ngai em em lote an ni tlangpui. Class khata huai leh sualho kha chu zirnaah an tluang tak tak ngai lo va, matrict pass hmain an thâmral tlangpui țhin.

Tichuan, kan ramah felna kawng zawha, lo hlawhtling chhuak ta, mi thiam leh neinung tak tak kan ngah ta hle mai. A tirah Pathian min hruaina a nih zia hre țhin mahila, hlawhtlinna tlãnga han lawn chhuah tak tak hi chuan ka theih tak amaw tih mai hi a lo awl leh țhin a. Kan hlawhtlinna zawng zawngte chu keimahni chakna leh theihna hmanga kan thawh chhuah emaw tih mai a awl hle țhin. Laodikei kohhran ang deuh khan, ka hausa a, sum ka ngah a, engmah ka tlachham lo ve tiin Lalpa ngai tawh mang lo hian kan lo thlamuang ve ngawt ang a, Lalpan, “Nang, mi rethei khawngaihthlâk, pachhia, mitdel, saruak chu i ni (Thup.3:17),” min lo ti reng si ang tih a hlauhawm a. Kan hriat loh hlan hian thlarau lam nunah hian pachhia, mitdel, saruak kan lo ni reng si ang tih a hlauhawm hle.

Kan hlawhtlinna bul ber chu Lalpa a ni a. A kawng kan zawh fuh avangin anin tluang takin min hruai a, hlawhtlinna tlãngah min hruai kai a ni tih hi i hre reng ang u. Pathian thu chuan, “Heng kan sum leh paite hi keimahni chakna leh kan kutkawih a ni, in ti rilru dah ang e. Fimkhur rawh u, … Lalpa in Pathian chu hre reng rawh u, sum leh pai deh chhuah theihna petu che u chu amah chu a ni zâwk a sin (Deut.8:17),” a ti a. Kan hlawhtlinnate hian Lalpa hliah lo sela, hlawhtlinna min petu Lalpa hmuh fiah nan leh a rawngbawl nan i hmang zel ang u.

Leave a Reply

Your email address will not be published. Required fields are marked *

error: Content is protected !!