Ka pu Hualrothanga – Zikpuii pa

KA PU HUALROTHANGA
Phuahtu – Zikpuii pa

Tawnmang lungmawl rauthla leng mah ni la,
Kei zawng ka ngai a che zunngai min hneman
Beisei phak loh duhthu lenga ka sam ngam loh
Ka pu, hmana fam hnu min hlan e.

Hei zat turni a chhuak chhaktiang daiah,
Hlim lai par ang a thlen vannei zaleng tan;
Kei zawng zantiang kawl a thim hian mi thlen lawmna
Zing thla dairial chang hnu leng tawh nan.

Dar ang ka lo tawng leh tawnmang mawlah, ka pu
Chhaktiang tual dai chang hnu kan doral vangin;
‘Ka pu i lo haw maw i ral tuk chu? khawthal,
Vawisawm kha chen tawn loh ni liam chhung khan,
Vanneihna chuan nauvang a chawi chem ?’
[adToAppearHere]

‘Siang lawm i tu i fa i nghilh em ni?
Hei chen tawnna turni kan lo thlir asin.
I u, i nau, lenrual leng dang zawng hian, ṭapin,
‘Tawn loh kar ni a va rei em!’ kan ti che.

‘Tawn loh ni zawng a rei lul mai, Mama,
Khawvelah zawng ṭhen chang a awm tur alawm
Mahse khawṭhal vawi sawm tawn loh ni zawng pawh khan
Vanneihna chuan nauvang mi chawi ṭhin asin!

Vanneihna chuan nauvang mi chawi lul mai,
Chhaktiang Japan ralpui tuk dawlin,
‘Hhehna lallu’ kan thlungluah khumin, hlimten
Thlangtiang kan run kan rawn zawng leh e.

Tawnmangah zawng hlimten nauvang nuiin
Khawvel lungngaihna leh ṭhenna kan dawn lo.
Sakhmel hlimin biahthu leng tin kan hril, kha chen
Tawn loh kar ni zawnga kan tawh kha.
[adToAppearHere]

Aw, ka tawnmang lungmawl mi awm rih la,
Hlimna ni par ang ṭila thamral tawh hnu
Ka pu anka nem leh sakhmel ka lawm nin loh
Lawma chatuana zal hi ka nuam mang e.

Malsawmna lei mite tana thlentu
Khawvel lungngaih pela lusun ṭapte thlem bang che;
Thihna thlan vawta zal tawh hnu mi rawn thlentu
Tawnmang ka ngai ber che min awm rawh.

Turni, chhaktiang daiah her chhuak lo la,
Zan thim ka pu min thlentu hi cham reng se.
Sikni zingṭian eng mawi leh leng zawng ai hian,
Kei zawng ka ngai ka thinlai na min hneman.

Ngai teh zankhua a rei bawar an pau
Kan inṭhen nan lenkawl a lo eng leh ta,
Dam takin aw, dam takın aw, ka pu he leiah zawng,
Tawnmang rauthla chauh hi ka chan tawk.

Hai ang ṭhangin lenkawl a lo enin,
Turnipui hian ṭhenna a thlen leh si ṭhin:
Zingṭian lenkawl hnim riai karah, rairah
Zun ngai tlei lo nau ang kan ṭap riang thlawn e.

Zaleng tawnah lungrun takin han hril ila,
An dawn thiam lo ka dawn lungruk hi.
Titi leng lak a changtu lungkham mah a tling zo lo,
Taksa lungkham hringmi mi hmuak.tu vang hian.

Thinlai a na, ka dawn ngam lo, darfeng
I lenrual zawng siang an lawi kim ta;
Sawngka lerah kan chuan nilen, tawh che nuamin
Tawn ni awm lo kumsul khua a rei leh ta.

Tawn ni awm lo kumsul khua a rei ta,
Beiseina hian ‘nakin’ min tiam tawh nan che;
A ni a thla a ral, kumsul a lo vei hian
Tawnmang lungmawlan a chang leh ṭhin.
[adToAppearHere]

Hmanah chuanin tawh lehna ni kan tiam,
Chawnban hmerin ‘dam takin aw’ kan tih kha;
Chhaktiang kawlpui daiah i nghilh ta mai em ni,
Rauthla lungmawl chauhva kan tawh che.

Duhleng par ang senlai mi lawm lai khan,
Ka dawn thiam lo zalam i pan tur kawng hi.
Thlafam dairial changin a khi chhuahtlang daiah
Chhawl ang uaiin rairah i fam maw?

Rilṭam saruak tuihalna em i tawrh?
Thinlai a va na ṭhin tak em ka dawnin;
Tu hnamchem nge i tawn ? Tu ngenmu nge i dawn?
Min hrilh u aw, phu’ zawng a nget ngai lo kan tih kha.

Hliampui tuara kawlphai zauvah, hmelma
Sang sawm kara turni sa i tuar tur chu,
Tu nge hlimthing zar che ? Tu nge siktui hlan che,
Min hrilh u aw, hmangaih bana kuah ka nuam e!

Beisei rial ang daia, lungngaih lei
Hnutiang chhawn i lo rum ni chuan,
I rawn dawn ngei ang maw, i lenrual zawng,
I tu i fa, i u leh naute zawng hi.

Thinlai a na, hnamchem len ka nuam e,
Lungngaihna zawng phura i hmel ka en hian,
Sawrkar ropuina hi ka tan ṭahna a ni.
Hnehna turni kan tan inṭhenna.
[adToAppearHere]

Leave a Reply

Your email address will not be published. Required fields are marked *

error: Content is protected !!