Judate kut leh ni serh te – Biakhmingthanga Chhangte

-Biakhmingthanga Chhangte

JUDATE KÛT LEH NI SERHTE
I Bible i Hrechiang Em?

He thu hi request a awm avangin hun engemaw chen chu kan chhui ang

Judate hian kût leh ni serh tam tak an nei a, heng hun hi malsawmna an dawn avanga lawmthu an sawina te, hmanlaia an tana Pathian hnathawh hriat rengna atan te, rilru lama insiamṭhatna leh inzirtirna atana pek an ni. Heng hi kar tin, thla tin, kum sarih dan te leh kum sawmnga dan tea awm ṭhin leh an hman ṭhin te an ni. Ṭhenkhat chu saltan hmaa an lo neih tawh te a ni a, ṭhenkhat erawh chu saltan hnua an neih te a ni.

SALTAN HMAA AN KÛT NEIHTE

1. Sabbath (Exod. 20 : 8 – 11) : Judate ni serh pawimawh ber a ni a, a awmzia chu “Chawlhna” “Thiltih lai chawlhsan” tihna a ni. Exodus buah hian vawi 15 a chuang a, Levitucus buah hian vawi 14 a lang a, Numbers-ah vawi 3, Deuteronomy-ah vawi 3 bawk, heng bakah bu dangah vawi 61 lai tihlan a ni. Sabbath lo awm ṭanna bul nia an sawi ber ṭhin chu Genesis 2 : 2 hi a ni, “Pathianin ni sarih ni-ah chuan a thil siam chu a ti zo a, ni sarih ni-ah chuan a thil siam zawng zawng chu a chawlhsan ta a,” Thil sian hun lai khan “Sabbath” tih tak hi a awm lo va, Adama te, Abrahama te, Isaka te, Jakoba te hun lai pawhin Sabbath hi a la awm lo va, Mosia lo lan hnu-ah kan hmuhna hmasa ber chu “Manna” pek chungchangah a ni. Sinai tlanga Mosian dan a lak khan Thu Sawm Pek zingah “Chawlhni serh rawh” tih a tel ve tak avangin Sabbath serh hi Israelte pawhin an lo ngai pawimawh ve ta chauh a ni.

Sabbath serh chhan sawi dan inang lo : Thuthlung Hlui bu hrang hrang te ngun taka bih chuan Sabbath an serh chhan sawi dan a inang lo va, an hun lai azirin serh chhan pawh chi hrang hrang an nei niin a lang. Serh dan tur nia lang te :-

1). Exodus 20 : 11-ah chuan “Ni ruk chhungin Lalpan lei leh van te, tuifinriat leh a chhunga awm zawng zawng te chu a siam. Tin, a ni sarih ni chuan a chawl ta si a, chuvangin Lalpan chawlhni chu mal a sawm a, a tithianghlim ta a ni,” tih a ni. Chuvangin Israelte pawh he ni ah hiah an chawl ve tur a ni a, an serh thianghlim tur a ni. Chutianga zirtirna chu Deut. 5 : 12 – 15-ah pawh kan hmu bawk.

2). Sabbath ni hian mihring chauh pawh ni lovin an ran vulh – sebawngte leh sabengtungte pawhin chawlh hahdam nan an hmang tur a ni. Chutiang bawkin an bawihte leh an ina cheng hnam dangte pawhin chawlh hun atana hmang ve hrim hrim turin Pathianin a duh (Exod. 23 : 12).

3). Deuteronomy 15 : 15-ah chuan Pathianin a mi Israelte Aigupta sala an tang chhan chhuakin zalenna a pe a. Chu chhan chhuahna an chan avang chuan Chawlhni hi serh turin a hrilh.

4). Chawlhni hi Pathian leh a mite inkara chhinchhiahna a ni a, chuvangin serh ngei tur tih hi Lalpan a hrilh dan a ni.

Serh leh sang dan a ni : Thu Sawm pek zingah Sabbath tih loh a dang pakuate hi chu vawiin thlenga a pawimawhna la pangngai reng te an ni a. Eng hunah pawh, khawii hmunah pawh a ṭhatna hi danglam mai mai lo tur an ni. Sabbath erawh hi chu ṭhatna lam dan aiin serh leh sang dan (ceremonial law) lam thil a ni a, kût ni te, thla thar leh hun serh lam thil mai a ni a, a dang deuh va ngaih a ni. Serh ṭhat loh deuh a nih lai pawh khan Pathian pawhin chuti takin a ngai pawimawh lo niin a lang; tihtawp pawh a duh viau ni pawhin a lang ( Isa. 1 : 13; Hos. 2 : 11). Thuthlung Thar lamah pawh Paula’n a ngaihnepna thu kan hmu (Kol. 2 : 16, 17).

Thuthlung Tharah Isuan a serh vak lo : Kan Lal Isuan khawvela rawng a bawl lai khan Sabbath serhtute nen an ngaihdan a inan lohna a awm ṭhin. An ngaihdan ang lo takin Chawlhniah buh hmunahte a kal a, dam lote a tidam bawk ṭhin (Joh. 5 : 10, 11). Hengte avang ngawt pawh hian Sabbath serh luat tuk hian awmzia a nei lo niin a ngaih theih a ni.

Sabbath Serh Dan Sawifiahna

Judate Sabbath chungchang kan sawi tawh a, tunah chuan Sabbath an serh dan kherkhiap tak chu i lo sawi ve teh ang.

Dan famkim tawk lo chu ? : Dan bulpui, Dan laimu chuan “Chawlhni chu a Thianghlim a, Serh tur a ni a… Hna thawh tur a ni lo,” a ti a, chu chu awm dan tur tlangpui kaihhruaina a ni a. Hun lo kal zelah chu kaihhruaina tlangpui chu famkim tawk lo va hriatna a lo lian ta a. Sawifiah a, ṭhensawm a, ṭhen tet leh a lo tul chho ta zel a. “Eng chin hi nge hnathawk chu,” tiin an inzawt a. Hnathawh chu thil tih reng reng hi a ni. Thil ti chuan rit a la (a chawi) ṭhin a; “Rit” chu eng chin hi nge?

Rit sawifiahna : Rita ngaih loh chin Scribal law-in hetiang hian a sawifiah a : Chaw, theipui rahro rihlam tlukpui; Wine tui no khat pawlh tawk; Hriak thih tawk; Tui mit tihhnawnna tawk; Lehkhapuan hriattirna pawimawh ziahna tawk; Lehkhatui hawrawp pahnih ziahna tawk; Phairuang pen atana hman tawk. Sabbath ni a rit lak theih dan leh khap dan dang chu – ‘A kut dinglam emaw, veilam emaw, hnungzang emaw, kâwng emaw, kokiin emawa rit la chu Dan bawhchhia a ni a. A kut phah hnung lamin emaw, a kephah chung lamin emaw, a samin emaw, a pawisa ip letling zawngin emaw…a Rit la chuan Dan a bawh chhe lo. A chhan chu thil ken dan phung pangngaia a ken loh vang a ni.

Damna chungchangah : Chawlhni (Sabbat) a tihdam chu hnathawk a ni. Chu chu sawifiah a ngai leh a. A nunna atana hlauhthawnawm a nih chuan tihdam a thiang. Tihdam chu a damchhuahna, a ṭhatpuina tur ni lovin a zual tur venna chin a ni. Pem chu tuam theih mahse damdawi hnawih loh tur.

Lehkha ziak phal a ni lo : Chawlhni (Sabbath)-ah hian lehkha ziak phal a ni lo. Lehkha ziak chu hnathawk a ni. Lehkha ziak awmzia chu – A kut dinglam emaw veilam emawa hawrawp pahnih ziak a, a thu ziah chu thu thuhmun a ni emaw, thu hran a ni emaw, pentui hranga ziah a ni emaw, ṭawng hrang a ni emaw chu thil tisual a ni. Miin thil tui dum reh mai theiin emaw, theitui sawr telin emaw, kalkawng vaivutah emaw, ṭiaupho ah emaw, hmun dangah pawh a thu ziah chu chhiar theiha awm reng tur chi a nih loh chuan thil tisual a ni lo. Leiah hawrawp pakhat ziak se, emaw, lehkha phek khatah ṭum khat ena hmuhkawp theih loh turin emaw ziak se, thil tisual a ni lo va, Dan a bawhchhe lo.

Khing thute khi Chawlhni (Sabbath) serh thua Scribal Law ṭhenkhat an ni a, chu Dan zawm chu Sakhaw dik, Pathian rawngbawlna dika an ngaih chu a ni.

Chawlhni bawhchhia chu a thi tur a ni : Thu Sawm pekin Chawlhni (Sabbath)-a hna thawh loh tur a tih chu “hnathawh” tih ngawt chu fiah tawk loa ngaiin, Dan thiamten sawi chianna thu sawmthum leh pakua an duang chhuak a, chung Dan thiamte chu “Lehkha ziaktute” an ni a, chu Dan zawm chu Pathian rawngbawlna, sakhaw dika ngaih a niin an la thu tak hle. The Book of Jubilee chuan Sabbath serh thu hi Bung 50 lai a nei a. Chung zingah chuan Nupui dawt hrilh; Hna thawh tum; Zin chhuah tum; Thil lei emaw, Hralh emaw tum; Tui khai; Rit chawi tih te a tel. Sabbath nia hna thawk tawh phawt chu – a in chhungah emaw, hmun dangah emaw; zin chhuak emaw; Lei let emaw; Mei chhem emaw; Sa chunga chuang emaw; Mi kut thlak emaw; Tual that emaw; Ran emaw; Sava emaw man chu a thi tur a ni.

Chawlhnia kalna tawk : Sabbath (Chawlhni)-a kawnga kal hlat phal chin chu Yard 1000 vel a ni a. Miin kawtthler tawpah kawng tan zawngin hruizen thlung se, kawtthler chu ama ina ngaih a ni a, Ama in kawtthler tawp aṭang chuan Yard 1000-a hla a kal thiang. Miin Zirtawpni tlaiah chaw vawihnih ei funin khawi hmunah emaw dah se, a dahna hmun chu ama ina ngaih a ni a, chuta ṭanga Yard 1000 a kal thiang a ni. Hetiang tak hian tunlaiin Judate chuan Sabbat an la serh a, tuna mi dang Sabbath serh hote hian hetiang tak hian serh ve tak maw ????? Serh ta lo ni se, Chawlhni bawhchhia an ni ve tho mai lo vang maw ????

Sabbath serh vanga tlawmna : Judaten Sabbath serh an lak thu takzia tihlanna dang a chhe zawngin i han thlir kual leh teh ang :

1. Suria lal nena inbeihna : Juda Makabia hova an hel khan Juda tlangval rual khat Thlaler pukah an tawm a. Suria Lal Antiochus-a’n Sabbath nia bei turin a sipai rual khat a tir a. Chung tlangval rualte chuan Sabbath nia Indo a, Dan bawhchhiat ai chuan an lo dawh mai a, an thi ta vek mai a ni.

2. Rom General nena inbeihna : Rom General Pompey-a’n Jerusalem kulh lak tumin a bei a. Juda-ho chu an kawlh em avangin a la thei lawk lo va. Sabbath ni ah an chezia hmuin, kulh epna tur Lei chhun pawn hna an thawk ta a. Chu chu Juda ho chuan kulh tlang aṭangin an thlir mai mai a ni. Sabbath ni an serh avangin engmah an tih leh khawih a thiang lo a, Rom sipaiten an that vak a, salah an hruai bawk a, an tlawm phah a ni.

3. Ptolemy-a hnuaia tlawmna : Rom lal Ptolemy-a’n Jerusalem a run pawh khan Sabbath ni ah chuan ral hlauhawm awm lo ang maiin ban pharin kulh chhungah chuan an ṭawngṭai hmiah hmiah mai a. Zing ni chhuah aṭanga ni tlak thlengin Sabbath ni an serh dan avangin thildang engmah an ngaihsak lo. Chutah le, hmelma rualte chuan duhtawkin an sam ta a, an tlawm ta, mi sang tam tak an thi a; Lal sual tak kutah an tluk luh phah ta a ni.

Judaten Sabbath ni chuti taka an lak urhsun avangin, Juda mipa tawh phawt chu sipaia ṭan luihna dan neitu Rom sawrkar chuan Juda te chu sipaiah an ṭan ve an phal lo hlauh thung a ni.

Kalhlen Kût

2. Kalhlên Kût – (Chhang Dawidim Telh loh Kût – Exod. 11 : 1 – 13 : 22) :

Isrelte thla chhiar ṭanna : Kalhlen Kût hi Aigupta rama lo awm ṭan a ni a, kum khat chhunga Israel te küt hmasa ber leh pawimawh ber a ni. He kût hiAigupta ram aṭanga Israela thlahte beramno thisena an kawngka bianga tata an inthawina aṭanga tlan chhuah leh hruai chhuah an nih tak hriatrengna kût a ni. Chumi ni chu an tan “thla inṭanna” leh an hnam pian cham (birthday) a ni. (Exod. 12 : 2). Nisan thla ni 14 (March – April) tlaiah Kalhlên kûtna atan beramno a pa, kum khat hnuai lam, hmelhem lo chu chhungkaw pakhat tan an talh ṭheuh va, beramno thisenah chuan husop bawr chiahin an kawngkhar biang tuakah leh kawngka luchungah an tât a, chumi zana Lalpan Aigupta ram a tlawh laiin, an kawngkaa beramno thisen lo tat apiang te in chu “Lalpan a kalhlên a” (Exod. 12 : 11 – 13). Beramno thisen tât apiang in chu “fatir thihna lakah” an him zel a. Aigupta mite erawh chuan fatir thihna chu an pumpelh ve lo; an kawngka bianga beramno thisen an tah ve loh avangin.

Beramno sa an ei dan : Beramno sa chu chhum lovin hmawlha thil kawkalin meiah an hem hmin a; chhang dawidim telh loh leh hnim khâ nen an ei pawlh a, a tuk thlenga ei bâng dah ṭhat a thiang lo va, a zan la lain an ei zo vek tur a ni. Beramno sa eitute chu an ei zawha kal chhuak mai turin an inbuatsaih a, puan vengin, pheikhawk bun chung leh ding chungin an ei a; tiang an keng tel bawk a, Aigupta chhuahsan turin inpeih rengin an awm a ni. Aigupta ramah kum 430 lai sala an tan hnuin Pathianin sal ata a chhanchhuak ta a ni.

Kût urlawkna : He kût hriatrengna hmang tur hian Judate chu an inbuatsaih nasa hle ṭhin. A hma thla khat zet aṭanga lo ur ṭanin Sunagog tinah he kût lam hawi hian hun an hmang a. Kalhlên Kût awmziate, Kalhlên Kût chanchin leh an tana a hlutna leh ropuina te a ṭobul aṭanga sawiin an lo inzirtir a, thupuiah an lo neih ṭhin a ni. Kût ṭan hma ni hnihah mitinin dawidim thenfai hna an thawk a. Khawnvar hala chhiin in chhung hmun tin, kil tin, bawm tin an dap a, dawidim an phiat fai kêlh a, an paih vek ṭhin a ni.

Jerusalemah kût an hmang : He kût hmang hian Jerusalem khawpuiah mi an tam thei hle a. Jerusalem aṭanga mel 25 biala Juda mipa puitling tawh phawt chu Jerusalem-ah kal ngei tur a ni a. An hunpui ber a nih avangin mel 25 pawn lam leh khawvel hmun tin aṭanga kal an tam thei hle. Khawpui thianghlim Jerusalema kal ve thei lote pawhin kawng sira lo dingin Jerusalem pana kalte chu duhsakna an lo hlan ṭhin a ni.

Kût hmanna ran hman zah : Lal Isua hnu kum 30-ah Palestina rama Governor chu Cestius-a a ni a, hetih lai hian Emperor Nero-an Judate sakhua chu tihhniam a tum a. Chuti maia tih chi an nih lohzia leh an sakhua an lak takzia leh urhsunzia Governor Cestius-a chuan Nero-a chu a hrilh a, Judate a hmin theihna tur hmanrua atan Kûtnaa beram an talh chhiarpui a neihtir a, Jetusalema Judate chanchin ziaktu hmingthang, Galili bial Governor pawh lo ni tawhin a ziak danin beram an talh zat chu 256,000 a ni a. Danin a tuk angin mi 10 aia tlem lovin beram pakhat an inṭawm tur a ni a. Beram pakhat inṭawm tlem thei ber zat mi 10-a chhutin mihring 27,00,000 aiin an tlem thei lo tihna a ni.

Mikhual thlenna a thlawn vekin : Mikhual an tam avangin Jerusalem-ah an leng ṭhin lo va, a chhehvel khaw bul hnai thlengin mikhualin an khat ṭhin. Khawpui thianghlima thlen in reng reng a thlawn vek a ni a, mikhual thlengtuten engmah an la ngai lo va. Temple-a an hlan beram vun erawh an mikhualten an pek chuan an dawng ṭhin a. Mikhualten pek chikah an neih a, ni khua a lo reiah phei chuan tih dan phungah an nei zui ta a ni

Thla bial zan : Kalhlên Kût hman hun lai hi thla bial hun lai a ni ṭhin a, thla a eng nuam hle ṭhin. Hetiang hun puia Lal Isua Lal anga Jerusalem-a a lut hi a lo berah pawh a hmutu leh a thawm hretute chu nuai khat leh sing nga chu an tling ngeiin a rinawm.

Kalhlên kûtin Thuthlung Thara a entirte : “Thuthlung Hlui hi Thuthlung Thar hlim thla, Thuthlung Thar darthlalang a ni” an ti ṭhin. Chutiang chuan he Kalhlên kût hian Thuthlung Thar lama a entirna leh a thlen diknate tlemin i han en thuak thuak teh ang :

1. Dawidim : Thuthlung Hlui lamah dawidim thu a chuang tam hle, kût an hman dawn apiangin dawidim hi an in chhung ata an thianfai ziah ṭhin, chu chuan thil ṭha lo a ni tih a entir. Thuthlung Thar lamah hian “sual (evil) thiltihtheihzia entir nana hman a ni. Pharisaite dawidim chu vervekna, pawn lama sakhaw mi nihna hi a ni a (Matt. 23 : 25 – 28; Lk. 12 : 1b). Sadukaite dawidim chu rinhlelhna leh rin lohna (Matt. 22 : 2; Tirh. 23 : 8), Heroda dawidim chu hurna tenawm a ni (Matt. 14 : 3). Thuthlung Hlui dawidim ṭhat lohna chu Thuthlung Thar chuan chiang takin a rawn sawifiah a ni. Paula chuan Korinth khuaa mite hnenah an zinga dawidim hlui uanna te, mahni induhtawkna te, finga inngaihna te, in rel neuh neuhna dawidimte chu an dah kian hma loh chuan, Pathianin chanvo ropui tak a pek, Amah nena inpawlna (fellowship) hlimawm leh malsawmna, thlarau lam malsawm sakna an tlan turte chu an chân vek ang tih a zirtir a. Dawidim fanin an awm tawh a, an zingah sualin thu a nei a, an zingah inngaihna sualin hna a thawk a, hmehmit thuai ahnehin an uanpui zawk a, Pathian malsawmna leh inpawl hlimna reng an nei pha lo va chuvangin an zinga “dawidim hlui” chu thianfai turin a ngen a ni. Hei hian Thuthlung Hlui dawidim chu Thuthlung Thar chuan chiang takin a ṭhat lohzia a sawi fiah a ni.

2. Beramno : Heta beramno kum khat pawh tling lo an talh hian Isua, Pathian Beram No, khawvel sual kalpuitu chu a entir a ni. (Joh. 1 : 29).

3. A kawkalha thil : Beramno kha hmawlhin a kawkalh (cross)-a thila an hemhmin hian, Isua chu khawvel sual tlan nana Kraws-a a thih tur entirna a ni

4. Beramno thisen kawngka bianga tah : Beramno thisen hussop-a kawngka biang lehlam lehlama leh kawngka lu chunga an tah hiah Isua kraws chunga an khenbeha, a thisen chhuak chuan khawvel sual laka chhandamna a siam hi a entir a ni. (Joh. 19 : 34; 1 Pet. 1 : 18, 19).

He Kalhlên kûtin a lo entir Thuthlung Thara a lo thlen dikna leh a entir hi sawi tur a tam hle. Paula chuan, “Kan Kalhlen Kûtna tur pawh an tal tawh si a, Krista ngei chu; chuvangin i kût ang u, dawidim hluia kut lovin, nunchhiat leh sualna dawidima kût hek lovin takna leh dikna chhang, dawidim telh lohvin i kut zawk ang u,” tiin a sawi a ni. Kan Kûtna tur dik tak chu Isua Pathian Beramno, khawvel sual kalpuitu chu a ni (Joh. 1 : 29).

Kalhlên Kût Chaw : Israelten Aigupta ram an chhuahsan dawn zana an chaw ei (Zanriah Hnuhnung) hriat rengna an hman ṭhinah hian Dawidim tel lo Chhang leh Beram sa bakah thil dang an tih te chu : –

1). Tui Al Thleng : Tui al dahna thleng an chhawp tel a. Chu chu Aigupta-a an tawrhna mittui hriat rengna tur leh Pathian Kut chakin Tuipui Sena (Tuipui Sen tui hi a al) ropui taka a hruai kai hriat reng nan a ni.

2). Hnah kha : Hnah kha ei chi an chhawp bawk a. Chumi zingah chuan hussop, kawngkhar bianga Beram No thisen an tahna hnim a tel bawk.

3). Charoseth : Apple, Date rah, Pomgranate rah leh theipilsak sawhkawi, Aigupta rama Leirawhchan an siam ṭhin hriat rengna. Buhpawl entir nan rairuang kuang emaw sawhkawiah chuan an vit bur bawk a.

3). Wine No 4 : Pathian thutiam hriat rengna pali (Exod. 6 : 6 – 7)

i). Aigupta phurrit ata ka hruai chhuak ang che u

ii). Nasa taka ngaihtuahin ban phar meuhin ka tlan ang che u

iii). Ka mi atan ka nei ang che u

iv). In tan Pathian ka ni ang.

Heng thutiam hriat rengna entir nan Kalhlen kut chaw an ei apiangin Wine No Pali an chhawp ṭhin.

Tlai ni tlak dar 6 vel (arsi pahnih lan) aṭangin Zirtawp a lo ni ta a; Dawidim telh loh (zan-riah) Kût chaw an kil ta ṭhin a ni.

Kalhlên Kût chaw ei dan : Aigupta ram an chhuahsan dawn zana an chaw ei kha chu ding chungin an ei a. Hmanhmawh, ralmuang lo leh Bawih an nihzia a tichiang a. Tuna Kalhlên Kût chaw an ei dan erawh chu ṭhu âwn chungin, muangchangin an ei ta, chu chuan zalên an nihzia a entir. Zalên dinhmun aṭangin Bawih dinhmun an tih leh zalen an nih dan te, zalên an nihchhante hriat rengna a lo ni ta. Kalhlen kût chaw an ei dan chu : –

1). No hmasa ber : Pa berin emaw chhungkaw hotu berin emaw mal a sawm a, a in a – No chu inhlan chhawng zelin an in dan dan a. Hei hi Kiddush No an ti a. Tihthianghlimna, tihhranna tihna tluk a ni. Chaw ei pangngai laka hrang tih a entir.

2). Kut sil : Kut sil hi hruaitu berin a sil chuan a tawk. (Kut sil dan hi hun remchang a awm chuan kan la sawi ang, a sei lutuk dawn bc).

3. Anṭam hel ei chi (lethuse) emaw, ei tura pawlh chi (Parsely) hnah emaw tuiah chiahin an ei. Hnah ei chi hi kawngkhar bianga Beram no thisen tahna hussop leh tui al hi Tuipui Sen hruai kai hriat rengna a ni.

4). Chhang phel : Dawhkanah dawidim tel lo chhang bial thuma rem kual a ni a. Chhang laita ber chu lain Pa (hotu) in mal a sawm a; a phel a, hmawm khat pawh tling lo te tak tê têin an ei a. Sal dinhmunah chaw kaw puar ei lo, Sal chan tâwk hriat reng na a ni. A phel pahin “Hei hi kan thlahtuten Aigupta rama tihduhdahna chhang an ei ṭhin chu a ni. Rilṭam apiang lo kal se la, ei rawh se. Tlachham apian lo kal se la, Kalhlên kût chaw hi min rawn kilpui rawh se,” a ti a. Palestina ram pawna khawsa te chuan he thu hi an chham tel bawk, “Kumin chu helaiah kan kil a. Kum tharah chuan, Israel ramah kan kil ang. Kuminah Sal angin, Kum tharah zalenin.”

5). Hruai chhuaha an awm thu sawi : An zinga naupang berin (naupang ber naute a nih chuan, leikang tawh zinga naupang fel deuhvin) an hun hman dan chu engvanga danglam nge a nih a zawt a. Hruaitu (chhungkaw Pa) in Aigupta Sal ata ropui taka hruai chhuah an nih dan a hrilh a. Kalhlen Kut chu hun inherin a herchhuahpui vanga tih dan phunga neih a nih mai lohzia leh Pathian khawngaih leh lainatna ngahzia leh thiltihtheihna nasatzia te hriat rengna kut a nihzia a sawi a.

6). Hemi zawhah Sam 113, 114 an sa a. Sam 113 – 118 te hi Hallel an ti a, Pathian chawimawina/fakna tihna a ni. Juda mipa naupangin en lo va a sawi theih tur hmasa te zinga mi a ni.

7). No hnihna : No hnihna an in leh a. Haggadah no tih a ni Hrilhfiahna, puanchhuahna tihna a ni.

8). Kut sil : Kut silin, zanriah ei turin an inbuatsaih a.

9). Lawmthu an sawi : Lawmthu an sawi a, “Kan Lalpa, kan Pathian, leilung ata ei tur min pe a, lawmthu kan hrilh a che. Aw Lalpa, Dan thu avangin min tithianghlima, lawmthu kan hrilh a che,” Dawidim telloh chhang sem leh a ni.

*10). Dawidim telh loh chhang ei rual hian thil – sawhkawi – Charoseth tlem pir a, ei tel tur a ni. Tihluihnaa Leirawhchan an siam luihtir ṭhin hriat rengna a ni.

11). Zanriah ei : Zanriah chaw an ei ṭan a. Beram hemhmin sa chu an ei zo ngei tur a ni. An ei zo thei ngang lo a nih pawhin ei bang chu dah ṭhat awih a ni lo va, an paih mai tur a ni.

12). Kut an sil leh a.

13). Dawidim telh loh chhang an ei leh a.

14). Lawmthu sawi : Lawmthu sawi ṭawngṭaiin a zui a. Messia hmahruai Elija lo lang tawh tura ngenna a ni ber.

15). No thumna : No thumna an in leh a. Chu chu lawmthu sawina a ni – “Aw Lalpa, kan Pathian, Van leh Leilung Pathian, thlai rah leh grep min siamsak (dinsak) tu, lawmthu kan hrilh a che (malsawmin awm ang che).”

16). Hallel Sam 115 – 118 an sa a

17). No lina : No lina an in leh a. Hallel ropui an tih Sam 136-na an sa leh a.

*18). Ṭawngṭai hla pahnih an sawi leh a. Kalhlên Kût dawidim tel lo ruai chu an tlingtla ta a ni.

Lal Isua leh a zirtirten Pindan chungnunga zanriah hnuhnung an kil khan Judate tihdan phung hi an zui ngei a rinawm. Chuti a nih chuan Olive tlang Gethsemane pana an chhuah dawna an hla sak kha Sam 136 hi a nih a rinawm.

Judate hian Kût ni serh 9 lai an nei a. Saltan hmain Kût Pali, Saltan hnuah Kût Panga an nei. Saltan hmaa an Kût neih te chanchin a hma lamah khan pahnih kan sawi tawh a, tunah pahnih dang lo zir leh ila :-

Rah Hmasa Kut

3. Rah Hmasa Kût (Thên Thil Hlan – Lev. 23 : 6 – 8; Num. 28 : 17; Deut. 16 : 6) : Rah Hmasa Kût, Thên Thil Hlan tia sawi bawk hi Abib Thla ni 14 tlai lamah a ințan a, a ni 15 ni chu Chhang Dawidim Telh loh kût a ni, chumi ni chu Chawlh Ni (Sabath) a ni. Sabbath zawh tuk chiahah, a ni ruknaah Rah Hmasa Kût an hmang zawm nghal a. Kum 40 chhung thlalera an vahvaih chhung khan Rah Hmasa Kût hi an hmang thei lo va, Kanaan rama an luh chinah, lo leh huan thlai tinreng an neih theih tak avangin Rah Hmasa Kût hi an hmang thei ta chauh a ni.

An thlawh laia an “Buhphal Hmasa Ber” chu puithiam hnenah an rawn keng a, puithiam chuan a lo pawm sak theih nan Lalpa hmaah “Chawlhni tuk tuk lehah” a lo thên sak a, Thlai Thar inkhawma kan thlai thar hmasa Biak Ina kan lakhawm ang deuh hi ni âwm tak a ni. Tichuan Puithiamin Lalpa hmaa thên thil hlan atana a hlan zawh veleh halral thilhlan atan beramno a pa sawiselbo kum khat mi chu maichamah a hlan ta a, chaw leh in tur pawh a hlan nghal a, sual thawina thilhlan erawh chu a tel lo a ni (Lev. 23 : 12 – 14).

Thuthlung Thar lama a entir : Rah Hmasa Kût hian a entir ber chu “Krista Thawhlehna” kha a ni. Sabbath zawh tukah a tho leh a, Paula’n “Krista chu Mitthi zing ata a tholeh tak zet a ni, “muhilte Thawh Hmahruaitu” (Rah hmasa – First Fruits) a lo ni ta,” tia a sawi kha (1 Kor. 15 : 20). “Buh fang leia a tlak loh va, a thih loh chuan, a mal chauhvin a awm reng țhin; a thih erawh chuan, tam takin a rah țhin” tia Joh. 12 : 24-a a sawi angin Isua chu taksaa tihthihin a awm a, Josefa thlanah an phum a; ni sarih ni hmasa bera a lo thawhlehna kha “Rah Hmasa” (Thawh hmahruaitu – First Fruits) a nihna chu a ni a. “Mahni hun țheuh zelah Krista chu Thawh Hmahruaitu(First Fruits) a ni a; chumi hnua a lo kal lehnaah chuan Krista tate (piangthar, chhandamte), Kristaa muhil tate chu an lo tho ve ang (1 Kor. 15 : 23).

4. Pentikos Kut (Chawlhkar Kût – Lev. 23 : 15 – 21; Deut. 16 : 9 – 12; Tirh. 2 : 1 – 14) : Pentikos tih hi Grik țawngin Pentekonta Hemeres tih a ni a. Hebrai țawngin Hamussim Yom an ti a. A awmzia chu Ni sawmngana tihna ve ve a ni. Pentikos hi Chawlhkar Kût ti pawhin an sawi bawk. Chawlhkar Kut hi Hebrai țawngin Hag Sabuot tih a ni.

Rah hmasa kut zawh atang chiaha ni sawmnganaah Pentikos kut hi an hmang ṭhin a. Heng kut pahnih inkarah hian hapta sarih a tla a. Sabbath vawi sarih lai a awm hnan bawk a, chuvangin he kut hi Hapta Kutte ti pawhin an sawi bawk ṭhin. Rah Hmasa kutah barley (chhangphuta siam chi buh sanghar) buhphal hmasa ber pawl tlakah an hlan a, a tawpah “wheat” (chhangphut buh) buh seng pawl tlakah a tawp a; a ni hmasa ber chu Rah Hmasa Kut a ni ve thung a. A ni hmasa ber leh a ni hnuhnung ber chauh an lawm ṭhin.

Chaw Thar Hlanna : Pentikos kut ah chuan Lalpa hnena “chaw thar hlanna” an nei ṭhin. Pawntikos kut hi Sabbath vawi sarihna zawh tuk tuk leh a nih avangin “Ni sarih ni hmasa ber” Isua thawhleh ni, tuna kan Pathianni chiah hi a ni. Pawl tlaka chhangphut “thar” hlan a nih avangin “Chaw Thar Hlan” tih a ni.

Rah Hmasa kutah kha chuan *”buhphal hmasa ber” thêna hlan a ni a. Pentikos kutah erawh chuan rawt dip hmasak a, chhangphut hlawm chu hlawm hniha siama âwm hmin tur a ni ve thung a. Tin, dawidim pawh telh tur a ni.

Halral thilhlan atan beramno pasarih sawisel bo, kum khat mi leh bawngtuai leh berampa pahnih an hlan a, chhang hlan rualin an hlan a ni. Lalpa tana rimtui atan chaw leh in tur thilhlan an hlan tel bawk. Hengte hi an hlan zawh hnuah “sual thawina thilhlan” pawh an hlan a, chumi atan chuan kel pakhat leh Remna Thilhlan inthawina beramno, a pa pahnih kum khat mi an hlan bawk.

Hriat reng nan : He Kut hi Inhmuhkhawmna Thianghlim-ah an puang a. Israel mipa puitling tawh phawt chu he kuta kal ngei tura phut an ni. Thuthlung Hlui leh Thar inkar hunah chuan Pentikos ni hi Mosian Sinai tlanga Dan thuthlung a lak hriatreng nan an hmang a. Aigupta ram ata Pathianin a chhanchhuahna hriat thar leh nan an hmang bawk a ni.

Eng ațanga sawmngana tih nge? : Pentikos Kut hian Kohhran din tura Thlarau Thianghlim lo thlenna tur a entir . (Lev. 23 : 15-22; Tirh. 2 : 1 – 4). Kalhlen Kut kha Nisan – April ni 14-ah a ințan a. Dawidim telh loh Kut chu Nisan ni 15-ah an hmang a, Rah hmasa Kut chu Nisan April ni 16-ah an hmang a, “Chawlhni (Sabbat) tuk tuk lehah (Ni Sarih Ni Hmasa Berah- kan Pathian Ni) chuan Puithiamin (in buhphal chu) a then tur a ni,” “… Chawlhni (Sabbath) Tuk tuk leh (Isua thawhleh ni or Pathian ni – Ni Sarih Ni hmasa ber), then thilhlan buhphal in rawn ken ni ațangin in chhiar ang a, Chawlhni vawi sarih (7 x7) a tling tur a ni; tin, chawlhni vawi sarih tuk atang chuan ni Sawmnga in chhiar ang a, Lalpa hnenah chhangphut thar thilhlan in hlan tur a ni…. Chhang hlawm then tur pahnih Chhangphut Dip Mi, Dawidim Nena Âwm, in rawn keng tur a ni…” tiin Pentikos Kuta hman chungchang sawi a ni a. Lev. 23 : 11, 15-17 en la).

Thlarau Thianhlim lo thlenna entirna : “Chawlhni (Sabbat) tuk tuk leh” chu kan Pathian ni, Isua thawhleh ni chiah hi a ni. Sabbat tuk tuk leh ațanga chhiar țana a Hapta Sarihna (ni 49) chiah chu Judate Sabbat ni a ni a, tin, a ni sawmngana chiah chu ” Hapta khata Judate ‘Ni Sarih Ni Hmasa Ber,” kan Pathianni hi a ni, chu mi ni chu Pentikos Kut atan an hmang țhin a, Thlarau Thianghlim lo thlenna ni entirna a ni a, Pentikos Kutin a entir ang ngeiin Pentikos niah Thlarau Thianghlim a lo thleng ta chiah reng a ni. (Tirh. 2 : 1-4).

Pentikos thilhlanten a entir : Buhphal hlan lo va, “Chhangphut dip mi, Chhanga âwm hmin hlawm hnih an hlan hian entir țha tak a nei a. Chhangphut dip siam turin khawla rawt dip hmasak a ngai a, tin, tuia hmeh hnuah chhang hlawma siam a ni ang hian Kohhrana hlawm khata inpumkhat theihna turin Kalvari Kraws khawla rawt dip hmasak a țul a ni. Tin, Tui-Thlarau Thianghlima inpumkhat tura hlawm khawm a ngai bawk a, chutiang taka awm turin sual rawt dipna Kalvari khawlah mi sual chu rinnaa a kal tlang veleh, Krista Taksa Pumkhata inhlawm khawm turin Tui-Thlarau Thianghlim pakhat chauhva hlawm khawmin a awm a; Krista Taksaah a lo chang țhin a ni, (1 Kor. 12 : 12; 13 : 27).

Chhang hlawmin a entir : Chhang hlawm hnih hlan a țulna kher hian Juda leh Jentail zinga ringtu lo ni ta, pawl hnih te Krista rinnaa inpumkhata kan awmna hian a entir a, (Eph. 2 : 11 -22; en la). Tin, Dawidim nena âwm a nihna hian Kohhrana sual (evil) a inphum tel ve thu entirna a ni, a lem leh a tak hi a inkawp chho zel a ni! (Mat. 13 : 33; Tirh. 5 : 1, 10; 15 :1). Engpawh ni se Pentikos Nia Thlarau Thianghlim lo thleng chuan zirtirte chu pumkhatah a rawn siam ta a ni. Israel leh Jentail ringtute chu pawl hnih lo ni tawh țhin mahse Thlarau Thianghlimin Taksa Pumkhatah a rawn țhui khawm ta a ni, (1 Kor. 10 : 16, 17; 12 : 12,13, 20, 27; Eph. 2 : 11, 12).

Saltan hmain Judaten Kût pali an nei a, Saltang chhuah hnuah Kûtpui pathum an nei thar leh a, kûpui tia sawi bakah kût tenau pahnih an nei bawk. Pentikos kût leh Tawtawrawt Kût inkar hi hun rei tak a tla a, he hun hi hun karlak tla tia sawi a ni a. Tawtawrawt Kût sawi hmain he hun karlak tla hi i han sawifiah hmasa lawk teh ang.

Hun Karlak Tla : Pentokos Kût leh Tawtawrawt Kût inkarah thla li a tla a, chumi hun chhung chu Grep Sengkhawmna hun a ni. Chung thla li hun chhung zawng chuan grep seng buaiin an buai a, inkhawmpui neihna hman pawh a awm lo. He hun chhung rei tawk tak (thla 4 chhung) hian “Khawngaihna Hun,” tuna kan hun hman mek hi a entir a, he mi hun chhung hian Thlarau Thianghlimin Kohhran membera lo tel turin ram tina mite a sengkhawm mek a, Tuna kan chênna hun hi a tawp hunah chuan “Jentailte famkimna hun,” seng khawm tur zawng zawngten lak khawm an nih hunah chuan, Israelte zinga “khawngaiha thlan (tuna Kristaa chhandam an nih) ang zia ziain paih thlak bak chu” lakkhawm zingah an tel ve ang a (Rom 11 : 5, 25), tichuan khawngaihna hun hi a tawp ang a, Thlarau Thianghlimin hnam tin zinga mi, Krista Kohhran, A Mo atana a chhinchhiah zawngte chu Lalpa hnenah boruakah khian a hruai chho ang a (1 Thes. 4 : 13 – 18), chu hun chu “Jentailte famkimna” tia Paula sawi kha a thlenna tur a ni ang (Rom 11 : 25). Kohhran hi chung lama lak chhohva a awm zawhah … Jerusalema Tawtawrawt Kût hnang turin lei kil lia thlanbIsraela thlahte chu vantirhkoh ten an lawr khawm ang a, an ram ngeia hruai khawmin an la awm ang (Mat. 24 : 31).

5. Tawtawrawt Kût (Lev. 23 : 23 – 25; Num. 10 : 1 – 10; 29 : 1 – 6) : He kût hi an chawlh hahdamna ni pawimawh berte zinga pakhat a ni a. An sakhaw Calender-a thla sarihna, Tishri thla, ni hmasa berah an nei țhin a, hei hi vantlang mipui inawpna lama an kum thar a ni (Num. 10 : 1 – 10). Kristian Calender-ah erawh chuan September thla chanve velah a ințan a ni. He thlaah hian ni 30 a awm a ni. He Kut hi Hebrai țawngin “Rosh Hashana” an ti a ni.

Hriatrengna kût : Pathiainin a mite saltanna ata a chhanchhuahna ni ropui tak hriatrengna leh Pathianin sual thiam loh a chantirna hriatrengna ni a ni a. Hemi hunah hian Judate chauh ni lovin hnam tin chi tina mi malsawm a pawimawhzia uar takin tihlan an tum țhin. Mihring tupawh hi khawvel pum pui neitu an nih vekzia an sawi uar a, berampa ki tawtawrawt (shophar), Abrahama leh Isaka te chanchina kan hmuh ang khan vawi za an ham a, chu chuan ramhuaihote a um bo va, Pathian kaihhruaina fing tak chu an neih phah leh țhin a ni.

An hman dan : He kum thar Kût hi Leviticus buah chuan Tawtawrawt kut an ti țhin a, chawlh nan te, inhmuhkhawm nan leh thilpek hlanna ni atana serh tura thupek an ni. Numbers buah chuan berampa ki kha tangkarua (silver)-a thlak a nih thu te, he ni ropui atan leh an riah hmuna inkohkhawmna atana hman tura tih a ni thute kan hmu.

He nia an inchibainabțawngkam atan chuan hengte hi an hmang țhin : –

1). “I tan kum țha lo ni rawh se” tih te,

2). Kum nuam leh hlimawmah Lalpan i tan siam rawh se” tih te,

3). “Pathian chuan kan sualte chu tuifinriat mawngah a paih thla ta” tih te hi a ni.

Hemi ni hi ni sawm chhung sual thupha chawi nan an hmang a, a ni sawm ni chu Tlanna Ni* (Inremna ni) a ni nghal.

Thuthlung Thar lama a entir : Pentikos Kut ațanga thla li a ral chiahin Tawtawrawt Kûtin
a rawn zawm chiah hian awmze țha tak a nei a. Pentikos Kût leh Tawtawrawt Kût inkarah grep an seng a, he hun inkara grep seng hun chhung rei tak hian tuna kan hun hman mek Khawngaihna Hun hi a entir a ni. Hun rei tak an chaw, grep an seng hian he Khawngaihna Hun chhunga thlarau bote Lalpa zema khung khawm tura chi tin, hnam tinte hnena Chanchin Țha hrila Lalpa tan a sengkhawm hna kan thawh hi a entir bawk. Tin, he kan hun hman mek Khawngaihna Hun tawpah hian thil pahnih lo awm ngei tur a awm a : Pakhatnaah chuan Tawtawrawt Kûta mipui inkohkhawm nana tawtawrawt an ham ang khan Kohhran hi chung lamah tawtawrawta koh khawmin kan awm ang. A pahnihnaah chuan Israela thlahte chu an rama hruai khawminan awm leh ang. “Lalpa ngei chu au thawm nen, vantirhkoh chungnung ber aw nen, Pathian tawtawrawt ri nen, van ațangin a lo chhuk dawn si a,” tia ziak angin (1 Thes. 4 : 16). “Kan zain kan muhil kher lo vang a, nimahsela kan zain tawtawrawt hnuhnung ber rik hunah chuan, rei lo têah, mit khap kar lovah tihdanglamin kan awm vek tawh ang; tawtawrawt chu a ri dawn si a… tia ziak a ni (1 Kor. 15 : 51 – 52).

Saltan Hnua An Kût Neihte

6. Tlanna Ni Kût (Inremna Kût – Lev. 23 : 26 – 32; Num. 29 : 7 – 11) : He Tlanna Ni kût ( Day of Atonement) hi Hebrai țawngin Yom Kipur an ti a, Inremna kût ti tein an sawi a; Simna, Ngaihdamna leh Khawngaihna Ni an ti bawk. Judate Kalendar-a Tishri (September – October) thla ni sawm niah an hmang țan a, ni sawm lai an hmang. He kût hi Judar te kût pawimawh ber a ni. Israel ramah chuan he kût hun lai hi ruahtui tlak țantirh, leilet an buatsaih țan hun lai a ni.

Sabbath anga serh : Tlanna ni chu chawlh dêrna ni a ni a, hun hmasa lamah a hlimawm zawng deuhin an lo hmang tawh na a, engtik hun lai ațang khan nge intihhrehawm hawi zawnga thlak a nih tak hriat a ni chiah lo. Sabbath serh angin he ni hi an serh a, hna chhete pawh thawh loh tur a ni. He Tlanna Ni hi Israel chhungte bakah an ina cheng vete zawng zawng pawhin an zâwm ve tur a ni a, an ran te nen lama chawlhna ni a ni.

Sual phurtu : He kû hi sual tlenfaina ni a nih avangin ni pawimawh tak a ni. Kel pahnih, an talh tur leh a nunga an chhuah tur an rawn kai a, mipui sual phurtu tur kel lu chungah chuan Puithiam lalberin mipui aiawhin a kut khing hnih chu kel lu chungah a nghat a, Israel mipui sualna zawng zawng chham kim dapin kel nung luah chuan a nghat ta vek a, tichuan mi pakhat an ruat chuan tuma luah loh leh chen lohna ramah a hruai bo ta dai a, tichuan kel chuan Israelte sualna chu a phur bo ta a ni. He kel hi Azazela kel an ti a, Sual phurtu kel tihna a ni.

Hmun thianghlim berah puithiam a lut : Puithiam Lalber chuan mahni puala inthawina a hlan zawh hnuah Israela thlahte tana Lalpa puala tlu zawk kelpa thisen chu kengin Hmun Thianghlim berah a lut ta a. Zahngaihna Ṭhutphah leh Zahngaihna Thutphah hmaah chuan a va theh a. “Israela thlahte bawlhlawhnate avang leh an bawhchhiatnate, an sualnate zawng zawng avangin hmun thianghlim pualah Inremna a siam a,” (Lev. 16 : 15, 16). Hemi ṭumah hian amah leh a chhungte tan inremna a siam a, mipui tan a siam bawk a, hmun thianghlim tan a siam bawk a, inbiakna puan in pualah pawh a siam bawk a, Dâr maicham pualah pawh thisen a kiahte tatin inremna a siam leh bawk a (Lev. 16 : 17, 18). Tichuan “Israela thlahte bawlhhlawhnate lak ata chu tihthianghlim an ni ta a” Lev. 16 : 19, 20).

Israelte sual ngaihdam a ni tih hriatna : Puithiam lalberin mipui tana Lalpa puala tlu zawk kelpa thisen theha Hmun Thianghlim bera luta a va thang chhung zawng khan mipuite chu thinlunga lungkham lian tak neiin, nungdama a lo chhuah loh hlauvin puithiam kawr fuala tengeng ri rêng rêng ri chu an ngaithla reng a, a ri a reh chuan “a thi ta a ni ang” tiin an hlauthâwng hle ṭhin. Sual thawina thisen, Zahngaihna Ṭhutphah hmaa vawi sarih a va theh chu Lalpan lo pawm lo ta sela chuan Nadaba leh Abihua ang khan Puithiam lalber chu a thi ve dawn si a (Lev. 10 : 1, 2). Puithiam Lalber silhfen hmawr fema tengeng khai ri chu an tan ngaihnawm tak a ni, a la thi lo tih an tan hriat theihna awm chhun a nih avangin. Kelpa thisen va theh zova him taka a lo chhuah chuan Israel mupui tan lawma thâwk huaina a ni a, an sualna lak ata ngaihdam an ni tih hriatna a nih avangin (Exod. 28 : 34, 35).

Sual vanga inchhirna rilru nen : Tlanna Ni chu rilru tihhrehawmna ni a ni a, a hlimawm zawnga hman aiin intihhrehawm zawnga hman a ni. An lo sual leh bawhchhiatnate zawng zawng avang khan inphahhnuai a, tlawmna nun tak zet nen he ni hi hman tur a ni. Chawngheia mahni sualna avanga inchhirna rilru nen Pathian hmaa kun tlawk tlawkna pawh a kawk thei bawk. Chuvangin he Tlanna ni hi minal tlin lohna leh sualna avanga inhmuh hniamna ni a ni. Hetiang hian Inremna ni hi kum tin vawi khat an hmang ṭhin a ni.

Thuthlung Thar lama a lo entir, a thlen dikna te : He Inremna Ni kût an hman dan hian Thuthlung Thar lama a tak lo thleng tur entir tam tak a nei a, chung chu tlem a langsar zual lo sawi ila :

1. Inthawina Dan thuah : “Dan thu chuan, thil ṭha, lo awm turte anpui tak nei lovin, a thlâ (shadow) chauh a neih avangin, kum tina inthawina pangngai an hlan fo te chuanin, a lo hnaite chu engtikah mah an tifamkim thei…lo,” – A tak erawh chu Krista a ni a, Inremna atana sual thawina chu kum tina tih nawn chhên ngai lovin Ani chuan “kelte leh bawng note thisen vang ni lovin, Ama thisen vang zawkin, Hmun Thianghlinah chuan vawi khatah a lut tlingtla ta nghal a” ni, (Heb. 10 : 1 – 4; 9 : 11 – 14 en la).

2. Puithiam lalber : Puithiam lalber, Israelte sual tana inthawina hlantu hian Thuthlung Thar lama a lo entir chu kan Puithiam Lalber, Isua Krista rawngbawlnaa a hnathawh dan a lo entir lawk a ni.

3. Beram thisena inthawina : Puithiam lalberin Hmun Thianghlim bera kel thisen a luhpuia, zahngaihna ṭhutphah leh a zahngaihna ṭhutphah hmaah a va theha Israelte sualna ngaihdam a ni ta hian Thuthlung Thara kan sual thawina “Krista thisen hlu chuan tlan” kan nih hi a lo entir a ni, (1 Pet. 1 : 18, 19).

4. Sual phurtu kel : Sual phurtu kelin Israelte sual thlalera a phur bo ta hian (Lev. 16 : 16 – 22) Thuthlung Thara ringtute sual phurtu Pathian Beram No, Isua Krista, kan sual phura thi ta chu a lo entir a ni. “En teh u, Pathian Beram No, khawvel sual kalpuitu tur saw!” tia Baptistu Johanan a sawi ang khan. (Joh. 1 : 29).

Tichuan Tlanna Ni Kût, Inremna Kûta kel thisen Hmun Thianghlim bera Israelte sual ngaihdamna tura Puithiam lalberin a va theh khan Pathianin a lo ngaidama, an sual laka tlan an ni a Pathian nen an inrem ta ang aia thukin Thuthlung Thara ringtute sualna chu Krista thisen hlua tlan leh chhandam an ni ta a ni.

7. BÂWKTE KÛT (Pâwl Kût – Lev. 23 : 33 – 44; Jos. 7 : 2 – 5, 14, 15): He kût hi a tirah chuan Pâwl Kût a ni a (Exod. 23 : 16; 34 : 22). A hnuah thlalera an vahvaih lai hriatrengna kûtah an hmang a, “Bâwkte Kût” an ti ta a ni ( Lev. 23 : 34; Deut. 16 : 13 – 15). He kût hi Judate ropui pathum zinga pakhat a ni a. Yom Kippur, Inremna Ni kût (Tlanna Ni) zawh a ṭanga ni li niah a inṭan ve ṭhin a. Thla sarihna, Tishri thla ni 15 aṭanga ni 22 thleng a awh ṭhin a ni. Ni sarih lai he kût hi an hmang a ni. Exodus buah chuan “kum tawp kût te, buh seng zawh dawn lam kut” ti te pawhin an sawi bawk. Thlalera in leh lo nghet pawh nei lo va ram tiam pana Lalpan a hruai lai hun hriatrengna kût a ni. Pathian hnena lawmthu sawina kût a ni a, hemi kar khat chhung hian an bawkte sak chawpah an khawsa ṭhin. Chutianga retheihna nasa tak aṭang chuan Lalpan dinhmun sang zawkah a hlankai avangin a hnena lawmthu sawi nan an hmang a ni. He kût pawimawhna hi kawng hnih lo thlir ila :

1). An hnam chanchinah pawimawhna a nei : Kan sawi tak ang khan he kût chhung zawng hian an in kalsanin bâwkteah an awm ṭhin a. Keini hun sawinaah chuan October ni 15 – 22 ang hi a ni ang. Bâwktê hi an in chung zawlah te, kawtthlerah te, Temple hung chhung ah te an sa thluah ṭhin a ni. An dan ang chuan bâwktê hi chu ṭhiah leh mai awlsam taka sak tur a ni. A bangah pawh chhawl hman tura tih a ni lem lo. A in chungah hnim an hmang a, zanah in chhung aṭanga van arsi hmuh theih tur khawpin a âwng suar ṭhin a ni. Hei hi thlalera in leh lo pawh nei lo va an vahvaihna kha hriat thartir lehtu a ni (Lev. 22 : 40 – 43). A tirah ni sarih an serh a, Lal Isua hun lai erawh kha chuan ni riat an serh tawh a ni. Tichuan he kût hian ram tiama an luh hmaa vakvai ang mai a an awm ṭhinzia a hriattir ṭhin a ni.

2). Lo lam thilah pawh pawimawhna a nei bawk : He kût hi thlai thar hlan ni ang deuh a ni. Exodus 23 : 16 leh 34 : 22-ah chuan “Sengluh Ni kût” an ti ringawt a (1 Lal. 8 : 2). “Lalpa Kût” ti pawhin an sawi bawk ṭhin. (Lev. 23 : 39). Pawltlâk zawha neih a nih ṭhin avangin mi an hlim em em a, kût ropui bera an ngaih hial a ni. Pathianin ei leh in tur a pek ṭhin avangin lawmthu sawina a ni. He hlimna ni hi mi hausa leh retheiten inang rengin an chang ve ṭheuh tur a ni, inthliarna a awm tur a ni lo.

Hun an hman dan : Tumkau leh hnah hring dangte kengin mipuite chu Temple-ah an lo kal a, Jerusalen aṭanga mel 20 bial chhunga mipa awm zawng zawng chu he kûtah hian an tel ngei tur a ni a. Mel 20 bial pawn lama mite chu a thei thei an lo kal ve chauh ṭhin. *Temple-a Maicham chu vawivsarih an kal hual ṭhin a. Chutih lai chuan rangkachak tuibelin puithiam chuan Siloam tui a zu chawi a, Temple Maichamah chuan thilhlan atan a leih baw ṭhin (Isa. 12 : 3). Tui an neih avangin lawmthu an sawi a, ruah sur nan an ṭawngṭai bawk ṭhin a ni.

Kan Lal Isua pawh he kûtah hian a lo kal a, hetia hun an hman lai tak hian Lal Isua chuan ring takin “Tuihal apiang chu ka hnenah lo kal rawh se,” tiin a au va. Thlarau lam tuihalna tirehtu chu amah chauh hi a ni tih a puang a. He dam chhung thlaler rama kan zin kawnga min hruai a, kan mamawh tinreng min petu Lalpa Isua hrerengin lawmthu sawinain kan nun hi lo khat rawh se.

Bâwkte Kûtin a entirna : Bawkte kût hian Kum Sangkhat Lalrama Israel hnam, an Messia hova an la chawlh hahdam hun tur lam a lo thlir lawk a; nakina Jehova nena Inremna kumhlun siama an awm zawhah hlim takin Kum Sangkhat chhung zalenna par an la tlan dawn a ni. Tunlai ṭawng han hawh zawk ila, Kum Sangkhat chhung pinic neiin, hnianghnara ei tur nen ram hnuaia intihlimna neiin an la awm dawn a ni!

Petera thlir lawkna leh a tak : Peteran hetih hun tur hi a lo thlir lawk a, Lalrama Krista ropuina tihlana a lo awm hun tur thlir lawkin, “Lalpa, kan tan heta awm hi a ṭha, i duh chuan hetah hian Bâwkte pathum kan khawh ang : i tan pakhat, Mosia tan pakhat, Elija tan pakhat,” a ti a (Mat. 17 1 – 4). Peteran heng thu a sawi lai hian van mite leh lei mite inchên pawlh a la theih rih loh va, nakin hun lo kal zel turah erawh chuan Kum Sângkhat Rorel hun a lo thleng ang a, chutah meuh chuan Van mite leh lei mite inzawm khawmna leh leia chenza theihna a lo awm tawh ang. Chutih hunah chuan Van mipui an lo chim thla ang a, Krista leh a mi thianghlim (A nupui, a mo, kohhran) zawng zawngte leh a vantirhkoh zawng zawng te nen, tin, Mihring Fapa chu “a ropuinaa inthuamin a lo kal ang a, a ropuina ṭhutphahah a ṭhu ang a, hnam tin chungah ro a rel ang (Mat. 25 : 31 – 46; 1 Thes. 3 : 13; Jak. 14 : 5b; Thup. 19 : 11 – 21; 20 : 1 – 6).

Chutih hunah chuan Jakoba mumanga van le lei inkal pawh theihna leihlawm indawh chunga Pathian vantirhkohte chhuk leh chhova kala insulpêl zung zung a hmuh ang khan, keini pawh van mite niin, tihdanglam taksa nen, Lalramah chuan Judate Lalnu (Queen) atan, a chhandam a kohhran, a nupuite hi kan la tel ve ngei dawn a ni!! A va nuam dawn em! Chutih hunah chuan thisena a tlan a Kohhrante hi a nupui kan ni si anga, Israelte chuan min va thik dawn tak em!!!! (Gen. 28 : 12; 1 Jor. 15. 15 : 51 – 54; 1 Thes. 4 : 15 – 18; Phil. 3 : 20; Ephe. 2 : 6, 7; Kol. 3 : 4 en la).

Judaten Mosia Dan hnuaia Pathianin Kût hman tur a pek pasarih bakah hian Kût pahnih an siam belh a. Chung kût chu a lo chhuah dan leh an hman dan tlangpui te lo zir leh ila.

8. PURIM KÛT (AISAN KÛT – Esth. 3 : 7 – 15; 9 : 26 – 32) : Purim Kût hi Aienna Kût an ti bawk ṭhin. Mizovin Aisan Kût tiin kan sawi bawk. Hebrai ṭawngkam thu mal Pur (English – lot) aṭanga lo kal, Mizo ṭawng chuan “ṭhum vawra thil pawhna” emaw aien tihna a ni. He kút chungchang hi kan Bible-ah chuan Estheri buah chauh a chuang a ni. Adar thla (February leh March) ni 14 leh 15 hi Purim Kût a ni a, hlimna leh bengchhenna ni a ni. Lalin ropui takin Mordekaia a chawimawi a, thuneihna a pek hnu chuan Mordekaia chuan Adar thla ni 14 leh 15 hi awm ni khama kût ni anga hmang turin Judate thu a pe a (Esth. 9 : 21 – 22). Estheri’n a sawi dan chuan *Purim Kût an hman nachhan chu hetiang hi a ni :-

1). Hemi ni hian Judate chu an hmelmate laka ralmuanga an awm tak avang leh chumi thlaa lungngaihna chu an tan lawmnaa a chan tak avang te,

2). Ṭahna ni tura ruat chu lawmna nia a lo chan tak avangin a ni. Hemi ni hi Hamana’n anmahni sâm vekna tur nia a ruat a ni.

Kût lawm dan : He kût ni hian hlim takin ruai an ṭheh a, an intihlim a, thilpek te an in pe tawn ṭhin. Mi rethei hnenah thilpekte an pe bawk ṭhin. He kû hi Judate kût hnuhnung pawl a ni a, Pathianin he kût hi hmang tura a tih pawh a ni lem lo va; hnam hruaituten an tihchhuah a ni.

Kût ni an lawm dan : He kû ni ah hian Estheri lehkhabu hi an chhiar ṭhin a, a bu thu hi a lemin an chang nghak bawk ṭhin. Judate tihboral tumtu Hamana lim an hal bawk ṭhin a, Estheri bu an chhiar laia Hamana hming an lam apiang hian an duh lohzia entir nan an lo au khum bawk ṭhin. Ni 13 ni hi chawnghei ni a ni a, ni 15 chhung ruaiṭhehna niah an hman ṭhin a ni. Tlaiah in tinah khawnvar an chhi êng a, Sunagog-ah an kal vek a, Estheri bu chhiar an ngaithla ṭhup ṭhin. A tawpah chuan Mordekaia te, Estheri te leh Israel mipuite mal an sawm hnuah an ṭin ṭhin a ni. Kum BC 161-ah Juda mi Makabia’n a hnehna ni Adar ni 13 hi Purim Kûtah an telh leh ta a ni.

9. Inpumpek Kût (Êngte Kût – Joh. 10 : 22 – 28) : Inpumpek Kût hi “Êng Kût” an ti bawk ṭhin. Hebrai ṭawngin “Hannukah” an ti. Tishri thla ni 25-na niah hman ṭan a ni ṭhin a, ni riat lai a awh ṭhin a ni. Judate Kût zinga a thar ber a ni.

Kût lo chhuahna bul, Epiphanes-a’n Jerualem a run : Inpumpek Kût lo chhuahna bul hi Judate chanchinah hun ropui leh chhinchhiah tlak tak a ni. BC 175- 164 chhung khan Suria ram lal Grik mi Antiochus Epiphanes-a chu Judai ram lalber a ni a, Grik nunphung ngaisangtu a ni a. Judate sakhua chu tihbo tumin a bei chiam a, Grik sakhua, hnam nun leh zia luahlan tumin a bei ta a. BC 170-ah Jerusalem a run thut a, a la ta mai a; Juda mi nuai riat a that a, nuai riat dang salah a hruai bawk a ni. Temple sum talent 1800 vel a la bawk. Judaten sakhaw dan bu an kawl a phal lo va, serhtan a khap bawk a. An fate serh tantirtu hmeichhiate chu an fa awrh chunga Kraws-a khenbeh an ni. Temple hung chhung tibawrhbangin nawhchizawrhna hmunah te, ennawm chhuahna hmunah te a hmang a. Halral thilhlanna maicham chu an pathian Olympian Zeus maichamah a siam a, an pathian hnenah inthawi nan maichamah chuan Judate tana sa thiang lo vawk sa a hlan bawk a. Temple kawtlai pawh a tibawrhbang nasa hle.

Inpumpek Kût a piang ta : Antiochus Epiphanes-a thiltih hian Judate a tithinur nasa hle mai a. Zalenna sualin Juda Makabia te unau kaihhruaiin Judate an hel ta a. Huaisen taka beiin BC 164-ah chuan Antiochus Epiphanes-a chu an hneh ta a. Ringlo miten kum thum lai an luah hnuah Jerusalem Temple chu a nih dan tur ang thlapin an siam ṭha leh vek a, an tithianghlim leh ta vek a ni. Chu Temple tihthianghlim lehna ni chu an hriatreng theih nan “Inpumpek Kût” hi Juda Makabia chuan kum tin a hun pangngaia an hman ziah theih nan dan a siam chhuak ta a. Judate thla “Kislew thla, December ni 25 ni, ni riat chhung chu *”Temple Tihthianghlim” champha kum tin lawm tak leh hlim raka hman ziah ṭhin tur thu an titlu ta a ni (1 Mak. 4 : 59)

Êng kût a nih angin : Inpumpek Kût ah hian Temple hung chhungah mei an chhep alh hluah a, a ên em avangin Jerusalem pum a ên hial ṭhin. In tinah êng chhit a ni bawk a, Rabbi Samaia zirtirna ang chuan tukverhah êng pariat chhit tur a ni a. Nitin pakhat zel timitin zan riat a awh ang. Rabbi Hillel-a thu ang chuan ni tin pakhat chhit belh zelin a zan riatnaah êng pariat a inchhi ang.

“Êngin a entir : Êng hian thil pahnih a entir a, pakhatna chu Israel ramah zalenna kawl a lo êng leh ta tih a entir a. A pahnihna chu – Judaten an Temple an han luah leh a, khawnvar ban pasarih (Menorah -Heb.) an han chhit leh dawn khan, a pakhatah chauh chuan a tui a lo la awm a, chu chu ni khat daiha an ngaih ṭhin a ni. Mahse, an han chhit chuan ni riat lai a lo daih ta mai a. Chu Êng mak tak mai chu hriatreng nan he Kût hi “Engte Kût” an ti a ni.

Leave a Reply

Your email address will not be published. Required fields are marked *

error: Content is protected !!