James Dokhuma ‘Silaimu Ngaihawm’-a ram leh hnam hmangaihna – F.Lalnunpuii

James Dokhuma ‘Silaimu Ngaihawm’-a ram leh hnam hmangaihna

F. Lalnunpuii
P/T Assistant Professor
Deptt. of Mizo
Gov’t Hnahthial College

1. Thuhmahruai:
Hringnunah hian hun khirh leh lawm lai ni te, ṭah leh nuih a inpawlh nawk chang a awm ṭhin a, chung mihring nuna thil thleng ṭhin te chu thu leh hla lama tui miten thu leh hlain an au chhuah pui ṭhin. ‘Silaimu Ngaihawm’ thawnthu pawh hi Mizoramin thih leh dam inkar, hun khirh tak mai a tawn behchhana James Dokhuma’n kum 1995-a a ziah a ni a, ram leh hnam hmangaihna lo lang te a changtute aṭangin hmuh theihin a awm a, eng ang takin nge ram chu an hmangaih tih te, eng dinhmun aṭangin nge an hmangaih tih te kan chhui zui dawn a ni.

2. A ziaktu chanchin:
James Dokhuma hi zirna lamah pawl 5 chauh passed nimah se Mizo Literature-a a thawh ṭhat avanga chawimawina nopui chi hrang hrang lo dawng tawh,kum 1985-a ‘Padma Shri in Literature’ pawh lo dawng tawh a ni. James Dokhuma hi kum 1932 June 15 khan a lo pianga,a pa chu Hrangchina niin a nu chu Kapkungi a ni. Hla phuah thiam Romani leh Lalṭanpuia te hi a unaute zinga mi an ni. Hna chi hrang hrang a thawk kual nasa hle a, kum 13 a nihin India sipaiah a ṭanga, kum 1950-ah bansan lehin 1954-ah St.Paul’s School-ah zirtirtu hna a thawk a, mahse rei thawk lovin Aijal C.D Block-ah Sanitary Inspector hna a thawk leh a. Kum 1960 rambuai hma deuhin a hna chu bansanin Hualtu khuaah zirtirtu hna a thawk leh a. Mizoram buai a lo nih khan a rammu ve nghal a,Tlungvel bial Block President mai bakah MNF rammu-ah M.P a ruat a ni bawk. Nowgong Special Jail-ah te tangin chumi hmunah chuan a thawnthu lar tak mai ‘Thla Hleinga Zan’ tih hi a ziak ṭan a, ‘Rinawmin’ tih leh ‘Khawhar In’ tih pawh hi Guwahati Jail-a atan chhungin a ziak zo bawk. Jail aṭanga a chhuah hnu kum 1973-ah E. Lungdar-ah zirtirtu hna a thawk leh a, chu pawh thawk rei lovin Aizawl Kulikawnah rawn pem sanin kum 2007-ah a boral ta a ni. James Dokhuma hi thawnthu phuah thiam mai ni loin essay, hlahril leh lemchan thawnthu ziaktu pawh a ni. A thu leh hla aṭang mai ni lo, a hnathawh tawh aṭang te hian James Dokhuma hi ram hmangaih tak leh a ram tana a theihna zawng zawng hlan ṭhin mi a nihzia kan hre thei a. Silaimu Ngaihawm aṭang hian Nationalist ropui tak a nihzia chiang takin kan hmu thei bawk awm e. [adToAppearHere]

3. Nationalism awmzia:
Nationalism hi Oxford Dictionary-in a sawifiah dan chuan, “Mahni ram leh hnam hmangaihna rilru,mahni ram chhuang lutuka ram dang hmuhsitna, mahnia ro inrel ve theihna tura hnathawh,” (120) tiin a sawi a. French Revolution kan en chuan Nationalism chu, “Zalenna, intluktlanna leh inunauna ṭha zawk beiseina a ni a, mimal zalenna te, mi tupawh intluk tlanna te, mi zawng zawng inngeih taka unau anga awmho theihna hi Nationalism chu a ni ber,”(Britannica Encyclopaedia) tiin sawi a ni bawk. Nationalism chuan indona te pawh a chawk chhuak hial ṭhin a ni tih French Revolution aṭang hian a lo lang thei awm e.

4. Silaimu Ngaihawm-a Nationalism Ziarang:
‘Silaimu Ngaihawm’ tih hi Mizoram buai kum 1966 chho bawr vel behchhana a ziah a ni a.A thawnthu hi han chhiar phat aṭangin rilru a dek nghal zar a,Bung 1-naah hian Lungpho leh Kawllen khaw inkâra thlan hlui tawh tak a lung phun pawh lung pangngai ve mai nimahse chu lunga thu inziak chemtea ker chawp fiah tawh lo tak chuan a thawnthu kal hmang tur chiang takin a rawn tarlang nghal a chu thu inziak chu, “L.T.Sanglura, ‘CH’Bn.MIZO ARMY” tih a ni. He thlan chhunga mu chauh hi khawngaihthlak a ni bik lo asin. Kha khan ram buai vanglaiah zet kha zawng nunna hian hlutna a nei ta lo a ni hial ang e tih turin he kan Zoram hi thihnain a tuam a…” (Silaimu Ngaihawm,19).

He Mizo Army hi eng vanga ram palai lenga zalh nge anih? tih hi zawhna lian tak a chhanna pawh awm nghal chu a ni. A thawnthu, a bul aṭanga a tawp thleng hian ram tana hna thawhna leh chu rambuai avanga mipui tawrhna te leh, hnam dang awpbehna a ta tal chhuak tura beihna nasa tak a langa. Mizo Union ho chuan MNF-in Independent an sual dan chu an thlawp zan lo a, “….Mizo Union chhuah tirh laia mi ṭhenkhatin ‘Burma zawm’ te, ‘Independent’ te an sawi lai khan tuna kan Mizo Union hotute hian an rawtin tuna independent sual buangbar ngai lovin kan hmu daih tawh ang chu. Nimahsela,kan ram dinhmun enin independent thei dinhmunah kan ding lo chauh pawh ni lovin India Sawrkarin a phal dawn lo tih an hria a,an bei duh lo lek zawk alawm”(33), chutiang karah pawh chuan mi tam tak rilruah chuan zalen duhna a intuh nghet viau tawh a. India sipai te chuan khaw te deuh te chu an ṭhenawm khaw lian deuhah khalh khawmin ei leh bar tur mumal nei loin mi tam tak an awm a.|halai rual tam tak chu mahni in lum kalsanin Mizoramin mahni ke ngeia rorelna khawl a vawn ve theihnan tiin an rammu a,mi tam takin India sipai lakah nunna an chan phah a.Rammu zingah chuan Lt.Sanglura leh a thian te pawh a kaihruaitu ber niin India sipai ho hriat hlau tak chungin a ruk thei ang berin khaw hran hrana an mi leh sa thlabar taka awm te chu an kan kual ṭhin a,an theih ang angin ram leh hnam tan a tawp thlengin an thawk a ni tih kan hmu a ni.He Mizoram hi hnam dang thuhnuaia kun tawh loa an tihduhdahna leh an khuahkhirhna aṭanga chhuaka mahnia ro inrel ve thei tura hmalak duhna chu a tir phat aṭangin a lang nghal a, he thawnthu hi Nationalism thawnthu a ni tih phat rual a ni lo. [adToAppearHere]

5. A changtute aṭanga Nationalism lan dan:
A changtute aṭang pawh hian chiang takin kan hmu thei bawk. A changtupa ber Sanglura chu MNF volunteer-ah a ram leh hnam chhan nan a nunna thâpin a inpe tih kan hria, Mizo Army-ah dinhmun pawimawh tak chelhin Lieutenant hial a ni thei a, hei hian a ram leh hnam tan hna ṭha tak a thawk a ni tih takin a tarlang a.Chu mai a ni lo a, ram leh hnam tan anih phawt chuan khawvawt, ruahsur, rilṭam te chu an tuar hram hram ṭhin a ni tih kan hmu thei bawk. A thih thlengin a ram leh hnam tan hna ropui tak a thawk a, “…Pathian leh kan ram tan rinawm takin ka thisen kalkawng hi in rawn chhui zel dawn nia…” (75).

Tlangval kei ka ni inti chin leh ram leh hnam hmangaihna rilru pu tawh phawt chu ram tan tiin an rammu deuh vek a. Zaikima pawh lehkha zir sang tak a ni a, a ram tlu chhe mek leh a hnam pui te ralṭi leh manganga an awm chu a hmu thei lo a. Vai sipai ho tihduhdahna lak ata a ram chhanchhuak tur chuan a chhungte remti lo chung a pen chhuak ve tih kan hmu bawk. Mahni in luma nuamsa taka lo awm bik chu ṭha a ti ngang lo a, “…Kan ṭhiante zawng zawng ram tan an chhuak zo tawh a…hetia awm ngawt reng mai chu ka zak hluah hluah”(37) a ti a. A tawp thlengin rinawm takin a ram tan a thawk tih kan hmu a, Lt.Sanglura thachhang daltu rinawm tak a ni.

A changtunu Lalramliani pawh hi hmeichhe huaisen; a ram hmangaiha a theih ang tawka a tha leh zung thawh ṭhin mi a ni. An khua Hualtu chu khaw ralmuang tak, vai sipai lakah pawh an la him avangin Mizo Army te chuan an lo paltlang fo ṭhin a,chung mikhual te chu Ramliani chuan huaisen takin vai sipai pawh hlau zo loin a lo buaipui ṭhin. An mamawh ei leh in tur, riahna tur thlengin a lo ngaihtuahpui ṭhin a, Sanglura bula a thusawi aṭang pawh hian ram leh hnam hmangaihtu tak a ni tih kan hre thei ang, “…keia lah chu hmeichhia ni mahila heti khawp hian tualchhungah kut ke berah min hmang bawk si a”(56).

James Dokhuma hi ram leh hnam hmangaih mi tak a nih avang hian a thu leh hla ah pawh Nationalism lam behchhan thu leh hla a ziak nual. Thawnthu kher loah pawh a kut chhuak ṭhenkhat heng – Tumna chu a hlawhtling ṭhin(1976), Hmasawnna (1978), Hausak aiin Hrisel a hlu zawk(1978), Finna Hmahruai(1980) aṭang te pawh hian ram leh hnam tana mi ṭhahnem ngai mi a nih zia kan hmu thei a ni. [adToAppearHere]

Silaimu Ngaihawm hi Nationalism thawnthu ṭha tak a nihzia fiah takin kan hmu thei a,a changtu zawng zawng te hian an ram leh hnam tan an theihtawp tak meuhin hna an rawn thawk a, chuvangin he thawnthubu tawi te a a changtute aṭang hian Nationalism thawnthu ṭha tak kan hmu a ni.

Works Cited:
Dokhuma James. Silaimu Ngaihawm. Gilzom Offset,A54 Electric Veng, Aizawl,Mizoram.2012.Print.
Department of Mizo,Mizoram University. History of Mizo Literature. Gilzom Offset, Electric Veng,Aizawl. 2013.
Mizo Writers’ Association. Ziakmite Chanchin. Gizom Offset, A-17,Electric Veng Aizawl.2002.Print
“nationalism.” Dictionary.com Unabridged. Random House, Inc. Web. 12 Sep. 2015.
“nationalism.”Encyclopædia Britannica. Encyclopædia Britannica Ultimate Reference Suite.  Chicago: Encyclopædia Britannica, 2015

[adToAppearHere]

About the author

Leave a Reply

Your email address will not be published. Required fields are marked *

error: Content is protected !!