ISUAN SAL TANG MIN CHHUAHSAK LEH TA !

-Nghakpuii, 9774549554, 3892319642

“Riangvaite hnenah Chanchin Tha hril tura min ruat avangin, Lalpa Thlarau chu ka chungah a awm, Ani chuan salte hnena chhuahna thu leh, mitdelte hnena mitvar neih lehna thu sawi tur te, tihduhdah tuarte chhuahtirna tur te, Lalpa lungngawi kum thu sawi tur tein min tir a ni.” Luk. 4:18.

Saltangte hnena chhuahna thu sawi țhintu Pathian kan nei hi kan va vannei em ! Kan hnenah tisain awm tawh lo mahse, vawin thleng hian a Thlarauvin kan hnenah a awm reng avangin saltang min la chhuah sak reng a țhina, a lawmawmin a va ropui tak em!!

Țawngțai mamawh a lo leng : Kar hmasa ni 14. 9. 2018 Zirtawp ni khan tleirawl te hi zah hmel deuh hian kan inah a lo leng hlawl mai a ! Ka hmuh phat ațang khan țawngțai a duh a nih ka ring a. Ka rin ang ngei chuan țawngțai a lo duh hle mai a. Ka pasalin a țawngțai sak a. Pathian thu te a hrilh a, keiin Biak inah ka kal pui thung a.

Inzai mai rawh : A awmdan ti hian a sawi a : “Ka muhil thei miah lo va, ka chaw ei a tui lo hle mai a. Zan khat phei chu ka inzai țep a. Ka rilruah hian, ‘tumah ngaihsaktu i neih loh hi, in zai mai rawh’ tia min hrilhtu a awm a. Ka in zai hman țhelh a ni. In inah hian lo kal ka duh lutuk a, ka lo lut ngam lawk lo va, in kawtah hian rei tak ka din hnuah ka lo lut ngam chauh a ni,” tiin. Thingtlang ațanga in hlawh tura lo kal a lo ni a. A chhungte hnenah a haw ngam tawh mang si lo va, zu leh sex hman khawlohna avangin hrehawm takin a hun a lo hmang thin a lo ni a. A la naupang si a, ka khawngaih khawp mai!

A inhlana mahse a reh : Tichuan, Pathian Thute ka hrilh hnuah chuan, sual duh zawng ti miah tawh lo turin, Pathian hnena thupha chawia ngaihdam dilin a inhlan thar ta a. Chu mi hnu chuan, mut theih lohna chu Isua hminga chhuak turin thu kan pe char char a, chaw eitui lohna te, zungawl veina te, hurna te pawh chu Isua hminga chhuak turin ka aupui char char a, Thupuan bung 12 – 22 thlengin a riin ka chhiar tir a, an khuaa haw nghal nal nal turin ka ti a, ka hawntir ta a. A phone number te ka la a, a tukah chuan a muttheih leh theih loh thu han zawh ka tum a, ka phone thei ta miah lo va. “Sual kawng a zawh leh ta mai ang a, ka phone a la duh lo aniang a,” ti ten ka ngaihtuah a, an in luah ka hre bawk si lo va. Hma ka lo lakpuina kha a thlawn ang tih ka hlau hle, a chhan chu ka lo puihna lamah hian ka hah ve thin em a ! Ka hmalak puina kha, a taka a chhawr ngei theih nan ka tawngtai pui char char a.

Sal bettu lak ata a chhuak : Ninga lai aliam hnu chuan, ka phone kan en chuan, whatsapp-ah hian message-in a țhat zel thu leh an khuaah a haw nghal thu leh a phone a chhiat avanga chanchin a rawn sawi mai theih loh thu a rawn sawina ka han hmu chu ka va han lawm teh lul em ! Ka phone zui a, tui takin a mu a, chaw pawh tui takin a ei a ni tih a rawn sawi a, misual simte tan Isua hi a va tha em ! Pan man hi a awm tak zet a ni. Saltang chhuahtun saltang min chhuah sak leh ta ! LALPA CHU FAKIN AWM RAWH SE.

NB : He thu ziaktu hi pan duh tan a chung bera ph. No.-ah khian a biak theihin a pan theih reng e. Aizawl Bazarpui tlang lawk, Chhinga Veng ah a awm. Tuartu (sufferer) te hming, address leh veng thup tlat zel an ni e, vantlang hriatah kan puangzar thei lo; hetianga sawi hi a tawk kan ti a ni.

Leave a Reply

Your email address will not be published. Required fields are marked *

error: Content is protected !!