ISUA THLEMA AWM THU

-Lalṭanpuia Ngente

Mathaia 4:1-11

Chumi zawhah chuan Isua chu Diabola thlema awm turin thlalerah Thlarau hruai luhin a awm ta a. Tin, ni sawmli leh zan sawmli a nghei hnuin a ril a lo ṭam ta a. Tin, thlemtu chu a lo kal a, a hnenah, “Pathian Fapa i nih chuan heng lung hi chhanga chang turin thu pe rawh,” a ti a.

Lal Isuan vana min lawn san hnuah ringtute hian puih kan la ngai dawn chauh tih hi Pathianin a hre reng a, puih kan ngaihna zawng zawnga mi puih theih nan, ringtuin thlemna a tawh tur zawng zawnga hautak ber pal tlang hmasaa min hriat sak vek turin ni sawmli chaw ngheia ril ṭam tawpkhawka a awm hnuah, a tih theih reng, a tana harsa lo tak ni bawk si hmangin thlemna a tawk a. Isua thlemna tawh aia harsa hi mihring zingah tu mahin an tawk dawn reng reng lo.

Nimahsela, ani chuan, “ ‘Mihring hi chhang chauhvin an nung lo vang a, Pathian kaa thu tin chhuakin an nung zawk ang,’ tih ziak a ni,” tiin a chhang a.

Harsatna kan han tawh tak tak hi chuan Pathiana rinna nghah hi harsa kan ti ṭhin tirawh u…. Mihring zingah, ‘tunge ka pan ang, tunge ka belhbul ang, tunge min pui thei ang,’ tia dap ruai a awl hle mai. Mahse, Lal Isua chuan, ‘Pathian kaa thu tin chhuak hi kan tan hian innghahna atan a tawk zo a ni’ tih hi min hmuh tir a duh em em a ni.

Tlakchhamna tawpkhawkin min tlakbuak pawhin Pathian thlir tlat tur leh, chutianga Pathian nghak tlattute chu Pathianin a thlahthlam reng dawn lo tih hi min hmuhtir a duh a ni.

Chumi zawhah chuan Diabolan khaw thianghlimah chuan a hruai lut a, Pathian biak in chhip zumah chuan a dah a; tin, a hnenah, “Pathian Fapa i nih chuan tla thla rawh; ‘I chungthu-ah zawng a vantirhkohte chu thu a pe ang a, An kutin an dawm ang chia; Chuti lo chuan, i kein lung i chhuih hlauh dah ang e,’ tih ziak a ni si a,” a ti a. Isuan a hnenah,“ ‘Lalpa i Pathian fiah suh,’ tih ziak a ni ve bawk e,” a ti a.

Pathian thuah hian thleng sang hlea inhriat chin leh Pathian pawh duh duha chet tir theia inngaih chin a awm thei hle mai a. Kan Pathian erawh chuan a hming ropuina turah lo chuan chet mai a tum ngai si lo. Hetah hian thuhriltu ropui pawh mualpho a awl hle, sawi thui lo vang.

A pawimawh lai chu, ‘setana aw hrethiam tur leh dodal hrim hrim tura zirtirna’ hi a ni. ‘Tih ziak a ni’ tih kal sualpui hi zoram ngeiah pawh hian an tam tawh hle mai. Chuvangin, thlarau pawlna dawng hlea kan inhriat lai tak hi fimkhur ngaih hun lai tak a ni a, Pathian aw leh setana aw hre hrang thei turin hmanhmawh phut phut lova Pathian nghah nachang hriat a ngai hle a, rilrua lang ang ang zui mai chuan setana aw a lo inzep vat thei ṭhin. Bible chhiar leh ṭawngṭai tam a ngai hle a ni.

Tin, Diabola chuan tlang sang takah a hruai leh a, khawvel ram zawng zawng leh a ropuina chu a entir a. Tin, a hnenah, “Bawkkhupin chibai mi buk la, heng zawng zawng hi ka pe vek ang che,” a ti a. Chu veleh Isuan a hnenah, “Setan, kal bo daih rawh! ‘Lalpa i Pathian chibai buk la, ama rawng chauh bawl rawh,’ tih ziak a ni,” a ti a.

Lal Isua mihringa a lo chan chhan leh lei hrehawma a lo kal chhan ber chu, ‘sual bawia tangte chhan chhuak turin’ a ni a. Chu a lo kal chhan ber chu setana chuan a hmaah a chhawp sak ta rup mai, vawi khat chauh chibai bukin a ta a ni thei ta vek mai. Hrehawm nasa tak tuara kraws-a thih ngai lovin a duh ber chu a nei thei ta. Mihring tan chuan do zawh a har dawn mang e.

Mahse, Lal Isua chuan setana hmaa kun chu vawikhat chauh pawh ni se a bawiha intukluhna a ni tih a hre em em si a, bumin a awm duh lo, hei hi a ni keini pawhin kan hriat reng tura min hnutchhiah chu.

Setana thlemnaa vawikhat tawlhthluk hi a pawi thui thei teh ania. ‘Tem hlekin tem hluk a hring’ tih angin, vawi khat tih chhin te, vawi khat dai pelhte hian ṭhenkhat nunah chuan dam chhung te, kumkhaw chawr lohna te a thlen thei zuk nia. Fimkhur a va ngai em.!

Lal Isuan a chhânna hi kan tan hian a va han pawimawh em, a hun taka kan hman ve theih nan sawi chhin fo ila, sawi nawn sawi nawn ang u. “Setan, kal bo daih rawh! ‘Lalpa i Pathian chibai buk la, ama rawng chauh bawl rawh,’ tih ziak a ni,” tih thu hi. Tichuan, thlemna kan tawh hunin, a hun takah tîm miah lovin hetiang hian kan chhâng ve thei dawn nia.

Kan hmaah hian thlemna a awm fo dawn a, ṭhenkhat chu tawrh har takte a ni ang. Amaherawhchu, Lal Isuan a lo pal tlang tawh aia harsa reng reng thlemna kan chungah a thleng dawn lo tih kha kan hre reng dawn nia.

Tin, a pawimawh lai ber chu, Lal Isua thlema a awm dawn khan ‘thlalerah Thlarau hruai luhin a awm’ tih a ni a. Thlarau hruaina hi kan tan hian a pawimawh hmasa em em a, a tel lo chuan kan mihring mihrinna hian setana hi a hneh thei ngai dawn lo a ni. Lalpa thlarau hruai leh chen chilh hi kan ngai takmeuh a, chu chen chilhna chang tur chuan eng kawng nge kan zawh ang le.?

Efesi 6:13-18 “Chuvangin, ni ṭha lovah chuan in do zawhna tur leh, in tih zawh vek hnu pawha in din theihna turin, Pathian ralthuam famkim chu la rawh u. Chutichuan, in kâwng chu thutaka hrengin, felna awmphaw chu hain, remna Chanchin Ṭha inbuatsaihna chu in keah bunin ding rawh u; chung lo pawh chu rinna phaw la ula, chu chuan mi sual thal alh thei zawng zawng chu in timit thei ang. Tin, Chhandamna lukhum leh Thlarau ngunhnam (Pathian Thu chu) la ula, ṭawngṭaina leh dilna tinrengin eng hun pawha Thlarauva ṭawngṭaiin, chumi kawngah chuan mi thianghlim zawng zawng tan ṭhahnemngai tak leh dil tlatin ngaihven rawh u.

Pathian thu ngainain i kâ aṭangin chhuak fo sela, ṭawngṭaiin Lalpa pawl fo rawh. Tin, ringtute tana kan himna ‘Kulh Bing’ kohhran hi thlahthlam ngai suh ang che. Tichuan, engtikah mah i tlu lo vang.

Lalpan a thlarauin thuam che u sela, malsawm che u rawh se, Amen.

Leave a Reply

Your email address will not be published. Required fields are marked *

error: Content is protected !!