-Biakhmingthanga Chhangte

Isua thawhleh Ni (Easter Sunday) hi khawvel ram hrang hranga Kristian awmnaah tawh chuan an ngai pawimawh hle a. He ni hi Kristian ten ni pawimawh atana an hman hma pawhin hman lai ațangin ni pawimawh a lo ni tawh a. Ram țhenkhatah hetih hun (World Temperature Zone) hi pangpar vul țan, thinghnah chawr no hun leh hnim hring chawr hun a ni a. Thing hnah ro a tla a, hnah thar hring mawi tak chhuah leh hun a ni bawk. He hun hi sakhaw lama hun pawimawh a nih bakah khaw vawt a liam a, Nipui a thleng țan a, ram vawt taka chengte tan phei chuan hun hlimawm a inher lai a ni.

Easter awmzia : Sapțawnga “Easter” tih țawng bul chu “Eastre’ tih a ni a. Anglo-Saxon țawng a ni a; pathiannu (goddess) sawina a ni. He pathiannu hi khawvela “eng” (light) petu pathian a ni a. Mi țhenkhatin Easter tih chu Ishtar ațanga lo kal a ni e, an ti leh zel a. “Ishtar” chu Babulon mite leh Asuria miten lei tithatu leh hmangaihna pathiannu an tih ațanga lo kal a ni a. Phoiniki mite erawh chuan “Astarte” leh “Baal” koh nan an hmang a. Baal chu Israel miten Jehova biak bansana, an tluk luhna pathian kha a ni. Astarte chu Europe ramah a darh zau zel a, a tawpah “Ostar” tih a lo ni ta a. Sapțawng hlunah chuan “Easter” tih a lo ni a, Easter – chuan “Ostara” tho a kawk a, Ostara tih chu lei tițhatu pathiannu sawina a ni.

Grik pathiannu Eostor : Easter tih hi Grik Nipui pathiannu ațanga lak nia sawi a ni bawk. Grik te chuan ni eng lum nuam tak petu an pathiannu hnena lawmthu sawi nan nipui khaw nawm lai takin inthawina hlanin an serh țhin a ni.

Easter tih hman zui a n : Kum zabi pahnihna AD khan Kristian Missionsry-te chuan Europe hmar lam ramah Chanchin Țha an hril a. Teutonic-ten nipui hun an lawm țhin nen Isua khenbeh thu hril chu a innang a. He nipui hun an lawmnaah hian “thihna hneha nunna neih thu” an lo tlangaupui ta a. Hun lo kal zelah Isua a thi a, a thawhlehna hming atan “Easter” an hmang zui ta a ni. Kohhran hmasa te chuan Easter chu Isua Krista thawhlehna hun atan serhin a hming chu an hmang zui ta zel a ni.

A hun leh ni : Kristian hmasa te chuan Easter hi Hebrai Calender- Nisan thla ni 14-naah an hmang țhin. Good Friday leh Easter hi Krismas angin a ni mumal taka bithliah a ni lo va, chuvangin hun hmasa lamah phei chu Easter ni hi a dang nuaih a. Pathianni-a hmang an awm laiin Thawhțan leh Thawhleh bakah Nilainia hmangte pawh an awm țhin a ni. A ni hrim hrim a inan tak loh nuaih avang chuan World Council of Churches inkhawmpui AD 326-a Nicaea khawmpuia neihah Kohhran hruaitu (Bishop) 318 kalkhawm te chuan Easter chu Pathianniah hman ni tawh se tiin lungrual takin an rel a. An thu chhuak ang chuan vawiin thlengin Pathianniah hman a ni ta zel a ni. Kum 1997 khan Syria rama Aleppo khawpuia World Council of Churches inhmuh khawmnaah Krismas ang bawka Easter ni bik ruat chungchang ngaihtuah a ni a, mahse thutlukna mumal tak siam a ni ta lo a ni. Easter hi lei pumpuia chhun leh zan a inchen lai (Vernal equinok) March 22 ațanga April 25 inkar, thla bial zana Pathianni hmasa berah hman a ni tlang pui a.

Easter hman dan : Easter hma chiaha Inrinni hi Holy Satarday an vuah a, Inrinni zan inkhawm pawh “Easter Vigil” an ti kher țhin. Easter hi Kristianten urhsun taka kan serh laiin Kristian lote pawhin hunpui pakhata ngaiin an hmang ve tho țhin. Khawvel hmun dangah chuan Easter Card hmangin Krismas leh Kumthar ang bawkin țhen leh rual, chhung leh khat te hnenah duhsakna thu an inthawn țhin a ni. Easter pual liau liauvin thilthlum ațanga siam hmawmsawm (confectionary) Chocolate Easter Eggs, marshmallow bunnies, peeps leh Jelly beans te an uarin chutiang ang chu dawr tinah lei tur an hung thluah țhin. Easter-in a ken tel langsar tak chu pangpar chikhat White Lily, “Easter Lily” tia lar zawk mah hi a ni. Easter Lily hian Isua Krista thlan ațanga a thawhlehna entirnaa ngaih a nih avangin Easter Sunday-ah chuan mimal leh Biak Inah Easter Lily khawi an uar hle. Artui hi lawmna leh chawimawina entirnaa an ngaih avangin Easter-ah hian an dek lar hle a ni. Pacific thliarkarah khuan Easter Island a awm a, kum 1722-ah Easter Sunday ni taka Dutch Admiral Jakob Roggeveen-a hmuh chhuah a nih avangin Easter Island hming an puttir ta a ni.

Leave a Reply

Your email address will not be published. Required fields are marked *

error: Content is protected !!