Isua neih ka duh zawk thildang zawng aiin – Biakhmingthanga Chhangte

ISUA NEIH KA DUH ZAWK
Thil dang zawng aiin

“Keia tan zawng nun hi Krista a ni si a, thih pawh hlawkna a ni,” Phil. 1 : 21.

Kristian Hla Bu No. 261-na “Isua neih ka duh zawk” tih hla hi R. F. Miller-i phuah a ni a. A nun ropui zia a hla thu ațang hian a lang chiang ngawt mai. Kan nunah hian Lal Isuan eng ang takin hmun chang ve hlawm tak maw? Mite nuna Isuan hmun a chan thuk dan te, Isua tana an nun an pek dan ropuizia te Upa Dr. P.C. Biaksiama’n thiam taka a sawi hi kan nun inbih pahin i han thlir ve teh ang u.

“A kut thir khen mi hruaina ka thlang zawk e” : Kum 700 vel liam taah khan Europe rama Assissi khuaa mi Francis-a chuan Lal Isua a Lal leh Chhandamtua a neih tak avangin an ram zau tak leh an in ropui tak chu kalsanin Krista rawng bawl turin a kawr hak lai chiah chhuahpui a. Mi rethei tana a inpek zawhzia leh a rawngbawlna tlawm tak mai chuan mi rilru a hneh em em a. A thusawi ngaithla turin ramsa te leh sava te pawh a bulah an lo kal khawm țhin a. Vawi khat chu kawng sirah hian phar tenawm tak, rilțama thi lek lek hi a lo awm a. Ani chuan ten ahnehin a khawngaih ta em em mai a, a ira chuktuahin a fawp ngawih ngawih mai a. A bul vel khuaa mite hnenah tunge a nih tih a han zawh kual chuan chutiang phar a awm tih hria reng reng an lo awm lo mai a, a hriat lohvin Lal Isua a lo tawk reng mai a lo ni a!! Lal Isua kutin a hruai dan chu a ngaihtuahin mak a ti hle a ni.

“Ram zau taka Lalber ni mah ila sual thunun ka nih si chuan” : Khawvel History kan chhiar chuan lal ropui leh ram zau taka lalber te kha an duh ang tawk pawh hmu zo lovin an boral zel mai. Alexander Ropuia pawh kha khawvel lal ropui leh thiltithei, sipai hotu huaisen hmingthang ber a ni na a, ama hote ngeiin an vau zãm a; khawvel pumpui laka hneh a tum chu a hlen chhuak zo ta lo va, Lunghnur takin an ram lamah a haw leh ta a. A haw kawngah chuan kum 33 mi lek niin khawsikin a thi ta mai a. Ama chanchin chhut leh zirmite chuan a khawvel nun hman danin a zir ngang lo niin an hria. Pathian tel lo va ram zau taka roreltu lalber ni mahse sual thunun a nih si avangin a lalberna chuan a daih rei lo va, a hlawhtling thei lo a ni.

“Thil dang zawng aiin, khawvel zawng ai pawhin” :

Sikh hnam atanga lo piang chhuak Sadhu Sander Singh-a tluka Krista thlangtu ropui mi dang sawi tur an vang ngawt mai. Ani tana Isua han thlan kha a van hautak tehlul em!! Atana Isua Lal leh Chhandamtua pawma zui kha chhungte tuithlarna, țhiante hmuhsitna, in leh lo chânna leh lunghahna tur nei lo va vahvaihna a ni chiang khawp mai. Krista a Lal leh Chhandamtua a pawmna chu phatsana, an chhungkuaa lo kir leh turin a nu leh pa, u leh nau, a țhiante, a bialnu hmelțha em em leh an sum leh pai, neih ro sum tinrengin vawi tam an thlem țhin a, mahse ani erawh chuan, “Isua neih ka duh zawk, thil dang zawng aiin, khawvel zawng ai pawhin” a titlang ngam a ni. A hak lai chauh nen an in ropui tak chu chhuahsanin a Lalpa, Isua Krista tan a vakvai ta a ni.

“Chawimawina aiin, rinawma Amah țan tlat fo ka duh zawk” : Kristian Martar zinga a hmasa pawl leh lung tileng em em Smurna khaw Bishop ni tura Hmangaih Johana ngeiin a ruat Mithianghlim Policarp-a, a Lalpa Isua Krista tana a rinawmzia kha ringtute tan entawntlak a va ni tehlul em!! Rom Lalber Kaisaran Kristiante a tiduhdah a, mi tam tak Krawsah a khenbeh bakah mi tam tak a halhlum zawih zawih pawha rinawm leh huaisen taka a Lalpa Isua tana rawngbawltu a ni a. Rom sipaiten an man ta a, ennawm chhuahna hmunah halhlum turin an hruai a, a upat tawh avang leh mi nungchang țha, zahawm, tuma pawisawi lo a nih avangin roreltu pawhin a hum duh a. “I upat tawh em hi, Isua hi phat mai la, tichuan thlamuang takin i awm dawn nia,” tiin a thlem a. Mahse Policarp-a chuan, “Kum sawmriat leh kum ruk chhung A rawng ka lo bawl tawh a, englai mahin min la tițha lo ngai lo va, engtin nge ka Lalpa leh Chhandamtu chu ka phatsan theih teh lul ang?” tiin a hnial fithla țhuai mai a, a Lalpa Isua tan a martar ta a ni.

Hmingthanna aiin, A hming thianghlim tak chu chawi ka nuam zawk e” : Khawvel zaithiam hmingthang, țhalaiten an ngaihsan em em, Cliff Rechards-a kha a hun lai chuan a ropuiin a zaithiamna chuan khawvel a deng chhuak a, a lar vet vet hle. Sum a ngaha, khawvel nawmchenna lipui a liluh a; a duh duh a nei thei, mahse a nun a ruak tlat a; thlamuanna a nei lo. A tawpah Lal Isua hnenah a tlu lut ta a, simin Isua chu a Lal leh Chhandamtuah a pawm a; a piangthar ta. Khawvel hla a sak a rem ta lo, a Chhandamtu duhzawnga a nun a ngai ta. Khawvel hla saa au vak vak chu Krista Chanchin Țha nen inmawi theiin a hre ta ngang lo va, amah ngaisangtute ngaihdan pawh la miah lovin “Isua neih ka duh zawk, hmingthanna aiin; A hming thianghlim tak chu chawi ka nuam zawk e,” a ti ta zawk a ni. Keini anga a changa khawvel hla sa a, a changa Pathian hla sa chawhpawlh nun a ni lo. Kan entawn a va tul tak em.

“Lili par mawi ber aiin a mawi zawk e” : Hun laihawl (Middle Age) lai vel khan Tibet Lal ropui tak chuan fanu hmelțha tak a nei a. A fanu chu an hnam dan anga pasal neih a lo hun chuan a duh ber a thlan chhuah theih nan Lalpa chuan a ram chhunga milian fapa tlangval hmelțha deuh deuh chu a chah khawm vek a. A pasal thlan ni chu a lo thleng ta a, thawmhnaw nalh leh manto ber ber inbelin tlangvalho awmnaah chuan a kal kual ta a.

“Tu tak thlang ang maw?” tiin nghakhlel takin an thlir țhup a, mahse thlan tur hre lo chuan a kal kual a kal kual ta mai a. A tawpah chuan a pa hnenah, “Hengte ai chuan Isua ka hmangaih zawk,” a ti ta hlawl mai a. A pa thinrim leh zak lutuk chuan an hnam dana hrem dan rapthlak ber thirlinga dephlum nghal turin thu a pe ta rum rum mai a. Mahse nula chuan zamna chhete pawh nei lovin hlim hmel a pu reng zawk a. Thirling vam sen huama an han deh lai chuan a hmel chu Angel ang mai hian a eng phet mai a. Chu thlamuanna hmel duhawm tak mai a han hmuh chuan Lalpa chuan a tisual let der a ni tih a hrechhuak leh ta si a. A fanu nunna chhanhim tuma a han thawh chhuah meuh chuan a lo tlai lutuk tawh a. A inchhirin ban a chen ta!! Amaherawhchu a fanu hmanga Pathian kohna chu chhangin, amah ngei pawhin Lili pawmawi Lal Isua chu ringin a nei ve ta a ni. I bialnu/bialpa nge i thlan dawn Lal Isua?

“Lal Isua ka duh ber min hruaitu atan” : Kum 1965-ah Miss America thlannaah khan nula hmel țha em em mai, Arizona State University zirlai Vonda Kay Van Dyke-i a tel ve a. Kristian te tana chutianga han tel ve te chu tih âwm loh tak niin a lang a, mahse tum dan chi dang a lo nei ru khiau va. TV ațanga amah lo thlirtu mipui maktaduai tam tak te hmaa Krista Chanchin a sawi theihna hun remchang dilin a rilruin a țawngțai reng a. A hun a lo thleng ta, mipui hmaa interview-naah chuan zawhna chhan huphurhawm tak mai chu a tawk ta ngei a. Endiktu pakhat chuan, “Bible hi i keng deuh reng thinin ka hria a, vanneihna tura i zawlaidi em ni?” tiin a zawt ta chat mai a. Dyke-i chuan, E, ni lo ve, ka Bible hi vanneihna thilah ka ngai lo va, ka thil neih hlu ber a ni a; Pathian nena kan inlaichinna hi sakhuana thil mai a ni lo. Amah chu ka ring a, Amahah chuan ka innghat tlat a; zaninah ngei pawh hian Ama duhzawng tiha a awm theih nan ka țawngțai asin!!” tiin a chhang a. Nula Van Dyke-i chuan Khawvel mipui maktaduai tam tak hmaah “Lal Isua ka duh ber, min hruaitu atan,” tih hi a takin a lo nunpui reng a ni. Keini hi engnge kan an ve le?

Keini chhiartute hi inen ve ila, piangthar nih hi chu kan duh hlawm maw le; Lal Isua pawh min chhandamtu atan chuan neih kan hnial lo, mahse kan thinlunga hotu leh roreltu atan hian kan hnawlin khawvel parmawina kan thlang leh mai țhin niin a lang. Isua aia piantharna hlimpui zawk kan ang lo maw? I inenfiah țheuh ang u. “Lal Isua ka duh ber, min hruaitu atan,” i ti thei țheuh ang u.

Leave a Reply

Your email address will not be published. Required fields are marked *

error: Content is protected !!