Isua Kraws mak tak chungah khan –  K. Zalawma

-Upa K. Zalawma

Isua kraws mak takchungah khân,
Ropuina Lal thi ka hmuhin,
Ka hlâwkna ber ka ngainĕp a,
Chapo, uanna ka ngaitlâwm a.

He hla phuahtu Isaac Watts-a (1674-1748) hi Southamton khuaah July ni 17,1674 khân a piang a, a pa hming pawh hi Isaac Watts (Sr) tho a ni. Isaac Watts-a hi unau pakaw zinga upa ber a ni. Sakhuana la run tak chhungkua an ni a; a naupàn tĕt aṭanga mi danglam tak a ni.

Kum nga mi chauh a nihin Latin a zir a, kum kaw mi a nihin Grik ṭawng an zirtir leh a, kum sawm leh pakhat a nihin French ṭawng a zir leh a, kum sawm leh pathum mi a nihin Hebrai ṭawng a zir leh a ni. Kum 28 mi a nihin London-a. Mark Lance Chapel Pastor a ni.

Hla tam tak a phuah a, hetih hun lai hian Biak inah hla nĕm leh dul lam an sa a, mi tiphur thei leh hla tho deuh an sa ngai lo a ni.

Ṭum khat chu a pain, “Bawiha, Kohhrante ti phûr tur hi eng emaw i pek a ngai a ni,” a tih chu vawng rengin kum hnih chhung chu chawlhni tinin hla thar a phuah a ni.

A hla phuah, “Isua kraws mak tak chungah khân,” tih te, “Khawvel lawm nân a lo kal a,” tih te hi chu khawvela ringtute hi chuan kan sa bâng dâwn lo a ni.

A pa hi sipai huaisen tak a ni awm e. Amaherawhchu mite’n ‘a pa ngûnhnâm aiin Isaac Watts-a kawlawmin mi a hneh tam zawk e,’ an ti ṭhin.

Isaac Watts-a hi November ni 25, 1748 khân kum 74 mi niin a thi. A hla phuah Kristian Hla Bua mite hi Kohhranten tun thlenga Pathian kan pawlna langsar te an la ni a, chûngte chu –

1. Kan Pathian kan Puipa pangngai
2. Khawvĕl lâwm nân a lo kal a
3. Juda maichâm chûnga
4. Isua kraws mak tak chungah khân
5. Ka Lal duhawm ka zahpui lo’ng
6. Ka sual atân ka Tlantuin
7. Khawiah pawh ni chhuahna apiangah
8. Lalpa hmangihtuten in lawm hla rawn sa r’u

Isaac Watts-a hi inserh thianghlim leh khermei pawl (Puritan) an tih zinga mi a ni. He hla thlûk ‘Rockingham’ hi Edward Miller-a (1735-1807) siam a ni a. A thlûk dang ‘Humburg’ hi Dr. Lowell Mason-a siam a ni thung.
Mizo ṭawnga letlingtu chu Rev. D.E. Jones-a a ni.

Isaac Watts-a hian Isua kraws mak tak kha a hmu chiang a, chu aia ropui zawk chu, kraws mak tak chunga ‘Ropuina Lal’ thi kha a hmu chiang em em hi a ni.

Kraws tih ṭawngkam hi engtianga lo piang chhuak nge? Isua an khenbehna sawi nan Greek ṭawng ‘stauros’ hman a ni a. Chu chu a khamphei awm ve lo, hmânlaia misual an hal hlum tur phuar behna thing (stake) hming a ni.

Kraws kan tih hi Latin ṭawng, ‘Crux’ aṭanga lak a ni. Crux hi chuan thing ding ringawt ni lovin, kawkalh a keng tel. Latin ṭawnga crux chu Old English-ah cros an ti a. Old Norse (Norwrgian ṭawng)-ah erawh chuan ‘cross’ tiin ‘s’ pahnih a awm a. Chuta ṭang chuan tunlaia English-a ‘cross’ tih hi a lo chhuak a, keini pawhin ‘kraws’ kan lo ti ve ta zel a ni (Zoṭawng Bible Dictionary phek 700, Revd Chuauṭhuama).

Kraws hi mi tam takin sawi fiah kan tum ṭhin. Isaac Watts-a erawh hi chuan kraws chunga thi kha Ropuina Lal a ni tih a han hmuh chiah chuan, a hlâwkna ber leh chapona te, uanna te kha hnâwmhnéah a ngai ta zawk a ni. Chuvangin –
“Pathian, Krista thihna lo chu,
Thil dang engmah ka chhuang tawh lo’ng;
Ka ngaihhlut thil tinrĕng pawh hi,
Ama rawngbâwl nân ka pe ang,” a ti ta thlâwt mai a ni.
Kraws-a kan aiawha thi Lal Isua kha Pathian ngei a ni tih a puang ngam a ni.

 

Kraws hi chiang fĕt fĕtin sawifiah ṭhin mah ila, kan ngaihhlut thil dang kan la buaipui chhûng chuan, kan la hmu fuh tak tak lo tihna a ni ang.

A changthumna thu hi ngaih fuh loh awl tak a ni awm e. Isaac Watts-a hi chuan, Isua kut leh ke, a lûahte hliam a hmu a, lungngaih leh hmangaih luang hmun/luang kawp-ah chuan, hlîngte hian lukhum an lo lo siam (compose) ngai rĕng em ni? tiin zawhna a siam ta tawp mai a ni.
(See! from His head, His hands, His feet,
Sorrow and love flow mingled down !
Did e’er such love and sorrow meet,
Or thorns compose so rich a crown ?)

Isaac Watts-a hian Isua kraws a han bih chian (survey) tak tak chuan, Pathian Fapa meuh amah avanga, ânchhedawng thinga inkhai a han hmu a, amah lamah chhuan tur a awm lo a ni tih inhre chiangin –

Engkim mai hi ka ta ni se,
Pathian pĕkah (pĕk atân) a tâwk lo va;
Chuti-ang hmangaih nasa chuan,
Thlarau, nunna, engkim a duh (demands)… a ti ta hlawl mai a ni.

Tirkoh Pawla pawhin, “Kei erawh chuan kan Lalpa Isua Krista kraws lo chu ka chhuan loh turzia mai chu, chumi azarah chuan khawvel hi ka tân khenbehin a awm ta, kei pawh khawvel tân khenbehin ka awm a ni,” (Gal 6:14) a lo ti daih tawh a ni.

Krawsa khenbehte chuan an duh zawng engmah an ti thei lo ang hian, kan sual avanga engmah tithei lova khenbeha thi ta Lal Isua duh angin, ni tin mahni inkhengbetin (mahni kraws pua Isua zuiin), kan zui tur Lal Isua duh zawng ti turin kan hlâwkna ber leh chapo uannate i ngaitlawm ve zawk ang u. Pathian hmangaihna chuan kan thlarau leh kan nunna, kan neih zawng zawng hi a duh si a.

(Were the whole realm of nature mine,
That were an offering far too small;
Love so amazing, so Devine,
Demands my soul, my life, my all.)

Leave a Reply

Your email address will not be published. Required fields are marked *

error: Content is protected !!