Isua hmusittu zaithiam hmingthang John Lennon-a thih dan

-Biakhmingthanga Chhangte

A hun hmasa lam : Mi pangngai chuan John Lennon- a hi kan hre fur awm e. He British Musician hi a hming dik tak chu John Winston Lennon a ni a, Official -ah erawh chuan John Winston Ono Lennon tia ziak a ni. Khawvel Indopui vanglai kum 1940, October ni 9 khan Maternity Hospital, Liverpool-ah a lo piang a. A nu leh pate chu Julia Stanley leh Alfred Lennon te an ni. A hming hi a pu John “Jact” Lennon leh British Prime Minister rothap Winston Churchill-a hming lak kawp ațanga phuah a ni. Biritain-a kohhran lar tak Anglican Kohhran atanga lo sei lian a ni.

John Lennon thlalak
Credit : John Lennon fb page

Naupan lai leh zirna lam : A pa hi sangha mantu a ni a, a nu leh pa an ințhen a, a Patea hnenah a awm ta a ni. Dovedale Primary -ah zirna bul a țan a, Quarry Bank High School ah a lut leh a. Lem ziah lamah a tui hle. Kum 14 a nihin pa anga a en a Patean a boralsan a, nu leh pa kara sei lian lo chu a khawhar thei em em a, chuvang chuan a nungchang a danglam hle. Mi hnuaihnung te țhianah a kawm țhin a! Zirna kawngah chuan ” beiseibo, hlawhchham lailet der, naupang dangte tibuaitu,” tia hriat a ni. An exam result a han chhuak a, sybject zawng zawngah a failed vek a ni. Liverpool College of Art-ah inziak lut lehin a incheina leh nungchang țhat loh avangin hnawhchhuah a ni leh a. ‘Life Drawing’ a exam a, exam Hall-ah a zirlai pui Cynthia Powell (a nupui ni zui ta) chuan a pui ngial nain a pass chuang lo a ni.

Zai lamah a lut ta : Kum 1960-ah Lead Guitarist- George Harrison, Bassist-Stuart Sutcliffe leh Drummer- Pete Best, Rhymn- McCartney, Vocals-John Lennon te chuan Band Ropui Beatles an din ta a.

Beatles Thlipui a tleh : Reilote chhungin Beatles ngaihsanna thlipui “Beatlemannia” tlehin “The Fab Four” tiin hming lem an phuah sak a. An Album hrang hrang te chuan khawvel hmun hrang hrang Music Chart-ah a rualin No. 1 a kai a. Kum 1965-ah British mi hmingțhate chawimawina sang “Members of the Order of the British Empire” (MBE) chu England Lalnuin a hlan hial a. Britih mite ropui theih lohna hmun USA-ah ringawt pawh an Album hi copy maktaduai 177 zet an hralh a. Khawvel pumpuiah phei chuan copy maktaduai 600 zet an hralh. Grammy Award pawh 10 ngawt an dawng a, a tawi zawngin Band-in ropuina leh chawimawina zawng zawng an dawng vek a ni ber. An ropuina chuan ram leh ram indaidanna bangin a dal ve lo va, an rah chin apiang chu an ram a ni mai. Heti taka an lara, sum tam tak hui luta khawvel an chhuk thlir mek lai hian an band member te inkarah buaina neuh neuh a awm avangin Lennon hian Beatles chu 1969 khan a chhuahsan ta a ni.

Isua aiin kan lâr zawk : Ropuina leh hmingthannain a tuam nasat zual lai 1966 March ni 4-ah Journalist Maureen Cleave chuan Beatles member te chu a kawm a. Chumi țum chuan John Lennon -a chuan chapo takin, “Kristianna hi chuaiin a ral ang a, her liamin a bo hlen ang. Inhnial buai vak pawh ngai lovin ka thu sawi dikzia hi hunin a la rawn hril mai ang. Tunah hian Isua aiin kan lâr zawk; Isua nge rok ‘n’ roll ral hmasa dawn ka hre lo. Isua hi a țha, mahse a zuitute hi an cher chhiain an satliah a; an chingchivet nuaih a, ka hrethiam teh nek lo ve,” a ti a. He thu hi London Evening Standard chuan a tichhuakin inkhawm zat tlak hniam mekna ram UK- ah chuan sawisel pawh an awm lem lo.

Buaina a chhuak ta : He chanchinbu chhuah atanga thla nga hnuah America Thalai Chanchinbu ‘Datebook’ megazine chuan an chanchinbu phek hmaah rawn tar chhuak ve lehin thawk lehkhatah boruak a so sang ta thut mai. US hmun hrang hrangah Beatles Album leh an hming leh thlalak chuanna thil hrang hrang hal a ni a, radio ațanga an hla tihchhuah pawh khap nghal a ni. Buaina punlun zelin Mexico, Spain, Vatican leh South Africa thlengin a kangkai a. Press Conference țum hnih kovin sawifiah ngial mah se mipui thinrim a reh thei lo. Venhimna khauh tak hnuaiah Concert neih ni mah se thaha vauna an dawng nual a, an zai laiin huapuaha vawm te an tawk ta bawk nen, an tour chu chhunzawm hleih theih pawh a ni ta lo.

*A la sawi duh tawk lo :*Hei mai hi a ni lo va; May 18. 1968-ah a țhiante bulah ‘Isua Krista; lo piang nawna rawn kir leh ta’ a nih thu Apple Corps-a puanzar puiah a sawm a. 1969 kuma an Concert dawn țumin “Beatles hian Isua aiin țhalaite hneh theihna kan ngah zawk,” a la ti ta cheu va. Isua aia an lar zawk thu a sawi ațanga kum 4 hnu 1970 kuma a hla tihchhuah “God” tih hlaah chuan ‘Isua leh Bible a rin loh thu’ a la au chhuahpui leh ta zel a ni.

Thihna hlim kawr ruam : A țawng thlahdah avanga hawtu an pung zel a, heng zingah hian kum 25 mi, Security Guard hnathawk Mark David Chapman, Honalulu, Hawaii lam chhuak a tel a. October 1980-ah “Isua aiin kan lâr zawk” tih avang leh a hla “God” leh “Imagine” avanga Lennon-a hotua inlet ta chuan kahhlum tumin New York a thleng tawh a. A thah tum chu a hmu fuh ta ngei a. Mahse hemi țum hian a rilru thlak lehin Lennon-a chu biain a autograph a sign tir hnuah inah a haw leh ta a. Hemi țuma an inbekbawr lai hi Paul Gooresh-a chuan a thla a lo la nghe nghe a ni. 1980, December 8 zan dar 10 : 50 velah Lennon-a te nupa Record Plan Studio, Dakota ațanga an lo chhuak chu anmahni ngaisanga Autograph sign tir tumtu mi engemaw zatin an lo hmuak leh a. An zingah hian Chapman pawh a rawn tel leh. Lennon-a chuan a hma thla lawka a hmuh leh biak tawh a nih vangin amah thah tumtu a ni ang tih rin ngaihna hre lovin a kal pel ve mai a. Chutia ngaih țha taka a awm lai chuan Chapman-a chuan a silai Charter Arms .38 Special Revolver chuan “Mr. Lennon” tih pahin Lennon-a hnung lam ațangin vawi 5 ngawt a kap a. A hmasa ber hian țhelh mahse a dang mu li chuan a hnungzang veilamah a fuh a. “Min kap a nia, Min kap a nia,” tiin Lennon-a chu a tlu a. Silaimu luhna leh a ka ațangin thisen a chhuak nguai nguai a. St. Luke’s Roosvelt Hospital-ah rang taka dah luh ni mah se zan dar 11 : 15 a lo rik chuan a lunga thisen zam a chhiat nasat em avangin mihring thiamna hmanga han chhan zawh rual a ni ta lo. An Band aia lar lo zawk leh mi hneh thei lo zawk, A thu inziahna Bible leh Amah a rin loh thu a auchhuahpui țhin Isua Krista hmaa a thiamthu sawi turin a thlarau a thlah ta a ni.

An kah hlum laia a tarmit bun
photo credit: Yoko Ono

“Pathian chu hmuhsitzia a ni lo ve; miin a theh apiang, chu mi vek chu a seng bawk dawn si a. Mahni tisa lama thehtu chuan tisa ami chhiatna a seng ang a ..” Gal. 6 : 7,8.

Leave a Reply

Your email address will not be published. Required fields are marked *

error: Content is protected !!