ISUA HMUH KA DUH E

-Rev Jonathan Pachuau-

1.“A retheih tehreng nen, a thawhchhuah ang ang chuan a la rui ve leh nghal a,” i ti em ni? A retheihna theihnghilhna tur zawngin a vak vel a, “Ka pu, ENGKIM NEITU ISUA hmuh ka duh e” a ti a nih kha.

2.“He pa/nu hi engmah ni si lo a chapo ve em em ringawt a,” tiin i lo ei lo viau thin em? A chak lohna a thup bo theihna tur a zawng a, “Ka pu, CHAKNA PETU ISUA hmuh ka duh e” a ti a nih kha.

3.“A ruih tawh hi chuan khawlaiah a au vak vak a, in chhungah buaina a siam ziah lehnghal” tiin i lo sawi thin em? A nun ipik leh chep lutuk tih thawlna a zawng a,“Ka pu, ENGTHAWLNA ISUA hmuh ka duh e” a ti a nih kha.

4.“A hmelchhiat ve tehreng nen a ler hrep lehnghal,” tiin i lo thlir thin em? Hmangaih leh Ngaihsaka kuangkuahtu zawng in a vak vel a, “Ka pu, HMANGAIHTU ISUA hmuh ka duh e,” a ti a nih kha.

5.“Engmah vei a nei lo, ho têah pawh a nui vak vak zel mai,” tiin i lo ngei thin em? A nun khan huaisenna a mamawh a, hnehtu nih tumin a vak vel a, “Ka pu, HNEHTU ISUA hmuh ka duh e” a ti a nih kha.

6.“Sum a hmuhna turah hi chuan zah reng reng a hre lo” tiin i lo haw deuh thin em? A nun khan thlamuanna a nih beiseiin sum a zawng a, “Ka pu, THLAMUANTU ISUA hmuh ka duh e” a ti a nih kha.

7.Isua neitute u… khawvel hian i thil neih ISUA kha hmuh a duh e.. I hmuh tir dawn lawm ni?

“In êng chu mi mit hmuhin eng rawh se, chutichuan in thil tih țhatte an hmu ang a, in Pa vana mi an chawimawi thei ang,” Matt. 5 : 16.

“Mi khawngaih thei tak te chu an eng a thawl e, khangaih an la hlawh dawn si a,” Matt. 5 : 7.

“Chhuak la, lamlianah te, daiah te kal la,ka in a khah theih nan mi han thlem lut hram rawh,” Lk. 14: 23.

Leave a Reply

Your email address will not be published. Required fields are marked *

error: Content is protected !!