Israel leh Arab indo, niruk indo – Theipui kung a chawr no (buk zel) chhunzawmna

-Biakhmingthanga Chhangte

“Tichuan, theipui kungah hian a tehkhin thu zir rawh u : A ṭang a lo no va, a hnah a lo chawr chuan nipui a thaw dawn tih in hre ṭhin; chutiang bawkin nangni pawhin chung chu a lo thleng tih in hmuh hun chuan amah chu a lo hnai tawh a, kawngka bul ngeiah a awm tih hria ang che u,” Marka 13 : 28, 29.

LAWNG LAMA INBEIHNA

Lawng lama inbeihna kan sawi hmain Israel leh Aigupta ralkah lawng neih dan lo khaikhin phawt ila; Arab ram dang neih kan chhiar tel lo vang.

1. Lawng uisathiam (destroyer) : Israel 3 a nei a, pakhat a chhia, Aigupta – 7

2. Tuihnuai lawng (submarine) : Israel 2, Aigupta 12

3. Bomb mitnei keng chi (missiles carrier) : Aigupta 18, Israel nil

4. Tuihnuai lawng râl (Anti-submarine craft) Israel 1, Aigupta 12.

4. Motor Board (lawng tê chak chi) : Israel 8, Aigupta 32

Total : Israel 14, Aigupta 82

Lawnga inbeihna : Indo ṭan June ni 5 zan aṭangin lawng lama inbeihna pawh ṭan nghal a ni a. A han che chhuak hmasa ngam zawk chu Israel Navy an ni a, destroyer pakhat hruaiin motor boat rual nen Aigupta lawng lian pahnih Port Said leh Alexandria run turin an thawk chhuak ta a. Port Said an va thlen chuan Aigupta lawng OSSA pahnih bomb mitneia thuam ther fur maite chu Israel lawng bei turin, tui fawn laka kawngpui hungna kawtchhuah pawn lamah an lo chhuak a, an han inbei ta mai ale, Israel lawng te chuan tim miah lovin an laipui 20 mm chiin an han kap ta siah siah mai a; Aigupta lawngte chu chhe rem rum chungin an tlanchhe ta a, an bomb mitnei (misiles) kente a ṭhat tehlul nen kah khat te pawh an kap ve hauh lo. Israel lawngte chuan an um zui a, lawng chawlhnaa va luhkhung turin an tui hnuai sipai (Frogmen)- te chu tui hnuaiah lutin Port Said chu an run zui ta a. He lawng chawlhnaah hian Aigupta indo lawng 8 lai awma an rin avanga luhkhung an ni a, mahse an va hmu ta lo. Port Said an run chhan ber hi, Aigupta bomb mitnei keng lawng rual (18 missiles carriers) bomb hlauhawm, lianpui pui, pounds 1000-a rit chi, mel 35 laia hla tuipui aṭanga kap thei ṭhiau an neih avangin Israel lawng sipaite hian an tuipui kam khawpui te hetiang laka venghim turin lawng lamah chet vat ṭulin an hriat vang a ni. Port Said-ah hian lawng tihchhiat tam lamah chuan an hlawhtling lem lo. Frogmen te chuan indo lawng te hal puah tumin thim tham hnuaia an va zawng chiam a, tel phur lawng lian pahnih mai lo chu an va hmu lo, an inthukru ril hle a ni ta ve ang.

Israel tui hnuai sipai an man : Hetih hun lai vek hian Israel tui hnuai lawng neih chhun zinga pakhat chu a ruk têin Alexandria lawng chawlhna luhna kawngka lam panin a kal a, tui hnuai lawng aṭangin tui hnuai sipai (frogmen)-te bomb ṭha tak tak kengin Aigupta lawng hal puak turin lawng chawlhnaah an va luhtir a, chu mi zan chu thla mang lai a ni a, duhthusama thim a ni; tui hnuai sipaite chu an hna chu hlawhtling takin an va thawk thei a, indo lawngte an va hal chhia a, chung lawng te chu tui hnuai lawng pahnih leh bomb mit nei phur chi (missiles carrier craft) pahnih niin an hria. Heng frogmen te hi khawvar dawn thlengin lawng chawlhna hmun kawtchhuahah an lo nghak a, mahse an lo kir ta lo, an haw san ta rih a; tui hnuai sipaite chuan an hnathawh nan hun tam zawk an duh emaw, buai thlak takin an va awm ta emaw a ni mai thei a, tiin lawng chu a zan lehah a va kal leh a, mahse ri va engmah a awm lo ve. Thawhlehni June ni ruk Cairo chanchinbu Al Ahram-in, “Vawiin chhun lai velah khan Israel tui hnuai sipai 4 tuipui kam lawng chawlhnaah kan hmu a, kan man ta a, chumi hnu darkar li velah a dang pahnih pawh kan man leh a, motor lawng chak man tuma bei an ni mai thei a,” tiin a chhuah a.

Aigupta lawng chetna ve thung : Kum 1967, June ni 6 zanah chuan Aigupta tuihnuai lawng an lo thawk chhuak ve a, pakhat chu Haifa lawng chawlhna hmar lamah a ni a,, a dang pakhat chu chhim lamah a ni a, a dang leh pakhat chu Ashdod kiangah a ni. Heng tui hnuai lawngte hian Israel vaukam khua run an tum emaw, a nih loh leh Israel ho Port Said leh Alexandria lawng chawlhnaa an va chet ang a chet ve an tum mi ngei tur a ni, hriat chian chiah phei zawng a ni lo ve. Heng lawng lo kal te hi Israel thil chhuina khawlte chuan a lo hre vat mai si a, an lo chang ran a, thawklehkhatah tui hnuai lawng den pilna bomb – Depth Charge-in an han den tak thut mai a, pakhat chu chiang takin a chhe ngei mai a, a hriak paite pawh tui chungah a tle nuar nuar mai a, a dangte chanchin chu hriat a ni ta lo. Israel lawng hotu, General Erel-a sawi dan chuan, thiam lo a ti a ni ta ve ang, “Aigupta tui hnuai lawng pute chuan Haifa khawdaia picnic tur ang hrimin an khaw thlirna (periscope) an hmang lu deuh a ni,” a ti. Tuipui lam indona pawh thawklehkhatah zual thut mai thei a ni reng a, Aigupta lam lawng neih ṭhat leh ngahzia lah tlang hriat a ni a; Israel leh Aigupta neih chauh han khaikhin mai pawhin 1 leh 6 ang vel lai a ni si a, Arab ṭangho lawng zawng zawng nen phei chuan nep lo tur a ni. Chuvangin Israel chuan Mediterranian tuipuia Aigupta lawngrual tam tak chu ṭhen darhtir hi indo hma aṭang rengin a lo tum tawh a, an vaukam kaina lawng (landing craft) 4 chu khawmual kawng puiah, Nagave thlalerah chhim lam lawng chawlhna Eilath panin an phur thla thluah thluah mai a; zan a lo ni a, an phur let leh a, chhunah an phur thla leh a, chutiang reng reng chuan hun engemawti chhung an hmang a ni. Hei hian Aigupta a tihlauthawng hle a, 1956 ang bawk khan Sharm el Sheikh an bei leh dawn ngei mai tiin a indo lawng hmun thuma ṭhena hmun khat lai chu Red Sea tuipui lamah an rawn sawn thlak phah reng a; indo a lo nih takah khan Suez Canal chu an lawng hlui thlun khawm tichhiain an hnawh ta tlat mai si a, Aigupta indo lawngte chuan Israel lawng chawlh hmunpui rawn run hek suh, chawlhna hmun an nei bawk si lo va, Yemen lawng chawlhna Red Sea chhim tawpa Hadaida-ah an chawl ta reng mai a ni. Israel lahin Eilath lawng chawlhna chu veng turin lawng chak chi – motor boat an nei a, hengte hi Eilath ven nan mai a ni a, Sharm el Sheikh te chu an thleng pha hram chauh a ni a, zuk rûn teh reng pawh ni sela, haw lehna khawp chakkhai an nei lo. Him takin Eilath lawng chawlhna chu an lo veng ringawt mai a ni. Landing craft an phurh vel te kha zawng hmelma bum nan mai lek a nih kha.

Amerika lawng an râl palh : June ni 8 chawhnu her lam a ni a, Amerika lawng pakhat Elint (Electronic Intelligence) chinchang hre thei lawng USS Liberty an tih chu Middle East aṭanga an mi leh sate thiar chhuah chungchanga Middle East rama Amerika awmna hmun hrang hranga thu hlang chhawng tura an tih chu El Arish aṭanga tuipui chung mel 14 vela hlaah awmhmun khuar turin Spain lawng chawlh hmun aṭangin a lo thleng thla a. Van boruak chu a thiang kuk mai a, chutih lai chuan Israel thlawhna pahnih chu an lo lang ta ṭhawt mai a, America lawng chu ft 6000 vel aṭanga birin thlawhna laipuiin hnai zet zetah an zu kap ta rem rem mai a; rei lo teah an han ching chau ta kau mai a; rei lote hnuah Israel motor boat pathum an lo lang leh ta nghal a, chungte chuan machine gun lianin an han tlir khum leh ta a, torpedo pahnihin an kap bawk a, lawng chu a alh ta hluah hluah mai a. Hetia an kah lai hian tualdawih lawng an ral palh a ni tih an hre ta a, an chawlh san ta a. Amerika lawng a lo ni a, sipai 164 zingah officer leh a dang 34 an thi a, 75 an hliam bawk a ni. Heng sipaite hi an pasalṭhain an rinawm hle mai, darkar chanve chhung lekin lawnga mei alh zawng zawng chu an timit thei vek a, ṭanpui pawh an duh lem lo. He lawng hian Israel silai mu hmun 821-ah a lo tuar hman a ni.

Eng vanga râl palh nge? : Engtizia nge hetia an inralh palh mai theih ? tih hi ngaihtuah tham tak a ni ta. A lehlam lehlamah thu a tam mai; ‘khual thu thang leh ar pan chuk a pûn’ tih zawng zawnghi a thleng a ni, âwm lo pui pui chhuanlam pawh a tam mai. Israel indo lawngho chuan an chhuanlam ber chu, “Kan hmuh tirh phat chuan Aigupta lawng niin kan hria a, Soviet lawng niin kan hre leh a, chumi hnu chuan Aigupta lawng ni ngeiin kan hre leh a, eng-le-khaw-le, indo lawng ni si, hnai hle tawh si, hnam puanzar khai si lo, lawng chhia ang mai, mihring han lang eih pawh awm si lo chu ral hmuha hmuh loh theih em ni ang, hemi hma ni thumah hian Israel sorkar chuan Amerika hnenah he lai velah eng ang lawng nge hapta khat chhung hian lo awm mai tur an awm em? tiin a zawt tawh a, engmah chhanna a awm bawk si lo va,” tiin Israel lawng hotute chu an ṭang a ni.

Inrâl palh liau liau a ni e : He inralpalh chungchangah hian Amerika-in zawt fiahtu, Enquiry Court a siam a, an han enfiah nghe nghe a, lawngah hian chhinchhiahna ft 8 x 5-a lian phei zawng a lo awm a, an lo thiam chiah lo a ni ta ve ang; a reng reng thuin America hian mi chinchang hre tura enthlak hi an huangtauna lam tak pakhat a ni reng ṭhin a, Israel hian hei vang hian an haider deuh em ni ang aw! ti pawh an awm rêng a ni. An thu chu ṭha takin an titawp a, “Inralpalh liau liau a ni e,” an ti tlang thei ta a ni. Israel pawhin an thil tihpalh avangin râlna (compensation) chu lungawi takin Dollars 3,500,000 (Rs 26,000,000/- hu vel) May 1969-ah khan a pe ta nghe nghe a ni.

Ni ruk indo chhung zawngin Israel lawng hlui tawh tak tak te chuan hmelma lawng chi thar ṭha pui pui Russia siam te ven lai Port Said leh Alexandria lawng chawlhna te hlawhtling takin an va run thei a, chutiang lawng ṭha zawk leh tam zawk tak lakah Israel tuipui kam khua te an venhim theih avang hian an fakawm em em a ni.

Hemi ni bak hi chu lawng lama inbeihna nasa a awm ta lo.

Leave a Reply

Your email address will not be published. Required fields are marked *

error: Content is protected !!