Inlarna te hi kan la mamawh cheu em – Mizo Sermon

Ṭpa Ngente.

Hebrai 1:1-2 ah chuan, “Pathian, hmasanga thlahtute hnena bung tam tak leh kawng tinrenga Zawlneitea thu lo sawitu khan, heng ni tawpah hian keimahni hnenah a Fapaah chuan thu a sawi ta” tih kan hmu a.

Hebrai ziaktu thusawi hi ngun taka kan ngaihtuah chuan, “Heng ni tawp, Lal Isua lo lan tawh hnuah hi chuan, hman laia Zawlneitea thu sawi ṭhintu khan ‘Fapaah’ thu a sawi ta a, hei hi kan tan hian a tawk zo em em a ni,” tih a kawk thei a. Tin, Pathian chuan Fapaa thu a sawi hi tawk a ti viau tawh ti pawhin a ngaih theih bawk.

Lal Isua khan heti hian a lo sawi bawk a. “Tuman an tihder loh nan che u fimkhur rawh u.” (Mathaia 24:4)
“Zawlnei der tam tak pawh an lo chhuak ang a, mi tam tak an tihder ang,” (Mathaia 24:11)

Tin, Tirhkohte pawhin himna an sawi chu inlarnate ni lovin, ‘Tupawh Lalpa hming lam apiang chu an him ang,’ an lo ti mai bawk a. “Tin, heti hi a ni ang a, Tupawh Lalpa hming lam apiang chu an him ang,’ a ti e, a tih kha. (Tirhkohte 2:21)

Tin, Paula chuan 2 Korinth 11:14 ah chuan, “Chu chu a mak lo ve; Setana meuh pawh êng tirhkohvah a insiam chawp si ṭhin a” a ti a. Kan hnena thu sawi ṭhin leh inlar ṭhin hi tunge a nih hre chiang lova, mihring ṭawng ni lova thlarau lam ṭawnga thu sawi apiang awih vek ringawt hi a him ber lo thei a ni.

Lal Isua chuan heti hian a sawi lawk bawk. “Krista derte leh zawlnei derte an lo chhuak dawn si a, chung chuan thei ang sela thlante meuh pawh an tihder theih nan chhinchhiahna leh thilmak ropui takte an ti ang. Ngai teh u, ka hrilh lawk tawh che u hi” tiin. (Mathaia 24:24-25)

Inlarna zawng zawng hi awih loh tur tihna a ni lo va, mahse thlarau ṭawnga thusawi apiang awih zel erawh a him lo va, him lo ni satliah mai lovin a hlauhawm tel tih hriat a ṭha hle mai. Kristiannaah hian bible aia tu inlarna emaw rin zawk hi thil hlauhawm tak a ni.

Johana 16:14 ah chuan, “Ani chuan kei mi chawimawi ang; ka taa mi a la ang a, in hnenah a hriattir dawn si che u a” a ti a. Thlarau thianghlim chuan Lal Isua a chawimawi ṭhin tur a ni a, Pathian thlarau aṭanga chhuak chuan Lal Isua nena inzawmna nei lo thu a sawi mai mai lovang tih hi hriat reng a pawimawh hle a ni.

Tin, Pathian chuan khawvel pum leh hnam tin hi hmangaihna angkhatin min hmangaih vek a, khawi lai ram bial zimte emaw, mi tlemte emaw bik tan Pathian thu bing, special taka pek bik awm anga inlarna hmu an awm a nih phei chuan, Bible nen en mila ngun taka ngaihtuah thiam a pawimawh hle a ni.

A tawp khar nan hei hi. Inlarna hi pakhatmah pekin awm tawh lo mah ila, Lalpan Bible leh Kohhran min pek hi kan tan hian a tawk em em a, heng aṭang hian Krista kan nei thei a, zawlnei dang puan sak reng kan ngai tawh chuang lo.

Leave a Reply

Your email address will not be published. Required fields are marked *

error: Content is protected !!