I PHUR CHU RIT HLE MAH SE

Rev. H.L. Thianghlima
Jan. 8. 218

“Nangni thawkrim leh phurrit phur zawng zawngte u, ka hnênah lo kal ula, Keiman ka chawlhtir ang che u,” (Mat. 11:28).

Ṭum khat chu mi pakhat pickup (truck) khalh hian hmeichhe pakhat bungbawr zeta a chhipa thil phur a hmu a. A khawngaih hle a, a pickup tidingin chu hmeichhia chu a motorah chuantirin a phur a. Hmeichhia chuan lawmthute a sawi chul a, an tlan zui leh ta a.

Nakin deuhah chuan motor khalhtu chuan side glass aṭangin a hmeichhe phurh chuan a thil phurh chu nghat lovin a lo phur zel tih a va hmu a.

Chutah driver chuan heti hian a va hrilh a, “Ka pi, i phur kha nghat la, hahdam takin chawl rawh, motor hian a phurhsak thei che alawm, i phurh hah a ngai lo a nia,” tiin.

Damchhung buaina, lungkham, phurrit hi tuman kan pumpelh thei lo. Phurrit laka hahchawlhna pakhat erawh a awm, Isuan, “Nangni, thawkrim leh phurrit phur zawng zawngte u,…lo kal ula, keiman ka chawlhtir ang che u,” a ti. ‘Lalpa’ tia au chung reng hian he hmeichhia ang hian kan phur hi mahnia la phurh zel kan tum fo.

Petera chuan, “Anin a ngaihsak ṭhin che u avangin in manganna zawng zawng ama chungah nghat vek rawh u,” (1Pet. 5:7) a ti.

Isuan khawngaihnain min sawm e. A hnena i tlûkluh phawt chuan, I phurrit hnuaiah chau mah la, Vân ṭhatnain a chhâwk ang che.

Phurrit a bo ta, Kalvariah, Isua a hnai reng e.

Leave a Reply

Your email address will not be published. Required fields are marked *

error: Content is protected !!