I LUM LEH LUM LA, I VAWH LEH VAWT LAW LAW RAWH

-Lalṭanpuia Ngente

Lum si lova, vawt si lova, i lum chang chang avangin ka kâ ata ka chhak chhuak dawn a che. (Thu Puan 3:16)

Pathian thu hi thu rum leh khal tak mai a ni a, a takin a fir a, a thikthu a chhe bawk a, ‘ka ngaihdan’ tih vel hi a leng lo. “Ni chu ni – ni lo chu ni lo” a ni tawp mai. Kan awih emaw awih lo emaw, Bible hi ngun taka kan chhiar ṭhin chuan Pathian thuchhuakte leh zawlneite thu te, Lal Isua leh Tirhkohte thute kha a khal ṭelh ṭawlh zia leh pawnlang ṭhat leh ṭhat inlawm tawnna thil mai mai an nih loh zia kan hmu ang.

Chuvangin Pathian thu hi mihring mitmei veng lova a nihna ang taka sawi ṭhin mi chuan lawm an hlawh ngai meuh lova, rawngbawlpuite ngei zing aṭang pawhin hmumawhtu an chhuak vat ṭhin. Hei hi a chhan chu, hmân aṭanga vawiin thleng hian setana hian Thutak pawh lova rawng bawl suau suau hi a huat loh em avang leh, Thutak hian eng lai pawha do a hlawh reng vang a ni.

Ringtu inti tam ber hian Thutak hi kan ngaina lo va, kan theih chinah kan chunga thuneitu awm lova zalen kan duh a, min thunun thei tur apiang ngaithei lovin thin thlak zel kan duh. Pathian thuin a thununna hnuaia awm kan peih lova, kan duh chinah Pathian thu her rem leh ṭhuai bun kan tum zel ṭhin. Pathian thu a nihna ang taka sawi ṭhinte ai chuan kan nun duh dan nena inmil taka sawi ṭhin te, ngaithlatute ril rem zâwng zawg thiam te, ṭawngkam thluaithluma pawn lam thil pet lawr thiamte hi kan lawm zawk a. Tin, kohhran huang chhungah pawh Pathian thu sawi ngai lo law law mi fel tak ni si te, thinlung tel lo va nui sâng theite leh khawvel thila mithiam leh neinungte hian lawm an hlawh zawk fo ṭhin bawk.

Kan ṭhatna leh felna te, kan thiamna leh finnate hi Krista’n a hmakhalh vek loh chuan ‘Nun tak’ a tling lo va, hemi chin hi chu ‘Chinghne beram vun sin’ ang chauh a ni. Thlarau hruai nun tak tak nei turin Pathian thu kan ngaina peih lo va, ngaina lo nih chu kan duh chuang lo va, kan nihna dik tak sawitute chu kan haw hlar ṭhin.

Mizote zingah hian ‘lum si lo, vawt si lo, lum chang chang, a kâ ata a chhak chhuah tur’ hi kan tam hle niin a lang. Pathian thu ka ngaihven inti tam tak pawh hi hremhmun lamah kan la Halelui Amen ṭial thla ruai ruai hlawm ngei dawn e. Rawngbawltute zingah pawh hetiang mi hi kan tam avangin kohhrana kan chet velna leh kan rawngbawlna pawhin rah ṭha a chhuah hleithei lo va, kan vei chuang lem lo bawk a. Sual phuara awm mekte chu sawi loh keimahni nun ngei pawh hi kan rawngbawlna hian min ṭhiat zo lo va, rawngbawltu rual pawh kan intai hlek hlek reng fo ṭhin. Chuvangin, kan khawtlang leh kan ram kan chhun êng zo lo va, kan ram chu ruihhlo leh corruption bu zawl a lo chang zo ta.

Lalpa thununna nâ tak emaw, a kâ ata min chhâk chhuah hun emaw, kan ram hi kan tu leh fate seilenna atana îtawm lo tawpkhawka kan chhuah mai loh nan keini hi bul ṭantuah ṭang ṭheuh turin inbuatsai ila, Pathian thlarauin a luah leh a hruai nun tak tak hi i thlahlel peih ang u, chuti a nih loh chuan kan ram hi kan tu leh fate chenna tlak lovah kan chhuah zo takngial dawn e.

Leave a Reply

Your email address will not be published. Required fields are marked *

error: Content is protected !!