I inpeih tawh em, tihdamna chang turin – Rev. VL Nithanga – Sermon

I INPEIH TAWH EM? (Tihdamna chang tûrin)

– Rev VL Nithanga

Tichuan, Isuan an rinzia chu a lo hmuhin zeng hnênah chuan, “Ka fa, i sualte ngaihdam a ni tawh e,” a ti a (Mk.2:5).

Pathian tihdamna chang tur hian keimahni lam kan inpeih ve a ngai a. Engmahin min dâl theih loh khawpa Lal Isua ringtu, beiseitu, pantu, hmuh tumtu kan nih a ngai a ni. Kapernaum khuaah Isua a awm a, in pakhatah thu a sawi mêk a. Zeng pakhat hian a lo hre ve a, Isua chu a beisei tlat a. A chhungte nge, a țhiante ni ang aw, mi paliin a awngphah chawpin an zâwn a. Dam lo hian Isua a mamawh em avângin, amahin a kal thei si lo va, amah zâwntu tûrin mi pali lai a sâwm a, an nin an zâwn ta a ni a. Isua awmna in an va thleng a, mipui an lo khat tlat a, an damlo zâwn chu luhpui theih zia zãng a ni lo. Beidawng taka damlo kha in lama hawpui leh maina chi a va ni em! Mahse, Isua a beiseina chu engmahin a dang zo lo va. Damlo chuan amah zâwntute hnênah chuan inchunga zâwn chho tur leh, inchung rek pawpa a mutna awngphah chawpa Isua hmaa thlâk thla tûrin a ngen a ni ang, a zâwntute pawhin an beisei pui hle a ni mahna, thil âwmlo tak pawh nise, damlo chu inchungah chuan an zâwn chho va, in neitun a phal leh phal loh pawh ngaihtuah lovin inchung chu an rek pawp a, damlo chu Isua hmaah chuan an thlâk thla ta mai a. Isuan a lo hmu chu an thil tihdân a hmuh khân, an rinna nasat zia a hmu tlang nghâl ta vek a. Amah an beiseina chu engmahin a dâl zo lo a ni tih a lo hre thiam nghâl a. Chutiang taka amah mamawhtu chu Isua chuan a lo ngaihven lo thei lo a ni. Nangpawh, i natnate tidam tûrin engmahin a dâl theih loh khawpin Isua chu ring la, beisei la, pan la, hmuh tum tlat la, chutiang taka amah beiseitu i nih phawt chuan Isuan a lo ngaihven lo thei lo ang che.

Isua chuan a lo hmuhin Zeng hnênah chuan, “Ka fa, i sualte ngaihdam a ni tawh e,” a ti a. Lal Isua hian damlo zeng tihdam nân hian a sualte ngaihdam a nih tawh thu a puansak tlat nia. Chu chu Pharisaiten an hre thiam lo va. Sual ngaidam theitu chu Pathian chauh niin an hre si a, an rilruin Isua chu Pathian sawichhiaah an puh a. Mahse, Isuan a lo hriatin an hnênah, “I sualte ngaihdam a ni tawh tih leh, Tho la, i awngphah la la, kein kal tawh rawh,’ tih hi a engnge sawi awl zawk?” a ti a. Sual ngaihdam theihna a neih zia hriattir nân, “Tho la, i awngphah la la, i inah kal rawh, ka ti a che,” a ti a. Damlo chu a thova, a awngphah a la a, an zaa hmuhah chuan a kal chhuak ta mai a ni. Isuan damlo zeng a tihdamnaah hian, a taksa tihdamna tur leh a sual ngaihdamna chu a inzawm tlat a ni. Nang pawh, i natna tihdam a nih theih nân i sualte ngaihdam a nih tawh zia hi chiang hmasa phawt teh. I sualte ngaihdamna chu i lo chang fiah ta hle a nih chuan i taksa pawh chu tihdam a ni nghal tih i pawm zui dawn nia. Kei pawh, ka sualte Lalpan kraws-ah min chinral sak tawh a, ngaihdam ka ni tawh tih ka inhre chiang a, chu chuan ka taksa thlengin min tidam tih ka pawm a, dam takin a rawngbâwl tûrin ka che chhuak zêl mai a ni. Chutiang chu i ni ve thei tawh em? Damna chang tûrin i inpeih ve tawh em le?

Damlo Zeng hnênah chuan Isua chuan, “Tho la, i awngphah la la, i inah kal rawh,” a ti a. Damlo chuan a sualte ngaihdam a nih tawh avângin a taksa Zeng pawh a dam tawh tih a pawm ngam a. Ngaidamtu leh tidamtu Isua rinnain a tho va, a awngphah a la a, an zavaia mit hmuhah chuan a kal chhuak ta mai a. Nangpawh, i sualte ngaihdam nân Isuan kraws-ah a lo tuar zo tawh tih hria la, a vuakna vualtea tihdam i ni tawh tih chu ring la, i damlohna lam en lovin, tidamtu Isua lam enin, amah ring chungin pen chhuak ve nghal mai rawh le. Tichuan, tihdamna chu i lo chang zui zêl dâwn nia. Nangmah tidam tûrin tidamtu Isua chu a inpeih sa reng tawh a, nangmah zâwk kha damna chang tûrin i lo inpeih ve tawh em le?

Leave a Reply

Your email address will not be published. Required fields are marked *