I inpeih tawh em, thi turin – Rev. VL Nithanga – Sermon

I INPEIH TAWH EM? (Thi turin)

– Rev VL Nithanga

Kutdawh chu a thi a, vantirhkohten an kalpui a, Abrahama ângchhûngah an dah a. Mi hausa pawh chu a thi a, phûmin a awm ta a. Tin, mitthi khuaah chuan na tak tuar reng rengin a awm a (Lk 16:22,23).

Isua lokal thlenga lo la dam tih loh chu, mitin mai hi la thi tur vek kan ni a. Kan dam rei dawn nge dawn lo lah tun kan hre hek lo. Chuvângin, thi tura lo inpeih sa a țha ber a ni. Thi tura inpeih sa chungchangah hian mi pahnih chanchin sawi ka duh a. An hming ka sawi lo ang a, an mahniin he thuziak hi an lo chhiar a nih pawhin an hriat thiam ka ngen nghâl a, ngaimawhawm a nih loh ka beisei e.

Mi pakhat, zû ti ve nasa tak, zûin a eichhiat ve viau tawh nen kan inkãwm a. A pianthar ngun tawh zia leh a țhat hlen thei si loh ziate min hrilh a. A beidawng ve viau mai a. “Ka nun hi ka ning em em tawh a, thih mai hi ka duh rum rum țhin a ni,” a ti a. Kei chuan, “A nih leh, intihlum kher lo mah la, zû hi i nghei thei si lo a nih chuan, a thih pawh i thi har tawh kher lo mai thei a, thi tur hian i inpeih tak tak tawh em?” ka ti a. Inpeih teh nang, thi pawh ni ila hremhmun chu ka kalna tur tih ka inhre reng mai, camping-ah ka luh leh ka țha hlen thei chuang si lo, hetianga dam reng ai chuan thiha, a nih nih nih mai te ka duh rum rum țhin,” a ti a. Chhandam a nih tawhna thlarau thianghlim zarah inhre chiang ve tawh se chuan, sual a sim ve thei ang a, thih inpeih sa reng chungin dam nuam a la ti ve hle mai tur hi a ni a. Chhandamna la chang lote hian khawvêl hi ningin thih hi châk rum rum țhin mahse, thi turin an la inpeih hauh bawk si lo. Keini erawh chu kan vannei hle. Kan țhat bik vâng ni chuang hauh si lo hian, khawngaihnaa chhandamna kan chan tawh avângin khawvêl ning ngawih ngawih khawpin sualin min eichhe ve lo va, nuam ti takin kan nung a, rei tak dama, a tam thei ang bera Lalpa rawng la bãwl zêl kan duh a, chutih rualin thi turin kan inpeihsa reng bawk si a, a va hahdam thlâk em!

Mi pakhat dang ka kawm leh chu, engmah ruihtheih thil ti ve lem lo, mi fel tak a ni a. Kohhranah pawh eng engemaw chanvo chelh ve thluah țhin, mi hmantlâk tak mai a ni a. Mahse, a nun ngaihțhat loh rûkna min hrilh tlat mai. “Piantharna tak tak hi ka la nei lo niin ka inhre țhin. Heti hian kohhranah chuan chanvote neiin, rawng chu ka bãwl ve tak naa, in tuipui ang hian Pathian thu hi ka tuipui ve tak tak si lo va, ka țawngțai tui ve tak tak ngai bawk si lo, mi an hlim ang hian ka la hlim ve ngai si lo va, kohhrana ka tih tur hi ti ve zêl mahila, ka nun chhûngrilah hian ngaih țhat chiah lohna hi ka nei ru tlat țhin,” a ti a. Kei chuan, “Tunah hian lo thi mai dawn ta la, i inpeih tawh em?” ka ti a. A ni chuan, “Chu tak chu a lawm, thi tura ka inchan hian ka la inpeih tlat lo, thih hi chu ka hlau khawp mai, a chang chuan ka rawngbãwlna te pawh hi hlâwkna awmin ka hre lo va, bânsan mai te ka duh a, ka ngam em si lo va” a ti a. Ka ngaihtuahna a tikal thui hle mai, hetianga chhandamnaa la chiang chiah si lo, rawngbâwlna chanvo chelh fe fur si, thi tura la inpeih tlat si lo, Salvation camping-a lut duh tawh si lo, hruaitu camp/rawngbawltu camp-a lut ve țhin, thlarauva piang hman tak tak si lo hi kan ram kohhran chhûngah hian a awm țeuh theih awm mang e ka tih phah ta a. Keini erawh chu kan vannei teh e, Thlarau thianghlimin min khawih a, kan thawh chhuah ni hauh lo, khawngaihna avânga chhandamna kan hmuh chian phah a, thi tura inpeih sa reng chungin Kohhranah Pathian rawngbâwl kan kham thei lo chu a ni si a.

Lazara chu a thi a, a thlarau chu Abrahama ângchhûngah Vantirhkohten an hruai a. Vanramah an hruai nghâl a ni. Mi hausa chu a thi a, an phum a. A thlarau chu mitthi khuaah na tak tuarin a awm a. Hremhmunah a kal nghal tihna a ni bawk (Lk.16:22,23). Nang pawh i thih ni hi a lo la thleng dawn, i thlarau chu Vanramah emaw Hremhmunah emaw an hruai nghâl dâwn. Hei hi lo inzâwt rawh, ‘I inpeih tawh em? thi turin’ tih hi.

Leave a Reply

Your email address will not be published. Required fields are marked *

error: Content is protected !!