I inpeih tawh em, Pathian rawng bawl turin – Rev. VL Nithanga – Sermon

I INPEIH TAWH EM? Pathian rawng bâwl tûrin

– Rev VL Nithanga

Sipaia awm tûra thlangtu chu a tihlâwm theih nân sipai tumah, indo laiin tun damchhûng khawsaknate hian a intihnawk ngai lo va (2Tim. 2:4).

Pathian ngaihdamna chang tura kan inpeih tawh a nih chuan Pathian chuan a fapa Isua Krista-in kan nihna sual leh kan tihsual tawh zawng zawng nen min ngai dam a. Min ngaidam mai ni lovin a fa atân min pawm leh a, a hnên ata kan rochan tûr a lo la dah țhat zawng zawng chu min chantîr leh phal a, chu mai chu a la ni lo fo va, a ro luahtu atân a hnêna awm reng tûrin a fadûat kan lo ni leh ta a ni (Lk.15:24).

Chutianga Pa roluahtu, inpui nghâktu ngei kan lo nih takah chuan Pathian rawng chu lawm tak leh tui taka bâwl mai tur kan lo ni ta a. Pa thuâwih chung zêla, atâna hna țha kan thawh a ngai a ni. Pa Pathian tân chauhva thawk kan ni lo va, keimahni tâna thawk pawh kan ni nghâl a. Pathian tâna kan thawh tam zawh poh leh keini tân malsâwmna a ni a, beng muka, sãwi muka, liam zawih zawihin min teh sak a (Lk.6:38), malsâwmna chhhiar sen loh khawp kan tân a lo luang liam țhin a ni (Sam.23:5).

Pathian hnêna chêng, a rawngbâwltu kan lo nih ve tâkah hian rawngbâwltu naran mai ni lovin, rawngbâwltu nung leh hlawhtling tak nih kan tum tur a ni a. Rawngbâwltu nung leh hlawhtling tak nih chu kan duh țheuhvin a rinawm e. Rawngbâwltu nung leh hlawhtling tak ni tur chuan tun damchhûng khawsak ngaihtuahna te hian kan intihhnawk loh a țul a ni (2Tim.2:4). Rawngbâwltu ni reng chung si a kan thinlungah Pathian Lalram aia khawvêl thilin hmun a chang lian zâwk a nih chuan, rawngbâwltu nung leh hlawhtling tak a nih theih loh va. Sum leh paia mi rinawm lo, mi hriat atâna kan duh loh thlenga sum um țhin kan nih reng chhûng chuan rawngbâwltu nung leh hlawhtling kan ni thei tak tak lo. Rawngbâwltu nireng chung sia remchang hmuh apianga zû in ru leh mai țhin kan nih chhûng chuan kan la fiah lo ruai tihna a ni a, rawngbâwltu nung leh hlawhtling kan la ni phâk hek lo. Nulât tlangvâlna lama mi za ru tlat, remchang hmuha sex hman sual mai pawi ti chuang lo kan la nih chhûng chuan rawngbâwltu nung leh hlawhtling a la nih tak tak theih loh bawk. Khawvêl thilte nêna inchawhpawlh nuk chunga rawngbâwltute hi kan la tam viau mai a, chutiang mite nunah chuan Pathian ram a la langfiah tak tak thei lo a ni. Hetiang khawvêl thil min zem buai tlat țhintute hi kan inhlih thlak fai vek a ngai a ni (Heb.12:1).

Khai le, unaute u, Pathian rawngbâwltu nung leh hlawhtling ni tur hian Lalpan hman che a duh a. Nangmah kha i lo inpeih ve tawh em? Pathian rawngbâwltu ni tur hian i inpeih ve tawh em le? Khing ang kan sawi khawvêl thilte khian a la zem buai tlat che a nih chuan, Pathian rawngbâwl tur hian i la inpeih ve lo tihna a ni. Khitiang thil sual tih duhna te khian a la zem buai tlat che a nih chuan, eng engah emaw hian chanvo neiin hruaitu han ni ve țhin mahla, inkhawmpuiahte pawh kalin a phur ber ber han ni țhin mahla, Pathian thu țha pui pui ngaithla ve fo mahla, i nunin saltanna chin a nei tlat ang a, engmah tak tak i ni thei chuang lo vang. Chuvângin a chunga kan sawi nangmah zem buai tlattu che khi inhlip thla fai vek tawh la, Pathian rawngbawl tur hian lo inpeih ve tak tak tawh rawh le. Pathian rawngbâwl tak tak tur chuan zûk leh hmuam thleng pawhin thil hnawksak mai mai a ni, nangmahah hnawk lo mahse, zûk leh hmuam i tih kha midang tân a hnawk tlat a nia. Inhlîp thla fai vek la, Pathian rawngbâwl tûrin i puanven sawi chhing la, lo inpeih ve tawh rawh le.

Leave a Reply

Your email address will not be published. Required fields are marked *

error: Content is protected !!