I inpeih tawh em? – Pa ro luahtu ni leh turin – Rev. VL Nithanga

Nimahsela, a pa chuan a bâwihte hnênah, “Puan țha ber kha han la ula, han sintîr rawh u, a kutah zungbun te, a kephahah pheikhawkte buntîr rawh u; sebâwngno thau tak kha han la ula, talh rawh u, hlim takin i ei ang u, he ka fapa hi a thi a, a lo nung leh ta a nih hi; a bo va, kan hmu leh ta a nih hi” a ti a (Lk.15:22-24).
Fapa tlanbo tehkhin thu hi Lal Isua sawi a ni a. Hetah hian Pathian zia leh a hmangaihna a tarlang chiang hle mai. Pathian chuan amah sual bosan tawhte pawh min ngaidam thei mai chauh pawh ni lovin, a ro țha țha chang leha, a fapa roluahtu atan min lo pawm leh duh a ni tih a tilang chiang hle mai.

Fapa naupang zâwk chuan a pa hnên ata a rochan zawng zawng a la chhuak vek a, khawlam hla takah a tlãn bo ta a. A pa enkawlna hnuai ata a tlãn bo va, a pa ro, a chanpual tûr erawh chu a tlan chhuahpui thung a. Pa enkawl phâk tawh lo va, ama thu thua nuam lutuka a va khawsa vel ta chu, a inchên chhe tulh tulh a. A inchên ral ta vek a, ei tûr a tlachham a, inhlawhfa chung pawhin a inchâwm zo tawh lo va, rilțama thih mai a hmabâk ta a ni (Lk 15:17). A dam khaw chhuah leh theihna tûr leh a dinhmun siamțhat lehna tûr chuan a pa hnêna kir leh chauh chu a tih tûr awm chhun a ni tih a hre chhuak ta a. Tichuan, a pa hnêna ngâihdam dil tûr leh, a hnêna inhlawhfate zînga teltîr ve tûrin a pa hnênah a kir leh ta a ni. A pa chu a fapa ngãidam tûrin a lo inpeih sa reng a. A pafa zâwk kha a pa ngâihdamna chang tûr leh a pa ro luah leh tûrin a lo inpeih har em a, a lo rethei rei vêl mai mai chu a nih kha.

Keini pawh hi Pathian hnên ata, kan ro chanai la chhuakin kan lo tlanbo ve thei khawp mai. Evangelist țha tak tak te, Upa țha tak leh rawngbawltu țangkai tak takte, Lalpa thlarau khawih harhna changa hlim taka Lalpa lo fak tawh țhinte leh, a rawng lo bâwl tawh țhin te pawh, tunah chuan Pathian pâwl phâk lohva hmun hla tak taka awmin, zû leh ruihtheih thil dangin a tihbuai em em, hmeichhiat mipat bawhchhiatnaa saltãng ta tlat te, hleprûk ngawl vei avânga dâwt sawi lo thei tawh lote, Pathian duh loh zâwng suala saltãng, eng laimaha chhungkaw hlim nei ngai tawh lote, fate leh tute thlenga sualin a eichhiat zui, sual vanga damlohna râpthlâk leh thihna thlenga tuar, lungngaihna chhumpuiin a chim pil tlatte kan va tam ta em!

Fapa tlanbo ang hian inngaihtuah chhuakin, heta kan awm reng chuan thutak tlachhamin kan thi dawn tih hria ila, Pa Pathian hnêna kir leh chiah hi kan dam khawchhuahna tûr leh, kan dinhmun tleu tawh siam rem lehna tur awm chhun a ni tih hriain, Pathian hnênah chuan i kir leh mawlh teh ang u. Kan kir leh har zawh poh leh kan dinhmun hi a chhe rei dawn a ni mai si a. Pain a fapa ngaidam tura a lo inpeih sa vek ang khan, kan tlanbona ata Pathian hnena kan kirleh chuan, Pathian chu min lo ngãidam turin a lo inpeih sa vek tawh a. Keini zâwk hi Pathian ngaihdamna changa, a ro luahtu kan nih leh theihna tûrin kan lo la inpeih lo mai mai țhin alawm. Pathian hnênah kir leh ila, a nin min lo ngaidam ang a, kan tlâkchhamnaahte min lo thuam mawiin, a fapa Krista thisena a hrin, a fa duh lai, a roluahtu kan nihna tûr dinhmun chu min lo chantîr leh ang a, Inpui nghâktu atân min lo siam leh ngei anga, thlarau lam leh taksaa kan mamawh apiang Pa Pathian chuan min pe zel dawn a ni. Tlâkchham reng kan nei lo vang. Nang, Pa ngaihdamna changa, a ro luahtu ni leh tur hian i inpeih ve tawh em?

Leave a Reply

Your email address will not be published. Required fields are marked *

error: Content is protected !!