I fei ken kha Ai khaw lam hawiin lek rawh – Upa K. Zalawm – Mizo sermon

Tin, Lalpan Josua hnênah, “I fei ken kha Ai khaw lam hawiin lek rawh; i kutah ka pe dâwn a nia,” a ti a. Tichuan, Josua chuan a fei ken chu khawpui lam hawiin a han lek ta a. Tin, châng rutute kha an awmna ata chu an lo chhuak thuai a; a kut a han phar veleh an tlân a, khawpuiah chuan an lût a, an la ta a; tin, khua chu an hâl ta thuai a. Josua 8:18‭-‬19.

Josua hovin Jeriko khawpui an lâk khân, khawpui leh a chhunga thil awm zawng zawng kha Lalpa tâna hluihlâwn vek tur a ni.
Akana khân hluihlamâwn thilte îtin a lo la ru a, Ai khua la tura an thawh leh chuan, khaw te reuh tĕ ni mahse an hneh theih loh phah ta a.
An man chhuah hnuin Akana te chhung kua chuan an thih phah ta a ni.

Chu tah Ai khaw bei turin an thawk leh ta a. Khawpui daiah chuan châng rutute a dah a;
Josua leh sipai dang chu Ai khaw ep lamah an awm a. Josua chu zîng takah Aikhaw bul ruamah chuan a kal a. Ai khaw lalpa chuan a hmuhin Israelho bei tur chuan an chhuak a, Josua hote chu an tlan chhe der a, thui tak khawpuia mi zawng zawng chuan an ûm a, thui tak thlĕm chhuahin an awm ta a. Khawpui kawngkâ pawh khâr nachâng an hre lo.

I fei ken kha Ai khaw lam hawiin lek rawh:
Ai khaw mi zawng zawng Josua leh a sipaite ûma an tlan chhuah vek hnu chuan, Lalpan Josua hnenah, “I fei ken kha Ai khaw lam hawiin lek rawh, i kutah ka pe dawn a nia,” a ti a. Chu ve leh Ai khaw lam hawia a fei an lek chuan, châng rutute chu lo chhuakin Ai khawpuiah chuan an lut a, an la ta a; khua chu an hâl ta thuai a.

Ai-hote chuan an khaw kâng khu chu an hmu a, an hma lama Israel-hote khan an rawn bei lĕt thung a, ruang chaicheh karah an awm ta a. Tichuan, Israel-te chuan pakhat mah zuah lovin an that ta vek a ni.

Josuan a fei lekna kut chu.. a la thla si lo:
Ai khaw mi an thah zawh hma chuan Josuan a fei chu a lek reng a. An hotupa berin a fei a lek kan vû reng avangin sipaihote chuan râl do hnà chu an chawlh san ngam lo a, hmĕlmate chu an that ta vek rĕng a ni.

Kan zir chhuah tur:
1. Hluihlâwn thil ît loh tur:
Hluihlâwn tih hi ‘devoted’ tih a ni a. Serh hran, emaw, thilserh tihna a ni. Mizo ṭawnga hluihlâwn chu hman loha dah mai mai lam a kawk a, Bibe-in ‘hluihlâwn’ a tih hi hriat fuh loh awl tak a ni. Jeriko khawpui leh a chhûnga thil awm zawng zawng kha Lalpa tâna ‘hluihlâwn vek tura tih a ni a. Akana khan râllâk zinga mi Babulon ram puan ṭha tak tak leh tangkarua (silver) leh rangkachak a hmu a, a awt ĕm a, a la ta a, a puan in chhûngah a thukru ta a. Chuvangin Ai khaw te reuh tĕ kha an lâk theih loh phah mai ni lovin, sipaite an chân phah ta zâwk a. Man chhuah a nih hnuah Akana leh a chhûngte khân an boral phah ta a ni.

Mahni ta bâk awhna hian thil sual tih duhnaah min hruai fo ṭhin. Khawvel thil mawi leh hausaknate lakah hian ringtute chu kan inthiar fihlim a ngaih hun a awm ṭhin. Chuti lo chuan, ‘thihna thanga awhna a ni’ tih hriat reng a ṭha.

I fei ken kha khawi lamah nge i lek ve dawn?
Josua chuan an ral do lamah a fei ken a lek a, a hoten chu chu an hmu a, huai takin râl an beih ngam phah a ni.

Setana râl lamah aiin Kohhran pawl dang lamah te, kan rawngbawlpui te, kan beramte lamah te ‘kan fei’ hi kan lo lek vû ṭhin em? Lalpa mite thinlung tina zâwng leh an mahni ti ṭhuanawp zâwngin kan fei (kan hmui leh awkâ) te hi kan lo lek ṭhin lo maw?
Sual râl do aiin mi dang ‘Beram’ rûk sak tumin kan hmanhlel zawk em?
Chuti a nih chuan kan miten hmĕlma an bei thei hauh lo vang le.

Israelte hruaitu Josuan hmelma bei tura a fei ken hmĕlma lama a lek reng a, sipaiten a thu an zâwm ang khan, kan ringtupui leh mahni rawngbawlpuite lamah ni lovin, Setana leh a hnathawh doa tichimit vek turin kan fei ken hi lek ve ila, hnung zuitu kan nei ngei ngei ang a,sual râl leh hmĕlmate chu hnehin an awm dâwn a lo ni.

Sual sipai râl nen ni tin kan i do ṭhin,
Thih theihna tûr hmanga min beih chuan,
Ka chau tawh hle a;
Lal Isuan a râlthuam min neihtir hnu chuan,
Ngamnain ka ûm leh ta a ni.

Leave a Reply

Your email address will not be published. Required fields are marked *

error: Content is protected !!