Hun a kal zel thlang zamual a liam – Damhauhva (1909 – 1972)

HUN A KAL ZEL THLANG ZAMUAL A LIAM
Phuahtu – Damhauhva

1.Hun a kal zel thlang zamual a liam.
Hril zel ila zaia awiin;
Phunchawng pui leh pang lo par e,
Lentu thing rihnim thlafamna.

2.Tur ni eng leh chappui lo char e,
Ṭuahpui, vau, romei tlang mawi nen;
Berhva leng suihlung an lawmna,
An sawi thang tur ni chul thei lo.


3.Chhermei kan chawi leh e leng rualin,
Chi tin piallei a zal zo ta;
An sawi ṭothangpui saw hmarah,
Chung khaw ri, chhum, thli, khuangruah nen.

4.Fur khawpui fang malsawmna a kim,
Sawmfang hi hnam tin lungmuantu;
Tur ni hliap e, thangvan zawlah,
Lawm lai lungrual ṭuan kham turin.

5.Ṭhal favang ni khawtlang eng riai e,
Hnam tin leng dawntuai lung lawm nan;
Rimawi rem thiam lelthangpui leh,
Ṭhadang ṭuan chawl e lailenna.


6.Sawmfang eng siau e, riang kan lawmna.
Rih tlangpuia mal tin kim chuan
Ka senmei khu lo thlir ang che.
Van ram chhum tlang lian iang ang che.

7.Van Lal rengpui ngur tin chhingtu kha,
Thangvan sang khua leh run nuam chu
Pelin lei hringmi a chan chu,
Hmangaihna leh remna a ni.

Leave a Reply

Your email address will not be published. Required fields are marked *

error: Content is protected !!